2010–2019
Poakpene duwehte Ah Poakohng Kitail
Oakotohpe 2017


Poakohng Mehteikan duwehte Ah Poakohng Kitail

Sang ni atail pahn kin mahk oh papah mehteikan ki limpoak mehlel, kitail kak mwahula oh kakehlailda.

Nan ansoun kamadipw en komwurumwuro, Sises ketkihong Sapwellime wahnpoaron ko kosonned kapw ehu, me kosoia:

“I pahn kihong kumwail kosonned kapw ehu, kumwail en poakpene nan pwungamwail. Duen Ei poakohng kumwail, iei duen kumwail en poakpene.

“Pwe ihme aramas koaros pahn esehki me kumwail nei tohn padahk, ma kumwail pahn limpoakpene.”1

Sapwelimen Sounkomouro wahnpoaron ko alehdi kosonned kapw ehu en kalaudehla arail doadoahk, laudsang mahs, oh mehkot me kesempwal. Kosonned wet oh luhk wet wehwehki ni oaralap “Nin duwen Ahi Poakohng uhk.”

Limpoak iei Wiewia; Limpoak iei Papah

“Limpoak wia pepehm en mehleliong, kesempwaliki, oh loaloapwoat. Kasalepen Sapwelimen Koht limpak laud ohng Sapwelime serih kan sansal sang ni Tomwpen Sises Krais me soutuko.”2 “Pwe iei wen Koht Ah loaloale sampah,” nin duwen dahme Sohn intingiedi, “me e ketkihdohki Sapwelime Ieroso, pwe mehmen me pwosonla IH en dehr salongala, ah en ahneki mour soutuk.”3“Limpoak ohng Koht oh Sapwelimeh kan wia kisehn wiewia en were ken Sises Krais.”4

Pahr ekei samwalahro, ansou me nein nait seri pwutak keieu laud, Jose, sounpar 4pahieu, ahpw wie mwadmwadonge ahi pwoud. Nan erein ara wie kokouruhr oh perperen pene, kisin pwutako idek reh, “Nohno kahlap, ke poakpoakeie?”

Liho sapengki, “Ehng, Jose, I poakpoakeiuk.”

Ih pil pwurehng peidek: “Ia mwomwen ahmw ese me ke poakpoakeie?”

E kawehwehieng kisin pwutako mwomwen ah pepehm ohng ih oh pil ndahng soahng koaros meh wiahier oh me e pil kak wiahiong ih.

Mwuri ahi pwoud uhd idek reh, duwehn ire kesempwal wet: “Ia mwomwen ahmw ese me ke poakpoakeie?”

Ni pasapeng mengei ahpw mehlel, kisin pwutako nda, “I poakpoakeiuk pwe I kehn nan ahi mohngiong.” Kasalepen en Jose ah limpak ohng ah nohno kahlapo rahno kin ansou koaros kasalehda me limpoak kapatapene wiewia oh pepehm loal kan.

Nahnmwarki Benjamin padahngki, “Oh kilang, I ndahiong kumwail mepwukat pwe kumwail en kak marainkihla; pwe kumwail en kak esehla me ni ansou me kumwail kin mihla nan amwail papah kempoakepahmwail akan, kumwail kin mihte nan amwail kin papah koht.” 5

Nan mour apwal en rahnpwukat, pwehki  wekpeseng en ansou de mwekid, kadar kisin lepin koasoai iangahki mehkot kemehn kouruhr de kihda kilel iangahki kisin lepin kahs “I poakpoakeiuk” udahn mwahu oh pil kesempwal. Ahpw dahme kitail udahn anahne wia iei en pwilikihdi neitail sehl kan, oh doadoahngki pehtail oh nehtail kan, oh sewese irail akan me anahne sawas laud. Limpoak ni soh papah duwehte pwoson ahpw sohte iangahki wiewia; Udahn e mehla douluhl.

Limpoak iei Mahk Mehlel

Limpoak unsek en Krais, me iei limpoak mehlelo,6  kiong kitail pepehm en kaidehnte kitail en mwekid de papah ahpw kitail en pil ahniki kehl en mahk, mendahte dahme wiawi. I pahn ehukihong kumwail irair ieu me sewese oh wekidala ahi mour. Ted ih Sharon, en Cooper ah pahpa nohno, mweidohngiehier en ehukihda dahme wiawihong arail peneinei sounpar duwau samwa samwalahro. I pahn ehukihong kumwail irair wet ni mwomwen me ngehi Ted, en cooper ah pahpao.

August  21, 2008, wia rahn keieu en sukuhl, oh rien Cooper pwutak laud silimeno, Ivan Garret, Oh Logan, wie awiawih pwoas ni wasahn awih pwoaso. Cooper, me  sounpar pahieu, dakdake were pwaisikelo; oh ahi pwoudo, Sharon alu.

Ahi pwoudo mihmi elep ahlo ih ndahng Cooper en kotehla ahlo. Ansouohte sdohsa ieu wetla wasahu oh idangidi Cooper.

I alehdi delepwohn ehu sang rehn emen mehn mpei me ndahngie me Cooper idaidier. I mwadangete tangala wasahn ou pwoaso pwe ien kilang ih. Cooper wie wonohn nan dihpw ko, songosong en esingek, ahpw sohte lupwen ohla sansal.

I kelepwidi limwahn Cooper ngehi song en kakehlailihki lepin lokaia kei me rasohng “Soahng koaros pahn Mwahu. Kehlail.” Ansouohte ahi kaun en High Priest, me adaniki Nathan, lela iangahki ah pwoud. Ah pwoudo nda sen kiheng Cooper kapai en prisduhd. Se ahpw kihdi peht kat pohn moangen Coopero. I sohte kak tamataman dahme I nda nan ahi kapakapo, ahpw I kak tamataman me mie me iang mih wasahu ansouo, oh ih ansouo me I esehda me Cooper pahn mehla.

Cooper iangih elikapter kohla nimwen weni ahpw e mehla. I kehn ansouo Kauno ah mahsanihongie me ahi pwukoah en apwalih serio pohn sampah wet ididier oh me Cooper mihmiher Reh.

Se ahneki ansou kis en mih rehn Cooper ni imwen winio. Tohn doadoahk ko kaunopada serio pwe sen kak koledi kiht patehng oh rahnmwahuiala, kolokol ih, uwen ansou me se men kolokolki ih.

Ni aht kohkohla ni imwat, ngehi oh ahi pwoudo me inenen pahtou mehlel kilengpene kiht ahpw tepda kosoia kisin pwutak me tangahki sdohsahu. Se sohte wehwehki pwutako, mendahte ah kin kousoan limwaht oh pil mihmihte nan ehria en aht wardo.

Mandahsang rahno udahn apwal ohng kiht pwehki aht ahneki pahtou. I kelepwidi ngehi kapakap ni  ngidingid me udahn weksang kapakap koaros mei wiahier. I peki rehn Sahm Nanleng en ketkihsang ahi patouo ni mwaren ahi Sounkomouro. E kapwaiada.

Mwurin souwas en rahno emen sounsawas en nan stake presidensi koasoanehdi ansou kis pwe sen tuhong irail pwutak pwulopwul ko—Pwutak me draipih sdohsahu—oh ah pahpa nohno iang mih nimwen ohlo. Ngehi Sahren awih pwutako oh ah peneinei en peidi. Ansou me wenihmwo retdahu, kiht ahpw tuhwong irail oh ehdin aht tuhwong irail. Ahi pisopo mwenginingin kihongie ien “Kohla Rehn Pwutako.” Ngehi Sharon pwoalehdi pwutako. Se sengiseng pene wen ansou ieu. Se ndahng me se ese me dahme wiawihier wia sapwungalah ieu.

E wia mwekid kopwuriamwei ieu ohng ngehi Sahron koaros pwehki dahme se kehn ansouo oh pil lel met. Sang ni kalahngan en Kauno, se kak ale ahl apwalo, me sansal, oh ihte ahl, oh poakohng kisin pwutak pwulopwulo.

Se inenen karaniala ih oh ah peneinei sounpar kei mwuri. E ehukihong kiht ah anosu kesempwal kan. Se pil iangih kohla ni tehnpas sarawio ni ah kaukaunop en kohla wia ah misin. 7

Riei ohl oh lihoko, Ted wehwehki ni soh peikasal me Samatail Nanleng poakohng kitail. E wehwehki me ahneki mahk oh sowese kansenamwahuih ih ni soangen ahlo, udahn kansenamwahu duwehte ahmw ale mahkepen dipomw. Insenamwahu wet kohsang ni atail pahn idawehn karasaras en atail Sounkomouro. Nan Pwuken Mormon, Alma padahki duwen Sounkomouro: Oh E pahn kohwei, oh lokolok ki medek oh kahpwal kan oh kasangosong koaros; oh met wiawi pwe en kapwaiada kokohp me mahsanih me e pahn alehda medek oh soumwahu en sapwlime aramas kan. 8

Riei ohl oh lih oko, ia uwen kesempwal en soai pwoated me pid limpoak mehlel oh mahk. Kitail, pil, kak ahneki popohl oh peren ma kitail pahn papah oh mahkehng mehteikan. Georgy, pilemen nein nait seri, kin kalap kosoia, “Soangen peneinei dah ieu ataile?” Oh e kin sapengki, “Kitail wia peneinei peren ehu!”

Presiden Thomas  S. Monson kaweidkin kitailehr, oh mahsanih, “Kitail kasawih atail mour oh pilada en idawehn karasaras en Sounkomouro sang ni atail pahn ahneki mpahi, limpoak, oh kadek.” 9

I ese me Sahm Nanleng oh Sapwelime, Ieros Sises Krais, poakohng kitail oh kin men sewesei kitail en kin poakpene duwehte Ara kin poakohng kitail. Oh I pil ese me sang ni atail pahn papah oh mahk ong mehteikan ki limpoak mehlel, kitail kak maiaudahsang atail kahpwal kan oh alehdi kehl en powehdi pein atail kaluet kan. Oh I kosoia mepwukat ni mwaren Sises Krais, amen.