Ma x’oso’ tab’i’ xkutankil li sachb’a-ch’oolej?

Jun chihab’ chaq anajwan, naq yookin chaq chixb’aanunkil jun lin k’anjel aran California, xkohin rochb’een jun li awa’b’ej re li oqech chirula’aninkil laj Clark ut li xHolly Fales ut lix junkab’al sa’ li rochoch. Ke’xseraq’i we naq toje’ ke’xk’ul jun li sachb’a-ch’oolej. Naq koowulak, laj Clark raasa naq kiwakli re xk’eeb’aal xsahil qach’ool, xb’aan naq wan li k’anjeleb’aal sa’ xxaal li rit, xja’aj, ut eb’ lix tel.

Toje’ chaq wiib’ po, laj Clark, li ralal aj Ty, ut maare lajeeb’ xkak’aal chik li saaj winq ut laj jolominel xkoheb’ chi b’eek toj sa’ xb’een li tzuul Shasta xk’ab’a’ li wan 4322 metro xteram, jun reheb’ li tzuul jwal nim xteram aran California. Sa’ li xkab’ kutan re lix kawil b’eenikeb’, naab’aleb’ re laj taqsinel tzuul ke’wulak sa’ xb’een li tzuul—ke’ru chixb’aanunkil a’an b’antiox re naq ke’xkawresi rib’ chiru naab’al po.

Sa’ li kutan a’an, jun reheb’ li xb’een kristiaan li ke’wulak sa’ xb’een li tzuul a’an laj Clark. Chirix jun li ch’ina hilank chire li xb’een li tzuul, kixaqli ut ki’ok chi b’eek. Naq kixb’aanu, kixtichk’o ut kit’ane’ chi pak’po chiru jun li nimla jul, ut kit’ane’ chaq chi xulxu chiru kab’laju metro ut chirix a’an kichal chi tolto chiru 91 metro toj taq’a. Laj Clark ink’a’ kikam, a’b’an mas ra kikana ut ink’a’ naru reek’asinkil rib’.

Eb’ li sachb’a-ch’oolej li kiril laj Clark chiru li kixk’ul, ka’ajwi’ a’an lix tikib’ankil. Eb’ li xb’een li kristiaan li ke’tawok re a’aneb’ re jun li ch’uut aj b’eenel sa’ kiche’ ut a’aneb’ aj xokol re li neke’xk’ul rahilal sa’ li k’iche’ ut aj tzolb’il b’anoneleb’. Sa’ junpaat ke’ril chanru wan laj Clark ut ke’xk’e lix ramb’al chiru li ke. Jo’kan ajwi, li ch’uut a’an yookeb’ chixyalb’al jun li ak’ b’oqleb’ ch’iich re numsink esil ut re xpatz’b’al li tenq’ li aajel ru sa’ eb’ li na’ajej b’ar wi’ li celular ink’a’ neke’xtaw lix señal. Sa’ junpaat, chalen chaq li na’ajej maare jun oor xnajtil, kitaqlaak jun li tulux ch’iich’ sa’ li tzuul Shasta. Chirix naq kixyal xaqliik wiib’ sut ut ink’a’ kiru xb’aan naq mas nach’ xteram choq’ re li tulux ch’iich, ut rik’in xyalb’al xq’e rik’in li kawil iq’, laj ch’e’ol re ki’ok wi’chik xyalb’al xaqliik sa’ rox sut. Naq li tulux ch’iich’ kinach’o’ sa’ junpak’al chaq, li iq’ kixjal lix b’e ut li tulux ch’iich’ kixaqli sa’ junpaat re naq ke’ru chixch’ik laj Clark sa’ junpaat sa’ li ch’ina na’ajej yamyo chirix lix chunleb’aal laj ch’e’ol re.

Naq laj Clark ki’ile’ sa’ jun li b’anleb’aal, ke’xk’e reetal naq mas naab’al lix tenb’al, chirix xja’aj, xxaal rit, xk’atq xsa’, ut xkux ruq’; lix pospo’y pejel ut naab’al lix yok’olal ut naab’al lix tz’uumal kipeje’. Ak re naq jun laj chaab’il b’anonel jwal nawb’il ru wan sa’ li b’anleb’aal a’an sa’ li hoonal a’an; ka’ajwi’ wiib’ oxib’ sut nawan sa’ li b’anleb’aal a’an chiru li chihab’. Laj b’anonel a’an kixye naq maajun wa rilom junaq kristiaan xk’ulb’al xiikil tene’k sa’ li xxaal rit ut sa’ li rich’mul nanumsin li kik’ sa’ li rulul ut ink’a’ ta raj kikam. Moko junes ta ki’oyb’eniman naq laj Clark ink’a’ taakamq, a’b’an naq taaruuq raj chi b’eek wi’chik. Laj b’anonel, li ink’a’ naxpaab’ li Dios, kixye naq li kik’ulman rik’in laj Clark moko naxk’ul ta rib’ rik’in chixjunil lix nawom chirix li toch’ol ut ka’ajwi’ naru nayeeman naq a’an jun li sachb’a-ch’oolej.

Naq laj Clark ut ut li xHolly ke’raqe’ xseraq’inkil li seraq’ a’an, ink’a’ kinru chi aatinak. Moko ka’aj ta wi’ xb’aan li sachb’a-ch’oolej li junpaat nak’eeman reetal, xb’aan aj b’an wi’ jun li sachb’a-ch’oolej nim wi’chik xwankil chiru a’an. Kichal jun li week’ahom—jun lix nawom inch’ool xb’aan li musiq’ej—naq li xHolly ut li junjunq reheb’ lix oob’ chi kok’al li wankeb’ sa’ li ochoch chixsutameb’ li xna’ xyuwa’ wankeb’ xnimaleb’ xpaab’aal li ke’ru raj wi’ xk’ulub’ankil a’ yaal k’a’ raj ru li kik’ulman sa’ li kutan a’an ut toj chi jo’kan ke’chaab’ilo’ raj sa’ musiq’ej. Laj Clark ut li xHolly ut li wiib’ ralal asb’ejeb’ chik, laj Ty ut laj Porter, wankeb’ qik’in anajwan sa’ li ch’utamil kab’l.

Naq nink’oxla rix li ke’xnumsi li junkab’al Fales, nink’oxla chi naab’al lix wanjikeb’ naab’aleb’ li kristiaan. K’a’ru taak’ulmanq rik’ineb’ li xiikileb’ aj Santil Paab’anel sa’ Roso’jikeb’ li Kutan li ninqeb’ xpaab’aal, li ak xk’ulumeb’ jun li osob’tesiik rik’in li tijonelil, li neke’tijok chi maak’a’ xlub’ikeb’, li neke’roxloq’i li sumwank, ut nujenaqeb’ rik’in oyb’enihom, a’b’an lix sachb’a-ch’oolej maajun wa nawulak? Jo’ chanru naq neke’ril li sachb’a-ch’oolej a’an. Malaj chanchan naq li jun ch’ol chik neke’xk’ul li sachb’a-ch’oolej.

K’a’ru taak’ulmanq rik’ineb’ li ani neke’xnumsi ninqi rahilal—sa’ tib’elej, sa’ k’a’uxleb’aal, malaj sa’ reek’ob’aal ch’oolej—chiru naab’al chihab’ malaj chiru chixjunil lix yu’ameb’? K’a’ru taak’ulmanq rik’ineb’ li neke’kam naq toj kok’eb’?

Toje’ wiib’ po chaq, wiib’ sumaleb’ li sumsu li wankeb’ lix hu re xk’ulub’il chi ok sa’ li santil ochoch, rochb’eeneb’ oxib’ li ralaleb’ ak q’ajenaqeb’ chaq sa’ lix mision ut oob’eb’ chik li alalb’ej sa’ xyanqeb’, xkoheb’ sa’ jun li ch’ina so’sol ch’iich’ chiru junpaataq. Nink’oxla chi yaal naq ke’tijok re xpatz’b’al lix k’aak’alenkileb’ naq maji’ neke’taqe’, ut ke’tijok chi anchaleb’ xch’ool naq li so’sol ch’iich’ ki’ok chi po’e’k sa’ li iq’ rub’elaj naq kit’ane’. Ke’kam chixjunileb’. K’a’ru taak’ulmanq rik’ineb’ a’an?

Ma wankeb’ sa’ xk’ulub’ li chaab’il kristiaan ut lix raarookeb’ komon sa’ xpatz’b’al rib’ jo’ kixpatz’ laj Mormon: “Ma ak x’oso’ xkutankileb’ li sachb’a-ch’oolej?”¹

Xb’aan lix paaltil innawom ink’a’ ninru chixch’olob’ankil k’a’ut naq wan sut naq wan li choxahil tenq’ ut wan naq maak’a’. A’b’an maare toj maji’ naqataw ru chi us k’a’ar a’an jun li sachb’a-ch’oolej.

Chi kok’ aj xsa’ naqaye naq li sachb’a-ch’oolej a’an li k’iraak chi maak’a’ xch’olob’ankil xb’aan lix nawomeb’ aj tz’ilol rix li kawilal malaj li kolq’e chiru k’a’ruhaq jwal xiwxiw xb’aan rab’inkil jun li hasb’ saqen ru. A’b’anan, xch’olob’ankil jun li sachb’a-ch’oolej jo’ “jun li tenq’ na’uxman xb’aan jun li choxahil wankil li ink’a’ neke’xtaw ru li wankeb’ sa’ li ruchich’och’ ”² naxk’e jun qana’leb’ chaab’il chik chirix li na’leb’ re li junelik q’e kutan. Li ch’olob’ank a’in nokoxtenq’a ajwi’ chirilb’al lix k’anjel li paab’aal sa’ xk’ulb’al junaq li sachb’a-ch’oolej.

Laj Moromi kixk’ut, “Chi moko junaq sut kixk’anjela anihaq li sachbʼa-chʼoolej, toj chirix xpaabʼaalebʼ.”³ Laj Ammon kixye, “Chi joʼkan li Dios kixkʼe chanru naq li winq, rikʼin paabʼaal, taaruuq chixkʼanjelankil li xninqal ru sachbʼa-chʼoolej.”⁴ Li Qaawa’ kixk’utb’esi chiru laj Jose Smith, “Xbʼaan naq laaʼin li Dios, … ut laaʼin tinkʼut li sachbʼa-chʼoolej … chiruhebʼ chixjunil li teʼpaabʼanq re lin kʼabʼaʼ.”⁵

Li rey aj Nabukodonosor kixtaqlaheb’ laj Sadrak, laj Mesak, ut laj Abed-nego naq te’xloq’oni li pech’b’il tz’ak re oor li kixwaklesi choq’ xdios, rik’in li xib’esink a’in, “Xb’aan naq wi ink’a’ teeloq’oni ru, sa’ junpaat texkute’q sa’ li xam li k’a’jo’ xtiqwal.” Chirix a’an kixhob’eb’ rik’in xyeeb’al reheb’, “Toja’ naq k’a’ chik chi diosil taakoloq eere sa’ wuq’?”⁶

Li oxib’ chi chaab’il tzolom a’an ke’xye: “Wi li Dios li naqaloq’oni ru naraj qakolb’al chiru li xam li k’a’jo’ xtiqwal. … A’b’anan wi ink’a’ tooxkol, ch’olch’ooq chawu, at rey, naq ink’a’ took’anjelaq chiruheb’ laa Dios.”⁷

A’an kaweb’ xnawom xch’ool chirix naq li Dios naru tixkoleb’ rix, “ut wi ink’a’,” wankeb’ xtz’aqalil lix paab’aal chirix lix k’uub’anb’il na’leb’.

Jo’kan ajwi’, sa’ jun sut li Elder David A. Bednar kixpatz’ re jun li saaj winq li kixpatz’ jun li rosob’tesinkil re li tijonelil, “Wi ta raj a’an rajom li qaChoxahil Yuwa’ naq sa’ laa saajilal tatk’ame’q raj xb’aan li kamk sa’ lix na’ajeb’ li musiq’ej re xb’aanunkil xkomon laa k’anjel, ma wan laa paab’aal re xkanab’ankil aawib’ chiru li rajom a’an ut naq ink’a’ tatk’irtesiiq?”⁸ Ma wan qapaab’al laa’o “[re] naq ink’a’ [took’irtesiiq]” chiru li qach’a’ajkilal sa’ ruchich’och’ re naq took’irtesiiq b’an chi junelik?

Jun li patz’om aajel ru xtz’ilb’al rix, a’an “B’ar naqak’e li qapaab’aal?” Ma ka’ajwi’ wan li qapaab’aal re k’irtesiik chiru li rahilal, malaj wan chi tiik chiru li Dios li Yuwa’b’ej ut lix santil k’uub’anb’il na’leb’ ut li Jesukristo ut lix tojb’al rix li maak kixb’aanu? Li paab’aal chirix li Yuwa’b’ej ut li Alalb’ej naxk’e chiqataw ru ut chiqak’ulub’a li rajomeb’ naq yooko chixkawresinkil qib’ choq’ re li junelik q’e kutan.

Anajwan ninch’olob’ xyaalal li sachb’a-ch’oolej. Li wank jo’ ralal xk’ajol li Dios a’an jun li sachb’a-ch’oolej.⁹ Xk’ulb’al qatib’el jo’ chanru xjalam-uuch ut jo’ chanru rilob’aal a’an jun sachb’a-ch’oolej.¹⁰ Li maatan re jun li Kolonel a’an jun li sachb’a-ch’oolej.¹¹ Lix tojb’al rix li maak xb’aan li Jesukristo a’an jun li sachb’a-ch’oolej.¹² Naq naru naqataw li junelik yu’am a’an jun li sachb’a-ch’oolej.¹³

Us ta us li tijok ut k’anjelak re xkolb’al qib’ chiru li toch’e’k sa’ tib’elej ut li k’iraak chiru li qawanjik sa’ li ruchich’och’, li qilob’aal tento naq tixjayaliheb’ li musiq’ejil sachb’a-ch’oolej li wankeb’ choq’ reheb’ chixjunileb’ li ralal xk’ajol li Dios. Maak’a’ naxye b’ar nokochal chaq, maak’a’ naxye k’a’ru li qatenamit, maak’a’ naxye li k’a’ru qab’aanuhom chaq wi naqajal qak’a’uxl, maak’a’ naxye li xb’aanuhomeb’ qe—juntaq’eet li k’ulub’ejil k’eeb’il qe chiqajunilo re xk’ulb’al li sachb’a-ch’oolej. Laa’o jun li yo’yookil sachb’a-ch’oolej, ut toj wan xkomon li sachb’a-ch’oolej chiqu. Sa’ xk’ab’a’ li Jesukristo, amen.