Pe Ua Uma Ea le Aso o Vavega?

I le tausaga talu ai, i se tofiga i le setete o Kalefonia, sa ma o ai ma se peresitene o le siteki e asiasi ia Clark ma Holly Fales ma lo la aiga i lo latou fale. Sa tau mai ia te au sa latou aafia i se vavega talu ai nei. I lo ma taunuu atu, sa taumafai Clark e tu efaafeiloai i maua aua sa i ai se fusi [brace] lanuuliuli na taofia lona tua, o lona ua, faapea foi ma ona lima.

I le na o le lua masina talu ai, sa o ai Clark, lona atalii o Ty, ma le pe a ma le toa 30 o isi alii talavou ma taitai i se gaoioiga a le siteki, e savavali i le tumutumu o le Mauga o Shasta e 14,180 futu (4,322 m) le maualuga, o se tasi o mauga sili ona maualuga i Kalefonia. O le aso lona lua o le savaliga faigata, na taunuu ai le toatele o le au feaei i le tumutumu—o se ausiga mataina ua mafaia ona o le tele o masina o sauniuniga.

O se tasi o tagata na muai taunuu i le tumutumu i lena aso o Clark. Ina ua mavae sina malologa puupuu e lata i le pito o le tumutumu, sa tu o ia ma amata ona savali. A o ia faia, sa ia lāvea ma pau i tua i le pito o le mato, ma mafatia ai i le pau i le pe a ma le 40 futu (12 m) o le le mau lelei sa toe pau ai i lalo o le aisa tifato mo le isi 300 futu (91 m). O le mea e ofo ai, na ola Clark ae ua matua manu’a lava ma ua le mafai ona gaoioi.

O vavega ia na aafia ai Clark i le taimi o lenei mea matautia ia faatoa amata. O nisi na muai taunuu atu ia te ia na “faapea” o se vaega o tagata feaei ia na aofia ai ma ni taiala laveai ma fomai mo faalavelave faafuasei. Na latou vave togafitia Clark mo le tei ma saunia ni mea e faamafanafana ai o ia. O lenei foi vaega na “faapea” sa faataitaia se masini fesootai fou ma auina atu se talosaga faafuasei mo se fesoasoani mai eria ia e le ola ai ni telefoni feaveai. Na vave ona auina atu se tamai helikopa i le Mauga o Shasta e itula le mamao. Ina ua mavae ni taumafaiga matautia le manuia e lua ina ia tulaueleele i se tulaga e le gafatia e le vaalele, ma le tauiviga i tulaga o matagi maemaea, sa amata ai e le pailate se taumafaiga lona tolu ma le faaiu. A o agai mai le helikopa mai le isi itu, na “faapea” na toe suia le matagi ma mafai ai ona tulaueleele le vaalele mo sina taimi e faaofiofi ai i totonu Clark i se vaega itiiti i tua ifo o le nofoa o le pailate.

Ina ua suesueina Clark i le nofoaga autu mo gasegase tigaina, na faaalia e suesuega sa aafia o ia i le tele o manuaga i lona ua, tua, ivi asoaso, ma tapulima; o se māmā ua pu; ma le anoanoai o manua. O se fomai tipitipi e faapitoa i manua i le faiai ma neura na “faapea” foi sa tiute i lena aso; e na o ni nai taimi lava o le tausaga e i ai ai o ia i lenei falemai. Fai mai le fomai mulimuli ane na te lei vaai lava i se tagata ua aafia i ni manuaga se tele i le tuasivi ma uaua ia e aveina le toto i le ulu ma le ua ma o loo ola. E le gata o le faamoemoe mo Clark ia ola ae ia toe foi i le malosi atoatoa. O le faamatalaina o ia o se tagata e le mailoa pe i ai se Atua, sa fai mai ai le fomai tipitipi o le tulaga ia Clark na teenaina ana suesuega uma faasaienisi e uiga i manuaga o neura ma e na o se vavega e mafai ona faamatalaina ai.

A o faaiuina le faamatalagaina e Clark ma Holly o lenei tala matautia, sa faigata ona ou fai atu se tala. Sa le na ona sa iloaina lelei ia vavega, ae ona o se tasi e sili atu.Sa ou maua se uunaiga maoae—o se molimau faaleagaga—e faapea sa mafai lava e Holly ma le fanau aulelei taitoatasi e toalima o e na saofafai i le potu malolo o siomiaina o latou matua i le i ai o sea faatuatua ona taliaina po o le a lava le taunuuga e ono oo i ai i lena aso ma o le a latou maua pea le manuia faaleagaga. O loo tatou faatasi iinei i le Maota Autu mo Konafesi ma Clark ma Holly ma le la fanau matutua e toalua, o Ty ma Porter.

I le manatunatu ai i le aafiaga o le aiga a Fales, na ou mafaufau tele ai e uiga i tulaga o le toatele o isi. A e faapefea le lemafaitaulia o le Au Paia o Aso e Gata Ai o e ua tumu i le faatuatua, ua mauaina se faamanuiaga o le perisitua, tatalo e le aunoa ma ua tumu i le faamoemoe ae lei maua lava se vavega? Atonu i se auala latou te malamalama ai i se vavega. Atonu i se auala e foliga ai nisi ua maua ni vavega.

Ae faapefea i latou o e mafatia mai mafatiaga ogaoga—faaletino, faalemafaufau, faalelagona—mo le tele o tausaga pe mo le sefulu tausaga pe mo lo latou olaga atoa faaletino? A e faapefea i latou o e maliliu laiti lava?

I le na o le lua masina ua mavae, e toalua ni ulugalii faaipoipo e umia pepa faataga o le malumalu, ma le fanau faamisiona e toatolu ma le isi fanau e toalima a i latou, na malaga i se tamai vaalele mo se faigamalaga puupuu. Ou te mautinoa sa latou tatalo mo le saogalemu a o lei tuuvaa atu mo le faigamalaga ma sa tatalo faatauanau ina ua fetaiai ma ni faafitauli ogaoga a o lei pau. E leai se tasi na sao. Ae faapefea i latou?

E i ai se mafuaaga e fesili ai tagata lelei ma e pele ia i latou i le fesili na tuuina mai e Mamona: “Pe ua uma ai ea le aso o vavega?”¹

E le mafai e lo’u malamalama faatapulaa ona faamatala le mafuaaga e i ai ai i nisi taimi se fesoasoani faalelagi a’o isi taimi e leai. Ae masalo e le o lava so tatou malamalama e uiga i le mea ua ta’ua o se vavega.

E masani ona tatou faamatalaina se vavega o se faamalologa e aunoa ma se faamatalaga atoa mai fomai faasaienisi po o le aloese mai mala matautia i le usitaia o se musumusuga manino. Ae, o le faauigaina o le vavega o “se mea aoga na oo mai e ala i le mana paia lea e le malamalama i ai tagata soifua”² e avatua se vaaiga lautele i mea e sili ona faavavau le natura. O lenei faauigaga tatou te mafai ai foi ona mafaufau i le matafaioi taua o le faatuatua i le taliaina o se vavega.

Na aoao mai Moronae, “Ma pe sa i ai se taimi na faia ai e se tasi ni vavega seia mavae ona latou faatuatua muamua.”³; Na folafola mai e Amona, “Ua faapea ona saunia e le Atua se ala e mafai ona faia ai e le tagata vavega tetele, e ala i le faatuatua.”⁴ Sa faaalia e le Alii ia Iosefa Samita, “Aua o A’u o le Atua, … ma o le a Ou faaali atu vavega … ia te i latou uma o e talitonu i lo’u igoa.”⁵

Na poloaiina e le Tupu o Nepukanesa ia Sataraka, Mesako, ma Apeteniko e tapuai i le tupua auro sa ia faatuina o se atua, ma taufaamatau atu, “Afai tou te le ifo, e lafoina outou … i totonu o le ogaumu e mu ai le afi.” Ona ia taufaifai lea ia i latou “O ai foi se Atua na te laveaiina outou ai la’u pule?”⁶

Sa tali atu nei soo faamaoni: “Afai o lea, ua mafai lo matou Atua, matou te auauna i ai, ona laveai mai ia te i matou ai le ogaumu e mu ai le afi. … Ae peitai, a le o lea, ia e silafia e oe le tupu e, matou te le auauna i ou atua.”⁷

Sa latou talitonu atoatoa e mafai e le Atua ona laveaiina i latou, “ae afai e leai,” sa latou faatuatua atoatoa i Lana fuafuaga.

E faapena foi, le fesili a Elder David A. Bednar i se alii talavou o le sa talosagaina se faamanuiaga faaleperisitua, “Afai o le finagalo a lo tatou Tama Faalelagi e siitia atu oe e ala i le oti i lou talavou i le lalolagi o agaga e faaauau ai lau galuega, e te faatuatua e faalogo ma usitai atu i Lona finagalo ma e le malolo ai?”⁸ O i ai so tatou faatuatua “e le malolo ai” mai o tatou mafatiaga faalelalolagi ina ia tatou malolo ai e faavavau?

O se fesili taua tele e manatunatu i ai o le “O fea e tuu ai lo tatou faatuatua?” O taulai atu ea lo tatou faatuatua i le na o le manao ia tuuitiitia le tiga ma le mafatia, pe o faaogatotonuina mausali i le Atua le Tama ma Lana fuafuaga paia ma ia Iesu le Keriso ma Lana Togiola? O le faatuatua i le Tama ma le Alo e mafai ai ona tatou malamalama ma talia lo Laua finagalo ao tatou saunia mo le faavavau.

Ou te molimau atu i le asō i vavega. O le avea ma se atalii o le Atua o se vavega.⁹ O le mauaina o se tino i Lona faatusa ma foliga o se vavega.¹⁰ O le meaalofa o le Faaola o se vavega.¹¹ O le Togiola a Iesu Keriso o se vavega.¹² O le faamoemoe mo le ola e faavavau o se vavega.¹³

E ui e lelei le tatalo ma galue mo le puipuiga faaletino ma faamaloloina i le taimi o lo tatou olaga faaletino, o le tatou taulaiga sili e tatau ona i ai o vavega faaleagaga ia o loo avanoa mo fanau uma a le Atua. E tusa lava po o le a le tatou aganuu, tagatanuu, mea ua tatou faia pe afai ua tatou salamo, po o le a se mea atonu na faia ia i tatou—tatou te mauaina uma avanoa tutusa i nei vavega. O loo tatou ola ai i se vavega, ma e i ai isi vavega o loo i luma atu. I le suafa, o Iesu Keriso, amene.