“Hamaar paas Aapke Kostin Kaam Hai”
Hum sab ke ek meeningful raul hai Parmeshwar ke kaam aage badhaawe me.
Parmeshwar ne Moses se ghoshna ki, “Hamaar paas Aapke Kostin Kaam hai” (Moses 1:6). Aap kabhi socha hai ki Swarg ke Pita ke paas aapke kostin ek kaam hai? Aapke kostin wahan U koi jaruri kaam tayaar karis hai—aur khaas kar aapke—pura kare ke kostin? Hum bolta jawaab haan hai!
Girish Ghimire ke baare me socho, jon Nepal ke desh me paeda aur badha hua. Jab u ek teenaeja raha, u China me padhis, jahan ek saath padhe waale ladka ne use Ishu Masih ke susamachaar ke baare me sikhaya. Ant me, Girish Brigham Young University aais grajuwait howe ke kostin aur apan hone waali patni ko mila. U long Salt Lake Valley me basees aur Nepal se dui ladkan godh lees raha.
Saalon baad, jab 1,500 sharnaati(refiuji long) ke Nepal ke camp me se Utah laawa gaeis,1 Girish ko laga ki u sake madad kare. Kaae ki bhaasha Girish achcha se janta raha aur sanskriti samajhta raha, u anuwaad(interpret) karis, sikhaais, aur salaah bhi dees. Samaaj me achcha se jab u long rehwe laga raha, thoda Nepali refiuji long maangis susamachaar seekhe. Ek Nepali-bhaasha wala shaakha aayojit hois, aur Girish baad me uske shaakha pradhaan banis. U Marman Dharamshaastra ke Nepali me traanslaeit bhi karwaais raha.
Aap long dekhe saka kaise Swarg ke Pita Girish ke tayaar karis aur istemaal karis?
Parmeshwar ke Paas Hum Sab ke Kostin Kaam Hai
Bhaaiyo aur bhaini long, Parmeshwar ke paas hum long ke kostin jaruri kaam hai. Bhaini log se baat karte par waisan sachchaai sikhaais jon sab pe laagu howe hai, Pradhaan Spencer W. Kimball sikhaais: “[Dharti] pe aae se pahle, [hum long] ke kuch kaam dewa ge raha. … Jabki hum long abhi sab cheejyaad nahi hai, isse to u sundar sach nahi badal jaai jispe hum long ek taaim raaji hoya hai.”2 Kitna sammaan dene waala sachchaai hai yeh! Hum long ke Swarg ke Pita ke paas khaas aur jaruri kaam hai aapke aur hamme kare ke. (dekhiye Ephesians 2:10).
I sab divye kaam khali thoda khush-naseeb long ke kostin nahi hai par hum sab ke kostin hai—bhale koi jenda, jaati, desh, kamaai, samaajik dasha, ya Girjaghar ka koling ho. Hum sab ke ek meeningful roul hai Parmeshwar ke kaam aage badhaawe me (dekhiye Moses 1:39).
Hum long me se thoda jan sochta hoi Swarg ke Pita kaise sake hum long ke istemaal kare jaruri sehyog me. Lekin yaad rakho, U sab taaim saadharan insaan ke istemaal karis hai asaadharan kaam karne ke kostin (dekhiye 1 Corinthians 1:27–28; D&C 35:13; 124:1). “[Hum] pratinidhi hai,” aur “shakti [hum] me hai” ki “jaada dhaarmikta karwaae” (D&C 58:27–28).3
Pradhaan Russel M.Nelson samjhais:
Pradhaan Russell M. Nelson sikhaais: “Prabhu ke mann me aap ke liye jon yojna hai utna aap ke mann me apne aap ke liye nahi hoga! Aap ke i taaim aur jagah ke kostin bachaae ke aur surakshit rakkha gaeis hai. …
Prabhu ke aap ki zaroorat hai dunya ke badle ke liye. Jab aap Unke aapke liye Unke ichcha ko swikaar karoge aur uspar amal karoge, aap paaoge ki aap namumkin ko mumkin kar rahe ho!”4
To kaise sako hum long Parmeshwar konchi chaahe hum long se ke samjho aur karo? Humme chaar siddhant bataawen do jisse madad mili.
Dusro pe Gaor Karo
Pahla, dusro pe gaor karo. Hum long sakta Masih rakam kare, “jon ghoom ghoom ke achcha kaam karta raha”(Acts 10:38; 2 Nephi 26:24bhi dekhiye).
Full-taaim mishan se laute ke baad, hum har roj ke lakshye ke baat bahut miss karta raha. Sachche ke, humme chehta raha apan vachan ke paalan karo, siksha paao, ek palwaar suru karo, aur kuch kamaao. Lekin hum sochta raha ki kuch aur baat to nahi raha, ya kuch khaas baat, jon Prabhu mangta raha hum kari. Thoda mahina soche ke baad, hum i ves padha: “Agar aapke dil kare, aap i jeneration me bahut achchaai karaae sakta hai” (D&C 11:8). Aatma humme samjhe ke madad karis ki divye kaam ke praemri lakshye hai aur sab ke ashish dena aur “dher achchaai” karna.
Hum long sakta apan jindagi me jaruri nirnay kare la taaim nikaale—jaise konchi sako padho, kaam ke kostin konchi karo, ya to kahan raho—koi aur ke sehyog kare ke kostin.
Ek palwaar ek nawa shahar me bas ge raha. Ek dhani padosi long ke beech me ghar khoje ke jagah, u long ke khushi laga aisan jagah rehwe ke jahan jaada samaajik aur aarthik jarurat raha. Bita saal me, Prabhu u long ke zariye dher jan ke madad karwaais hai aur u long ke ward aur stake badhaais hai.
Ek medikal peshewar bhi aisan kaam karta raha lekin hafta me ek roj nikaalis raha muft ke sewa kare ke u long ke jiske paas helth insurance(swaasth beema) nahi raha. I admi aur uske aurat jon rakam sabke jiwan me ashish deta raha ke kaaran, Prabhu ek rasta dekhaais u long ke kayi sao mareez ke sahayta kare ke jon ke jarurat raha apan bada palwaar ke dekhbhaal karte.
Aatmik Uphaar ke Khojo aur Badhaao
Dusra, aatmik uphaar ke khojo aur badhaao. Swarg ke Pita hum long ke i sab uphaar dees hai ki hum long sako jaano, karo, aur anand lo U kaam ke jon u dees hai.
Hum long me se thoda jan saait sochi, “Kya hamaar paas ekko uphaar hai?” Aur fir se, jawaab haan hai! “Sab admi [aur aurat] ke Parmeshwar ke Aatma se ek uphaar mila hai … ki sab ke usse bhalaai howe” (D&C 46:11–12; zor diya gaya).5 Thoda se aatmik uphaar ke baare me skripcha me likha hai (dekhiye 1 Corinthians 12:1–11, 31; Moroni 10:8–18; D&C 46:8–26), lekin aur dher uphaar hai.6 Thoda uddharan saait rahi dayaluta hona, aasha zahir batana, insaan se achcha se bat karna, achcha se oganaiz karna, yakeen karaae ke rakam baat karna ya likhna, achcha se sikhana, aur mehnat karna.
Kaise hum long apan uphaar jaane sakta hai? Hum long sakta apan petriakal blessing me dekhe, u long se puche jon hum long ke achcha se jaane hai, aur apne aap pata lagae ki hum long konchi aasaani se kar leta aur laaik karta karo. Sabse jaruri, hum long sakta Parmeshwar se puche (dekhiye James 1:5; D&C 112:10). U hum long ke uphaar ke jaane hai, kaae ki Wahi to hum long ke dees hai (dekhiye D&C 46:26).
Jab hum long apan uphaar jaan jaaega, hum long zimmedaari ban jaae use badhawe ke kostin (dekhiye Matthew 25:14–30). Ishu Masih bhi “suru me sab gun nahi paais raha, lekin woh aur gun se gun tak [bhadhte] gaeis” (D&C 93:13).
Ek jawaan ladka tasveer long banais raha dhaarmik biswaas ke baare me batawe ke kostin. Hamaar faivrat hai Uddhaarkarta ke ek tasveer, jiske ek copy hum long ke ghare tanga hai. I bhaai apan aartistic uphaar long ke badhais aur istemaal karis. Uske zariye, Swarg ke Pita aur sab ke prerna dis u long ke chelapan ke sudhaare ke kostin.
Kabhi kabhi hum long mehsoos karta ki hum long ke paas kuch khaas jaruri uphaar nahi hai. Ek din, ek thoda niraash jawaan aurat vinti karis, “Prabhu, hamaar apan dekhrekh(ministry) konchi hai?” U bolis, “Sab ke notis karo.” I ek aatmik uphaar raha! Tab se, uske khushi mile notis kare me koi ke jon ke sab taaim bhulae dewa jaae, aur Parmeshwar uske madad se ketna dher jan ke ashish dees hai. Hum long ke kuch aatmik uphaar saait duniya ke riwaaj se hum long ke nahi naami karega, lekin hai Parmeshwar aur Uske kaam ke kostin u jaruri.7
Durbhaagye ke Faeda Uthaao
Teesra, durbhaagye ke faeda uthaao. Hum long ke musibat hum long ke madad kare Swarg ke Pita jon kaam rakhis hai ke dekhe aur uske kostin tayaari kare ke. Alma samjhaais, “Bhaari dukh jhele ke baad, Prabhu … humme apan haath ke saadhan banae lis” (Mosiah 23:10).8 Uddhaarkarta ke rakam, jiske praeshchit la balidaan Uske sikhaais kaise hum long ke sahaeta karo (dekhiye Alma 7:11–12), hum long kathin anubhav se paaya jaae waala gyaan ke istemaal kare dusar long ke prerit kare ke, mazboot kare ke, aur ashish dewe ke.
Ek bahut safal hiuman risos ekzektiv ke jab kaam pe se nikaal dewa ge raha, u apan petriakal blessing padhis aur prerna mehsoos karis ek kampani suru kare ke jisse aur sab profeshanal long sake kaam khoje. (U hamme bhi kaam khoje me madad karis jab hamaar palwaar mishan pe se lautis raha.) Prabhu uske mushkil ke istemaal karis ek zariya ke rakam ki u sakis dusar long ke ashish dewe, aur uske bhi ek munasib kaam mil gae.
Ek jawaan admi-aurat ke mara hua bachcha paeda hua. Tute dilon ke saath, u long sochis apan ladki ke sammaan me u long salaah dewe la sewa pradaan kari u maata-pita ke kostin jon yahi rakam mushkil ke saamna kare hai. U long ke khaas hamdardi ke kaaran jon musibat se badhis raha, Prabhu i admi-aurat ke istemaal karis.
Parmeshwar pe Nirbhar raho
Aur chautha, Parmeshwar pe nirbhar raho. Jab hum long usse biswaas se mangta hai sachchi abhilaasha ke saath, Woh hum long ke divye kaam hum long ke batai.9 Ek dafe jab jaan jaaega, U madad kari hum long ke kaam pura kare me. “[Uske] aankhi ke saamne sab kuch tatkaal hai” (D&C 38:2; ise bhi dekhiye Abraham 2:8), aur samay samay par U ham log ke liye darvaaza kholi (dekhiye Revelation 3:8). U Apan Ladka, Ishu Masih ke bhi bhejis, ki hum long sako Uske taaqat pe nirbhar raho jon hum long ke chamta se bada hai (dekhiye Philippians 4:13; Alma 26:12).
Ek bhaai, jon kuch laokal gavmant ke nirnay se chintit raha, mehsoos karis ki uske chaahi chunaao me khada ho. Ek daraona kempain ke baad, u apan biswaas ajmaais aur kuch saadhan batoris chunao me jaawe ke kostin. Ant me, u nahi jeetis lekin mehsoos karis Prabhu uske aguwaai deis hai aur shakti dees raha samaaj se jaruri mushkilon ke baare me batae ke.
Ek kuwaari maa, jon apan badhe me apahij ladkan ke paalta raha, puchis ki u kaise sake apan palwaar ke zaroorat achcha e pura kare. Bhale mushkil raha, u mehsoos kare ki Prabhu uske taaqat di apan mishan safalta se pura kare ke kostin.
Chetaoni ke Ek Shabd
Wahi taaim Parmeshwar hum long ke madad kare divye kaam pura kare me, shaetaan maange matlab bhara jindagi se hum long ke dhyaan hatae aur usse roke.
Saait paap hum long sabse bada rukawat hai, Pavitra Aatma ke pehchaane la shakti kam kar dewe aur uske aatmik shakti ke haasil nahi karen dewe. Swarg ke Pita ka diya hua kaam karne se pahle, hum long ke chaahi shudh howe ke koshish karo (dekhiye 3 Nephi 8:1). Kya hum long is tarah se ji rahe hai ki Parmeshwar hamare zariye kaam kar sakta hai?
Shaetaan bhi koshish kare hai hum long ke dhyaan kamti jaruri musibat ke madad se hatawe ke. Prabhu ek pehle ke Girjaghar ke neta ke chetaoni dees “Tumaar mann hamaar kaam … aur tumme call karal la ministry se jaada duniyadaari pe raha”(D&C 30:2). Kya hum long duniyadaari ke cheej long me itna magan hai ki hum long apan divye kaam se hat giya hai?
Uske saath saath, Shaetaan hum long nahi sakta la ehsaas se niraash kar dewe hai. U hum long ke kaam ke janwaae hai bahut mushkil ya sharmnaak. Fir bhi, hum long sakta Parmeshwar pe bharosa kare! Kyunki Wah hume prem kartein hain. Woh chahata hai ki hum safal ho. Woh “[hum long] ke aage jaai; u [hum long] ke sange rahi, [hum long]ke haaren nahi di” (Deuteronomy 31:8; Psalm 32:8; Proverbs 3:5–6; Matthew 19:26; D&C 78:18bhi dekhiye).
Shaetaan saait hum long ke manawe ke koshish kari hum long ke kaam ke kam anmol batawe ke dusra long ke kaam se. Lekin Parmeshwar ka diya har kaam jaruri hai, aur hum santushti paaega jab hum long “anandit honge us mein jo Prabhu ne [hamein] diya hai” (Alma 29:9).
Jaise Parmeshwar hum long ke zariye kaam kare hai, shaetaan sake hum long ke behkaawe ki ekko safalta ke hakdaar apne ban jaao. Fir bhi, hum long sakta Uddhaarkarta ke vinamrata dekhawe Pita ke jaijaikaar aur badhaai karke (dekhiye Matthew 5:16; Moses 4:2). Jab ek riporter koshish karis Mother Teresa ke pehchaan badhawe uske jiwan ke mishan ke kostin gareeb ke madad me, u bolis: “I to [Parmeshwar] ke kaam hai. Hum uske haath ke ek pensal ke … rakam hai. … U soche la kaam kare. U likhe la kaam kare. Pensal ke usme koi kaam nahi hai. Khali pensal ke maango istemaal kare ke mauka do.”10
Samaapti
Mere pyaare bhaaiyo aur bahano, mai hum sab ke amantrit karta hai “[apne aap] ko Parmeshwar ke de deo … sachchaai ke aozaar ke rakam” (Romans 6:13). Dewe me shaamil hai Uske batana ki hum long mangta kuch karwaae, Uske aguwaai maango, aur Uske shakti chaaho.
Har dam ke rakam, hum long sakta Ishu Masih ke or dekhe, hum long ke pefekt uddharan. I dharti se pahle la jiwan me, Swarg ke Pita puchis raha, “Hum kiske bheji?”
Aur Ishu jawaab dees, “Hum yahan hai, humme bhejo” (Abraham 3:27; Isaiah 6:8bhi dekho).
Ishu Masih apan pahle se tay karal bhumika, Uddhaarkarta aur Muktidaata, la ke swikaar karis, ke kostin tayaari karis,aur amal karis. U Pita ke ichcha karis (dekhiye John 5:30; 6:38; 3 Nephi 27:13) aur Uske divye kaaryon ke pura karis.
Jab hum long Masih ke uddharan pe chalta hai aur apne aap ke Parmeshwar ke de deta hai, hum gawahi deta hai ki U hum long ke bhi Apan kaam pura kare me aur dusar long ke ashish dewe me istemaal kari. Ishu Masih ke naam se, amen.