An Kot Pwarata mi Unusen Pochokun: Ewe Puken Mormon

Ewe Puken Mormon esap chok ewe foun nongonongen ach manaman, nge a pwan tongeni winiti foun nongonongen ach kapasen pwarata pwe nupwen sossot ika kapaseis sise sinei repwe tori kich, epwe anukuchara ach kapasen pwarata. Ei puk iei ew poun me won ewe kinon ennet minne a nap seni pounen meinisin an chon asita ewe puk. Pwata? Pokiten ika mi ennet, iwe Joseph Smith emon soufos me iei ewe Mwichefenin Jises Kraist mi niwinsefanito, ina mwo ika mi wor pekin ungeni non uruo me ekkoch pwan anini. Ren ei popun, ekkewe chon esit ra mochen amwani ewe Puken Mormon, nge ekkewe eppet ra churi ra chommong, pokiten ei puk mi ennet.

Aewin, chon esit repwe awewei ifa usun Joseph Smith, emon 23 atin won farm ese naf an sukun, a fori ew puk mi wor fite puku sokonon iten aramas me neni, me pwan ekkewe porous mi fokkun tichik. Ach sipwe awewei, chommong chon esit ra apasa pwe i emon mi wesen tipachem a anongonong won chommong puk me pwan ekkoch pisek an epwe fori masowen uruon ewe Puken Mormon. Nge mi sokono seni met ra apasa, ese wor emon chon pwarata pwe a kuna Joseph Smith me och ekkei pisek me mwen ewe chiaku a poputa.

Ika mwo ei porous epwe ennet, ese fokkun naf an epwe awewei fisitan ewe Puken Mormon. Emon epwe pwan ponuweni ewe kapaseis: ifa usun Joseph epwe aneani ekkewe puk meinisin, tonau ekkoch ese auchea, me forochu tichikin pungun ion a nom non menni neni me inet, iwe mwirin a makketiw ren unusen an chechemeni? Pokiten nupwen Joseph Smith a chiakuni, ese wor noun toropwen esinesin. Ennetin, punuwan we Emma a achema: “Ese wor noun toropwe ika puk epwe anea seni. … Ika mi wor ren ena sokkun mettoch i ese tongeni opano seniei.”¹

Iwe ifa usun Joseph a fori ei mettoch mi amwarar ren an makkei ew puk mi nap seni 500 peich nge ese wor noun toropwen aurour? An epwe fori, esap chok tipachem ne fori mettoch nge epwe pwan unusoch an chemeni met mi wesen sokono. Nge ika ena mi ennet, pwata ekkewe chon esita rese affatau ei angangoch mi amwarar?

Nge mi pwan wor ekkoch. Ekkei anini ra chok awewei masowen uruon ewe puk. Ewe ennetin osukosuk mi chok nom: ifa usun an Joseph efisata ew puk mi awora ewe Ngun, me a angei me ian ewe nongonong mi nap, napengeni minne a afatano ika ungeni an Souneng nuku usun an fansoun?

Ren awewe, ewe Puken Mormon a aitikich, esap usun chommong Souneng ra nuku, pwe ewe Turutiwen Adam ew kinikinin ach sipwe fefeita. A pwarano ekkewe pwon mi pin a fis atun papatais, minne rese mak me non ewe Paipen.

Emon epwe pwan eis: Ian Joseph a angei ewe mirit mi nap pwe pokiten an Kraist Achasefan, I epwe tongeni nimeti kich me pwan aunusochukicheno? Ian a angei me ia ewe afanafan mi amwarar usun nuku nonAlma 32? Ika an King Benjamin we afanafan usun an ewe Chon Amanau Achasefan, minne afanafan a kon amwarar usun ei itenap me non pukefel meinisin? Ika ekkewe tutunapen ewe ira olif fiti fitikokon me chommongun nongonongun? Nupwen ua aneani ei tutunap, ua kan chunganau ai upwe kunaochu tichikin. Iwe iei sipwene ekieki pwe Joseph Smith a chok makkei ekkei afanafan seni an pwisin ekiek ese wor noun toropwen aurour?

Ren sokonon ei ekiek, pisekin pwarata usun an Kot mwokutukut mi tongeni pwa non unusen ewe Puken Mormon ren ennetin kewe mi nap, akkaewin ren ekkewe afanafan mi murino usun ewe Achasefan an Jises Kraist.

Ika Joseph esap emon soufos, iwe ren ach sipwe awewei ekkei me chommong pwan ekkoch mirit ren nongonon, ekkewe chon esit repwe anini pwe i emon pwan tipachem usun Kot. Nge ika epwe ina, emon epwe eis: pwata Joseph i ewe chok emon non ekkewe 1,800 ier mwirin an Kraist we angang epwe efisi sokopaten nongonong mi sokono me fatoch? Pokiten a ew pwarata, esap tipachem, ina popun ei puk.

Nge ika mwo sia ekieki pwe Joseph emon mi tipachem ne fori mettoch me non an sinei usun Kot—ekkei sinenap pwisin resap fori an epwe angoch ne mak. Ar repwe awewei usun fisitan ewe Puken Mormon, ekkewe chon esit repwe pwan ara pwe Joseph i emon chon mak mi sinenap non an ier 23. Ika esap ina, ifa usun an achufengeni chommong it, neni, me mettoch a fis non ew puk mi mak non tettenoch? Ifa usun a makkei tichikin kokkotun maun, makkei afanafan mi manaman, me forata foun kapas mi mak non pukefel, minion aramas ra fen chemenir, apasa sefanir, me wata won asamen ar reichoko, kapas usun “Pwe nupwen oua angang ngeni chiechiemi aramas oua chok angang ngeni ami Kot” ( Mosaia 2:17) ika “Aramas ra manau, pwe repwe tongeni mefi pwapwa” (2 Nifai 2:25).. Ekkei ir porous mi wor manamaner—porous usun mi manau me ngasangas me amefi ekkoch. Ar ara pwe Joseph Smith non an ierin 23 a wor ren ewe angangoch ne makkei ei angang mi amwarar non ew chok sokkun mak non ukukun 65 ran mi fokkun ungeni met mi ennet.

Preseten Russell M. Nelson, emon chon mak mi mirit me angangoch, a apasa pwe a makkei sefani fan 40 an we afanafanen mwichenapen mwichefen. Iwe iei sipwene nuku pwe Joseph Smith, pwisin, a makkei unusen ewe Puken Mormon non ew chok kinikin ren ekkoch chok kukkun itechik mi mwan a siwin mwirin?

Punuwen Joseph Smith we Emma a apungano pwe ese tufich an epwe apwonueta: “Joseph Smith [nupwen i mi chok emon anuon] ese tongeni makkei ika etetteni echo toropwe mi fatoch ika makkeoch; me ese fokkun tongeni makkei ew puk usun ewe Puken Mormon.”²

Iwe amuchunon, ika emon a etiwa ekkei anini meinisin, ina mwo ika ir mi tipemwaramwar ika repwe ennet, chon esit repwe chok weri watten eppet. Joseph a ara pwe ewe Puken Mormon a mak won seleichen Gold. Met a apasa a kesit me ren aramas non fansoun we—pokiten “meinisin” ra sinei pwe uruon nom ra mak won sinin ira ika chon toropwe, tori ekkoch ier mwirin, nupwen seleich mecha mi mak ren makken nom ra pwa. Pwan, chon esit ra ara pwe aean simen, usun mi awewetiw me non ewe Puken Mormon, a nap seni an ekkewe chon Merika me nom sinei—tori forun simen a pwa non Merika me nom. Ifa usun ekkewe chon esit repwene awewei ekkei me pwan ekkoch mettoch ra kuna? Oupwe kuna pwe eni Jospeh a fen fokkun seroch ne esisinata. Nge, ina mwo ika an esisinata esap pung, mi ungeni mettochun sains meinisn me tipachemen sukun, i a esisinata pwe mi pung nupwen ekkewe ekkch mi mwan.

Mwirin ekkei mettoch meinisin, emon epwe eis ifa usun emon a tongeni nuku pwe ekkei titipen pekin pesepes me echimw, usun mi kawor me ren chon esit, ra seroch ne chufengen non ew napanap a atufichi Joseph ne makkei ewe Puken Mormon iwe a forata ew angangen setan. Nge ifa usun ei a weweoch? Non ennetin ungeni och sokkun nuku, ei puk a fen amemefi minion ne ungeni Setan me manau usun manauen Kraist.

Nupwen emon epwe finata ne nuku an ekkewe chon esit awewe, me rei, ai upwe fori esap esenipato och mirit ika fefeitan ngun. Ika upwe nuku ena sokkun awewe, upwe etiwa ekkoch tettenin nuku ese pung. Iwe, eni upwe pwan epinengaw seni ekkewe kapasen pwarata an ekkewe 11 chon pwarata,³ ina mwo ika emon me emon ir mi nukuchar ngeni ar kapasen pwarata tori ar mano; eni upwe fen pwan poutano ewe nongonong mi pin minne a aurano peichen ei puk mi pin fiti ennetin seni nang; eni upwe pwan epinengaw seni ewe ennet pwe chommong, fiti pwisin ngang, aua arap ngeni Kot ren am aneani ei puk nap seni ekkoch; me akkaewin, eni upwe fen amam mongungun ewe Ngun mi Fel. Ei epwe fen ungeni mettoch meinisin ngang mi sinei pwe mi ennet.

Emon nein chieni kewe mi och me tipachem a suseni ewe Mwichefen ren och fansoun. A keran chok mak ngeniei usun an niwinsefan: “Akkom, ua mochen epwe affatoch ngeni ei ewe Puken Mormon non uruo, neni, kapas, me non oreni. Nge nupwen ua siwini ai ekiek ngeni met a aitikich usun ewe kapas allimen Jises Kraist me An misin mi amanaua kich, a poputa ne wor ai kapasen pwarata usun ennetin. Non ew ran nupwen ua aneani ewe Puken Mormon non rumwei we, ua kouno, fotopukutiw, me apasa ew ennetin iotek me mefi fatan pwe Semach won Nang a mongunungun ngeni nguni pwe ewe Mwichefen me ewe Puken Mormon ir mi ennetin pung. Ewe unungat esop ier fansoun ai kaeo sefan usun ewe Mwichefen a unusen emwenisefani ei me peseiei usun ennetin.”

Ika emon epwe awora fansoun ne aneani me ekipwichi ewe Puken Mormon, usun chienei we, me ausening ngeni ekkewe uwan Ngunupin mi ngarangar, iwe i epwe angei ewe pwarata a mochen.

Ewe Puken Mormon ina ew me nein an Kot kewe auchean niffang ngeni kich. A ew ketinas me eppet—a tinano ewe kapasen Kot non maun epwe fiu fan iten netipen ewe mi pung me a fis pwe ew eppetin ennei mi nap. Kich souneng, mi fen wor rech ewe tufich ne eppeti ewe Puken Mormon me pwan ewe tufichin ach sipwe nounou—ne afanafana ekkewe nongonong mi pin ren manaman me apasa kapasen pwarata mi nap usun Jises Kraist.

Ua apasa ai ennetin kapasen pwarata pwe ewe Puken Mormon a chiaku me ren ewe niffang me manamanen Kot. Ina an Kot pwarata mi unusen pochokun usun an Jises Kraist pin, ewe osini usun kokkon Joseph Smith, me ewe ennet usun ei Mwichefen. Amwo epwe winiti ewe foun nongonongen ach kapasen pwarata, eni repwe apasa usun kich, ina usun chok ekkewe chon Leiman ra siwin, “rese tongeni rikino” (Alma 23:6). Non iten Jises Kraist, amen.