Leum, Oruh tuh Kuht in kuh in Liye
Kuht enenuh in ngwetngwet nuh ke mwet sahyac ke ahtro muhtuhn Mwet Lahngo lasr.
The Lion King el sie petsac na sun ke ipin acn Africa. Ke pacl se Lion King el misac ke pacl se el sefiyac wen se nahtuhl ah, lacohn fuhsr sac forsiyucki in som nuh sahyac ke mwet kol koluk kuhnaoslah oruh wo ke savanna ah. Lacohn prins sac kol tohkohsrahi sac ke kahsruh sin mwet luti sac. Ahtro muhtahl ikacslah nuh ke enenuh in ma nuh kwewa wo nuh ke fohlohkihnyac tukun ac misac uh ke savanna ah. Na el ekihn tohkohsrah pwacye lal, lacohn fuhsr sac kahsrweyuck in “liye ma yohk ma mwet uh enenuh in liye kac.”1
Lotwelah in ekihn mwet eis luhn ma nuh kwewa luhn Pahpah, wosasuc luti kuht in liye in ahluhkwelah ma kuh in liyeyuck kacsr. In lihksreni liye ma uh, kuht enenuh in nuhnkuh liye mwet uh oacna ke Mwet Lahngo El liyaclos. Wosasuc el kuh in mokle ac nwacklah ke kain in mwet pucspucs. Kuht tiac kuh in kahlwem na pwacye ke sulwaclah ac ohiyacn nuhnak luhn mwet kuht aetuhi nuh se, lohm alu, ac fin ne in sucu lasr, mweyen kuht suhkwac na etuh kwewa kwaclos. Kuht enenuh in tiac nuhnkuh ke ma somlah ac tiac srisri ac in ahkyohkye mwe srihkasrak oasr yohrohsr ingena.
Nga ikacslah muhtuhk in, “liye ahluhkwelah ma nga kuh in liye” ke nga ekihn misin prestuhn se ke pacl in kuhlwacnsap luhk. Tamuhlwel fuhsr se el ai sahngweng ac tiac etuh ma uh. Ke kuht ohsun ke sie lohlngohk, el suhpwacr ke el fahk, “Nga ke som nuh lohm ah.” Nga nuhnkuh sihk sifacna, “Koacl, kuht kuh in nahwelah ma se inge.” Nga ahkkweyacl in orekma upac ac pruhe kac ke wik se ac na pahngonyuc. Apkuhran in mihnit se luhlah, nuh ke wik se tok ah, el pahng. El srwackna ke som nuh lohm sel. Nga sulpac ahkkweyacl in pruhe, in orekma upac, ac in pahngonyuc ke wik se. Ke lohlngohk lasr, ma uh tiacna eklac. El kwacfe in som nuh lohm sel.
Nga tiacna kuh in lwelah ma se inge in sikyak. Nga muhtwacwacack in lotwel ke ohiyac muhtahl ke pahng lal. Nga kwacfwel in “muhlkuhnlah kacl sifacna ac som orekma.”2Tuh fin ne ke kahsruh yohk nga sang, nuhnak lal tiacna eklac. Se kahlwem nuh sihk muh nga tena arlacna etuh na pwacye lah mac. Na nga puhla muh pihrihkyuck nga in siyuck ma se sel: “Tamuhlwel, meac upac nuh sum?” Ma el fahk ah moklweack insiyuck: “Prestuhn, Nga tiac kuh in rit.”
Mwe kahsruh lahlmwetmwet se suc nga nuhnkuh muh ac yohk srihpac nuh sel in lohng tiacna fal nuh ke enenuh lal. Ma enenweyuck yohk nuh sel pa in liye lohlngohk sa lal ac lwelah nguhn in kahsrwel in etuh mac na pwacye ke nuhnak luhn tamuhlwel se. El enenuh nga in liye na pwacye enenuh lal ac sang sie srihpac in finsrak. Sahyac na, nga tuh oruh inkacnek in kahsruh ma tiac fal nuh ke elyah lal. Tamuhlwel puhlaik se inge el etwaclah in rit ac sikyak mwet tuhmal lutlut wo luhn Jisus Kraist. El ikacslah muhtuhk nuh ke kahs luhn Mwet Lahngo: “Mwet uh elos liye luku, ac nga liye insien mwet uh” (1 Samuel 16:7).
Pa sie mwe insewowo ke Nguhnin Leum ahkyohkye ngwetngwet lasr. Esam ke mwet pahluh Elisha, el tuhkahkwack ac sokwack mwet mweun luhn acn Syria ma raunwelah acn sel wi ohsr ac chariot nahtuhlos? Mukul kuhlwacnsap lal sahngweng ac siyuck sel Elisha meac elos ac oruh ke ma sikyak ah. Elisha el fahk muh elacn tiac elyah, ke kuhtuh kahs ma tiac kuh in muhlkihnyucklac. “Nimet sangeng. Pus mwet wi kuht lukelos” (Luo Tokosra 6:16). Mwet kuhlwacnsap se lal ah tiac etuh mac kalmacn ma el fahk ah. El tiac na akihlen na pwacye ma el liye uh. Tuhsruhk, Elisha el liye lihpufacn puhs ahkolah in mweun luhn mwet orekma luhn mwet pahluh. Elisha el pruhe nuh sin mwet Lahngo Elan ikacslah muhtuhn mukul fuhsr se inge, “ac mwet kulansap lal ngetak: ac, liye lah, pe eol uh sessesla ke horse ac chariot e, raunella Elisha” (Luo Tokosra 6:17).
Kuhtuh pacl kuht srihkuhtlac liki mwet sahyac ke ma suc tiac oacna sie ke ma kuht liye. Kuht puhla wo yurin elos suc nuhnak, sramsram, nuknuk, ac orekma oacna kuht ac tiac puhla wo yohrohlos suc tuhkuh ke siena facsin kuh ohiyac. Ke ma pwacye uh, yac kuht kwewa tiac tuhkuh ke kain in acn ac sramsram ke kain in kahs? Yac kuht tiac liye ip yohk fal ke moul in srihke lasr? Tuh kuhtuh liye ac sramsram ke mwe insewowo in liye, oacna mwet pahluh Elisha, ac kuhtuh liye ac sramsram ke ma pwacye elos liye, oacna nga puhlakihn ke ma nga tiac etuh ke misineri luhk.
Kuht muhta ke sie facl ma mwet uh luhngse kapsra, sang ine, ac ahkkolukye In siena liki ke ngwetngwet ke kuhlahs luhn social media. Sahyacna, kuht enenuh in liye ohiyac wo ma kais sie sesr kuh in akihlenyuck kac. Ohiyac wo ac kena yohk inge tiac kuh in oreklac ke Pinterest kuh Instagram.
In lwelah ac luhngse mwet sahyac tiac kalmac pa kuht enenuh in sruokyac luhlahlfongi lalos. Woiyac uh, ma pwacye uh ahkkweye ohiyac wo lasr, oruh ac fah tiac sie ma kosraclah kuhlwacng. Luhngse pwacye nuh sin mwet sahyac enenuh in tahfwelah srihke in lwelah se in akihlen ohiyacn moul in puhla ac ohiyac wo ma kuht tiac arulacna etuh kac. Liye yohk lasr ke ma kuht liye uh enenweyuck nuh ke lohacng wowo lasr nuh sin Mwet Lahngo.
Ke Mei 28, 2016, tuhlihk mukul yac-16 se ac kawuck se lal Austin oasr ke rench luhn sucu lal fin acn Colorado. Beau ac Austin fanyak nuh ke stosah se okwacltahl ke finsrak yohk ke sie lwen in muhtwacta. Eltahl tiac som loes ke pacl se elos sun ma upac, suc ahkuhtweyac muh oasr ma upac sikyak. Stosah soko Beau el wucn ah puhtatlac, na tanilyac Beau suc toasriyac srihk liki paun 400 (180 kg) ke osra. Ke pacl se Austin kawuck lal Beau el mayang nuh yohrohl, el liye lah Beau el elyah ke moul lal. Ke kuhiyacl kwewa, el srihke in olwack stosah soko ah liki kawuck lal an. Tiacna mukwilac. El pruhe kacl Beau ac na el som suk kahsruh. Mwet in kahsruh ai, tuh ke ao ekahsr tohkoh Beau el misac. El mwesahs liki moul in mahno se inge.
Ninac pahpah ahsor tuhmwacl tui. Ke elos tu ke acn in ono se wi kawuck sacohk lal Beau ac mempucr luhn sucu, na polis ohfuhser se utyak nuh lun fuckihl sac ac sang cell phone nahtuhl Beau ah nuh sin ninac kiyacl. Ke el srukyac fon sac, puhsra luhlahp se kahslah. El ikacslah ac liye alarm se lal Beau nuh ke lwen nuh kwewa. El riti pweng se luhn tuhlihk mukul pwacr-sacohk, puhlaik nahtuhl suc el orwaclah in riti lwen nuh kwewa. Fahk muh, “in esam in fihliyac Jisus Kraist emet in moul lom mihsenge.”
Lohacng lal Beau ke Mwet in molwelah tiac na ahksrihkyelah ahsor luhn mwet sacohk lal ke wacngihnlac lal. Tuhsruhktuh, sang finsrak ac kalmac yohk ke moul lal Beau ac sulwaclah luhn moul. Sang lwelah se nuh sin sucu lal an in ahsor yohk muhkwena ke misac sa lal an ac in ngwetlah nuh ke engan na pwacye se ke moul se ahk luo. Pa sie luhngse kawihl nuh sin pahpah ninac kiyacl Beau in liye ke mwe sang wen se nahtuhlos inge liye.
Ke kuht ekihn mempucr luhn Alu, utuckuh nuh sesr mwe ahkkahlwemye luhn nguhn lasr ma kahsrwe kuht ke pacl kuht lohacng kacsr sifacna ac ngwetlah liki molwelah. Kuhfa luhn Leum el mwe ahkacsmak in kalweni in lohacng nuh sin Jisus Kraist tuh kuht fah esamuhl pacl nuh kwewa ac tuh fah oasr Nguhn Lal pacl nuh kwewa in kuht (liye D&C 20:77). Tuh kuhtuh pacl uh kuht tulokihn puhla in ahkacsmak ac ahkkahlwemye inge. Ke kuht lohacng ke Jisus Kraist in moul lasr, El fah oruh tuh kuht in kuh in liye nuh ke ma yohk srihpac liki na kuht muhkwena nuhnkuh kac.
Nga eis lwacta se inge arlac pwacr ke sie mwe ahkkahlwemye kuh puhlakihnyuck sin sie tahmtahel oaru. El fahk nuh sihk lah el srihke in kahsruh mukul tuhmwacl in kahlwem lah fuhkah puhla lal, el muhtwacwacack in tahkuhnlah ma mukul tuhmwacl ah oruh kuh fahk ahkfohsyacl ke fon nahtuhl. El nuhnkuh muh ke pacl fal, oasr ma suhmuhslah in ahkkahlwemye in kuh in akacsruhi nuh sel ma elan ekuhllah ke ohiyac lal. Tuh, ke sie sacnri ke pacl in ipeis kuhfa luhn Leum ac lohacng nuh ke Iwaclah luhn Mwet Lahngo, el nuhnkwacack lah ma koluk el suhmuhslah ke puhla lal sin mukul tuhmwacl ukwacack na pwacye nguhn luhkwel ac tiac kuh in ekuhluhllah.
Sie mwe ahkkahlwemye luhn nguhn ilyak nuh insiyacl ma fahk: “Lwelah in som; lwelah nohfohn in som. Elah mwe kahsruh ingacn. Wacngihn finsrak la.” Na el suhmuhslah, ac nga fahk; “Use kihtin pacl nuh sihk in puhlaik in elah lis sac. Tuh ke nga oruh, kwewana puhla koluk ingacn wacngihnlac. Insiyuck sesseslah ke luhngse—luhngse nuh sin mukul tuhmuhk ac luhngse nuh sin Mwet Lahngo.” Oacna Saul ke inkacnek nuh fin acn Damascus, ararama lal eklac. Unen ik uh puhtatlac liki muhtahl.
Mwet Lahngo lasr El sana in ikacslah kun luhn mahno ac nguhn. Ikacslah muhtahsr in liye ma pwacye muhtahl, ke kahlwem ac akucl, ahkoe kuht lac in unweyucklac ke ma kuht kun kac. Ke kuht lohacng nuh ke “mwe ahkkahlwemye” luhn nguhn ma srihsrngi kuht nuh ke inkacnek luhn liyactwen, kuht eis olwelah ke kuhfa luhn Leum in eis Nguhn Lal in wi kuht. Ma se inge sikyak nuh sel Joseph Smith ac Oliver Cowdery ke tempuhl se Kirtland ke pacl se ma pwacye lutiyuck sin Jisus Kraist suc olwelah muh mwe lihsrlihsr lohsr luhn suhlahlahlfongi sisyucklac liki nuhnak lalos, ac nuhnak lalos fah ikacklah (liye D&C 110:1).
Nga fahkwack lah ke kuh luhn Jisus Kraist, ikacklah muhtahsr in liye ma uh yohk likina liye na pwacye lasr uh. Oacna ke kuht Esamuhl ac nguhn Lal in wi kuht, nuhnak lasr fah ikacklah. Na ma pwacye fuhlwact ke sacohkiyacn kais sie sesr fah lihksreni oan insiyacsr. Ke inen Jisus Kraist, amen.