Aua le Fefe e Fai Mea Lelei

O’u uso e ma tuafafine pele, ou te tatalo faamaualalo ia faatasi mai le Agaga o le Alii ma i tatou a o ou lauga atu i le asō.Ua tumu lo’u loto i le faafetai i le Alii, le ana le Ekalesia lenei, mo le musumusuga ua tatou lagonaina i tatalo faatauanau, o lauga musuia, ma pesega a agelu i lenei konafesi.

Ia Aperila talu ai, sa tuu mai ai e Peresitene Thomas S. Monson se savali na gaepu ai loto i le lalolagi atoa, e aofia ai ma a’u.Sa ia saunoa e uiga i le mana o le Tusi a Mamona.Sa ia uunaia i tatou e suesue, manatunatu loloto, ma faaaoga ona aoaoga. Sa ia folafola mai afai tatou te tuuto atu taimi i aso taitasi e suesue ai ma mafaufau loloto ma tausi poloaiga o loo i ai i le Tusi a Mamona, o le a tatou maua se molimau taua e uiga i lona moni, atoa ma le molimau tauia o le Keriso soifua o le a fesoasoani ia i tatou i le saogalemu i taimi o faigata. (Tagai “O Le Mana o le Tusi a Mamona,” Liahona, Me 2017, 86–87.)

E pei o le toatele o outou, sa ou faalogo i upu a perofeta o le siufofoga foi lea o le Alii ia te a’u.Ma, e pei foi o le toatele o outou, sa ou filifili e usitai i na upu.Ia, talu mai lava lo’u tamaitiiti, sa ou lagona ai lava le molimau o le Tusi a Mamona o le afioga a le Atua, o le Tama ma le Alo na faaali mai ma fetalai mai ia Iosefa Samita, ma o Aposetolo anamua na o ifo i le Perofeta o Iosefa e toefuatai mai ki o le perisitua i le Ekalesia a le Alii.

I lena molimau, ua ou faitauina ai lava le Tusi a Mamona i aso uma mo le silia ma le 50 tausaga.E masalo la e tonu lava lo’u manatu o upu a Peresitene Monson e faatatau i se isi tagata. Ae, e pei o le toatele o outou, sa ou lagonaina le faamalosiauga a le perofeta ma o lana folafolaga ua valaaulia ai a’u e fai se taumafaiga sili atu. E toatele outou ua faia le mea na ou faia: tatalo ma le faamoemoega faateleina, mafaufau loloto ma le naunautai atili i tusitusiga paia, ma taumafai malosi atili e auauna atu i le Alii ma isi mo Ia.

O le taunuuga fiafia mo a’u, ma mo le toatele o outou, o le mea lea na folafola mai e le perofeta.O i latou na teufatuina i le loto lana fautuaga, ua lagonaina manino atili le Agaga.Ua tatou mauaina se mana tele atu e tetee atu ai i le faaosoosoga ma lagonaina le faatuatua tele atu i se Iesu Keriso toetu, i Lana talalelei, ma i Lana Ekalesia ola.

I se vaitau o le faateteleina o le vāvāō i le lalolagi, o na mea ua faateleina i le molimau ua tafiesea ai le masalosalo ma le fefe ma aumai ai ia i tatou lagona o le filemu. O le usitai i le fautuaga a Peresitene Monson ua maua ai isi aafiaga matagofie e lua mo a’u: Muamua, o le Agaga na ia folafola mai ua maua ai se lagona o le faamoemoe e uiga i mea o loo i luma atu, e tusa lava pe foliga mai ua faateleina le vāvāō i le lalolagi. Ma le, lona lua, ua foai mai e le Alii ia te a’u—ma oe—se lagona sili atu o Lona alofa mo i latou e lofituina. Ua tatou lagonaina se faatelega o le manao e o atu e laveai mai isi. O lena manao sa i ai lava i le totonugalemu o le auaunaga ma aoaoga a Peresitene Monson.

Na folafola mai e le Alii le alofa mo isi ma le lototele i le Perofeta o Iosefa Samita ma Oliva Kaotui ina ua foliga mai sa lofituina galuega sa i o laua luma atu.Sa fetalai mai le Alii o lena lototele manaomia o le a sau mai lo la faatuatua ia te Ia e fai ma o la papa:

“Aua le fefefe e fai mea lelei, oʼu atalii e, auā o soo se mea e te lua lulu, o lena foi o le a oulua seleseleina; o lea, afai lua te luluina le lelei o le a oulua selesele foi le lelei mo o oulua taui.

“O lea, aua le matatau, le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atiaʼe i luga o laʼu papa, e lē mafai ona latou manumalo.

“Faauta, ou te lē tausalaina oulua; ō i o oulua ala ma ia lē toe agasala; fai ma le mamalu le galuega ua Ou poloaiina ai oulua.

“Vaai mai ia te aʼu i mafaufauga uma; aua le masalosalo, aua le fefefe.

“Matau i manuʼa ua tuia ai loʼu itu, ma tulaga fao foi i oʼu lima ma oʼu vae; ia faamaoni, tausi i aʼu poloaiga, ma o le a oulua mautofi ai i le malo o le lagi” (MF&F 6:33–37).

Na ta’u mai e le Alii i Ona taitai o le Toefuataiga, ma ua Ia ta’u mai foi ia i tatou, a tatou tutu ma le faatuatua i luga o Lana papa, e faaitiitia le masalosalo ma le fefe; ae faateleina le manao e fai le lelei.A tatou taliaina le valaaulia a Peresitene Monson e toto i o tatou loto se molimau ia Iesu Keriso, o le a tatou mauaina le mana, le manao, ma le lototele e o atu ai e laveai mai isi e aunoa ma le popole mo o tatou lava manaoga.

Ua ou vaaia lena faatuatua ma le lototele i le tele o taimi pe a feagai le Au Paia faatuatua o Aso e Gata Ai ma tofotofoga taufaamatau.Mo se tasi faataitaiga, sa ou i ai i Idaho i le taimi na pa ai le Faatanoavai o Teton i le aso 5 o Iuni, 1976.Sa solo i lalo le puipui o le faatanoa.E faitau afe na sosola ese mai o latou fale. E faitau afe fale ma pisinisi na faaleagaina. O se vavega lava, e itiiti ifo ma le 15 tagata na fasiotia ai.

O le mea na ou vaaia iina, sa ou vaaia o soo se taimi lava e tu mausali ai le Au Paia o Aso e Gata Ai i luga o le papa o se molimau ia Iesu Keriso. Ona latou te le masalosalo o loo Ia leoleo i latou, latou te le fefefe ai lava.Latou te le amanaiaina o latou lava tofotofoga ae o atu mo le toomaga o isi. Ma e latou te faia lea mea ona o le alofa mo le Alii, e le fesili lava mo se taui.

Mo se faataitaiga, i le taimi na pa ai le Faatanoavai o Teton, sa malaga se ulugalii o le Au Paia o Aso e Gata Ai, i le tele o maila mai lo la aiga.Ae o le taimi lava na la faalogo ai i le tala i luga o le leitio, sa la toefoi vave atu i Rexburg. Nai lo le o atu i lo la fale e vaai pe ua faaleagaina, sa la o atu e su’e le la epikopo. Sa i ai o ia i totonu o se fale sa faaaogaina e fai ma nofoaga autu o le sulufaiga. Sa fesoasoani o ia e faatonutonu le faitau afe o volenitia sa taunuu atu i pasi aoga sasama.

Sa savavali atu le ulugalii i le epikopo ma faapea atu, “O lea faato’a ma taunuu mai.Epikopo, o fea ma te o e fesoasoani ai?” Sa ia tuu atu ia i laua igoa o se aiga.Sa nonofo lena ulugalii e asu ese le palapala ma le vai mai lea fale i lea fale. Sa la galulue mai le tatafa o ata seia po mo le tele o aso. Mulimuli ane sa faia se la malologa ma o ai e vaai lo laua lava ia fale.Ua leai ma se fale i le lolo, leai ma se mea o totoe e faamama.O lea sa la toe liliu vave atu ai e toe o atu i lo la epikopo. Sa la fesili atu, “Epikopo, o i ai se tasi ma te fesoasoani i ai?”

O lena vavega o le lototele ma le alofa mama leleoa—le alofa le pona o Keriso—o loo tupu pea i le aluga o tausaga ma i le lalolagi atoa.Sa tupu i aso matautia o sauaga ma tofotofoga i le taimi o le Perofeta o Iosefa Samita i Misuri.Sa tupu a o taitaia e Polika Iaga le malaga mai Navu ona valaau atu lea i le Au Paia e o mai i nofoaga toafa i le itu i sisifo atoa o le Iunaite Setete, e fesoasoani i le tasi ma le isi e faatu Siona mo le Alii.

Afai e te faitau i tusiga i apitalaaga a na paionia, e te vaaia ai le vavega o le faatuatua na tafiesea le masalosalo ma le fefe.Ma e te faitau i le Au Paia na tuua mea na latou fiafia i ai ina ia fesoasoani atu i se isi tagata mo le Alii, a o lei toe foi atu i a latou lava mamoe po o a latou lava fanua e lei suaina.

Sa ou vaaia lena lava vavega e tasi i ni nai aso talu ai i faatafunaga a le Afa o Irma i Puerto Rico, Saint Thomas, ma Florida lea e faipaaga ai le Au Paia o Aso e Gata Ai ma isi ekalesia, vaega faalenuu i le lotoifale, ma faalapotopotoga faavaomalo e amata taumafaiga faamama.

E pei o a’u uo i Rexburg, o se tasi ulugalii i Florida e le auai i le ekalesia sa taulai atu e fesoasoani i le nuu nai lo le galulue i lo laua lava fanua. Ina ua ofo atu e nisi o tuaoi o le Au Paia o Aso e Gata Ai le fesoasoani e aveese ni laau tetele se lua na pauu i lo la auala, sa faamalamalama mai e le ulugalii sa lofituina lava i laua o lea sa la liliu atu ai e fesoasoani i isi, ma le faatuatua o le a saunia e le Alii le fesoasoani la te manaomiaina i lo la fale. Ona faasoa mai lea e le tane lena mea i luma o tagata o le tatou Ekalesia na taunuu atu ma ofo atu le fesoasoani, sa tatalo le ulugalii.Sa la mauaina se tali o le a oo mai le fesoasoani.Sa oo mai i totonu o ni itula o lena faamautinoaga.

Na ou faalogo i se lipoti o nisi na amata faaigoaina le Au Paia o Aso e Gata Ai o loo ofuina le mitiafu sasama Lima Fesoasoani “O Agelu Sasama.” Sa ave e se tasi o le Au Paia o Aso e Gata Ai lana taavale i totonu e siaki, ma sa faamatala e le alii sa fesoasoani ia te ia le “aafiaga faaleagaga” na ia maua ina ua aveesea e tagata i mitiafu sasama ia laau mai lona fanua ona ia fai mai lea, sa latou “usuina se pese ia te a’u e uiga i le avea ma se atalii o le Atua.”

O le isi tagatanuu o Florida—e le o se tasi foi o le tatou faatuatuaga—sa faamatala mai sa o atu le Au Paia o Aso e Gata Ai i lona fale a o galue o ia i lona fanua na faaleagaina ma sa lagona le lofituina, mamafatu o le avega, ma sa toetoe lava a tagi.I ana lava upu, sa fai mai ai na fatua’i e volenitia “se vavega mamana.”Sa lei gata na latou auauna atu ma le filiga ae faatasi ma le ata ma laumata fiafia, ma le le taliaina o se taui.

Sa ou vaaia lena filiga ma faalogo atu i lena ata i le tauafiafi o se Aso Toonai, sa ou asia ai se vaega o le Au Paia o Aso e Gata Ai i Florida.Sa taofi e volenitia a latou galuega faamama mo sina taimi ina ia ou faatalofa atu ai i nisi o i latou. Sa latou fai mai e 90 tagata o le latou siteki i Georgia sa faia se fuafuaga e auai atu i le laveai i Florida i le po na muamua atu.

Sa latou tuua Georgia i le 4 i le vaveao, ma tietie atu mo le tele o itula, galulue i le aso atoa, alu ai ma le po, ma fuafua e toe galulue foi i le aso e sosoo ai.

Sa latou faamatalaina uma i ni ataata ma le agamalie lelei.Sa na o le pau le popolega sa ou lagonaina o lo latou mananao lea ia taofi le faafetai atu ina ia mafai ona faaauau ona galulue.Sa toe faaola le iliafi a le peresitene o le siteki ma sa galue i se laau na pa’u ma sa la’u ese e se epikopo ni lala laau a o matou feosofi i totonu o le matou taavale e o atu i le isi vaega laveai.

Na muamua atu i lena aso, a o matou o ese atu mai le isi nofoaga, sa savali mai se alii i le taavale, aveese lona pulou, ma faafetai mai ia i matou mo le au volenitia.Fai mai o ia, “E le o a’u o se tagata o le tou lotu. Ou te le talitonu i mea ua outou faia mo i tatou. Ia faamanuia le Atua ia te outou.” O le volenitia Mamona sa tu i ona talaane sa ataata ma faamimigi ona tauau, e pei e le onomea se viiga ia te ia.

A o o mai ai volenitia mai Georgia e fesoasoani i lenei tamaloa na maofa, e faitau selau le Au Paia o Aso e Gata Ai mai lena lava vaega na faaleagaina o Florida na malaga atu i le faitau selau o maila i se isi nofoaga i Florida na latou faalogo sa sili atu ona faataumaoia ai tagata.

I lena aso, sa ou manatua ai, ma malamalama atili, i upu faavavega a le Perofeta o Iosefa Samita: “O se tagata e faatumulia i le alofa o le Atua, e le faamalieina i le faamanuiaina na o lona aiga, ae oo atu i le lalolagi atoa le naunau ia faamanuiaina le fanauga uma a tagata” (Aoaoga a Peresitene o le Ekalesia: Iosefa Samita [2007], 426).

O loo tatou vaaia lea ituaiga o alofa i olaga o le Au Paia o Aso e Gata Ai i soo se mea.O taimi uma e i ai se faalavelave matautia i soo se mea i le lalolagi, e foai atu ma ofofua atu le Au Paia o Aso e Gata Ai i taumafaiga o galuega alofa a le Ekalesia.O se talosaga mo volenitia e le tau manaomiaina. O le mea moni, o nisi taimi, e tatau ona matou talosagaina i latou o le a volenitia e faatali e aua le malaga i le nofoaga o loo tautapena seia oo ina saunia i latou o loo taitaia le galuega e talia i latou.

O le manao ia faamanuia atu o le fua lea o tagata e mauaina se molimau ia Iesu Keriso, o Lana talalelei, Lana Ekalesia toefuataiina, ma Lana perofeta.O le mafuaaga lena e le masalosalo ai ma lē fefefe tagata o le Alii. O le mafuaaga lena e volenitia ai faifeautalai mo auaunaga i tulu’iga uma o le lalolagi. O le mafuaaga lena e tatalo ai matua faatasi ma a latou fanau mo isi.O le mafuaaga lena e lu’i ai e taitai a latou talavou e teufatu i le loto le talosaga a Peresitene Monson ia faatofuina i latou lava i le Tusi a Mamona.E oo mai le fua lea, e le ona e faamalosia e taitai ae ona e ala i le faatinoina e talavou ma le au paia o le faatuatua.O lena faatuatua e faatino—lea e manaomia ai osigataulaga le manatu faapito—e aumaia le suiga o le loto e faatagaina ai i latou e lagonaina le alofa o le Atua.

Peitai, e na o le pau le mea e faatumauina le suia o o tatou loto pe afai e faaauau pea ona tatou mulimuli i le fautuaga a le perofeta. Afai tatou te tuu le taumafai pe a uma se taumafaiga tele, o le a mou atu le suiga.

Ua faateleina e le Au Paia o Aso e Gata Ai faamaoni lo latou faatuatua i le Alii o Iesu Keriso, i le Tusi a Mamona o le afioga a le Atua, ma i le toefuataiga o ki o le perisitua i Lana Ekalesia moni.O lena molimau faateleina ua tatou maua ai se lototele sili atu ma le popole mo isi o fanau a le Atua.Ae o luitau ma avanoa i luma atu o le a manaomia ai nisi mea se tele.

E le mafai ona tatou muai vaaia ni auiliiliga, ae ua tatou iloa lava le ata tele atu.Ua tatou iloa i aso amuli, o le a i ai le lalolagi i le vāvāō.Ua tatou iloa i le lotolotoi o soo se faafitauli e oo mai, o le a i ai lava le Alii e taitai le Au Paia faamaoni o Aso e Gata Ai e avatu le talalelei a Iesu Keriso i atunuu uma, ituaiga, gagana, ma tagata.Ma ua tatou iloa o le a agavaa soo moni o le Alii ma saunia e talia o Ia pe a toe afio mai o Ia.E le tatau ona tatou fefefe.

O lea, i le tele o mea ua tatou fausiaina ai le faatuatua ma le lototele i o tatou loto, ua faamoemoeina ai e le Alii le tele o mea mai ia i tatou—faapea ai ma augatupulaga pe a mavae i tatou.E manaomia ona latou malolosi atu ma lotototoa atili ona o le a latou faia ni mea tetele atu ma faigata atu nai lo mea ua tatou faia.Ma o le a latou feagai ma le faateteleina o le tetee mai o le fili o o tatou agaga.

O le ala i le faamoemoe a o tatou agai pea i luma sa tuuina mai e le Alii: “Vaai mai ia te aʼu i mafaufauga uma; aua le masalosalo, aua le fefefe” (MF&F 6:36). Sa ta’u mai e Peresitene Monson ia i tatou le auala e faia ai lena mea. E ao ona tatou mafaufau loloto ma faaaoga le Tusi a Mamona ma upu a perofeta. Tatalo e le aunoa.Ia talitonu. Auauna atu i le Alii ma o tatou loto atoa, manatu, mafaufau, ma le malosi atoa. E ao ona tatou tatalo ma le malosi atoa o o tatou loto mo le meaalofa o le alofa mama, le alofa le pona o Keriso (tagai Moronae 7:47–48). Ma e sili i lo mea uma, e ao ona tatou tumau ma mausali i le mulimulitaia o fautuaga faaperofeta.

A faigata le ala, e mafai ona tatou faalagolago atu i le folafolaga a le Alii—le folafolaga lea na faamanatu mai e Peresitene Monson ia i tatou lea e masani ona ia sii maia ai le fetalaiga lenei a le Faaola: “Ma ai se na te talia outou, o iina o le a Ou i ai foi, ona o le a Ou alu muamua atu i o outou luma.O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga”(MF&F 84:88).

Ou te molimau atu e muamua atu le Alii i o outou luma i soo se taimi lava tou te i ai i Lana feau.O nisi taimi o le a avea ai oe ma le agelu e auina atu e le Alii e sapasapai i luga isi.O nisi taimi o le a avea ai oe ma lē e siosiomia e agelu e sapasapaia i luga oe. Ae o le a e maua pea Lona Agaga e afio i lou loto, e pei ona folafola atu ia te oe i sauniga faamanatuga uma.Pau lava le mea o lou tausi i Ana poloaiga.

O loo i luma atu aso e sili ona lelei mo le malo o le Atua i le lalolagi.O mea faafeagai o le a faamalosia ai lo tatou faatuatua ia Iesu Keriso, e pei foi ona sa i ai talu mai aso o le Perofeta o Iosefa Samita. E faatoilalo e le faatuatua i taimi uma le fefe. O le tutu faatasi e tupu mai ai le lotogatasi. Ma o au tatalo mo i latou e mafatia e faafofogaina ma taliina e se Atua alofa.E le tulemoe o Ia e le moe lava o Ia.

Ou te molimau atu o loo soifua le Atua le Tama ma e finagalo ia te oe e foi atu i le aiga ia te Ia.O le Ekalesia moni lenei a Iesu Keriso. E silafia e Ia oe, e alofa o Ia ia te oe, ma o loo leoleo o Ia ia te oe.Sa Ia togiola mo au agasala ma a’u agasala ma agasala a fanau uma a le Tama Faalelagi.O lou mulimuli ia te Ia i lou olaga ma au auaunaga i isi, e na o le pau lena o le ala i le ola e faavavau.

Ou te molimau atu ai ma tuu atu la’u faamanuiaga ma lo’u alofa. I le suafa paia o Iesu Keriso, amene.