Ib Leeg Hlub Ib Leeg Ib Yam Li Nws Hlub Peb

“Kev hlub yog ib yam uas coj yus los mus muab siab npuab, txhawj xeeb txog, thiab tshua lwm tus neeg. Qhov piv txwv zoo tshaj plaws hais txog Vajtswv txoj kev hlub rau Nws cov me nyuam yog nrhiav tau hauv Yexus Khetos txoj Kev Theej Txhoj Nyob Mus Ib Txhis Li.”² “Rau qhov Vajtswv hlub neeg ntiaj teb kawg li, nws thiaj txib nws tib leeg Tub los rau hauv ntiaj teb. Tus uas ntseeg nws Leej Tub, ces yuav tsis tuag, tab sis yuav tau txoj sia nyob mus ib txhis.”³ “Kev hlub Vajtswv thiab tib neeg sawv daws yog ib tug yam ntxwv ntawm Yexus Khetos cov thwj tim.”⁴

Ob peb xyoos dhau los, thaum kuv tus tub xeeb ntxwv, Jose, muaj 4 xyoos, nws nrog kuv poj niam ua si. Thaum nkawd tab tom luag thiab ua si ua ke, wb tus tub xeeb ntxwv nug hais tias, “Pog, koj puas hlub kuv?”

Kuv poj niam teb nws hais tias, “Aws, Jose, hlub los mas.”

Ces Jose nug nws dua ib lo lus nug hais tias: “Koj ua li cas paub hais tias koj hlub kuv?”

Kuv poj niam piav rau Jose hais txog qhov uas nws xav li cas txog Jose thiab tej yam nws tau ua rau Jose thiab tej yam nws kam ua rau Jose.

Tom qab no kuv poj niam nug Jose tib co lus nug, suav lo lus nug hais tias: “Koj ua li cas thiaj paub hais tias koj hlub kuv?”

Jose ua tib zoo teb hais tias, “Kuv hlub koj vim kuv hnov tau tias koj hlub koj hauv kuv lub nruab siab.” Jose txoj kev hlub nws pog hnub ntawd thiab mus ib txhis li qhia hais tias txoj kev hlub yog tej kev coj ua thiab tej kev xav hauv nruab siab huv tib si.

Vaj Ntxwv Npeyamis tau qhia hais tias, “Thiab saib seb, kuv qhia nej tej yam no xwv kom nej yuav kawm tau kev txawj ntse; xwv kom nej yuav kawm tau tias thaum nej ua hauj lwm rau nej tej neeg nruab ze ces nej tsuas ua hauj lwm rau nej tus Vajtswv xwb.”⁵

Niaj hnub nim no muaj kev txom nyem ntau heev dhau, ces qhov uas peb muab text xa mus rau lwm tus neeg muaj duab pab txhawb nqa los yog muab ib daim duab zoo nkauj tso rau saum Internet muaj cov lus hais tias “Kuv hlub koj” yeej zoo heev thiab muaj nqis ntau heev. Tiam sis qhov uas tsim nyog peb txhua tus ua yog muab peb tej xov tooj tso tseg rau ib sab thiab, xuas tes xuas taw, pab lwm tus neeg uas muaj teeb meem. Kev hlub uas tsis pab lwm tus neeg yog zoo ib yam li kev ntseeg tsis muaj tej hauj lwm zoo; twb tsis muaj qab hau dab tsi li.

Khetos txoj Kev Hlub Dawb Paug, uas yog kev siab hlub,⁶ tsis yog tshoov peb lub siab kom ua tej yam zoo thiab ua hauj lwm pab lwm tus neeg, tiam sis kuj pab kom peb muaj peev xwm zam txim rau lwm tus neeg, txawm muaj li cas los xij. Cia kuv qhia ib zaj los ntawm kuv lub neej uas tau pab kuv hloov kuv lub neej. Ted thiab Sharon, uas yog Cooper niam thiab txiv, tau tso lus rau kev qhia saib tau muaj li cas rau lawv tsev neeg ntau tshaj cuaj xyoos tas los. Kuv yuav qhia zaj no ib yam li kuv yog Ted, Cooper txiv:

Yim Hli Ntuj 21, 2008, yog thawj hnub mus kawm ntawv, thiab Cooper peb tug tij laug, Ivan, Garrett, thiab Logan, yog tos nce npav rau ntawm qhov chaw tos npav. Cooper, uas muaj 4 xyoos, tab tom caij nws lub luv thij; kuv poj niam, Sharon, tau taug kev.

Kuv poj niam nyob txoj kev sab tid thiab co tes rau Cooper kom nws hla kev. Thaum tib lub sij hawm ntawd, muaj ib lub tsheb uas lem sab laug los luam Cooper.

Muaj ib tug neeg zej zog hu tuaj ntsib kuv qhia kuv tias Cooper raug tsheb luam. Kuv rawm maj tsav tsheb mus tom qhov chaw tos npav. Cooper pw rau ntawm cov nyom, sib zog ua pa, tiam sis raws li peb pom peb tsis paub tias nws sab npaum li cas.

Kuv txhos caug rau ntawm Cooper thiab hais tej lus zoo txhawb nqa nws ib yam li “Yuav OK os. Tso siab mog.” Tam sim ntawd kuv tus thawj coj rau pawg pov thawj hlob, Nathan, tuaj txog ua ke nrog nws tus poj niam. Nws hais kom peb siv lub pov thawj hwj foom koob hmoov rau Cooper. Wb txawm muab wb ob txhais tes tso raum Cooper lub taub hau. Kuv tsis nco qab hais tias wb tau hais dab tsi foom koob hmoov rau nws, tiam sis kuv nco tau tias yeej muaj neeg ib ncig ntawm peb, thiab tam sim ntawd kuv paub hais tias Cooper yuav tas sim neej.

Muaj ib lub dav hlau kiv tshuab uas thauj Cooper mus rau lub tsev kho mob tiam sis, Cooper twb yuav tas sim neej. Kuv xav hais tias Leej Txiv Saum Ntuj Ceeb Tsheej yog qhia kuv hais tias kuv lub luag hauj lwm saib xyuas Cooper tag lawm thiab nim no Cooper yog Leej Txiv li.

Kuv poj niam wb muaj lub cib fim nrog Cooper nyog me ntsis nyob ntawm lub tsev kho mob. Cov neeg kho mob nyob ntawd tau npaj wb tus tub kom wb puag tau nws thiab nyiav nws thiab cia wb siv sij hawm nrog nws ntau npaum li wb lub siab xav.

Thaum kuv poj niam wb tab tom mus tsev, txawm wb nyuaj siab heev los, wb sib tham txog tus tub hluas uas tsav lub tsheb uas luam wb tus tub. Wb twb tsis paub tus tub ntawd, txawm hais tias nws nyob ib txoj kev ze wb thiab nyob hauv wb pawg ntseeg.

Hnub tom qab ntawd yeej nyuaj heev rau peb tsev neeg vim peb puav leej tu siab heev. Kuv txhos caug thiab sib zog thov Vajtswv, nthuav kuv lub siab rau Vajtswv mloog. Kuv thov Leej Txiv Saum Ntuj Ceeb Tsheej tuav tus Cawm Seej lub npe kom Nws daws kuv lub siab tu, tshem nws tawm ntawm kuv mus. Vajtswv tau ua li ntawd.

Tsis ntev tom qab ntawd ib tug pab cuam hauv peb ceg txheem ntseeg pawg thawj tswj hwm tau caw kuv poj niam wb mus ntsib tus tub hluas ntawd—tus uas tsav lub tsheb—thiab nws niam txiv tom tus pab cuam lub tsev. Sharon thiab kuv tos tus tub hluas thiab nws niam txiv tuaj txog. Thaum lub qhov rooj qhib, wb ntsib lawv, yog thawj thawj zaug wb ntsib lawv. Kuv tus npisov ntxhi rau kuv pob ntseg hais tias, “Mus cuag nws. Sharon thiab kuv txawm khawm nws. Peb peb leeg txawm quaj nyiav ua ke ntev tsawv. Kuv poj niam wb qhia nws hais tias wb paub tias tsis yog nws txhob txwm.

Yog ib qho txuj ci tseem ceeb heev rau Sharon thiab kuv, uas wb ob leeg tau xav li ntawd hnub ntawd thiab tseem xav li ntawd. Dhau ntawm Vajtswv txoj kev tshav ntuj, wb txawm muaj peev xwm taug txoj kev loj, txoj kev zoo, tib txoj kev uas zoo taug, thiab hlub tus tub hluas no.

Tau ntau xyoo los lawm wb tau nrog nws thiab nws tsev neeg ntaus phooj ywg. Wb nyob ntawd thaum nws ua tej yam tseem ceeb hauv nws lub neej. Wb twb nrog nws mus tom lub tuam tsev thaum nws npaj mus ua tub txib.⁷

Kuv cov kwv tij thiab cov muam, Ted paub tseeb hais tias peb Leej Txiv Saum Ntuj Ceeb Tsheej hlub peb. Nws paub hais tias qhov uas nws muaj peev xwm zam lwm tus neeg lub txim, kom daws nws lub nra hnyav li ntawd, yeej zoo heev npaum li qhov uas Vajtswv zam txim pub rau nws thiab. Qhov zoo heev no los ntawm qhov uas peb ua raws li tus yam ntxwv ntawm peb tus Cawm Seej. Hauv Phau Ntawv Maumoos, Amas hais txog tus Cawm Seej hais tias: “Thiab nws yuav mus, raug tej kev mob nkeeg thiab tej kev txom nyem thiab tej kev dag ntxias txhua yam; thiab ua li no xwv kom txoj lus thiaj yuav muaj puv npo li uas tau hais tias nws yuav ris nws cov neeg tej kev mob thiab tej kev nkeeg.”⁸

Kuv cov kwv tij thiab cov muam, nov yog ib zaj zoo kawg nkaus hais txog kev hlub thiab kev zam txim pub. Ib yam li ntawd, peb ntsib tau kev zoo siab thiab kev xyiv fab thaum peb ua hauj lwm pab lwm tus neeg thiab zam txim pub rau lawv thiab. Feem ntau, kuv tus tub xeeb ntxwv, Georgy, hais tias, “Peb yog ib tse neeg zoo li cas?” Thiab nws teb hais tias, “Peb yog ib tse neeg zoo siab!”

Thawj Tswj Hwm Thomas S. Monson tau ntuas peb hais tias: “Cia peb tshuaj xyuas peb lub neej thiab txiav txim siab ua raws li tus Cawm Seej tus yam ntxwv ua siab zoo, hlub lwm tus, thiab muaj siab hlub.”⁹

Kuv paub hais tias peb Leej Txiv Saum Ntuj Ceeb Tsheej thiab Nws Leej Tub, Yexus Khetos, hlub peb thiab yeej los kam pab peb muaj kev hlub ib leeg rau ib leeg ib yam li nkawd hlub peb. Thiab kuv paub hais tias thaum peb ua hauj lwm pab lwm tus neeg thiab zam txim pub rau lawv, muaj siab hlub tiag tiag, peb yuav muaj zog thiab peb tej siab tu yuav rov qab kho tau kom zoo. Thiab kuv ua tim khawv li no los ntawm Yexus Khetos lub npe, amees.