Yac Pacl luhn Ma Usrnguck uh Tui?

Ke yac se somlah ah, kuneyucki nga ke acn California, nga in som wi stek prestuhn in muhtwacta yohrohl Clark ac Holly Fales ac sucu lalos, ke lohm selos. Fwackyuck nuh sihk lah oasr ma usrnguck yohk sikyak nuh selos. Ke pacl se kuht sun acn selos, upac nuh sel Clark el an tu ac paing kuht mweyen el orekmakihn puhres in sang sruokyac fintohkohl, inkwacwacl, ac puhres in sruokyac pac pahol.

Mahlwem luo met liki, Clark, tuhlihk mukul se nahtuhl Ty, ac tuhlihk mukul fuhsr 30 ac mwet kol som nuh ke sie mukwikwi luhn mukul, fan finohl feet 14,180 (4,322 m) wi fuhlwact emet ke finohl Shasta, sie pac acn fuhlwact e lucng fin acn California. Ke lwen in fan finohl ahk luo, inkaiyacn mwet fan finohl inge sun acn e lucng ke finohl sac—yohk engan in kuhtanglah ke srihpen ahkoo yohk lalos ke mahlwem ekahsr ah oruh kuh in sikyak ohinge.

Sie ke mwet sun emet acn lucng ke lwen sac pa Clark. Tukun monglac srihsrihk e lucng ke finohl sac, el tuyak ac muhtwacwacack in fahsr. Ke el muhtwacwacack fahsr, el mihsrwelac ac ut sifaclac nuh siskacn pe yot fuhlwact ke finohl sac, kweoklac ke puhtat ke feet 40 (12 m) ac tahfwelah in sihrihr nuh ten ke ingin suc ma afyucflac ke aes ke lusen feet 300 (91 m). Mwe lut se lah lah, Clark el pain moullac tuhsruhk el kihneta ac tiac kuh in mukwikwi.

Ma usrnguck se Clark el sun ke puhluhn pacl se inge muhtwacwacack se na. Kuhtuh sin mwet ma ohsun nuh sel ah kahlwem tuh mwet fan finohl, mwet liyacacng mwet ke pacl in fan finohl, ac mwet liyacacng mwet ke pacl elyah. Elos silahklahk liyaclwacng Clark in ahkwoyacl ac ahkolah ma nuh sel in ahkfucsrfucsryacl. U se inge “fahsr” in srihke in suk lah mwe sramsram nahtuhlos inge ac kuh in orekma ke kain acn sac ac falyang nuh sel oruh elos suhpwaclah sap na elyah se suk kahsruh ke puhluhn acn se ma mwe pahng nahtuhlos koflah srukyac siknal la. Oasr elikaptucr srihsrihk soko suhpweyucklac nuh Finohl Shasta ke lusen ao se. Tukun srihke ahk luo luhn pilot sac in oruh in ai elikaptucr soko ah ke acn na upac eng ac inging sac, pilot sac kampare sifil srihke ahktolu ac oraclah ai elikaptucr soko ah. Ke pilot sac srihke sie pacna inkacnek in ai elikaptucr soko ah u sac silahklahk srakuhlwacng Carl nuh lun elikaptucr ittok soko ah ac kampare fanyak tihngtihngi na fintukun mwe muhta luhn pilot sac.

Ke Clark el ilyak ac muhta ke acn ono lal, kensa lal ahkkahlwemye lah oasr acn muhsahllah ke inkwacwacl, fintohkohl, sri, ac pahol; patlah luhn ahlolol; ac acn mihsac ac kuhretret ke mahnol. Falyang taktuh nuh ke kihnet luhn brain “sikyak” in orekma ke lohm ono ke lwen sac; el oasr ke lohm in ono se inge ke kuhtuh na pacl ke kais sie yac. Tohkohyang Taktuh se lal inge fahk lah emet me el sonna liye sie mwet in kihnet upac ac muhsahllah upac mahno a pain moullac. Clark el motkweyuck muh el ac moul ac fohlohklac oacna meet ah. Taktuh se inge el sie mwet tiac luhlahlfongi ke God, tuhsruhk el ahkuhtweyac lah ma sikyak nuh sel Clark inge lain kwewa lahlmwetmwet ma el eis ke sains ac ma se fanna kuh in sang ahkuhtweyac ma sikyak nuh sel Clark uh pa usrnguck luhn God.

Ke Clark and Holly ahksahfyelah in fahkwelihk ke ma inge, nga sokwack ma inge in upac nuh sihk in sramsram. Tiac na fihsrwacsr mweyen ma ke ma usrnguck sikyak inge—tuhsruhk ke srihpen ma fuhlwact liki se. Nga sokwack tuh mana kahlwem se—ke ip luhn nguhn—lah Holly ac kais sie tuhlihk kahto limekohsr suc muhta lun lohm sac wi ninac ac pahpah kiyaclos suc oasr luhlahlfongi lah elos kuh in insese kac ma e sikyak ke lwen sac ac elos srwackna tu kuh ke nguhn muhtahl ke kahsruh lal el ac oruh wo nuh selos. Clark ac Holly ac tuhlihk mahtuh luo nahtuhlos, Ty ac Porter, wi kuht mihsenge nuh ke Acn in Toeni Luhlahp.

In nuhnkuh ke ma sikyak ke sucu luhn Fales, nga nuhnkuh yohk ke srihpac nuh sin mwet puhkantwen sahyac. Ac fuhkah fin koflah in acwaclac nuh selos suc nwacnwaclah ke luhlahlfongi, suc eis mwe ahk insewowo ke pristut, suc pruhe pacl nuh kwewa sang luhlahlfongi lalos, suc ahkos akwuck in ahkos masap ac suc luhlahlfongi tuh ma usrnguck uh tiacna sikyak? Ke elos kahlwem ke ma usrnguck. Ke mwet sahyac eis ma usrnguck uh.

Ac fuhkah nuh sin suc kweok in kahlwem ke mwe ahksuhpwacr—ke mahno, nuhnak, puhla—ke yac kuh lusen yac 10 kuh ke moul nohfohn lalos ke moul in srihke? Ac fuhkah nuh sin suc misac ke yac fuhsr lalos?

Mahlwem na luo tari ah, tempuhl luo-enenuh kuht in oruh-in sruokyac macruht luhn siacnyacn, wi pacl in misineri luhn tuhlihk neke-sahflah ac tuhlihk limekohsr sahyac selos, som ke oaksohk srihsrihk soko ke kihtin pacl. Nga puhla pwacye lah elos pruhe ke wo ohiyac meet liki sohkwack ac pruhe pac ke pacl in elyah ke ma ukwaclos meet liki kasihki. Wacngihn mwet moul. Ac elos uh?

Kuh oasr srihpac luhn mwet wowo ac mwet elos luhngse in siyuck ke kihsensiyuck srihpsrihpyak sin Mormon: “Yac tui tiac sifil sik ma usrnguck uh?”¹

Ke kihtin etwacack luhk tiac kuh in ahkuhtweyac lah efuh kuhtuh pacl uh oasr elyah in ahkkolukye mwet sahyac ac kuhtuh pacl uh wacngihn. Tuhsruhk srihklac kahlwem lasr lah meac oraclah ma usrnguck uh.

Kuht kwacna ahkuhtweyac ma usrnguck uh muh pa pacl kuht unweyucklac suc ma tiac kuh in ahkuhtweyucki sin sains kuh kahingkihn ongaiyac ke kuht porongo pihrihkyuck luhn nguhn. Tuhsruhktuh in ahkuhtweyac ma usrnguck muh “sie ma wowo ma tuhkuh ke sie kuh fuhlwact ma mwet uh tiac kahlwem kac”² suc ma sang sie ngwetngwet na yohk nuh ke ma kaul luhn nguhn. Kalmac se inge el ikacslah nuh sesr in nuhnkuh yohk ke orekma utuftuf luhn luhlahlfongi ke eisyacn ma usrnguck uh.

Moroni el luti, “lah wacngihn ma usrnguck ac ahkkahlwemyeyuck ne ke na mwet se ahkkahlwemye luhlahlfongi lalos.”³ Ammon el fahkwelihk, “Ohinge God El sang sie ohiyac tuh mukul uh, ke luhlahlfongi, kuh in oruh ma usrnguck yohk.” Ac wacngihn kuhtwena pacl mama usrnguck uh orek ne ke na tukun elos luhlahlfongi.”⁴ Leum El ahkkahlwemye nuh sel Joseph Smith lah el ac fah oruh ma usrnguck nuh sin suc luhlahlfongi ke Inel.⁵

Tohkohsrah Nebuchadnezzar el sap ke kuh lah Shadrach, Meshach, ac Abed-nego in alu nuh sin ma srolwaclah kol se el akiyac muh god se, ke puhsra in ahksahngweng, “Fin elos tiac alu nuh kac, elos e tuhlac … nuh ke e se fihrihr arulacna fol ac ngal.” Na el ahkkoluk yaclos ke “Suc God sacn ac eiskomlac liki pouk?”⁶

Mwet tuhma lutlut inge fahk: “Fin ac pa ingen, God se fanna lasr suc kuht kuhlwacnsuhpuh enenuh in kahsrwekuht eiskuhtlac liki e fihrihr ngeng se. … Tuhsruhk fin tiac, oruh in etweyuck nuh selos kwewa, O tohkohsrah, lah kuht e tiac kuhlwacnsuhpuh god lom.”⁷

Elos luhlahlfongi lah God el kuh in molweloslac, “tuhsruhk fin tiac,” elos sesseslah ke luhlahlfongi lalos ke plwacn Lal.

Oacna sie, Elder David A. Bednar el siyuck sin tuhlihk mukul fuhsr se suc siyuck in eis mwe ahkinsewowo ke pristut, “Fin ma inge ma sahp sin Pahpah Tuhmasr Inkuhsrao lah kom eisyucklac liki misac ke fuhsr lom ke nguhn ac facluh in fahlac na in kahsrwekom ke kuhlwacnsap, nuh oasr sum luhlahlfongi in sang nuh Sel ac in tiac ahkwoyeyuck?”⁸ Kuh kuht oasr luhlahlfongi “in tiac ahkwoyeyuck” ke facluh se inge kuht kuh in ahkwoyeyucklac ne tok ma pahtpaht?

Kihsensiyuck na usrnguck se in nuhnkweyuck pa “Kuht fihliyac luhlahlfongi lasr uh oyac?” Luhlahlfongi lasr uh oasr ke ma luhngseyuck ac kweok, kuh ma inge kwewa kuht enenuh in lohacng nuh kac ke God suc Pahpah Tuhmasr ac ke plwacn muhtahl ac ke Jisus Kraist ac Ke Iwaclah Lal? Luhlahlfongi ke Pahpah ac Wen in lwelah nuh sesr in kahlwem ac eis kahs Lalos ke kuht ahkoekuht nuh ke moul ma pahtpaht.

Mihsenge, nga fahkwack ke ma usrnguck. Tuhlihk nuhtin God pa mwe usrnguck uh.⁹ Eis mahno ke Luhmahl pa ma usrnguck se.¹⁰ Mwe sang sel Leum lasr pa Usrnguck.¹¹ Iwaclah Luhn Jisus Kraist pa ma usrnguck se.¹² In kuh in eis moul ma pahtpaht pa ma usrnguck se.¹³

Ke wo kuht in pruhe kac ac orekma nuh ke loangweyuck luhn mahno ac unweyuck ke moul se inge, tuh ma kuht enenuh in lohacng nuh kac uh pa nguhn in ma usrnguck ma ikacklah nuh sin tuhlihk nuh kwewa nuhtin God. Wacngihn elyah ke facsin ma kuht oasr kac uh, tiac elyah ke muhtuhnfacl lasr uh, tiac elyah ke mac ma kuht oraclah fin kuht auliyak, tiac elyah lah mac ac fah tuhkuh kac nuh sesr—kuht nohfohn ma se fanna suc ma kuh in eis mwe insewowo luhn ma usrnguck. Kuht moulkihn ma usrnguck se, ac oasr pac ma usrnguck pacl ingoh. Ke inen Jisus Kraist, amen.