Rubak, Bo Mrellak el mo Omes
Ng kired lomes er a rebebil el loba osengel Osobel.
Sel The Lion King a dodengelii el huirum el kirel a klou el chutem er a Africa. Ngkel lion king ra le mad lolsobel er a ngelekel sechal, eng ngkal ngeasek el price el lion a mlodikl eng ke lomecheracheb el king a tilemelii a tabesul beluu. Ngikal lion prince a liluut el nguu a belual. Ngulkiu er a sensei er ngii el ulsisecheklii meng mlo medengei el kmo a bek el outeliil a mo mad e kuk msa klengar ra tang, e ngkal ngeasek el merredel lion a liluut el nguu a belual. Tiara losuub el mo merredel, ngkal ngeasek el lion a mlosisechakl el “lomes el bedul cheroid ra kuk di osengel.”1
Sel dosuub me bol sebeched el ngmai aikel klokelel a Chedam lolab, ea ebangkelio a dirrek el lolsisechakl er kid el llomes el bedul cheroid ra kuk di osenged. A domes el cheroid ra sel kuk di osenged, eng kired el lomdasu ra rebebil lokiu osengel a Osobel. A ebangkelio a sebechel el kosekesterir a robdois e kakerous el chad. Ngdiak el sebeched lungil medengei a ikel lulecheuekl el sorir ma rengrir a rechad el dodengelterir ma de chadecheduch, ongdibel er a Ikelesia, ma dirrek er a telungalk er kid e leng kesai el dodengei a rokui el tekoi el kirir. Ng kired lomes lengelakl er a uldesuir ma blekerdelir a rechad e mekengii a kedeb losenged er a de ngarngii el klechad.
Ngulbok a medak er a “kumes lengelakl er a osengek” ra memong sera kusiou el mission president. A ngeasek el elder a mlei e mad el bekikl e medakt. Sera ki mkaseues e ki mchadecheduch, eng melekoi el mekngit a rengul, “Ng soak el mora blik.” Ma kumedesuang, “Tiang a ki mchedechulii.” Mak mesmechokl er ngii me bol meduch a rengul e bo loluluuch el kirel tial tekoi el tal sandei e bo lomekedong er ngak. A tal sandei ruriul, ra mochu tal bung, eng ngomekedong. Ng dirk soal mo remei. Mak liluut el mesemechokl er ngii me bo loluluuch, el blak a rengul loureor, e bo lomekedong er ngak ra chelsel a tal sandei. Aki mluut el mo chadecheduch, eng direkak el mengodech a tekoi. Ng direk melemolm el soal mormei.
Ng dimlak kengei me bol tekoi tiang. Mak mocha olsisechakl er ngii el kirel a chedaol blekerdelel a okodongel. Ak milisiich er “ngii me lobes er ngii e bo loureor.”2 Ng rokui el tekoi el kulasem e diak el mechedechuul. Ngdi mle kiul me rengak el kmo ngak a diak kisang tial rokir el siasing. Seikid e ak milchesuar er a ongitikaik e oker er ngii a ker: “Elder, ngera kmal meringel er kau?” Sel ledilii a miliud er a renguk: “President, ngak a diak el sebechek el menguiu.”
Sel mellomes e lomellach el kulumdasu e lekong kmal ngarngii a belkul el kirel rongesii a dimlak a kangester er ngii ra usbechel. Sel lulesbech er ngii er ngak a kirek lomes lengelakl er a kuleached el ureor e mecherei a Reng mel ngesukak el mo medengelii sel kmal ngara chelsel a uldesuel ngikal elder. Ngulusbech er ngak el moungil mesang e odersii a mo uchul a urungulel. E diak, le kbai kora mlo imiis el terekakl a blekerdelek. Ngikal lulsemuuch el elder a mlo meduch el menguiu e mlo klikiid el mesiungel a Jesus Kristo. Ng milok a medak el mora tekingel a Rubak: “A chad omes er a ikrel, e ngdi ngak omes er a rengul a chad” (1 Samuel 16:7).
Ng meral klengeltengat el Reng er a Rubak a mok osenged. Ke medengelii a profet Elisha ra le bekiis e lesa re soldau ra Syria el ileuekl ra belual el ngara uos ma kuruma? A mesiungel a mlo medakt e uleker ra Elisha el ngera temo rulii el kirel tial chetiteuoekl el tekoi. A Elisha a dilu er ngii me lak el bekikl lokiu a ikal bedochel el tekoi: “Lak ke medakt: Te kuk betok a rulab el me rekid er a rulab elmo er tir” (2 Kings 6:16). Ngikel mesiungel a mla ra rauelbeluu el kmo ngerang melekoi a profet. Ng diak lesa el engelakl er a osengel. Engdi, a Elisha a milsterir a re soldau el anghel el keltmokl el mo oumekemad el kirir a rechedal a profet. Ma Elisha a miluluuch el mora Rubak mel bok a medal ngikal kekerei el chad, “ng mesenge: a bkul a bukl el di meseked er a uos ma kuruma el ngau, el rokui el iliuekl er a Elisha” (2 Kings 6:17).
Kede blechoel el meleakl er kid ra rebebil leng ngikel klekakerous el de ues. Kede melchesuar el mechelaod el ngara bita er tirkel lomdasu, melekoi, oubail, e ua blekerdeled e meringel el kmeed er tirkel ngodech a teletelir malechub eng klechad er tir. E a klemerang, kid ng diak kede bla ra kakerous el beluu e melekoi a kakerous el tekoi? Ng diak de rokui lomes er a beluulechad lokiu a klou loleochel leng blekerdelel a klengar er kid? A rebebil omes e mengedecheduch lokiu a reng el ua profet Elisha e a rebebil omes e omeketakl loba klebechel el ues el di ua sel blo kulchesuar er ngii meng ngkal ngarngii a ngesengesel el misionari.
Kede kie er a beluulechad el rechad a sorir el lomekesiu, omngakl, me a oltuub. Ngbai kired lomes lokiu a usbechellel a tekoi ra melidiul, ng kired lomes a rengud er a ikel blekerdelel a Dios el derta er kid a sebechel ngmai. A ikal klungiolel a Dios ma soad a diak el sebechel meues er a Pinterest malechub e le bereked er a Instagram.
A mo kongei e ou beltik el reng ra rebebil a diak el belkul a kmo kede mo omsau a uldesuir. Ng bleketakl, a klemerang a mekerreuid el mor sel ngarbab lomengesioll, e diak el bol sersid me lak kede chubechubechad. Ng klemerang el dou beltik el reng eng kirel melmolm omeruul el kongei a ungil lomerellir a rechad el blekerdelel a klengar er tir ma telitur er tir a diak ke bo dungil el medengei. Domes er a cheroid ra kuk di osenged eng kirel a uldesued lomes el bedul Osobel.
Sera May 28, 2016, e a teruich ma euid a rekil el Beau Richie ma sechelil ra Austin a mlara sers ra charm er a Colorado. A Beau ma Austin a ngilasech er a mlirir e mle semeriar ra sils el kmal moungil. Ng dimlak bol cheroid e te soiiseb er a chetiteuoekl el tekoi, luchul eng dilubech a kerior. Tial mlai el Beau a ulemekall er ngii a ulebitokl e oserchii a Beau er a cheungel tial leua el dart el bond el deel (180 kg). A sechelil a Beau ra Austin ra bo lesang, e ng mesa Beau el kedebengang a telil. Meng ngolab a rokui el klisichel, e millasem el mengurs er tial mlai er bebul a sechelil. Ng dimlak louedikel. Ng miluluuch el kirel a Beau e chuateter el remuret el moo siik a ngeseu. Ma rechad er a emergency a mochang, engdi kesai el sikang ruriul e a Beau a milngai er tial klengar.
A rechad er blil a mlei e kmal lumekikngit el reng. Sera le ngara osbitar lobengkel ngkal sechelil a Beau me a rechedal a telungalek, ea bulis a silisb e nguu a dengua er a Beau el nguu el mesang a delal. Mesera lenguu tial dengua, ea alarm a millebusech. Ng milkengii tial dengua el ulmes er tial ngar ngii. Ng mle klou a ngerel el chiuii sel tekoi el ngkal lungil ngelekel sechal a rirelii el mo menguiu er ngii er sel sils. Ng uasei, “Bo molatk el mo nguu a Jesus Kristo el mo uldelomel er a chelsel a klengar er kau er a chelechal sils.”
Sel rengul a Beau ra Osebelel a diak el bol ngesur a klengit el reng ra re betik a rengrir er ngii a le dibus. Ngdi msang a klou el lurungulel ma belkul el mo ra klengar ra Beau ma ikel techall er a klengar. Ng mesterir a telungalk er ngii ma re sechelil el lomes el cheroid ra kuk di klengit el reng ra mle mereched el kodelel e morsel lultebechel el deurreng er sel tara klengar. Ng meral mle medemdemk el klubechub el chad er a blil a Beau a milsang lulekiu osengel ra tekoi el kmal mle soal.
Mesel ngercheled a rechad ra Ikelesia, e kede mla nguu el me rekid a debsechel a reng el lomeklatk er kid sel domes el di olab osenged lolechib er a mo suobel. A sakrament a omeklatk er kid ra bekl el sandei me dolemolm lomtab er a Jesus Kristo mede blechoel el melatk er Ngii e de blechoel loba Reng er Ngii (mesa D&C 20:77). Engdi, bebil ra taem e ng diak ke domtab a ikel blekeradel lomeklatk e mengelechel. Sel sekum e a Jesus Kristo a uldelomel ra klengar er kid, Ngii a mo uchul eng rullid el momes a lmuut el meklou el techall el kal sebeched el di kid el mtab.
Ak ngiluu a meang el babier el kirel a blekeradel ra teletael el mo sobecheklii a tal kedung el sister. Ng uluchais er ngak el kmong melasem el ngosiur a bechil el mo medengei el kmo ngerang melchesuar, ng mlo melechang er a dengua er ngii a ikel tekoi loruul a bechil ng melekoi el kmal lolengasech er reng. Ng omdasu mesel lungil taem, eng mla kutmeklii a llechukl el bo lolecholt er ngii el mo rulii meng soal mo ngodechii a teletelel. Engdi, tara Sundei me lolai er a sakrament e lomtetab er a Tngakireng er a Osobel, eng mlo melchesuar el sekum meng meluches a ikel mekngit el blekeradel el kirel a bechil eng mo choridii a Chedaol Reng el mo diak lobengklel e dirrek el diak bol ngedechii a bechil.
Ng millebusech a debsechel a rengul el kmo: “Mchitii; mchoit el rokui. Msuld a ikel llechukl. Ngdiak a ngera el rellii.” Meng mlo meluches, e bo kumelekl a tekingel: “Ng telkib el taem eng merma ra renguk el mesuld er ngii rokui el llechukl. E tia ra ak rellii, a ikel rokui el mekngit el blekerdelek a ririid. A renguk a mlo mui ra beltik el reng—beltik el reng el mora bechik ma beltik el reng el mora Rubak.” Eldi ua Saul ra rael el mora Damascus, a osengel a milngodech. A cheleuel a chelebirukel a rirebet er a chelsul a medal.
A Osobel a blechoel lulmok osengir a re mle chouikou ra tech ma reng. A le blok a osenged el kirel a chedaol klemerang, a llechukl ma le cheldecheduch, a kutmeklid me kede mukar ra kedeb el losenged. Sel domtab me longelechel a reng lolecholt eng kired el melodech a teletelel a domdasu ma doruul a tekoi malechub eng kirel lomes loba kemanget el ues er a diak a ulebengelel, e kede melai er sel telbiil er a sakrament el mo obang a Reng er Ngii.Tiang a dilubech el mora Joseph ma Oliver ra Templo ra Kirtland er a klisichel a klemerang ra lolsisechakl er tir a Jesus Kristo el mle yaksok el kmo sel melkedek er a klechad a mengai ra uldesuir e a osengir ra klemedengei lobok (mesa D&C 110:1).
Ak sioning el kmo ngokiu sel klisichel a Jesus Kristo, eng mo sebeched lomes lokiu a reng le ngelakl er a ikel bleketakl el deues. Mesel dolatk er Ngii me doba Reng er ngii e a osenged er a klemedengei a obok. E sel klou el klemerang er sel chedaol el teleteled el ngarngii er a derta er kid a mo mesisiich el medechel er a rengud. Loba ngklel a Jesus kristo, amen.