Itangitangiri n ai Arona Ngkai E a tia n Tangiriira
Man buokaia ao kabwaraan aia bure tabeman ma te tangira ni koaua, ti kona ni kamaoaki ao ni karekea te korakora n tokanikai iaon ara kanganga.
N tain te Kabanea n Amwarake, te Tia Kamaiu e anga te tua ae boou nakoia Ana Abotoro, ni kangai:
“I anganingkami te tua nabangkai, bwa kam na itangitangiri; n ai arou ngke I tangiringkami, bwa kam na itangitangiri naba.”
“Ane a na ataingkami aomata ni kabaneia bwa au reirei ngkami n aei, ngkana kam i tangitangiri.”1
Ana reirei te Tia Kamaiu a anganaki te tua ae boou bwa a na karaoa te bwai ae raka riki, ae korakora riki, ae mai karawa.Te tua ae boou ao te kakao e kauarerekeaki ni kiingin te kibuntaeka “ngkai I a tia n tangiri ngkami.”
Te Tangira e Kaotaki n Ara Mwakuri; Ti Kaota Ara Tangira Rinanon Ara Ibuobuoki
“Te tangira bon te namakin ae nano, tabeaianga, ao ni bwakannanoia. Te banna ni katooto n ana tangira te Atua ibukiia Natina e reke n ana Mwakuri ni Kamaiu Iesu Kristo ae akea tokina.”2 “Bwa E tangiriia aomata te Atua n te aro are E anga Natina ae te rikitemanna iai, bwa e aonga n aki mate ane onimakinna, ma e na reke irouna te maiu are e aki toki.”3 “Tangiran te Atua ao raom bon anuaia ana reirei Iesu Kristo.”4
Tabeua te ririki n nako, ngke tibura te ikawai, Jose, ae aua ana ririki, e takakaro ma kainnabau. Ngke a tabe ni ngarengare ni kukurei n ikotaki, tibura te mwaane e titirakinna, “Tibu ma, ko tangirai?”
E kaeka, “Eng, Jose, I tangiriko.”
Ngkanne e manga titirakinna riki: “Ko kanga n ataia ae ko tangirai?”
E kabwarabwara nakoia ana namakin ao e tuangnga naba bwaai ni kabane ake e a tia ni karaoia ao n tatauraoi ni karaoi ibukina.
Imwiina kainnabau e titirakina Jose te aekaki n titiraki naba anne, n raonaki ma te titiraki ae e na iangoia raoi: “Ko kanga n ataia ae ko tangirai?”
Ma te kaeka n nanoroo ma e karinerine, e taku, “I tagiriko ibukina bwa anne ae I namakinna inanou.” Anuan Jose n tangira tibuna te unaine n te bong anne ao n tainako e kabwarabwara bwa te tangira bon ikotan te mwakuri ao te namakin ae nano.
E katanoata te Uea ae Beniamina “Nooria I taekin bwaai aikai bwa e aonga n reke iroumi te wanawana; bwa kam aonga n ataia bwa ngkana kam beku ibukiia raomi ao kam beku naba iroun Atuami.”5
N te aonaaba ni bong aikai te korakai n aro nako aika a mwaiti, kanakoan te rongorongo ma te tamnei ae kamanga ke katokaan te tamnei ae tamaroa ma taekana “I tangiriko” e tamaroa ao e kakaawaki. Ma angiina ae ti riai ni karaoia ti na katuka ara mobaera ao, ni kabonganai konabwaira, ni buokiia tabeman ake a kainnanoa buokaia. Te tangira n akea te mwakuri bon aekan te onimaki n akea te mwakuri, ni koauana e bon mate.
Te Tangira bon te Kabwarabure
Ana tangira Kristo, are te tangira ae itiaki,6e aki tii anai nanora ni mwakuri ao ni karaoi ibuobuoki ma e anganiira naba te korakora ni kabwarabure, n aki taraa te bwai are ti rinanona. N na tibwa te rongorongo are I a tia n rinanona ae bita maiu. Ted ao Sharon, ana karo Cooper, a tia n anganai te kariaia n tibwa te bwai are e riki nakoia aia utu e raka iaon ruaiwa te ririki n nako.N na karakina au taneiai man ana taratara Ted, are taman Cooper:
Aokati 21, 2008, moan bongin te reirei, ao tarin Cooper teniman ake a ikawai, Ivan, Garrett, ao Logan, a mena n te kainibwati n tataninga tokaia n te bwati.Cooper, ai aua ana ririki, e toka iaon ana bwatika, kainnabau, Sharon, e a oki n rianna.
Kainnabau e mena inuukan te kawai ao e tuanga Cooper bwa e na rinuuka. N te tai naba anne, te kaa e karaurau ni buti n raibwake nakon te maing ao ni moananako Cooper.
I karekea te tareboon mai irouia kain rarikira ni kaongoai bwa e moanaki n te kaaCooper. I waekoa ni buti nakon te kainibwati bwa N na nooria. Cooper e wene iaon te uteute, n rawerawea ikena, ma akea ikoakina ae nooraki.
I katorobubua irarikin Cooper ao n tuangnga taeka aika a kakukurei n aron“E na nakoraoi bwaai. Tataninga.” N te tai anne au mataniwi n ibonga, Nathan, e kaoti ma buuna.E tuatua neiei bwa ti na angan Cooper te kakabwaia n te nakoanibonga.Ti katokai baira iaon atuun Cooper. I aki kona n uringa te bwai are I taekinna n te kakabwaia, ma I uringa raoi rokoia tabeman irarikira, ao n te tai anne I ataia bwa e na motirawa Cooper.
Cooper e kakibaaki n te erekabuta nakon te onaoraki ma e a bon, motirawa. I namakinna bwa Tamara are i Karawa e tuangai bwa au ibuobuoki iaon te aba e a tia ao Cooper e a roko inanon baina.
Ti raona Cooper n te onaoraki tabeua te tai. Taan mwakuri ikekei a katauraoia bwa ti aonga ni kona n taua ni kabo ma ngaia ao ni karekea ara tai are ti tangiria ma ngaia, n tautaua, nakon tokin nanora.
Iaon kawaira n okira mweengara, kainnabau are e kainnano n tang ao ngai ti itaramata ao ti maroroakina taekan te ataeinimwaane are e kabuta te kaa. Ti aki kinaa, e ngae ngke e maeka irarikin te kawai n te mwaake are e mena iai ara uoote.
Te bong are imwiina e bon matoatoa iroura ngkai ti bane n taonaki n te nanokawaki. I katorobubua iaon bubuan waeu n tataro mai inanou are I tuai kakaraoia mai imwaina. I bubutia Tamara are i Karawa n aran au Tia Kamaiu bwa e na kanakoa te rawawata are I taonaki iai. E karaoia.
Imwiina n te bong anne temanna te kauntira n ara titeiki beretitentii e bairea kaitiboora ma te ataeinimwaane—te tia kabuti kaa—ma ana karo ni mweengan te kauntira. Sharon ao ngai ti tataninga rokon te ataeinimwaane ma ana karo. Ngke e uki te mataroa, ti a kaitibo ma ngaiia n te moan tai. Au bitiobi e wirikiriki i taningau, “Nako kawaria.” Sharon ao ngai ti rabatia inanon te kurubu ae bubura. Ti bane n tang n te tai ae rang maan. Ti tuangnga bwa ti ataia bwa te bwai are e a tia n riki bon te kabuanibwai.
Bon te kamimi nakoiu ao Sharon, bwa ti uaia n namakina anne ao e teimatoa n tiku. Man ana nanoanga te Atua, ti kona ni butimwaea te kawai ae bubura, te kawai ae matata, te kawai ae tii ngaia, ao n tangira te ataenimwaane aei.
Tia moanna ni kaan nakon teuaei ao ana utu inanon ririki aika bati. E a tia n tibwa ana tai ae moan te kakaawaki ma ngaira. Ti airi naba ma ngaia nakon te tembora ngke e katauraoi ibukin ana mition.7
Tariu ao mwaaneu, Ted e ataia n aki nanououa bwa Tamara are i Karawa e tangiriira. E ataia bwa arora ni kona ni kabwarabure, ao ni kabebetea n te aro anne, bon te bwai ae tamaroa n aron kabwaraan ana bure. Te tamaroa aei e roko man irirakin ana banna ni katoto ara Tia Kamaiu. N ana boki Moomon, Aramwa e kaotia bwa te Tia Kamaiu “Ao e na waaki, n rinanon te maraki ma te karawawataaki ao te kaririaki n aekaia nako; ao aio bwa e na kakoroaki bukin te taeka are e taku bwa e na uota iaona marakiia ao aorakiia ana aomata”8
Tariu ao mwaaneu, ai tamaroara karakinan te tangira ni koaua ao te ikabwarabure. Ngaira, naba, ti kona ni karekea te kimwareirei ao te kukurei ngkai ti beku ao ti kabwarai aia bure tabeman. Georgy, tibura naba te mwaane temanna, e tataekinna n tabetai, “Aekakira aron ara utu aei?” Ao e kaeka, “Ngaira te utu ae kakukurei!”
Beretitenti Thomas S. Monson e a tia n reireiniira, ni kangai, “Ti na taratarai maiura ao ni kataia n iriira ana banna ni katoto te Tia Kamaiu n akoi, n tangira, ao n nanoanga.”9
I ataia bwa Tamara are i Karawa ao Natina, Iesu Kristo, a tangiriira ao a tatauraoi ni buokiira ni karaoi mwakuri ngkai ti itangitangiri n ai aroia ngkai A tia n tangiriira. Ao I ataia bwa man buokaia ao kabwaraan aia bure tabeman ma te tangira ni koaua, ti kona ni kamaoaki ao ni karekea te korakora n tokanikai iaon ara kanganga. Ao I taekinna n aran Iesu Kristo, amen.