“Ua ia te A’u Se Galuega mo Oe”
E tofu i tatou taitoatasi ma se matafaioi taua e faatino i le tuleia i luma o le galuega a le Atua.
Na tautino atu e le Atua ia Mose, “Ua ia te A’u se galuega mo oe” (Mose 1:6). Pe ua i ai se taimi na e manatunatu ai pe e i ai se galuega a le Tama Faalelagi mo oe? Pe o i ai ni mea taua ua Ia saunia mo oe---ma e patino lava mo oe---e faataunuuina? Ou te molimau atu o le tali o le ioe!
Mafaufau ia Kilisi Kimaea, o le na fanau ma ola ae i le atunuu o Nepale. A o talavou, sa a’oga o ia i Saina, lea na faailoa atu ai e se tasi o lana vasega ia te ia le talalelei a Iesu Keriso. Mulimuli ane, sa sau Kilisi i le Iunivesite o Polika Iaga i se galuega mo galuega faauu ma feiloai ai i lana ava i le lumanai. Sa nonofo i la’ua i le Vanu o Sate Leki ma sa la vaetamaina ni fanau se toalua mai Nepale.
I ni tausaga mulimuli ane, ina ua silia ma le 1,500 le au sulufai mai tolauapiga i Nepale na toe masii atu i Iuta,1 sa musuia Kilisi e fesoasoani. Faatasi ai ma le lelei o lana gagana faa-Nepale ma le malamalama faaleaganuu, sa avea Kilisi ma faamatalaupu, faiaoga, ma se faufautua. Ina ua mae’a ona toe faamautu i le nuu, sa i ai ni tagata sulufai mai Nepale sa faaalia le naunau i le talalelei. Sa faatulagaina se paranesi mo le gagana Nepale, ma sa avea mulimuli ane Kilisi ma peresitene o le paranesi. Sa avea foi o ia o se tufugaaao i le faaliliuina o le Tusi a Mamona i le faa-Nepale.
Pe o mafai ona outou vaai i le auala na saunia ai e le Tama Faalelagi ma faaaoga ia Kilisi?
Ua i ai i le Atua se Galuega mo i Tatou Taitoatasi
Uso e ma Tuafafine, ua i ai i le Atua se galuega taua mo i tatou taitoatasi. I le saunoa atu i tuafafine ae aoao atu ai ni upumoni e faatatau i tagata uma, na aoao atu ai Peresitene Spencer W. Kimball: “Ae tatou te lei o mai iinei, na tuuina mai ia i [tatou] ni tofiga patino. … E ui tatou te le o manatua nei ni auiliiliga, ae e le faapea o le a suia ai le mea moni mamalu o mea na tatou ioeina.”2 Se upumoni ina a faaeaea! Ua i ai i lo tatou Tama Faalelagi ni mea patino ma le maoae mo oe ma a’u e faataunuuina (tagai Efeso 2:10).
O nei tofiga paia e le o faapolopoloina mo na o ni nai tagata faapitoa ae e mo tagata uma—tusa lava po o le a le itupa, tausaga o le matua, lanu, atunuu, maualuga o le tamaoaiga, tulaga faaleagafesootai, po o valaauga i le Ekalesia. E tofu i tatou taitoatasi ma se matafaioi taua e faatino i le faalauteleina o le galuega a le Atua (tagai Mose 1:39).
O nisi o i tatou e tuufesili pe mafai e le Tama Faalelagi ona faaaoga i tatou e faia ni sao taua. Ae ia manatua, Na te faaaogaina pea tagata masani e ausia ai mea ofoofogia (tagai 1 Korinito 1:27–28; MF&F 35:13; 124:1). “O [tatou] o pule,” ma “ua i totonu ia te i [tatou] le mana” e “aumai [ai] le amiotonu tele” (MF&F 58:27–28).3
Na faamatala mai e Peresitene Russell M. Nelson:
“E tele atu mea o loo mafaufau i ai le Alii mo oe nai lo mea o loo e mafaufau i ai mo oe lava ia! Na faasaoina ma faapolopoloina oe mo lenei taimi ma nofoaga. …
“E manaomia oe e le Alii e suia le lalolagi. A o e talia ma mulimuli i Lona finagalo mo oe, o le a maua oe lava i le ausiaina o mea faigata!”4
E faapefea la ona tatou malamalama ma faatino le galuega ua faamoemoe mai ai le Atua mo i tatou? Se’i ou faasoa atu ni mataupu faavae se fa o le a fesoasoani ai.
Taulai Atu i Isi
Muamua, taulai atu i isi. E mafai ona tatou mulimuli ia Keriso, “o le na femaliua’i ma agalelei” (Galuega 10:38; tagai foi 2 Nifae 26:24)
Ina ua ou toe taliu mai se misiona tala’i, sa ou misia le faamoemoega i aso taitasi sa ou fiafia lava i ai. E manino, sa ou manaomia le tausia o au feagaiga, a’otauina, amata se aiga, ma faigaluega. Ae sa ou taumafaufau pe sa i ai se isi mea, pe o se mea faapitoa foi sa finagalo le Alii ou te faia. I le uma ai ona manatunatu loloto mo ni masina, sa ou tau i le fuaiupu lea: “Afai e te manao i ai, o le a avea oe ma ala o le faia o mea lelei e tele i lenei tupulaga” (MF&F 11:8).Sa fesoasoani mai le Agaga ia te au ia malamalama o le uluai faamoemoega lava o tofiga faalelagi o le faamanuiaina ai lea o isi e ala i le “faia o mea lelei e tele.”
E mafai ona tatou faalatalata atu i vaega o faaiuga i o tatou olaga—e pei o le a le mea e a’o, po o le a le mea e fai mo le galuega, po o fea e nofo ai—i le tulaga o le fesoasoani i isi.
Sa siitia mai se tasi aiga i se aai fou. Nai lo le sailia o se fale i se pitonuu mauoa, sa uunaia i latou e nonofo i se eria e tele manaoga faaleagafesootai ma faaletamaoaiga. I le aluga o tausaga, sa galue le Alii e ala mai ia i latou e lagolagoina le toatele o tagata taitoatasi ma atiae le latou uarota ma le siteki.
O se polofesa faafomai sa tausisia se faiga masani ae sa lagona ua taiala o ia e tuuese se aso se tasi i vaiaso taitasi e siaki fua ai tagata e leai ni inisiua mo le soifua maloloina. Ona o le naunautaiga o lenei tamalii ma lona faletua e faamanuia isi, sa saunia e le Alii se ala mo i la’ua e lagolagoina ai le fia selau o gasegase sa manaomia le fesoasoani, a o tausia foi lo la’ua aiga toatele.
Iloa ma Atiae Meaalofa Faaleagaga
Lona lua, ia iloa ma atiae meaalofa faaleagaga. Ua tuuina mai e le Tama Faalelagi nei meaalofa e fesoasoani ai ia tatou iloa, faatino ma olioli i le galuega ua te Ia mo i tatou.
E taumanatunatu nisi o i tatou, “Pe i ai ea ni a’u meaalofa? Ou te toe fai atu, o le tali o le ioe!“Ua tuuina atu i alii uma [ma tamaitai] se meaalofa e le Agaga o le Atua … ina ia manuia ai” (MF&F 46:11–12; ua faaopoopo le faamamafa).5 E tele ni meaalofa faaleagaga ua tusifaamaumauina i tusi paia (tagai 1 Korinito 12:1–11, 31; Moronae10:8–18; MF&F 46:8–26), ae e tele atu isi.6 O nisi faataitaiga e ono aofia ai le lotoalofa, faaali atu o le faamoemoe, fesootai lelei ma tagata, faatulagaina lelei, tautala atu pe tusi faatauanau, aoao manino atu, ma le galue malosi.
E faapefea la ona tatou iloaina a tatou meaalofa? E mafai ona faasino i o tatou faamanuiaga faapeteriaka, fesili atu ia i latou e iloa lelei i tatou, ma faailoa patino mai mea tatou te lelei ai ma fiafia i ai. O le mea e sili ona taua, e mafai ona tatou fesili atu i le Atua (tagai Iakopo 1:5; MF&F 112:10). Na te silafia a tatou meaalofa, ona o Ia na foai maia ia te i tatou (tagai MF&F 46:26).
A tatou iloaina a tatou meaalofa, ua ia te i tatou se tiutetauave e atiae (tagai Mataio 25:14–30). E oo foi ia Iesu Keriso “e lei maua le atoatoaga i le amataga, ae [sa ati ae] mai lea alofa tunoa i lea alofa tunoa“ (MF&F 93:13).
Sa tusia e se tasi alii talavou ni ata e faalauiloa ai tulaga faatauaina faalelotu. O le ata ou te fiafia lava i ai o se ata o le Faaola, o se kopi o lea ata o loo tautau i lo matou fale. Sa atiae e lea uso ma faaaoga ana meaalofa faatufugaga. I le galue ai e ala mai ia te ia, sa musuia ai e le Tama Faalelagi isi e faaleleia le avea o i latou ma soo.
O nisi taimi tatou te lagona ai e leai ni a tatou meaalofa taua ma patino. I se tasi aso, sa aioi atu ai se tamaitai talavou lotovaivai, “Le Alii e, o le a la’u galuega patino?” Sa Ia tali mai, “Ia matau isi tagata.” O se meaalofa faaleagaga! Talu mai lena taimi, sa ia maua le olioli i le matauina o i latou o e galo i le tele o taimi, ma sa galue le Atua e ala ia te ia e faamanuia ai le toatele. O nisi o a tatou meaalofa faaleagaga atonu e le faalauiloa ai i tatou e tulaga masani o le lalolagi, ae e taua i le Atua mo Lana galuega.7
Faaaoga Mafatiaga
Lona tolu, faaaoga mafatiaga. O o tatou tofotofoga e fesoasoani tatou te iloa ai ma sauniuni mo le galuega a le Tama Faalelagi o loo i ai mo i tatou. Na faamalamalama mai e Alema, “ina ua mavae le puapuaga tele, sa faia e le Alii a’u o se meafaigaluega i ona aao” (Mosaea 23:10).8 Faapei o le Faaola, o lana taulaga togiola ua mafai ai e Ia ona fesoasoani mai ia te i tatou (tagai Alema 7:11–12), e mafai ona tatou faaaogaina le malamalama e maua mai aafiaga faigata e siitia ai, faamalolosia, ma faamanuia ai isi.
Ina ua faamalolo se pule sili faamanuiaina o punaoa mo tagata faigaluega, sa ia faitauina lona faamanuiaga faapeteriaka ma lagona ua musuia o ia e amata se kamupani e fesoasoani ai i isi tagata e sue ni galuega. (Sa fesoasoani foi o ia ia te au e sue sa’u galuega ina ua toe foi mai lo matou aiga mai se misiona.) Sa faaaoga e le Alii lona tofotofoga e avea o se maa-sopo e faamanuia ai isi, a o tuuina atu ia te ia se isi matata e sili ona ‘anoa.
Sa aafia se ulugalii talavou i se pepe na fanau mai ua maliu. Faatasi ai ma loto nutimomoia, sa tonu ia i la’ua e faamamaluina lo la afafine e ala i le saunia o fautuaga ma ni ‘anomea e lagolago ai matua e onosaia tulaga talitutusa faapea. Sa galue le Alii e ala i lea ulugalii ona o lo la alofanaunau faapitoa, sa atiae e ala i mafatiaga.
Faalagolago i le Atua
Ma le lona fa, faalagolago i le Atua. Pe a tatou ole atu ia te Ia i le faatuatua ma le faamoemoega tonu, o le a Ia faaalia mai o tatou tofiga faalelagi ia te i tatou.9 A tatou iloa loa, o le a fesoasoani mai o Ia ia i tatou e faataunuu na tofiga. “Aua ua i luma o [Ona fofoga] mea uma” (MF&F 38:2; tagai foi Aperaamo 2:8), ma i le taimi sa’o, o le a Ia tatalaina faitotoa e talafeagai mo i tatou (tagai Faaaliga 3:8). Sa Ia auina mai foi Lona Alo, o Iesu Keriso, ina ia mafai ai ona tatou faalagolago ia te Ia mo le malosi e sili atu i lo o tatou lava tomai faalenatura (tagai Filipi 4:13; Alema 26:12).
O se tasi o uso, na popole i faaiuga faalemalo i le lotoifale, sa uunaia o ia e tauva mo se tofi lautele. E ui i se faiga faatosina taufaafefe, sa ia faaaoga lona faatuatua ma ao mai punaoa e tauva ai. O le taunuuga, e lei manumalo ae sa ia lagonaina na tuu mai e le Alii ia te ia se taitaiga ma se malosi e faaleo ai mataupu e taua i le afioaga.
O se tina nofotoatasi, sa tausia se fanau na alia’e mai ai ni manaoga faapitoa, sa ia fesiligia pe mafai ona ia gafataulimaina manaoga o lona aiga. E ui ina sa faigata, ae sa ia lagona le faamalosia o ia e le Alii e faataunuu ma le manuia lana misiona taua.
O Se Upu o le Lapataiga
O le taimi lava e tasi e fesoasoani mai ai le Atua ia te i tatou e faataunuu ia tofiga faalelagi, o le taimi foi lena e galue ai le fili e faalavelave ma tata’i ese i tatou mai se olaga ta’uaogaina.
O le agasala atonu o lo tatou maagao aupito tele lea, e faapogisaina lo tatou lagona nofouta i le Agaga Paia ma taofia ai lo tatou maua o le mana faaleagaga. Ina ia faatino le galuega a le Tama Faalelagi ua ia te Ia mo i tatou, e tatau ona tatou taumafai ia mama (tagai 3 Nifae 8:1). Pe o tatou ola ea i se ala e mafai ai ona galue le Atua e auala mai ia i tatou?
O loo saili foi e Satani e faalavefauina i tatou i mea e le taua. Sa lapata’ia e le Alii se taitai muamua o le Ekalesia, “Sa tele ona i ai lou mafaufau i mea o le lalolagi nai lo o mea a a’u … ma le auaunaga na valaaulia ai oe” (MF&F 30:2). Pe ua faatumuina ea i tatou i mea faalelalolagi ua tatou faasee ese ai mai o tatou tofiga faalelagi?
E le gata i lea, e faalotovaivaia foi i tatou e Satani i lagona o le le agavaa. Na te faia ia foliga mai e matua faigata tele la tatou galuega pe taufaafefe. Peitai, e mafai ona tatou faalagolago i le Atua! E alofa o Ia ia i tatou. E finagalo ia tatou manuia. O le a Ia “savali i [o tatou] luma; o le a faatasi ma [i tatou], na te le tuuna [i tatou].” (Teuteronome 31:8; tagai foi Salamo 32:8; Faataoto 3:5–6; Mataio 19:26; MF&F 78:18).
E mafai foi e Satani ona faaseseina i tatou e vaai atu i la tatou galuega o se mea e itiiti le taua nai lo le galuega ua atofaina atu i isi. O galuega uma mai le Atua e taua, ma o le a tatou maua le olioli a o tatou “mitamita i le mea ua poloaiina ai [tatou] e le Alii” (Alema 29:9).
A o galue le Atua e ala ia i tatou, e ono faaosoosoina i tatou e le fili e ave le faamalo ia i tatou lava mo soo se mea e ausia. Peitai, e mafai ona tatou faataitai i le lotomaualalo o le Faaola i le taumamao mai le viia o le tagata lava ia ae ia viia ma faamamaluina le Tama (tagai Mataio 5:16; Mose 4:2). Ina ua taumafai se failipoti e faaaloaia Mother Teresa mo lana misiona i le olaga e fesoasoani i e matitiva, sa ia tali atu: “O le galuega [a le Atua]. O a’u e pei o se … penitala i Lona aao. … O Ia e mafaufau. O Ia e tusitusia. E leai lava se mea a le penitala e fai i ai. O le penitala e tatau lava na o le faataga ina ia faaaoga.”10
Faaiuga
O’u uso e ma tuafaine, ou te valaaulia i tatou taitoatasi ia “tuuina atu [outou lava] i le Atua … e fai ma auupega a le amiotonu” (Roma 6:13). O le tuuina atu e aofia ai le tuu atu ia te Ia ia silafia tatou te mananao ia faaaoga i tatou, sailia Lana taitaiga, ma maua Lona malosiaga.
E pei ona masani ai, e mafai ona tatou vaavaai atu ia Iesu Keriso, lo tatou faataitaiga atoatoa. I le muai olaga, sa fesili ai le Tama Faalelagi, “O ai se Ou te auina atu?”
Ma sa tali atu Iesu, “O A’u lenei, auina atu au”(Aperaamo 3:27; tagai foi Isaia 6:8).
Sa talia e Iesu Keriso, sa saunia i ai, ma sa faatinoina Lana matafaioi na muai faauuina ai o Ia o lo tatou Faaola ma le Togiola. Na Ia faia le finagalo o le Tama (tagai Ioane 5:30; 6:38; 3 Nifae 27:13) ma faataunuu Ana galuega paia.
A o tatou mulimuli i le faataitaiga a Keriso ma tuuina atu i tatou lava ma le lotofaamaoni i le Atua, ou te molimau atu o le a ia faaaogaina foi i tatou e tulei Lana galuega ma faamanuiaina ai isi. I le suafa, o Iesu Keriso, amene.