Tiac Sahngweng in Oruh Ma Wo

Tamuhlwel ac tahmtahel sacohk wiyuck, nga pruhe ke puhsisacl tuh Nguhn luhn Leum in wi kuht ke kuht ac sramsram mihsenge uh. Insiyuck sesseslah ke kaksyak nuh sin Leum, suc pa La Alu se inge, suc ma kuht puhlakihn kohkoh Lal ke kihsen pruhe, sramsram wolacna, ac ke on oaskuh ke toeni luhlahp se inge.

Ke mahlwem Eprel ah, Prestuhn Thomas S. Monson el tahfwelah sie pweng ma lihksreni moklweack insiyacn mwet fin facluh, suc ma moklweack pac insiyuck. El sramsram ke kuh luhn Puk luhn Mormon. El kwacfe kuht in lutlut, orekmakihn mwe luti inge. El olwelah lah fin kuht sang pacl lasr ke kais sie lwen in lutlutkihn ac nuhnkuh kac ac liyacacng masap ma oan lun Puk luhn Mormon, ac fah oasr luhlahlfongi fokoko se lasr ke pwacyeiyac uh, ac luhlahlfongi ma kuht eis ke Kraist moul ac fah kahsruh karihngihn kuht ke pacl upac. (Liye “The Power of the Book of Mormon,” Liahona, Mei 2017, 86–87.)

Oacna inkaiyowos, nga eis kahs luhn mwet pahluh oacna puhsrwen Leum nuh sihk. Ac, nga oacyacpac oacna inkaiyowos, nga sulwaclah in ahkos kahs inge. Na inge, eke nga tuhlihk srihsrihk ah, nga puhla loh luhn Puk luhn Mormon lah pa kahs luhn God, lah Pahpah ac Wen sikyang ac sramsram nuh sel Joseph Smith, ac lah Mwet Sap e pacl met ah tuhkuh nuh yohrohl Mwet Pahluh Joseph in fohlohkohnwack kuh luhn pristut nuh ke Alu luhn Leum.

Ke testimoni se ingacn, nga riti Puk luhn Mormon lwen nuh kwewa puhs liki yac 50. Ke srihpen nga riti tari nga tuh nuhnkuh muh kahs lal Prestuhn Thomson ah ma nuh sin mwet sahyac. Tuh, oacpacna inkaiyowos, nga puhla muh kahs in ahkkweye luhn mwet pahluh ac olwelah lal suli yuc in sifil insacnweacng liki met ah. Puhs suwos oruh tari ma suc nga oruh: pruhe ke inse pwacye, nuhnkuh yohk ke ma suhmuhslah, ac kampare in kuhlwacnsuhpuh Leum ac mwet sahyac ke Srihpacl.

Mwe insewowo ma sikyak nuh sihk, ac nuh suwos mwet puhs, pa ma suc mwet pahluh el olwelah. Kuht suc eis kahs in kahsruh lal nuh insiyacsr tuh lihpsre kohkoh luhn Nguhn arlac kahlwem. Kuht sokwack kuh yohk in lain mwe sruhf ac puhla luhlahlfongi yohk ke Jisus Kraist suc ma sifil moulyak, ac ke wosasuc Lal, ac ke Alu moul Lal.

Ke pacl luhn fohs kuh tihkuclkucl yohk fin facluh, elos suc yohkwelihk testimoni la elos sislah ahlohloh ac sahngweng ac use nuh sesr puhla luhn mihslac. Ke kuht porongo kahs lal Prestuhn Monson oasr ma wowo luo ma sikyak nuh sesr: Ma se met, Nguhn suc ma el olwelah el oraclah puhla in luhlahlfongi in kuht nuh ke ma suc ac fah sikyak, ac finne ma tihkuclkucl fin facluh se inge upaclah. Ac, ahkluo, Leum el use nuh sihk—ac kom—puhla na yohk se ke luhngse Lal nuh selos suc muhta in upac. Yohkwelihk kena lasr in som ac molwelah mwet sahyac. Kena se inge pa finsrak se emet lal Prestuhn Monson ke orekma ac luti lal.

Leum el olwelah luhngse nuh sin mwet sahyac ac puhlaik nuh sin Mwet Pahluh Joseph Smith ac Oliver Cowdery ke orekma ye muhtahlos arlac upaclaclac uh. Leum el fahk lah puhlaik suc ma elos ac enenuh ac fah tuhkuh ke luhlahlfongi lalos in El suc pa yot kuh lalos:

El fahk nuh selos lah elos tiac enenuh in sahngweng in oruh ma wo, ke srihpen ma nuh kwewa elos tahknwelihk elos fah kosracni. Ke ma inge, fin elos tahknwelihk wo elos fah eis kosracni wowo nuh ke opi lalos.

Ke ma inge, elos tiac enenuh in sahngweng in oruh ma wo. Fin facluh ac hell tuhkweni ac laenuhlos. Elos[facluh ac hell] fah tiac kuhtanglah fin elos[Joseph ac Oliver] tulokyak fin yot kuh Lal.

Leum el tiac nuhnuhnkwacl Joseph ac Oliver. Sahyacna El sapkihn nuh selos in som ac tiac sifil oruh ma koluk. Elos enenuh in ahkfahsryelah orekma ma El sang nuh selos ke wo.

El oacyacpac fahk lah elos enenuh in ngwet nuh Sel ke nuhnak lalos kwewa, ac elos enenuh in tiac ahlohloh ac sahngweng.

Elos enenuh in nuhnkuh ke kihnet ma lihksreni tihllac ke sisken mahnol ac ke iken osra lun Pahol ac niyacl. Elos enenuh in pwacye ac liyacacng masap Lal, na elos ac fah usrui tohkohsrahi inkuhsrao (liye D&C 6:33–37).

Leum el fahk nuh sin mwet kol Lal ma El srihsrngiyac in fohlohkwacnwack alu Lal, ac El fahk nuh sesr, lah ke kuht tu ke kuh fin yot kuh Lal, ahlohloh, ac sahngweng ac wacngihnlac: kena in oruh ma wo uh ac yohkwelihk. Ke kuht eis puhsrwen suli lal Prestuhn Monson in muhsaheack in kuht testimoni ke Jisus Kraist, kuht ac eis kuh, kena, ac puhlaik in som ac kahsrwelah mwet sahyac ac tiac elyah ke enenuh lasr sifacna.

Nga tuh liye kain in luhlahlfongi ac puhlaik inge ke pacl puhs ke mwet luhlahlfongi ke alu se inge sun ma upac. Oacna nuh ke pacl se, ma nga tuh oasr fin acn Idaho ke Dam Teton muhsahllah in Jun 5 1976. Kof na mahtol ke dam se inge rahklac tuhkuh nuh ten. Wo ohiyac, suhpuhs liki mwet 15 misac.

Ma nga liye ke acn sac pa, nga liye lah pacl nuh kwewa mwet luhlahlfongi elos tu kuh fin yot kuh ke testimoni ke Jisus Kraist. Ke srihpen elos tiac ahlohloh El karuhnguhnuhlosyang, elos eklac tiac sahngweng. Elos lahfwekihn lah ma upac lalos sifacna in som ac kahsrwelah mwet sahyac. Ac elos oruh ke luhngse nuh sin Leum, tiac tuhpan muh ac moul nuh selos.

In oacna, ke Dam Teton tuh muhsahllah ah, sie siyacnyacn luhn alu uh elos oruh fuhfahsryucsr lalos, suc ma elos loessuhlah liki lohm selos. Ke na elos lohngwack nus sac ke retio ah, elos suhlahklahk fohlohk nuh Rexburg. Elos tiac fohlohk nuh lohm selos in liye lah muhsahllah, a elos som suk pisap lalos. El tu ke sie lohm luhlahp ma orekmakihnyuck in sang ahkfahsrye kahsruh ma som nuh ke kain in elyah inge. El tu kahsruh in kol faluhntirs tausin suc tuhkuh ke pas rangrang okwacn lutlut uh.

Siyacnyacn se inge elos fahsryak nuh sel pisap ac fahk, “Kuht tuhfahna in fohlohk. Pisap, kuh acn oyac kuht kuh in som ac kahsruh?” Siyacnyacn sac muhta ac lafihs fohk fuhrahrrahr ac eis kof liki lohm nuh ke lohm. Elos orekma ke lututacng neke fongweni nuh ke lwen nuh ke lwen. Sahflah elos monglac na elos fohlohklac ac liye lah fuhkah lohm selos sifacna. Wacngihnlac pahtlah ke sronot ah, suc ma wacngihn ma elos ac ahknwacsnwacsye. Na elos silahklahk forlah ac som nuh yurin pisap lalos. Elos siyuck, “Pisap, kuh oasr mwet kuht kuh in kahsruh?”

Ma usrnguck ke puhlaik mihslac ac luhngse—luhngse pwacye luhn Kraist—kalweniyuck in orek ke yac nuh ke yac fin facluh nohfohn. Sikyak ohiyac se inge ke lwen koluk ke kalyeiyuck ac upac ke pacl lal Mwet Pahluh Joseph Smith fin acn Missouri. Sikyak ke pacl Brigham Young el kol fuhfahsryucsr sac ke acn Nauvoo ac ke Mwet ke alu uh pahng in som nuh ke acn ma wacngihn mwet we ke acn nuh kwewa fin acn western United States, in kahsruh sie sin sie in muhsaheack Zion nuh sin Leum.

Fin kom riti ma sihmlac luhn mwet payonir inge, kom ac liye orekma luhn ma usrnguck suc ma luhslah ahlohloh ac sahngweng liki mwet inge. Ac kom riti ke Mwet Luhlahlfongi ke elos sislah ma suc elos luhngse in kahsruh sie mwet nuh sin Leum, met liki elos fohlohklac nuh ke srip nahtuhlos sifacna nuh ke nien imac lalos suc ma elos soenna puhkanlah.

Nga liye kain in usrnguck se pacna inge ke lwen ekahsr somlah ah tukun kuhnanuclac ma sikyak ke Pahkah Irma fin acn Puerto Rico, Saint Thomas, ac Florida, ke mwet ke alu uh kuhpahsryang nuh sin alu sahyac, u ke acn lalos ac u luhn muhtuhnfacl sahyac in sramtweack ahknwacsnwacs lalos.

Oacna kawuck luhk fin acn Rexburg, sie siyacnyacn suc ma tiac mempucr ke alu uh fin acn Florida elos lohacng yohk in kahsruh mwet ke acn sac likina elos in orekma ke acn lalos sifacna. Ke kuhtuh mempucr ke alu uh siyuck in kahsrwelos in moklwelah sahk lukwac ma kosrwaclah nien kahsruhsr lalos, elos ahkuhtweyac lah elos arlac aelah in kahsruh mwet sahyac, ac luhlahlfongi tuh Leum el ac ikacslah kahsruh ma elos enenuh nuh ke lohm selos sifacna. Mukul sac tahfwelah in fahk lah met liki mempucr ke alu ah tuhkuh in kahsrwelos ah, elos tuh muhta pruhe. Elos eis sie top ma fahk muh kahsruh ac fah tuhkuh. Tukun na ao ekahsr kahsruh sonolos in ahkpwacyeye top sac.

Nga lohng sruhmuhnyuck muh kuhtuh muhtwacwacack in pahngon Mwet ke Alu uh muh “Lihpufacn Rangrang” suc ma nukum fohrohk rangrang ma sihm kac ah fahk muh Helping Hands. Sie muhtwacn ke alu uh uslah stosah okwacl ah nuh ke shop ah in orek, ac sie mukul suc ma kahsrwel ah ahkuhtweyac ke “nguhn suc el puhlakihn” ke mwet ma fohrohk rangrang ah moklwelah sahk ikor liki inkucl sel ah na, el fahk, elos “onkackihn soko on nuh sihk suc fahk muh tuhlihk uh ma nuhtin God.”

Sie pac mwet fin acn Florida—suc ma tiac ma ke luhlahlfongi lasr uh—sruhmuhn lah mwet ke alu uh tuhkuh nuh ke lohm sel ke pacl el orekma ke acn lal suc ma kuhnanuclac ac el puhla toasr luhlahp kac, el fosurukyak na upac, ac el apkuhran na elan tuhng. Faluhntirs inge oruh sikyak kahs inge in el, ke kahs lal, “sie ma usrnguck muhtahl.” Elos tiac kuhlwacnsap muhkwena ke oaru tuhsruhk ke ngihsngihs ac isrwacsr srihsrihk, ac elos tiac ke in moul nuh selos.

Nga liye insacnweacng ac lohng puhsren ngihsngihs ke, ekuh in Sactte, ke nga muhtwacta nuh yurin sie U ke Alu uh fin acn Florida. Faluhntir inge tui ke ahknwacsnwacs lalos ngan muh kuh in usrukyac paholos. Elos fahk lah mwet 90 ke stek lalos in acn Georgia elos oakiyac sie plwacn in wi mwet kahsruh fin acn Florida ke fong se na met ah.

Elos mukwilac liki acn Georgia ke ao 4:00 ke lututacng an, kahsruhsr ke ao, orekma ke lwen fohn ac fong fohn ac sifil plwacn elos in orekma ke lwen tok an.

Elos ahkuhtweyac ma elos oruh inge ke isrwacsr srihsrihk ac kahs tahfuhnkahs. Ma ake sefanna nga puhla ah pa elos tiac ke tui fahk kuloh nuh sin mwet uh uh elos ke tahfwelah na orekma lalos. Stek prestuhn el sifil ahkosack tahtah nahtuhl ah ac tahi sahk ikor soko ac sie pisap el amackihn lwe sahk ke kuht sroacng nuh ke stosah okwacsr ac som nuh ke u sahyac ma faluhntirs in kahsruh ah.

Toang na ke lwen sac, ke kuht yuclac liki sie pacna acn, mukul se fahsryak nuh ke stosah ah,  eslah susu lal ah, ac fahk luhpan kuloh lal ke mwet faluhntirs lasr ah. El fahk, “nga tiac mempucr ke alu lowos an, nga arlac suhlahlahlfongi ke kahsruh lowos nuh sesr. God Elan ahkinsewowoye kowos.” Mwet faluhntirs se luhn alu uh ma tu siskacl ah el isrwacsr srihsrihk ac moklweack finpihsacl, oacna in muh el tiac muh in kaksyakihnyuck el.

Ke faluhntirs fin acn Georgia tuhkuh in kahsruh mukul se inge el suhlahlahlfongi lah in ohinge, foko sin mwet ke alu uh ma ke ipin acn ma arlac muhsahllah fin acn Florida elos fuhfahsryucsr ke mael foko nuh ke sie pacna acn in Florida suc ma puhlakihn muhsahllah na upac ke acn selos.

Lwen sac, nga esam, ac kahlwem kac, kahs in palye luhn Mwet Pahluh Joseph Smith: “Sie mwet suc sesseslah ke luhngse luhn God, el tiac falkihn mwe insewowo nuh sin sucu lal muhkwena, tuhsruhk suk fin facluh nohfohn, kena in ahkinsewowoye mwet nuh kwewa” (Teachings of Presidents of the Church: Joseph Smith [2007], 426).

Kuht liye kain in luhngse se inge ke moul luhn mwet ke alu se inge yen nuh kwewa. Kais sie pacl ma oasr ma upac sikyak fin facluh, Mwet ke alu uh sang ac srasra po in kahsruh mwet ke pacl upac. Suhkwac ngihsreyuck mwet in srasra po. Pwacyeiyac, ke kuhtuh pacl, kuht enenuh in siyuck mwet ma srasra po inge in sano in som nuh ke acn in tuhpan kahsruh nekena mwet kol orekma ingacn ahkolah in esaclos.

Kena in ahkinsewowoye pa fahko luhn mwet ma eis testimoni ke Jisus Kraist, wosasuc Lal, Alu fohlohkyak Lal, ac mwet pahluh Lal. Pa sis mwet luhn Leum elos tiac ahlohloh ac sahngweng. Pa sis mwet srasra po nuh ke misineri nuh ke kuhlwacnsap ke sroasrihk nuh kwewa fin facluh. Pa sis ninac pahpah pruhe wi tuhlihk nahtuhlos ke mwet sahyac. Pa sis mwet kol ahkkweye mwet fuhsr in oruh nguhsr lal Prestuhn Monson in esaclosyang in lutlut ke Puk luhn Mormon. Fahko luhn orekma uh tiac sikyak ke srihpen elos pahtokyuck sin mwet kol tuhsruhk sikyak ke srihpen mwet fuhsr ac mwet elos orekma ke luhlahlfongi ke kuhiyaclos. Luhlahlfongi ingacn, moklweyuck, suc ma enenweyuck kihsac pwacye, suc ma oruh insiyac in eklac ma ikacslah nuh selos in puhla luhngse luhn God.

Tuhsruhktuh, insiyacsr, kuh in eklac muhkwena fin kuht tahfwelah na in ukwe kahs luhn mwet pahluh. Fin kuht tui tilac srihke tukun orekma se fanna, na eklac se ingacn ac eflah.

Mwet luhlahlfongi pwacye ke alu uh elos ahkyohkye luhlahlfongi lalos ke Leum Jisus Kraist, ke pwacyeiyacn Puk luhn Mormon muh pa kahs luhn God, ac ke fohlohkyak luhn kuh luhn pristut ke Alu pwacye Lal. Kapkapwack luhn testimoni se inge acse nuh sesr puhlaik yohk ac in nuhnkuh ke tuhlihk sahyac nuhtin God. Tuhsruhk ma upac ac pacl wowo nuh ke pacl fahsruh uh ac enenwekuht yohk liki met ah.

Kuht tiac kuh in etuh ma srihsrihk nuh kwewa, tuhsruhk kuht etuh lah meac ac sikyak ke pacl fahsruh uh. Kuht etuh lah in lwen sahflah inge, facluh ac fohswack. Kuht etuh lah inmahsrlon ma sik inge, Leum elac kol mwet luhlahlfongi in us wosasuc luhn Jisus Kraist nuh ke muhtuhnfacl, sucu, kain in kahs, ac mwet nuh kwewa. Ac kuht etuh lah mwet tuhma lutlut pwacye luhn Leum ac fah fal ac ahkolah in Esacl ke El ac sifil tuhkuh uh. Kuht tiac enenuh in sahngweng.

Na, finne yohk luhlahlfongi ac puhlaik kuht muhsaheack tari ke insiyacsr, Leum el tuhpan kahsruh yohk sesr—ac oacyacpac sin fihl nuh ke fihl tohkohsr uh. Elos enenuh in fokoko liki kuht ac puhlaik liki kuht mweyen ac upaclah ac yohkwelihk ma upac uh likina met ah. Ac elos ac fah sun lain upac sin mwet lokoalok luhn nguhnasr.

Sie inkacnek in eis nuhnak kuh nuh ke pacl fahsruh uh utuckuh sin Leum: El fahk lah kuht enenuh in ngwet nuh Sel ke nuhnak nuh kwewa, ac lah kuht enenuh in tiac ahlohloh ac sahngweng (liye D&C 6:36). Prestuhn Monson el fahk tari lah kuht ac oruh fuhkah ma se inge. Kuht in nuhnkuh kac ac oruh mwe luti ke Puk luhn Mormon ac kahs luhn mwet pahluh. Sikalweni in pruhe. Luhlahlfongi. Kuhlwacnsuhpuh Leum ke insiyacsr, kuhiyacsr, ac nuhnak lasr kwewa. Kuht in pruhe ke kuhiyacn insiyacsr kwewa nuh ke mwe sang luhn luhngse, luhngse muhtahl luhn Kraist (liye Moroni 7:47–48). Ac yohk liki ma nuh kwewa, kuht enenuh in akwuck ac insacnweacng ke ukweyacn kahs in kahsruh ma palyeyuck.

Ke pacl inkacnek uh upac, kuht kuh in epacl nuh ke olwelah luhn Leum—olwelah ma Prestuhn Monson el ahkacsmakihnye kuht kac ke el kwacna kalweni kahs luhn Mwet Lahngo: Ke inkacnek uh upac, kuht kuh in epacl nuh ke olwelah luhn Leum—suc ma Prestuhn Monson el kwacna ahkacsmakihnye kuht kac. Ke olwelah se inge, Leum el fahk lah El ac fah weluhlos suc eis kuht, ke srihpen El fahsr met liki kuht. El ac fah oasr ke lacpoh lacyot ac lacpoh lacsac lasr, ac Nguhnal ac fah oan insiyacsr, ac lihpufacn Lal ac fah raunikuhtlac in sruhkkuhtyak nuh lucng (liye D&C 84:88).

Nga fahkwack lah Leum El wi kom fahsr met liki kom pacl nuh kwewa ma kom oruh orekma Lal. Kuhtuh pacl uh kom pa lihpufacn luhn Leum ma suhpweyucklac in tahpuhk mwet sahyac. Kuhtuh pacl uh kom ac rauniyuckyak ke lihpufacn suc ma ac sruhkkomyak nuh lucng. Tuh pacl nuh kwewa Nguhn Lal ac fah oan in kom, suc pa sie ma uliyuck nuh sum ke pacl nuh kwewa ke kuhfa luhn Leum uh. Kom enenuh in liyacacng masap Lal.

Lwen suc ma wo emet ac fah tuhkuh nuh ke tohkohsrahi luhn God fin facluh. Mwe lain ac fah ahkkweye luhlahlfongi lasr ke Jisus Kraist, oacna ke lwen lal Mwet Pahluh Joseph Smith. Pacl nuh kwewa luhlahlfongi el kuhtanglah sahngweng. Tuhkweni orekma el oswelah ma sefanna. Ac pruhe lom ke elos suc enenuh uh lohngyuck ac toplac sin God luhngse se.

Nga fahkwack kahs in loh luhk lah God Pahpah el moul ac kena kom in tuhkuh nuh Yohrohl ke nien muhta Lal. Pa inge Alu pwacye luhn Leum Jisus Kraist. El etwekom, El luhngse kom, ac El liye kowosyang. El iwaclah ke ma koluk lowos ac ma koluk luhn tuhlihk nuh kwewa nuhtin Pahpah Lucng. Fahsr Tohkohl in moul lom ac ke kuhlwacnsap lom nuh sin mwet sahyac pa inkacnek se fanna nuh ke moul ma pahtpaht.

Nga fahkwack ma inge ac usot nuh suwos mwe insewowo ac luhngse luhk. Ke inen Jisus Kraist, Amen.