Lub Caij ntawm tej Txuj Ci Tseem Ceeb Puas Tau Tsum?

Ib xyoo tas los, thaum kuv ua hauj lwm hauv lub xeev California, kuv tau nrog ib ceg txheem ntseeg tus thawj tswj hwm mus xyuas Clark thiab Holly Fales thiab nkawd tsev neeg nyob hauv tsev. Lawv qhia kuv tias tsis ntev tas los nkawd twb tau pom ib qho txuj ci tseem ceeb. Thaum wb tuaj txog, nyuaj rau Clark sawv thiab tos txais peb vim nws coj ib qho khoom kom pab nws lub nrob qaum khov, khoom pab nws caj dab khov, thiab khoom pab nws caj npab khov.

Ob lub hlis ua ntej, Clark, nws tus tub Ty, thiab 30 tus tub hluas thiab thawj coj ntxiv tau pib ua ceg txheem ntseeg kev lom zem nraum zoov, taug kev mus saud lub Roog Shasta uas siab li 14,180 fij (4,322 m), yog ib lub ncov roob siab tshaj plaws nyob hauv California. Thaum txog hnub ob uas ua nyuaj rau lawv nce mus, lawv feem coob twb txog lub ncov roob lawm—yog ib yam zoo siab kawg vim lawv twb npaj tau ntau lub hlis kom ua tau li no.

Ib tug ntawm thawj pawg uas los txog lub ncov roob ntawd yog Clark. Tom qab nws so me ntsis ze rau npoo roob, nws sawv thiab pib mus kev. Thaum nws ua li ntawd, nws ntog thiab poob qab ntawm npoo ntsa tsuag, poob mus 40 fij (12 m) ces dov toj saum cov dej khov mus 300 fij (91 m) ntxiv. Zoo siab uas Clark tseem ciaj, tiam sis nws raug mob heev thiab txav tsis taus hlo li.

Tej txuj ci tseem ceeb uas Clark tau thaum nws raug xwm txheej ceev no nyuam qhuav pib xwb. Yeej yog “hmoov zoo” vim tej neeg uas tuaj cuag nws ua ntej yog ib pawg nce roob uas muaj neeg paub cawm neeg saum roob thiab cov kwv kho mob kam ceev. Lawv pab kho Clark txoj kev ntshaib ceeb thiab muab khoom kom pab nws lub cev sov. Kuj yog “hmoov zoo” uas pawg no twb sim ib lub tshuab xa xov tshiab thiab xa kev thov pab los ntawm ib qho chaw uas cov xov tooj tsis ua hauj lwm. Lawv xa ib lub nyab hoom tshuab me me tuaj rau lub Roob Shasta uas nyob deb li ib teev. Nyob siab li ntawd ua nyuaj rau lub nyab hoom tsaws thiab tom qab sim ob zaug, thiab txawm cua tshuab hlob heev los, tus kws tsav pib zaum thib peb. Thaum lub nyab hoom tshuab los tig txawv li tau ua tas los lawm, yog “hmoov zoo” uas cov cua hloov thiab lub nyab hoom tshuab twb tsaws ntev txaus cia pawg neeg ntawd tso Clark rau hauv qhov chaw me me nyob tom qab tus kws tsav nyab hoom lub rooj zaum.

Thaum lawv soj ntsuam Clark nyob hauv qhov chaw kho kev raug mob, kev soj ntsuam ntawd qhia tias nws twb lov pob txha nyob ntawm nws caj dab, nrob qaum, cov tav, thiab caj dab tes; ib lub ntws to qhov; thiab muaj ntau kev hle tawv thiab kev hlais. Yog “hmoov zoo” uas ib tug kws paub kho kev raug mob rau lub hlwb twb ua hauj lwm hnub ntawd; nws nyob hauv lub tsev kho mob no ob peb zaug ib xyoo xwb. Tus kws kho mob no hais tias nws tsis tau pom ib tug neeg raug mob npaum li no rau nws txha nrob qaum thiab txoj hlab ntsha caj dab uas tseem ciaj. Nws hais tias tsis yog Clark yuav ciaj xwb tiam sis nws kuj yuav rov zoo li qub. Tus kws phais mob hais tias nws tsis ntseeg Vajtswv, tiam sis hais txog Clark ces txhua yam yeej tsis yog raws li nws kawm txuj ci txog lub hlwb uas raug mob thiab piav hais tias yeej yog ib qho txuj ci tseem ceeb.

Tom qab Clark thiab Holly piav zaj no tas lawm, ua nyuaj rau kuv hais lus. Yeej yog tsis yog vim tau hais txog tej txuj ci tseem ceeb ntawd xwb, tiam sis yog vim muaj ib qho txuj ci tseem ceeb ntxiv. Kuv tau txais kev tshoov siab—ntawm sab ntsuj plig—hais tias Holly thiab nws tsib tug me nyuam uas zaum hauv chav nyob nrog lawv niam thiab txiv muaj kev ntseeg heev ces txawm muaj li cas thaum hnub ntawd los lawv yeej yuav txaus siab thiab lawv sab ntsuj plig tseem yuav muaj zog. Clark thiab Holly thiab nkawd ob tug me nyuam hlob, Ty thiab Porter, nrog peb nyob hauv lub Tsev Rau Rooj Sab Laj hnub no.

Thaum xav txog tsev neeg Fales zaj no, ua rau kuv xav txog tej xwm txheej uas lwm tus raug thiab. Yuav hais li cas txog Tsoom Haiv Neeg Ntseeg uas muaj kev ntseeg heev, txais cov koob hmoov pov thawj hwj, muaj neeg thov Vajtswv pab lawv, lawv ua raws li kev khi lus, thiab muaj kev cia siab, es lawv tsis txais ib qho txuj ci tseem ceeb? Tsis txais raws li lawv to taub yog ib qho txuj ci tseem ceeb. Tsis txais raws li lawv pom lwm tus txais ib qho txuj ci tseem ceeb.

Yuav hais li cas txog cov uas raug kev txom nyem loj heev—ntawm sab cev nqaij daim tawv, sab paj hlwb, sab siab ntsws—tau ntau xyoo los yog tas lawv lub neej hauv lub ntiaj teb no? Yuav hais li cas txog cov uas tuag thaum lawv tseem hluas?

Ob lub hlis tas los no, ob khub niam txiv uas sib yuav thiab muaj daim ntawv tso cai nkag tuam tsev, uas muaj peb tug me nyuam uas ua tub txib thiab tsib tug me nyuam tag nrho twb nce saum ib lub nyab hoom me me kom ya mus tsis deb. Kuv yeej xav hais tias lawv tau thov Vajtswv kom tsis muaj teeb meem ua ntej thiab thov Vajtswv thaum lawv lub nyab hoom muaj teeb meem loj heev ua ntej tsoo thiab tawg. Tsis muaj leej twg tseem ciaj sia. Yuav hais li cas txog lawv nev?

Tib neeg zoo thiab cov uas lawv hlub puas tsim nyog nug qhov uas Maumoos nug hais tias: “Lub caij ntawm tej txuj ci tseem ceeb puas tau tsum?”¹

Vim kuv tsis paub ntau kuv thiaj piav tsis taus vim li cas Vajtswv muab txoj kev pab thiab lwm lub sij hawm nws tsis ua li ntawd.Tiam sis tej zaum peb tsis to taub ib qho txuj ci tseem ceeb yog dab tsi.

Feem ntau peb piav hais tias ib qho txuj ci tseem ceeb yog thaum peb txais kev kho mob thaum cov kws kho mob piav tsis taus vim li cas los sis peb tsis raug xwm txheej loj heev thaum peb txais kev tshoov siab uas meej heev. Tiam sis, yog peb muab qhov txuj ci tseem ceeb txhais hais tias yog “ib yam xwm uas muaj los dhau ntawm Vajtswv lub hwj chim uas tib neeg tsis to taub”² ces ua rau peb lub zeem muag pom tej yam uas kav mus ib txhis. Kev txhais lo lus no kuj cia peb xav txog qhov uas kev ntseeg tseem ceeb npaum li cas thaum yus txais ib qho txuj ci tseem ceeb.

Maulaunais qhia hais tias, “Ib txwm tsis tau muaj dua leej twg ua tau tej txuj ci tseem ceeb txog rau thaum tom qab lawv ntseeg tso.”³ Amoos tshaj tawm hais tias, “Vajtswv tau muab ib qho cuab yeej xwv kom tib neeg, los ntawm kev ntseeg, yuav ua tau tej txuj ci tseem ceeb loj.”⁴ Tus Tswv tau tshwm sim rau Yauxej Xamiv hais tias, “Vim kuv yog Vajtswv, … thiab kuv yuav ua tej txuj ci tseem ceeb … rau txhua tus uas ntseeg kuv lub npe pom.”⁵

Tus Vaj Ntxwv Nenpukajnexales hais kom Sadalas, Mesakas thiab Anpenekaus teev tiam tus mlom kub uas nws hais tias yog ib tug vaj tswv, hais tias, “Yog nej tsis kam pe, kuv yuav muab nej pov rau hauv cub tawg.” Ces nws cem lawv hias tias “Nej xav hais tias tseem yuav muaj dua ib tug vaj tswv nyob qhov twg los pab tau nej thiab no los?”⁶

Peb tug thwj tim rau siab no hais tias, “Yog hais tias tus Vajtswv uas peb hwm pom zoo pab peb, nws yeej yuav pab kom peb dim ntawm cov nplaim taws thiab ntawm koj txhais tes. … Txawm yog nws tsis pab peb los peb hais rau koj hais tias peb yeej yuav tsis hwm thiab tsis pe [koj] tus mlom.”⁷

Lawv tso siab plhuav rau Vajtswv hais tias Nws cawm tau lawv, “txawm yog nws tsis pab,” lawv yeej ntseeg Nws txoj hau kev tag nrho.

Zoo ib yam li ntawd Txwj Laug David A. Bednar nug ib tug tub hluas uas tau thov kom txais ib zaj koob hmoov pov thawj hwj hais tias, “Yog peb Leej Txiv Saum Ntuj Ceeb Tsheej lub siab nyiam yog kom koj tuag tam sim no thaum koj tseem hluas mus rau lub ntuj ntsuj plig ua koj txoj hauj lwm qhuab qhia no, koj puas muaj kev ntseeg ua raws li Nws lub siab nyiam thiab tsis txhob txais kev kho mob?”⁸ Peb puas muaj kev ntseeg kom “txhob txais kev kho mob” kom dim peb tej kev txom nyem hauv ntiaj teb Vajtswv thiaj yuav kho peb zoo mus ib txhis li?

Ib lo lus nug tseem ceeb hais tias “Peb muab peb txoj kev ntseeg tso rau leej twg?” Peb txoj kev ntseeg puas tsom ntsoov rau qhov uas peb xav tsis raug kev mob kev nkeeg thiab kev txom nyem, los yog puas tsom ntsoov rau Vajtswv Leej Txiv thiab Nws txoj hau kev dawb huv thiab Yexus Khetos thiab Nws txoj Kev Theej Txhoj? Kev ntseeg Leej Txiv thiab Leej Tub ua rau peb to taub thiab txais yuav Nkawd lub siab nyiam thaum peb npaj nyob mus ib txhis.

Hnub no kuv ua tim khawv txog tej txuj ci tseem ceeb. Qhov uas yus yog Vajtswv tus me nyuam yog ib qho txuj ci tseem ceeb.⁹ Kev txais ib lub cev raws li Nws tus yam ntxwv yog ib qho txuj ci tseem ceeb.¹⁰ Lub txiaj ntsim uas yog tus Cawm Seej yog ib qho txuj ci tseem ceeb.¹¹ Yexus Khetos txoj Kev Theej Txhoj yog ib qho txuj ci tseem ceeb.¹² Qhov uas peb txais tau txoj sia nyob mus ib txhis yog ib qho txuj ci tseem ceeb.¹³

Txawm yog ib lub sij hawm zoo thov Vajtswv thiab ua hauj lwm kom txais kev pov hwm thiab kev kho mob ntawm sab ntsuj plig hauv lub neej no, peb yuav tsum tsom ntsoov rau tej txuj ci tseem ceeb ntawm sab ntsuj plig uas Vajtswv pub rau Nws cov me nyuam txhua tus. Txawm peb yog haiv neeg twg, txawm peb tuaj teb chaws twg tuaj, txawm peb tau ua dab tsi los yog peb hloov siab lees txim, txawm peb raug dab tsi los—peb txhua tus txais tau tej txuj ci tseem ceeb no zoo ib yam. Peb txoj kev ua neej yog ib qho txuj ci tseem ceeb, thiab yuav muaj tej txuj ci ntxiv thaum yav tom ntej. Los ntawm Yexus Khetos lub npe, amees.