O Le Molimau Mamana a le Atua: O Le Tusi a Mamona

O le Tusi a Mamona e le gata o le maa’au’au o lo tatou talitonuga faalelotu, peitai e mafai foi ona avea ma maa’au’au o a tatou molimau a oo ai ina tatou fetaiai ma tofotofoga ma fesili e lei taliina, e mafai ai ona faamautuina a tatou molimau. O lenei tusi e tasi e sili atu lona mamafa i le fua o le upumoni, nai lo le mamafa o faitioga uma e faasaga i le tusi. Aisea? Aua afai e moni, o lona uiga o Iosefa Samita o se perofeta ma o le Ekalesia toefuataiina lenei a Iesu Keriso, tusa lava pe o a nisi finauga iloga e tetee ai. Ona o lenei le mafuaaga, ua faamoemoe ai le au faitio ia le faamaonia le faapogai paia o le Tusi a Mamona, ae o faafitauli o latou fetaiai e le mafaafoeina aua e moni le tusi nei.

Muamua, o faitioga e tatau ona faamalamalama mai pe na faapefea e Iosefa Samita, o se tamaitiiti faifaatoaga e 23 tausaga e utiuti sona a’otauina, ona fatuina se tusi e faitau selau igoa ma nofoaga uigaese, faapea foi tala auiliili ma mea na tutupu. Ina ia faamalamalamaina lenei mea, e toatele le au faitio sa fai mai faapea o ia o se alii atamai i fatufatuga o le sa faalagolago i le mau tusi ma isi punaoa i le lotoifale e fatufatu ai anotusi iloga o le Tusi a Mamona. Ae e ese mai la latou mau, e leai se molimau e tasi o faapea na vaai ia Iosefa ma nisi o nei punaoa le faavaea a o lei amataina le faaliliuga.

Tusa lava foi pe na moni lenei mau, e matuai le lava e faamalamalama ai le i ai o le Tusi a Mamona. E tatau lava foi ona tali se tasi i le fesili: Na faapefea ona faitau e Iosefa nei punaoa le faavaea uma, ilo ese faamatalaga e le talafeauga, tausia le ogatusa o faamatalaga pei o ai ma i fea ma pe o anafea, ona faalau atu lea i se manatua atoatoa?Ina o faaliliu Iosefa, sa leai lava ni ana mea tusitusi. O le mea moni, sa toe faamatala e lona toalua o Ema: “Sa leai ni ana faamaumauga tusitusia po o se tusi e faitau mai ai. …A na fai e i ai se mea o nei mea, semanu e le mafai ona ia nanaina mai ia te au.”¹

O lea na faapefea la ona faatino e Iosefa lenei galuega ofoofogia o le faalau atu o se tusi e 500-ma sili atu itulau e aunoa ma ni mea tusitusi? Ina ia faia, atonu e le gata ina o ia o se alii atamai fatufatu ae sa ia te ia foi se manatua maoae le atoatoa sa matuai tulaga ese. Ae afai e moni lenei mea, aisea na le tulimata’i atu ai e lana au faitio lenei taleni ofoofogia?

Ae e i ai se mea e sili atu. O nei finauga sa na o le anotusi faasolopito o le tusi na faitaulia. O loo tumau pea faafitauli moni: na faapefea ona aumaia e Iosefa se tusi e aumaia ai le Agaga, ma o fea na ia maua mai ai nei aoaoga faavae maoae, o le tele lava ua faamanino ai feteenaiga o talitonuga Kerisiano i lona taimi?

Mo se faataitaiga, o loo aoao mai e le Tusi a Mamona, e ese mai talitonuga o le tele o Kerisiano, e faapea o le Pau o Atamu o se laasaga lelei i luma.Ua ia faaali mai feagaiga na faia i le papatisoga, lea e le o taua i le Tusi Paia.

E le gata i lea, e ono fesili se tasi: o fea na aumai ai e Iosefa le malamalamaaga mamana e faapea o le Togiola a Keriso, e le gata ina mafai ai e Ia ona faamama i tatou ae e faaatoatoaina ai foi i tatou? O fea na ia aumai ai le lauga maoae i le faatuatua oi le Alema 32? Po o le lauga a le Tupu o Peniamina i le Togiola a le Faaola, atonu o le lauga aupito ofoofogia i lenei mataupu i tusitusiga paia uma? Po o le talafaatusa o le laau o le olive ma lona lavelave ma le tamaoaiga tele i aoaoga faavae? Pe a ou faitau i le talafaatusa, ou te tago tusi se ata e mulimuli ai i ona auiliiliga. Pe ua manatu nei ea ua tatou malamalama sa na ona faalau lava e Iosefa Samita nei lauga mai ona mafaufauga e aunoa ma ni mea tusitusia?

E ese ai mai na ituaiga o faaiuga, ua tumu le Tusi a Mamona i ata lolomi o alofiaao o le Atua, e pei ona faamaonia i upumoni faaleaoaoga faavae mamalu o le Togiola a Iesu Keriso.

A na fai e le o se perofeta ia Iosefa, o lona uiga ina ia tusia nei mea ma le tele o isi malamalamaaga ofoofogia ma faaleaoaoga faavae, e tatau i le au faitio ona faia se finauga faapea o ia foi o se alii atamai i mataupu silisili. Ae, pe afai o lea, e ono fesili se tasi: aisea sa na o Iosefa ai i le 1,800 tausaga na sosoo ma le misiona a Keriso na aumaia sea aofaga lautele o aoaoga faavae tulaga ese ma le manino? Ona o faaaliga, ae le o le atamai, o le faapogai lena o le tusi lenei.

Ae tusa lava foi pe tatou te manatu o Iosefa o se alii atamai i mataupu silisili, ma se manatua maoae—o ia lava taleni e le lava e avea ai o ia o se tusitala maoae le tomai. I le faamatala ai o le i ai o le Tusi a Mamona, e tatau ai foi i le au faitio ona faia se mau faapea o Iosefa o se tusitala talenia lava ia i le 23 o ona tausaga. A leai, pe na faapefea ona tuufaatasia le anoano o igoa, nofoaga, ma mea na tutupu i se galuega sologa lelei e aunoa ma ni mea e le gatusatusa?Na faapefea ona ia tusia faiga faatogafiti auiliili o taua, fatu lauga mamana, ma fatufatu fasifuaitau o loo faailoga, taulotoina, sii mai, ma tuu i luga o faitotoa o pusa aisa e le faitau miliona o tagata, e pei o, “Pe a outou auauna atu i o outou uso a tagata, ua na o lo outou auauna atu lava lea i lo outou Atua”(Mosaea 2:17) po o le “Ua i ai tagata ina ia latou maua le olioli” (2 Nifae 2:25). O savali nei e i ai le mana—savali e foliga mai e ola ma manava ma e musuia ai. O le faapea mai o Iosefa Samita i le 23 o ona tausaga na umia ai e ia ni tomai e tatau ai e tusia ai lenei galuega ofoofogia i se tusitosi e tasi i le pe tusa ma le 65 aso faigaluega, e manino le ese pe a faatusa i mea moni o le olaga.

Sa faasoa mai e Peresitene Russell M Nelson, o se tusitala tomai ma poto masani, ua silia ma le faa-40 ona toe tusi se lauga o se konafesi aoao lata mai.Pe ua tatou talitonu nei ea o Iosefa Samita, na o ia lava, na faalauina le Tusi a Mamona atoa i se tusitosi e tasi ma na o nai suiga iti o le kalama na faia i le uluai kopi?

Sa faamautu mai e le faletua o Iosefa, o Ema, le le mafaia o sea ituaiga o ausiaga: “O Iosefa Samita [a o avea o se alii talavou] sa le mafai e ia ona tusitusi pe faalau se tusi manino ma lelei ona faaupu, ae tu’u ai ia le faalauina o se tusi e pei o le Tusi a Mamona.”²

Ma le mea mulimuli, tusa pe toatasi e taliaina finauga uma na ta’ua, tusa lava pe masalomia atonu lava e sa’o, ae o loo feagai pea le au faitio ma se isi toatuga tele. Sa ta’u atu e Iosefa sa tusia le Tusi a Mamona i papatusi auro. O lea mau sa faaauau pea ona faitioina e le au faitio i ona aso—aua na iloa e “tagata uma” o talafaasolopito anamua sa tusia i pa’ulaau po o pa’umanu, seia oo i tausaga mulimuli ane, na maua ai papatusi apamemea o tusia ai tusiga anamua. E le gata i lea, sa fai mai le au faitio e faapea o le faaaoga o le sima, o loo faamatala mai i le Tusi a Mamona, o se mea sa le i oo i ai le tomai faatufugaga o tagata Amerika i lea taimi—vagana ina ua maua fausaga o sima i Amerika anamua. Ua faapefea nei la ona faamatala e le au faitio nei mea? Ua outou vaai la, o Iosefa, atonu sa o se tagata mate e ese le laki. Ae po o le a, e ui i le gasu na faasagatau ia te ia, faasagatau i le silafia uma faasaienisi ma faaakatemia, sa sa’o lava lana mate ae sese uma isi.

I le uma ai ona manatunatu i nei mea uma, e ono fesili se tasi pe mafai faapefea ona talitonu se tasi faapea na tuufaatasia faafuasei nei mea moni ma ‘malosiaga, e pei ona fautuaina e le au faitio, i se faiga na mafai ai e Iosefa ona tusi le Tusi a Mamona ma ua fafau mai ai se togafiti faasatani. Ae faapefea la ona sagatonu lenei mea? I le tetee tuusao i sea ituaiga o mau, o lenei tusi ua musuia ai le faitau miliona e tetee atu ia Satani ma ola atili i ni olaga faapei o Keriso.

E ui atonu e filifili se tasi e talitonu i le faamalamalamaga a le au faitio, ia te a’u lava ia, o le faia o lea mea e le aumaia ai se alualu i luma faaleatamai po le faaleagaga. Ina ia talitonu i lena mea, e tatau ona ou taliana se faasologa o manatu e le faamaonia. E le gata i lea, e tatau ona ou faaleaogaina le molimau a molimau e toa 11,³ e ui ina tumau faamaoni tagata taitasi i lana lava molimau e oo i le iuga; e tatau ona ou teena le aoaoga faavae paia o loo faatumulia ai lea itulau ma lea itulau o lenei tusi paia i ona upumoni faalelagi; e tatau ona ou faaleaogaina le mea moni e faapea e anoanoai tagata, e aofia ai ma au lava, ua latalata atili i le Atua ona o le faitauina o lenei tusi nai lo se isi lava, ma e sili atu i lo mea uma, e tatau ona ou faafitia musumusuga mautinoa a le Agaga Paia. O le a feteenai lena ma mea uma ua ou iloa e moni.

Sa tuua e se tasi o a’u uo lelei atamai le Ekalesia mo se taimi. Sa tusi mai o ia talu ai nei e uiga i lona toe foi mai: “Muamua, sa ou manao ina ia faamaonia mai ia te au le Tusi a Mamona i lona faasolopito, faaletino, faalegagana, ma faaleaganuu. Peitai, ina ua ou suia la’u taulaiga i le mea o loo ia aoao mai e uiga i le talalelei a Iesu Keriso ma Lana misiona laveai, sa amata ona ou maua se molimau i lona moni. I se tasi aso a o ou faitauina le Tusi a Mamona i lo’u potu, sa ou taofi ae tootuli i lalo ma avatu se tatalo ma le loto ma lagonaina ma le manino sa musumusu mai le Tama Faalelagi i lo’u Agaga e faapea o le Ekalesia ma le Tusi a Mamona e matuai moni a’ia’i. O lau tolu ma le afa tausaga o le toe sailiilia o le Ekalesia na toe taitai mai ai a’u ma le loto atoa ma le faatalitonuina i lona moni.”

Afai e faaalu e le tagata se taimi e faitau ai ma manatunatu loloto ma le lotomaualalo le Tusi a Mamona, e faapei ona faia e la’u uo, ma uai atu i fua suamalie o le Agaga, ona mulimuli ane lea ona maua le molimau o loo moomia.

O le Tusi a Mamona o se tasi o meaalofa e le mafaatauina a le Atua ia i tatou. O le pelu ma le talita—na te auina atu le upu a le Atua i le taua e tau ai mo loto o e amiotonu ma avea ai o se puipui autu o le upumoni. I le avea ai ma Au Paia, e le gata ua ia i tatou le matafaioi ma le avanoa le laumaua e puipuia ai le Tusi a Mamona ae o le avanoa foi e faaaoga tonu ai—e folafola atu ai ma le mana ona aoaoga faavae paia ma tautino atu ai le molimau faapaleina ia Iesu Keriso.

E tuuina atu la’u molimau maua’i na faaliliuina le Tusi a Mamona e ala i le meaalofa ma le mana o le Atua. O le molimau mamana a le Atua i le paia o Iesu Keriso, le valaauga faaperofeta o Iosefa Samita, ma le moni a’ia’i o lenei Ekalesia. Ou te faamoemoe o le a avea ma maa‘au’au o a tatou molimau, ina ia ta’ua ai i tatou, e faapei o sa Lamana na liua, “sa lei pauu ese lava i latou” (Alema 23:6). I le suafa, o Iesu Keriso, amene.