A Sils er a Ongasireng ng mla mo Diak?

A tal rak er a mla memong, el mlara ureor el ngar California, e ak mlo oldingel lobengkel a stake president el momes ra Clark and Holly Fales me a telungalek er tir, er a blirir. Te dilu er ngak el kmo te siliseb er a ongasireng el tekoi. Sera kibong, ea Clark e mle meringel el modechor el me mes er kemam el mle llechotel a melisiich er a ulekel, me a iklel, ma chimal.

Eru el buil ruchei, ea Clark, ma ngelekel el Ty, me a kmeed el okedei el ngeasek el sechal ma roungerachel er tir a mlora kemanget lomerael, el merael er a 14,180 foot (4,322 m) er Mount Shasta, el tara kot el ngarbab el rois ra California. Sel ongeru el sils er tial meringel lomerael, ea betok er tir a ngilmeklii el mora chetetudil—a smiich el lomeruul el mlosebechel le tir el chiloit a betok el buil el mengedmokl el kirel.

A tar tirkel kot el chad el mlora chetetudil er sel sils a Clark. Uriul er a le telkib lolengull er a bkul a rois, eng mlo dechor e mocha merael. Sera lorael eng milsibas meng ulubeteteluul el reuebet, el miltemall er tial kmeed el 40 feet (12 m) a klemengetel e melitai er a ice el dellas el kmeed el 300 feet (91 m). Ongasireng, el Clark a dimlak el mad, eng di mle meringel el metemall meng dimlak el sebechel louedikel.

A ongasireng el bla rengii a Clark er tial milekedmokl a mle ketengel. A re mle kot el mo melai er ngii a di mle “kiul” ngarngii el chelechad er a re hikers el ngarngii a chad ra siik me a rechad er a bkaisemrungel el semmong er a ukeruul. Te di mle mereched el msang a lousbech e mililii meng mekeald a bedengel. Tirkal chelechad a di mle “kiul” ngarngii el skeng a beches el klekedellel a olkeiungel me tel uldureklii a ongit el mo mela ngesou er a basio el diak loureor a cell phone er ngii. A kekerei el helicopter a mlo kedong el mora Mount Shasta el mle tal sizang a cherridel. A uriul er a erul lolasem el mo tuab el mle chetituokel e diak el sal sebechel tial helicopter lomtok ra mesisiich el eolt, e a pilot a mocha melasem er a ongedei el bo lultab. Tiara lokiu a kuk ngodech el teletael, e a eolt a di mle “kiul” mengodech me tial helicopter a mlo tuab meng kmal di mle sebecherir el mereched lotungii a Clark er a kekerei el delmerab er a ulel a kingellel a pilot.

A Clark er a le meues er sel ospitar el mora remeringel a rektir, e a skeng er a bedengel a chulechotii a chelam el iklel, ulkel, kekengel, chimal; chemars el olmedel; ma betok el delobech ma telemall. A meduch el chad ra botk e di mle “kiul” ngarsei el loureor er sel sils; el ngar tial ospitar el di mekesai el taem er a ta el rak. Ng kal toktang a millekoi el kmo ng dirkak a tang me lesa chad el uker a betok el tellemall el mora ngurd e le kiei. Ng dimlak el di lesa Clark el sebechel di ngar ng bai mo sebechel lemuut er a smechel. Ng kal toktang a milsaod er ngii el diak loumerang er a Dios, e dilu el kmo tial teletael el dilubech el mora Clark a omtok a rokui el bla losuub el kirel a telemellel a ngurd me a tial dilubeh a ongasireng.

Sera bol merek a Clark ma Holly el mesaod er tial tekoi, e ak mle meringel er ngak a mengedecheduch. Ng diak el dil tial ongasireng—ng ngbai kirel ngkel ngarab. Ak ngiluu a dmolech luldasu—chedaol el sioning—el kmo a Holly me a tirka el teim el ngelekir el mle dengchokl er a chelsel a blirir lobengterir a demerir ma derrir a mla rengii a klaumerang er tir el sebechir el chobengelii a ngii di el ngerang el mo duubech er sel sils te sebechir el lomakes el bedul luchei. A Clark ma Holly me a tirkel teru el meklou el ngelekir, el Ty ma Porter, a obengked er chelecang er tial Conference Center.

Sera kumdasu er tial dilubech el mora telungalek er a Fales, e ak mla omdasu el kirel a betok el dilubech el mora rebetok el chad. E kuk mekera tirkel betok el chad el mui a klaumera er tir, el ngmai a klengeltengat ra priesthood, betok a nglunguuch el kirir, oltirakl a telbiil, klou a urungulir el Uriul-klebesei el Santo el a dimlak el bortir ongasireng? A ikel bedengel ongasireng el lodengei. Ma ikel bedengel ongasireng el leues el mora rebebil.

E kuk mekera tirkel ngara klou el ringel—ra bedengir, uldesuir, rengrir—el mela rak malechub a betok el rak er tial klengar er tir? E mekera tirkel kuk di mle mekekerei e mad?

Dirk eru el buil ra mla memong, el obekel lolab a kengei el mora templo, me a retedei el ngeasek el missionary ma lmuut el teim el rengalek a, ngilasech ra kekerei el skoki el mle kedeb omerolir. A kungil medengei el kmo te milluluuch lolengit mel sebecheklterir ruchei ra bol sebek e miluluuch er sera leborngii a telmellel a skoti ruchei er a le aksident. Te di mlad el rokui. Ng kuk mekera tirkang?

A rungil chad me a rebetik ra rengrir te ngarngii a ungil luchul e toker er tial ker el dilii a Mormon: “A sils er a ongasireng ng mla mo diak?”¹

A ikal sesei el klemedengei er ngak a diak el sebechel smodii a uchul ma bebil ra team ea chedaol klisiich a mei ea le bebil eng diak. Alta kid el diak a ungil klemedengei er kid er a kmong ngera ikel ngii ongasireng.

Ke de blechoel el mesaod a ongasireng el sel bo dungil ra rekted el diak el sebechir a retoktang el smodii malechub e ngimiit er kid a kengaol tekoi ele kede ultirakl ra odbechel a reng. Engdi, sel dolekoi er a belkul a ongasireng el kmo “dubech el klungiaol lulekiu chedaol klisiich el chad a diak lungil medengeli a uchul”² a meskid a tmolech losenged er a chedaol tekoi. Tiaikid el belkul a rullid el mo omdasu er a klisichel a klaumerang el mle uchul ongasireng.

A Moroni a ulsisechakl, “Ng dirkak a tal taem mel borngii ongasireng dil merekmo uriul er a klaumerang er tir.”³ Ammon a millekoi, “A Dios a mla msa chad a teletael, lokiu a klaumerang, eng kudmokl ongasireng.”⁴ A rubak a ulechotii er a Joseph Smith, “E le ngak a Dios, … me ak kmocholt a ongasireng … el mortirke loumerang er a ngklek.”⁵

A King Nebuchadnezzar a mle soal a Shadrach, Meshach, ma Abed-nego el mengull er a kolt el bleob el chaus el lekong chelid, el ulemcheracheb er tir, “Alsekum meng diak monguul er ngii, e komo bidokl … ra chelsel a meringel ngau.” E okor e uleltuub er tir “Ng techa ngkal Dios el sebechel losobelimi er a chimak?”⁶

Tirkal tedei el blak a rengrir el oltirakl e dilu el kmo: “Boluaisei alsekum, me a Dios er kemam el ki mosiou er ngii a sebechel losobelmam er tial ngau. … E a lak, e bo modengei , E king, el kmo ngdiak ki bo mosiu er a chelid er kau.”⁷

Te mle meklou a rengrir el Dios a mo osobelterir, “engdi alsekum eng diak,” e te mui el oumerng er a Uldesuel.

Ngosisiu, el Elder David A. Bednar a mle oker er a ngeasek el chad el mle soal a klengeltengat er a priesthood, “Alsekum meng ngurungulel a Demad er a Babeluades el kau a imuul lokiu a kodall el mora belurir a rdeleb el mo melemolem er a omesiou er kau, kau koumerang el mo oltirakl ra Rengul meng diak bomungil?”⁸ Kid kede ngar ngii a klaumerang er kid el “diak bo dungil” er a ringel el dengarngii er tial belulechad mel sebeched el mo nguu omekungil el diak a ulebengelel?

A kired lomdasu er ngii el ker a tiakid “Tial klaumerang er kid ngultuil er a ngerang?” A klaumerang er kid ng chemau sel soal a rengud el mo diak de ngara ringel, malechub eng mesisiich el bedul a Dios el Chedam me a chedal el uldeusel el okiu a Jesus Kristo ma Tngakireng er ngii? A klaumerang er a Chedam ma Ngalek a meskid a techall el mo medengelii e kongei a Urungulir er chelecha el dongedmokl el kirel a diak a ulebengelel klengar.

Chelechang, e ak kuuchias a ogasireng. Kid el ngelekel a Dios a ongasireng.⁹ A nguu a bedenged el di uai Ngii a ongasireng.¹⁰ a sengk er a Osobel a ongasireng.¹¹ A Tngakireng er a Jesus Kristo a ongasireng.¹² A techall er a diak a ulebengelel klengar a ongasireng.¹³

Me ngungil doluluuch el kirel a ureor ma omesebechakl ma omekungil er a klengar er kid er tial beluulechad, a sel ngarbab el osenged a kirel bedul a chedaol ongasireng el medechel el mora rokui el ngelekel a Dios. Ng diak el iior er a siukang er kid, de chad er ngii beluu, diak el iior ra bla deruul el tekoi alsekum mekede olengit a klausubes ra kngtid, ng diak el iior ra mla meruul el merkid—kid el rokui a di chelbangel er a diosisiu el tungelel a ongasireng. Kid a ngar el chad el ngii ongasireng, ma lmuut el merael mei el ongasireng a ngarmedad. El ngara ngklel a Jesus Kristo, amen.