Li raatin li Dios: Lix Hu laj Mormon

Lix Hu laj Mormon ink’a’ ka’ajwi’ wan choq’ taqenaqil pek li xaqab’anb’il wi’ li qapaab’aal, naru ajwi’ chi wank choq’ taqenaqil pek sa’ lix nawom qach’ool, re naq jo’q’e neke’chal li xyalb’al qix malaj li patz’om li ink’a’ sumenb’il, nakana lix nawom qach’ool chi xaqxo sa’ xna’aj. Li hu a’in naq nab’isman sa’ li b’isleb’aal re li yaal, natawman naq nim wi’chik xwankil chiru lix na’leb’eb’ chixjunileb’ li neke’wech’ok re. K’a’ut? Xb’aan naq wi yaal a’an, yaal ajwi’ naq laj Jose Smith kiwan choq’ profeet, ut naq a’in lix Iglees li Jesukristo li k’ojob’anb’il wi’chik, maak’a’ naxye k’a’ru malaj ani wan li nayehok re naq ink’a’. Xb’aan a’in, eb’ laj wech’onel k’eek’ookeb’ xch’ool chixk’utb’al naq moko yaal ta lix Hu laj Mormon, a’b’anan maamin te’ruuq chi elk chi us, xb’aan naq tz’aqal yaal li hu a’in.

Xb’een, eb’ laj wech’onel tento te’xye chanru naq laj Jose Smith, jun saaj aj k’aleb’aal 23 chihab’ xyu’am li ink’a’ mas tzolb’il, kixk’uub’ jun li hu wan wi’ k’iila cient chi ak’ k’ab’a’ej reheb’ li winq ut reheb’ li na’ajej, jo’ ajwi’ xk’ihal li seraq’ chirix li k’a’ru xk’ulman. Chi jo’kan, wankeb’ laj wech’onel li neke’xye naq laj Jose q’axal seeb’ chaq xna’leb’, ut naq kiroksiheb’ k’iila hu, ut li k’a’aq chik re ru natawman sa’ lix tenamit, re xyiib’ankil li esilal yeeb’il sa’ lix Hu laj Mormon. A’b’anan us ta neke’xye chi jo’kan, sa’ xyanqeb’ li ke’ilok re, maajun xye naq kiril laj Jose rik’ineb’ li hu ut li k’a’aq chik re re naq kixtikib’ xjaltesinkil ru.

Ut wi ta yaal li na’leb’ a’in, toj ink’a’ nak’anjelak re xk’utb’al chanru naq ki’ok chi wank lix Hu laj Mormon. Tento ajwi’ xsumenkil li patz’om a’in: Chan ru kirileb’ laj Jose ru chixjunil li hu a’in, ut rik’in li na’leb’ wan chi sa’ kirisi chaq li ink’a’ nak’anjelak, kixkanab’ chi tustu chixjunil li na’leb’ chirix ani wan b’ar ut jo’q’e, ut kixye li aatin sa’ jun xikik? Xb’aan naq laj Jose Smith, naq kixjaltesi ru li aatin, maajun tz’iib’ahom wan rik’in. Li xEmma, li rixaqil kixye: “Maak’a’ rik’in a’an junaq tz’iib’ahom chi moko junaq hu re taaril chaq. ... Wi ta wan k’a’ruhaq xkomon a’an rik’in, ink’a’ raj kiru chixmuqb’al chiwu.”¹

Chi jo’kan, chan ru kixb’aanu laj Jose li nimla k’anjel a’in, ut kixye raatinul jun li hu numenaq oob’ cient xperel, chi maak’a’ k’a’ru tz’iib’anb’il? Re xb’aanunkil chi jo’kan, ink’a’ tz’aqal naq q’axal seeb’ xna’leb’, tento raj naq jultikaq re chixjunil. Wi ut yaal a’in, k’a’ut naq eb’ laj wech’onel ink’a’ neke’xye resil li nimla seeb’al a’in?

A’ut toj wan chik. Eb’ li na’leb’ a’in ka’ajwi’ neke’aatinak chirix li k’a’ru yeeb’il resil sa’ li hu. Wan ajwi’ li patz’om a’in: chan ru kixyiib’ laj Jose jun li hu li nak’utun wi’ xsaqenkil li Musiq’ej, ut b’ar kixtaw li chamal tzol’leb’ li nakutanob’resink re malaj natuqub’ank re li paab’anb’il xb’aaneb’ laj Kristiano sa’eb’ li kutan a’an?

Jo’ jun eetalil, lix Hu laj Mormon naxk’ut li moko paab’anb’il ta xb’aan jalaneb’ chik aj Kristiano, naq lix t’anik laj Adan a’an jun li chaab’ilal li tento ki’uxman. A’an naxk’utb’esi k’a’ruheb’ li sumwank li wankeb’ sa’ li kub’iha’, li ink’a’ yeeb’ileb’ resil sa’ li Santil Hu.

Jo’kan ajwi’, naru napatz’man: b’ar kixtaw laj Jose li xnimal ru na’leb’ naq sa’ xk’ab’a’ lix tojb’al rix li maak kixb’aanu li Kristo, a’an naru chiqach’ajb’al, ut jo’kan ajwi’ chixtz’aqob’resinkil qu? B’ar kixtaw li xnimal ru aatin chirix li paab’aal sa’ Alma 32? Malaj li raatin li rey aj Benjamin chirix lix tojb’al rix li maak xb’aan li Kristo, a’an li aatin q’axal nim chirix a’in sa’ chixjunileb’ li loq’laj hu? Malaj li jaljookil ru aatin chirix lix toonal li che’ olivo, rik’in xk’ihal lix raqal ut xnimal lix na’leb’? Naq nawil ru li jaljookil ru aatin a’in, na’ajman naq nintz’iib’a resil re xtawb’al ru chixjunil li na’leb’ wan chi sa’. Ma taqapaab’ tab’i’ naq laj Jose Smith yal kixyeheb’ li aatin a’in chi maak’a’ xkawresinkil rib’ ut chi maak’a’ tz’iib’anb’il?

Ink’a’ naru naq kiwan chi jo’kan; wan reetalil li ruq’ li Dios sa’ chixjunil lix Hu laj Mormon, ut natawman sa’eb’ li xninqal ru yaalil na’leb’ li wankeb’ chi sa’, jo’eb’ li chaq’al ru aatin chirix lix tojb’al rix li maak xb’aan li Jesukristo.

Wi ta maawa’ profeet laj Jose, re xk’utb’al chanru naq ke’k’ulman li k’iila xninqal ru na’leb’ a’in chirix li paab’aal, eb’ laj wech’onel tento ajwi’ raj te’xye naq a’an q’axal aj na’onel chirix li paab’aal. A’b’anan wi ta yaal a’an, taaruuq raj taqapatz’: k’a’ut naq ka’ajwi’ laj Jose, chiruheb’ li 1800 chihab’ chirix lix yu’am li Kristo, kiru chixkutanob’resinkil xk’ihal li na’leb’ a’in? Lix sumenkil a’an naq a’ chi k’utb’esinb’il kichal li hu a’in, moko rik’in ta lix seeb’al lix k’a’uxl.

Ut us ta taqak’oxla naq laj Jose a’an jun nimla aj na’onel chirix li paab’aal, ut naq chixjunil jultik re—a’in ink’a’ naraj naxye naq chaab’il chi tz’iib’ak. Re xch’olob’ankil chanru naq wan lix Hu laj Mormon, eb’ laj wech’onel tento ajwi’ te’xye naq laj Jose ak wan xseeb’al chi tz’iib’ak naq 23 chihab’ xyu’am. Wi ink’a’ jo’kan, chan ru naq kixjunaji k’iila k’ab’a’ej, na’ajej, ut b’aanuhom sa’ jun nimla esilal li maak’a’ xmajelal? Chan ru naq kitz’iib’ak chirixeb’ li ninqi pleet, kixye li chaq’al ru aatin, ut kixk’oxla chi ak’il k’iila raqal chi aatin li eetanb’il, li tzolb’il, li yeeb’il, ut li k’eeb’il chi k’ute’k xb’aan k’iila mil chi komon, jo’ li aatin, “Jo’q’e wankex chi k’anjelak chiru lee rech winqilal, ka’ajwi’ wankex chi k’anjelak chiru lee Dios” (Mosiah 2:17) malaj “Nekewan li winq re naq te’wanq xsahileb’ xch’ool” (2 Nefi 2:25). A’ineb’ li aatin li wankeb’ raam—eb’ li aatin li yo’yookeb’, li neke’musiq’ak ut neke’musiq’ank. Wi taqaye naq laj Jose Smith naq 23 chihab’ xyu’am wan tz’aqal xseeb’al chixtz’iib’ankil li xnimal ru k’anjel a’in chi jun xikik chiru tana’ 65 kutan, a’an ink’a’ naxk’am rib’ rik’in li k’a’ru naqanaw sa’ li yu’am a’in.

Li Awa’b’ej Russell M. Nelson, jun aj tz’iib’anel li chaab’il ut nim xna’leb’, xye we jun reheb’ li aatin li kixkawresi choq’ re jun li jolomil ch’utub’aj-ib’, a’an xtz’iib’a chi ak’il 40 sut. Ut anajwan ma taqaye naq laj Jose Smith, chi maak’a’ xtenq’ankil, kixye chixjunil lix Hu laj Mormon sa’ jun xikik, ut ka’ajwi’ kok’ tz’iib’ ke’jalman chirix a’an?

Li xEmma, rixaqil laj Jose, kixch’olob’ naq ink’a’ raj kiru a’an: “Laj Jose Smith [jo’ saaj winq] ink’a’ kiru chixtz’iib’ankil chi moko chixk’eeb’al chi tz’iib’ak jun li ch’ina hu re xtaqlankil, ut maamin kiru chixtz’iib’ankil jun li nimla hu jo’ lix Hu laj Mormon.”²

Ut sa’ roso’jik, us ta taqak’ul chixjunil li na’leb’ a’in li ch’a’aj xpaab’ankil, toj wan jun nimla ch’a’ajkilal choq’ reheb’ laj wech’onel. Laj Jose kixye naq lix Hu laj Mormon kiwan chi tz’iib’anb’il chiru perel ch’iich’ oor. Kiwech’man rix chi naab’al li na’leb’ a’in sa’ xkutankil laj Jose, xb’aan naq nawb’il xb’aaneb’ “chixjunil” naq eb’ li najteril esil wankeb’ chi tz’iib’anb’il chiru hu malaj tz’uum, toj ke’nume’ naab’al chihab’ chik, toja’ naq ke’tawman najteril hu chi tz’iib’anb’il chiru perel ch’iich’. Jo’kan ajwi’, eb’ laj wech’onal xe’xye naq li kab’lak rik’in chun, jo’ yeeb’il resil sa’ lix Hu laj Mormon, ink’a’ ki’uxman sa’ xyanqeb’ li najter winq aj America—a’b’anan moqon ke’tawman kab’l re chun sa’ najter America. K’a’ru naru neke’xye laj wech’onel chirixeb’ li na’leb’ a’in li xe’tawe’ moqon? Tento raj naq q’axal us chi q’ehink laj Jose. Us ta maajun nanawok re li na’leb’ a’in sa’ xkutankil a’an, tento taqaye naq a’an kiq’ehin chi us, naq maa’ani chik kixnaw.

Sa’ xraqik chixjunil, naru taqapatz’ k’a’ut naq taapaab’amanq naq chixjunileb’ li na’leb’ a’in li yeeb’il xb’aaneb’ laj wech’onel xe’ru chixjunajinkil rib’ yal chi jo’kan, ut xe’xkanab’ naq laj Jose tixtz’iib’a lix Hu laj Mormon re xwaklesinkil jun b’alaq’il na’leb’ re laj tza. A’b’anan chan put ru naru nawan a’in? Ink’a’ naru, xb’aan naq li hu a’in xreek’asi xch’ooleb’ k’iila mil chixtz’eqtaanankil laj tza, ut chi wank sa’ xyu’ameb’ jo’ chanru li Kristo.

Maare wankeb’ li te’ajoq re xpaab’ankil lix na’leb’eb’ laj wech’onel, a’b’anan choq’ we laa’in, maak’a’ xwankileb’ sa’ lin k’a’uxl ut sa’ lin musiq’. Re xpaab’ankileb’ a’an, tento raj naq tinpaab’ k’iila na’leb’ li k’utk’u naq moko yaal ta. Jo’kan ajwi’, tento raj tintz’eqtaana lix ch’olob’ahomeb’ laj yehol nawom chixjunjunqaleb’,³ us ta chixjunqaleb’ ke’kana chi xaqxo li raatineb’ toj sa’ xkamikeb’; tento raj tintz’eqtaana li choxahil tzol’leb’ li natawman sa’ li junjunq perel re li hu a’in, jo’ ajwi’ li yaal wan chi sa’, tento raj naq tintz’eqtaana naq k’iila mil, jo’ laa’in, q’axal wi’chik xe’ru chixjilosinkil rib’ rik’in li Dios rik’in rilb’al xsa’ li hu a’in chiru k’a’ruhaq chik chi hu, ut sa’ xb’een chixjunil, tento raj naq tintz’eqtaana li k’utb’il chiwu xb’aan li Santil Musiq’ej. Chi jo’kan yooqin raj chixtz’eqtaanankil chixjunil li ninnaw naq yaal.

Jun li wamiiw li seeb’ xch’ool ut raab’il inb’an kixkanab’ li Iglees chiru jarub’aq chihab’. A’an xtz’iib’a jun li hu we chirix lix sutq’ijik: “Sa’ xtiklajik chaq, xwaj naq taak’utmanq chiwu naq yaal lix Hu laj Mormon rik’in li k’a’ru tzolb’il chirix li najter kutan, li ch’och’, li aatinob’aal, ut li tenamit. A’b’anan naq xinjal inna’leb’ re xsik’b’al li k’a’ru naxk’ut li hu chirix lix evangelio li Jesukristo ut lix k’anjel re kolok, xin’ok chixk’ulb’al xnawom inch’ool naq yaal. Sa’ jun kutan naq yookin chaq chi ilok sa’ lix Hu laj Mormon sa’ lin warib’aal, xinraqe’, xinwiq’la, ut xintijok chi anchal inch’ool, ut xweek’a rik’in nimla kawilal naq lin Choxahil Yuwa’ xye re lin musiq’ naq li Iglees ut lix Hu laj Mormon, a’aneb’ tz’aqal yaal. Chiru oxib’ chihab’ rik’in meer yookin chi tzolok chi ak’il chirix li Iglees, ut xink’ame’ chixnawb’al chi anchal inch’ool ut chi anchal ink’a’uxl naq yaal.”

Wi taak’e laa hoonal re rilb’al ut xk’oxlankil lix Hu laj Mormon chi tuulan aach’ool, jo’ xb’aanu li wamiiw, wi taak’e aaxik chiru lix ki’il uuchinihom li Musiq’ej, timil timil taak’ul lix nawom aach’ool li ajb’il aab’aan.

Lix Hu laj Mormon a’an jun reheb’ li maatan q’axal nim kixk’e li Dios qe. A’an jun yok’leb’ ch’iich’ ut jun ramleb’—naxtaqla li raatin li Dios chi pleetik choq’ reheb’ li raameb’ li tiikeb’ xch’ool, ut q’axal nak’anjelak re xkolb’al rix li yaal. Jo’ aj Santil Paab’anel, laa’o nokoru chixkolb’al rix lix Hu laj Mormon, a’ut naru ajwi’ taqoksi choq’ k’anjeleb’aal re pleet—re xjultikankil rik’in wankilal li choxahil tzol’leb’ wan chi sa’, ut re xch’olob’ankil naq sa’ xb’een chixjunil, naxk’ut xyaalal li Jesukristo.

Laa’in ninch’olob’ chi tiik li waatin naq lix Hu laj Mormon kijaltesiman rik’in lix maatan ut lix wankil li Dios. A’an tz’aqal raatin li Dios, li naxk’ut xyaalal lix diosilal li Jesukristo, lix b’oqb’al laj Jose Smith jo’ profeet, ut naq tz’aqal yaal li Iglees a’in. Chiwanq a’an choq’ taqenaqil pek li xaqab’anb’il wi’ lix nawom qach’ool, re naq taayeemanq chiqix jo’ kiyeeman chirixeb’ laj Lamanita li ke’jale’ xch’ool, “maajo’q’e ke’xjalb’ehi rib’ ” (Alma 23:6). Sa’ lix k’ab’a’ li Jesukristo, amen.