Luhngse Sie Sin Sie oacna ke El Luhngse Kuht
Ke kuhlwacnsap ac nuhnakmuhnahs nuh sin sie sin sie ke luhngse pwacye, kuht kuh in unweyucklac ac ahkkweyeyuck.
Ke Kuhfa Sahflah, Mwet Lahngo el sang sie masap sasuc nuh sin mwet tuhma lutlut Lal, fahk:
“Inge nga sot nu suwos sie ma sap sasu: kowos in lunges sie sin sie. Oana ke nga lunges kowos, kowos in oayapa lunges sie sin sie.
“Kowos fin lungse sie sin sie, na mwet nuhkwewa ac fah etu lah kowos mwet tumuk lutlut.”1
Utuckyang sie masap sasuc nuh sin mwet tuhma lutlut luhn Mwet Lahngo in oruh sie ma yohk liki met ah, sie ma wo liki met ah, ac sie ma oa liki met. Masap sasuc se ac solsol se inge ahkfototoyeyucklac ke sie pohloh kahs suc fahk muh “oacna ke luhngse kowos.”
Luhngse Pa Orekma; Luhngse Pa Kuhlwacnsap
“Luhngse pa puhla loal luhn insacnweacng, nuhnak wo, ac luhngse. Srihkasrak se ma yohk emet ke luhngse luhn God nuh sin tuhlihk Nahtuhl konweyuckyak ke Iwaclah ma pahtpaht luhn Jisus Kraist.”2“Tuh God El lunges faclu ouinge,” John el suhmuhslah, “El ase Wen sefanna natul, tuh elos nukewa su lulalfongi in el fah tia misa, a elos fah eis moul ma pahtpat.”3 “Luhngse nuh sin God ac nuh sin mwet uh pa sie ohiyac wowo luhn mwet tuhma lutlut luhn Jisus Kraist.”4
Kuhtuh yac somlah ah, ke tuhlihk mukul nuhtin nahtuhsr ma mahtuh emet, suc pa Jose, ke el yac ahkosr, el sritacl nuh sin muhtwacn kiyuck. Ke elos isrwacsr ac eis pacl wowo lalos, tuhlihk nuhtin tuhlihk nahtuhsr el siyuck, Ninac mahtuh, kuh kom luhngse nga?”
El tohpkohl fahk, “Ahok, Jose, Nga luhngse kom.”
Na el oruh pac sie kihsensiyuck: “Kuh kom etuh fuhkah lah kom luhngse nga?”
El ahkuhtweyac nuh sel puhla lal ac oacyacpac fahk nuh sel ke ma nuh kwewa el oruh tari ac ma el ac ahkolah in oruh nuh sel.
Tohkoh muhtwacn kiyuck ah fohlohkwacnwacng kihsensiyuck ah nuh sel, wi kihsensiyuck na loal se: “Kuh kom etuh fuhkah lah kom luhngse nga?”
Ke sie ngwetngwet in nihkihn insiyac ac pwacye, el fahk, “Nga luhngse kom mweyen nga puhla ke insiyuck.” Atacn luhngse lal Jose nuh sin ninac mahtuh kiyacl ke lwen sac fahkwack lah luhngse uh el tuhkuh ke mukwikwi ac puhla loal luhn kais sie.
Tohkohsrah Benjamin el luti, “Ac liye, nga fahk nuh suwos ma inge tuh kowos in etuh in lahlmwetmwet; tuh kowos in etuh lah ke kowos kuhlwacnsapuh mwet wiyowos kowos kuhlwacnsapuh God lowos.”5
Fin facluh mihsenge suc ma oasr kain in kweok pucspucs, suc ma kwacna suhpweyuck sie muhta kuh ngwetngwet isracsr ke cellphone nahtuhsr ke kahs in ahkwo ma fahk muh “Nga luhngse kom” wo ac yohk srihpac. Tuhsruhk puhkantwen sesr enenuh in fihliyac cell phone nahtuhsr uh ac, ke pahosr ac niyacsr, kahsruh elos suc enenuh kahsruh. Luhngse ma wacngihn kuhlwacnsap kac el oacna luhlahlfongi ma wacngihn orekma kac; el misac na pwacye.
Luhngse El Nuhnakmuhnahs
Luhngse suwohs luhn Kraist, suc pa luhngse muhtahl,6 el tiac ahkkweye kuht muhkwena in mukwilac ac sang kuhlwacnsap tuhsruhk el oacyacpac oasr kuh la in nuhnakmuhnahs, finne upac ohiyac sacn. Lwelah nga in akacsruhi ke sie ma suc sikyak ma lihksreni ekuhllah moul luhk. Ted ac Sharon, pahpah ninac kiyacl Cooper, lwelah tuh nga in akacsruhi ke ma sikyak nuh sin sucu lalos ke yac yuc somlah ah. Nga ac sruhmuhn in oacna ke liye lal Ted, pahpah tuhmwacl Cooper:
Ohkohs 21, 2008 pa lwen in muhtwacwacack luhn lutlut ac, tamuhlwel mahtuh tolu wiyacl Cooper, Ivan, Garrett, ac Logan, nohfohnna tu ke puhsstap ah soano pas ah. Cooper, suc ma yac ahkosr in pacl sac, el muhta fin pwacskuhl okwacl; muhtwacn kiyuck, Sharon, el fahsr.
Muhtwacn kiyuck tu ke lacfacl lacah ke inkacnek ah ac pounset nuh sel Cooper elan yucme nuh yohrohl. In pacl sac na, stosah soko kahkahsrihk kuhf nuh lacsac te yuclac facl Cooper.
Nga eis sie pahng ke taclofon ah sin sie mwet tuhlan luhk fahk lah stosah soko faksuhllah Cooper. Nga silahklahk lali nuh ke passtap ah in liyacl. Cooper el ahlahpwelihk fin mah ah, suk mohngohl, tuhsruhk wacngihn kihnet kahlwem kacl.
Nga sikuckmuhtuhntei siskacl ac fahk kahs in ahkkweyacl muh “Ma nuh kwewa ac Wo. Elan kampare soano kahsruh.” In pacl sac na mwet kol luhn high priests, Nathan, el sikme wi muhtwacn kiyacl. Muhtwacn kiyacl ah fahk kuht in sang sie priesthood blessing ah nuh sel Cooper. Kuht fihliyac pahosr nuh fin sifacl Cooper. Nga tiac kuh in esam lah meac nga fahk ke blessing sac, tuhsruhk nga esam arlac kahlwem lah nga puhla muh oasr nguhn raunikuhtlac, ac in pacl sac na nga etuh lah Cooper el ac siskuhtlac.
Elikaptucr ah usacllah Cooper nuh lohm ono ah, tuhsruhk, el misac. Nga puhla lah Pahpah Lucng el fahk nuh sihk lah sahflah ma kunuck nuh sel Cooper ac el inge oasr ye kohkoh Lal.
Kuht sislah kihtin pacl lasr yohrohl Cooper ke lohm ono ah. Mwet orekma we ah ahkoellah kuht in muh kuh in sruokilyac ac wihlkacsluh nuh sel ac elos use nuh sesr pacl luhlah ma kuht kuh in weluhl, sruokilyac, in oacna ke lasr uh.
Ke kuht fohlohk nuh lohm sesr, nga ac muhtwacn kiyuck suc ma toasrlah ke ahsor kuht foracni ac sramsramkihn mukul se ma us stosah soko ah. Kuht tiacna etwacl, finne el muhta fototo nuh in pohloh acn sesr ah.
Lwen tok ah arulacna upac nuh sesr ke srihpen kuht lihksreni na toasrlah ke ahsor ac kweok suc ma kuht puhlakihn. Nga puhtati ke intwek ac oruh sie pruhe na upac emet suc ma nga tuhfahna in oruh. Nga siyuck sin Pahpah Lucng ke inen Mwet Lahngo luhk in eslah ahsor na toasr suc nga puhlakihn. Ac el oruh.
Tohkohyang ke lwen sac sie kaunsuhlucr ke stek prestuhnsi el sackuhnlah nuh sesr kuht in ohsun nuh sin mukul fuhsr sac—suc ma us stosah soko ah—ac wi pahpah ninac kiyacl in ohsun ke lohm sin kaunsuhlucr se inge. Nga ac Sharon tuhpan mukul sac ac pahpah ninac kiyacl in tuhkuh. Ke sruhngucl ah ikacklah, pacl se emet kuht in liyacltahl. Pisap luhk el mahmah nuh insrwek, “Fahlac nuh yohrohl.” Nga ac Sharon lihksreni apsilyac. Kuht tuhkweni tuhng ke pacl na loeloes se. Kuht fahk nuh sel lah kuht etuh lah ongaiyac se pa sikyak ah el tiac oruh in oacyac.
Sie ohiyac usrnguck nuh sihk ac Sharon pa inge, lah kuht kwewana in puhlakihn ohinge ac kuht srack puhla ohinge. Ke luhngse luhn God, kuht kuh in eis inkacnek suwohs, inkacnek kahlwem, inkacnek se fanna, ac luhngse tuhlihk fuhsr wowo se inge.
Kuht fototoeni nuh sel ac sucu lal ke na yac sac fahfahsruh. El akacsruhi nuh sesr ke ma yohk srihpac ma sikyak in moul lal. Kuht weluhl pacna som nuh in tempuhl ke el ahkoel nuh ke misin lal.7
Tamuhlwel ac tahmtahel, Ted el tiac tahfuh luo in etuh lah Pahpah Tuhmasr Inkuhsrao El luhngse kuht. El etuh lah fin kuht kuh in nuhnakmuhnahs, ac in fuhlwelah ma nuh kwewa nuh Sel, pa sie puhla na wowo pa in eis nuhnakmuhnahs. Puhla wowo se inge tuhkuh ke kuht ukwe srihkasrak luhn Mwet Srihkasrak Wo emet. Ke Puk luhn Mormon, Alma el fahkwack ke Mwet Lahngo: “Ac el fah som, kweok ke kain in waek ac ongaiyac ac mwe sruhf nuh kwewa; ac ohinge tuh kahs uh in ahkpwacyeiyucklac suc fahk lah El fah eis nuh Facl kweok ac mas luhn mwet Lal.”8
Tamuhlwel ac tahmtahel, sie sramsram na wowo ke luhngse pwacye ac nuhnakmuhnahs pa inge. Kuht, kuh pacna in eis engan ac insewowo ke kuht kuhlwacnsap ac nuhnakmuhnahs nuh sin mwet sahyac. Georgy, sie tuhlihk mukul nuhtin nahtuhsr, kwacna fahk ohinge, “Kuh kuht suc fuhkah se?” Ac el sifacna tohpohklah, “Kuht sucu engan se!”
Prestuhn Thomas S. Monson el luti kuht, fahk, “Lwelah kuht in liye moul lasr uh ac eiskuhtyang in ukwe srihkasrak luhn Mwet Lahngo ke kuhlwacng, luhngse, ac luhngse muhtahl.”9
Nga etuh lah Pahpah tuhmasr Inkuhsrao ac Wen Nahtuhl, Jisus Kraist, luhngse kuht ac elos inse muhlahlah in kahsrwe kuht in orekma ke kuht luhngse sie sin sie oacna ke Elos luhngse kuht. Ac nga etuh lah ke kuhlwacnsap ac nuhnakmuhnahs nuh sin sie sin sie ke luhngse pwacye, kuht kuh in unweyucklac ac eis kuh in kuhtanglah ma upac lasr sifacna. Ac nga fahkwack ma inge ke inen Jisus Kraist, amen.