2010–2019
Aiersefan a Murinno Fansoun Meinisin
October 2017


Aiersefan Mi Murinno Iteitan Fansoun

Ewe chok fansoun sia ipwenong won ewe anen aiersefan, sia tingor an ewe Chon Amanau we pochokunen angasano non manauach.

Ekkoch ier ra no, Preseten Gordon  B. Hinckley a fiti ew urumoten foodball an ewe college. A feitto ikana ren an epwe awora esinesin ren ewe nenien urumot epwe eiteit seni iten ewe auchean chon aiti chon ewe kumien football ren fansoun nakatam a chok arapakan an epwene tori ierin an epwene asoso seni wisan ewe. Ewe kumi, a fokkun mochen epwe wineni ewe urumot, ar repwe pwarano ar afona nour ewe chon aitir. Preseten Hinckley a koko ngeni an epwe chuno ren ewe rum ikewe kewe chon football ra kan siwinir ie me ngenir ekkoch kapasen pesepes. Emon me non ewe kumi a aporousa met nour ewe chon aitir a ureni noun kewe chon urumot “Ousap ekiekin oupwe umwesin fori mwan iwe ouwa nusuni ena urumot”. Nge ren ekkewe kapas a amwasanger, ra wineni ewe urumot.

Ikenai, uwa mochen upwe kapas ngeni ekkana ra ekiekin noninen pwe ra “umwesin fori mwan” non manauach.. Ennetin, pwe pungun, pwe kich “meinisin sia fen tipis, me kukkununo ach sipwe mwareiti Kot.”1klInamo ika mi wor ekkoch kumi rese mwo kuf non ekkewe fansoun urumot, nge unusoch ese fis me non pukupukun manau. Nge uwa pwarata pwe ewe Chon Amanau Jises Kraist a fen awesano ew angangen achasefan mi unusoch me a ngenikich ewe niffangen aiersefan—ach anesefan ngeni ew anean mi unusoch me fetanochun manau.

Aiersefan a Wato Pwapwa

Fan chommong sia ekieki pwe aiersefan ew mettoch mi anoninen me anetipengaw. Nge an Kot kokkot pwe ewe kokotun pwapwa, esap ewe kokotun noninen! Aiersefan a efefeitakicheno me emwirinokicheno. Tipis a wato netipengaw. 2 Aiersefan ina anen ach sipwe kuna ngas. Ussun met Elter D. Todd Christofferson a awewei. Me nukun Aiersefan, ese wor ennetin ekkesiwin non manauach. … Nge ren chok aiersefan sia tongeni feinno ngeni ewe angangen chen an Jises Kraist me manau ese much. Aiersefan  … a awena ngenikich ngaseno, epinukunuk me kinamwe.” 3 Ai porous ngeni ami meinisin—akaewin ngeni ekkewe sarafo—pwe aiersefan a ew mettoch mi murinno fansoun meinisin.

Nupwen sia kapas ussun aiersefan, sise chok porous ussun ach tufichin emwirinoueno inisich. Ennetin aiersefan a nap seni ena—Ina na memmef seni ach nuku non ewe Samon Jises Kraist me an manaman an epwe omusano ach tipis ussun Elter Dale G. Renlund a fen aiti kich. Me nukun ewe Chon Amanau,  … aiersefan epwe chok winiti ew atongen napanapen ach pwarano ussun manawach 4 Sise tongeni ach sipwe ekesiwini sokkun manauach won pusin winikapach, nge ewe chok Chon Amanau a tongeni awesano ach tikitikipun me uwei osach mi chou, a ngenikich ewe tufich ach sipwe fetan won ewe anen anneasochis fiti epinukunuk me pochokun. Ewe pwapwan aiersefan a nap seni ewe pwapwan ew manau mi murino. Ina ewe pwapwan omusano, ren ach sia pwan nimenimoch sefan, me ach sia arap ngeni Kot. Nupwen kopwe sinei ena memefin pwapwa ese pwan wor ew memmef epwe tongeni amenemenochu manauom.

Ennetin aiersefan a amwasanga kich ach sipwe fori ew pwonen ach sipwe anneasochis—ew pwon mi pin a poputa fansoun papatais me asofosefani iteiten wik nupwen sia angei ewe sakramen. Ren ach angei ewe sakramen, sia angei ewe pwon pwe ngunun we epwe nonnom [rech],”5fansoun meinisin fiti pwapwa meinisin me kinamwe a feitto seni An chiechi ngenikich fansoun meinisin. Iei ewe uwan aiersefan, me iei met a fori aiersefan epwe apwapwa!

Aiersefan a Murinno epwe Wor Nukuchar.

Uwa sani ewe kapas monomon ussun ewe at.6 mi mwanecheno a mak non Luke 15:11–32. Mi wor och mettoch mi auchea ussun ena fansoun ikewe a wor ew auchean ekiek a fis ekesiwinin, nupwen ewe noun mi mwanecheno a ekiek sefan o a era, noun semei kewe chok angang meinisin mi chok nannaf ener mongo, nge ngang iei upwene pe ren ai ei echik. Tipan pwe epwe fiti ekkewe pik ne mongo ener kewe mongo, a mefi pwe ese chok onusumwanieno tufichin saman ewe nge pwan pusin manauan. Fiti an nuku pwe saman ewe epwe chok etiwa sefani—ika mwo esap emon noun nge emon chok noun chon angang—a ekieki pwe epwene nikitano an anneasonap me nom nge epwene niwiniti imwan ewe.

Uwa ekieki ussun an ewe at tamen fetan ngeni imwan we. Mi wor fansoun nupwen a tipemwaramwar me ekieki, “Epwe ifa ussun an semei ewe epwe etiwaei?” Meni ina epwe fen nimaramar sefan nge ekkewe pik, ewe titin pik. Ekieki ika epwe ifa ussun sokonon ei porous ika ewe at e fangeta. Nge nuku a chok anisi an epwe mokutuno, me nuku a anisi saman ewe an epwe chok nikitu ne kakaton me akawiti tori ewe amuchunon fansoun:

Nupwen atewe mi chok towaweno seni imwan ewe, nge saman ewe a kuna. Saman we a fokkun tongei, iwe a sano a faropachei noun we at iwe a kis ngeni.

“Me ewe at a apasa ngeni, Papa, ngang uwa tipis ngeni Kot, o uwa pwan tipis ngonuk. Use fich ngeni ai upwe chiwen iteni noum at.”

“Nge ewe sam a kokkori noun kewe chon angang, a apasa, oupwe chok mwitir wato ewe uf mi fokkun chif, o oufoufa ngeni nei ei at; o iseta efoch ring won outun poun o pwinitanong sus won pechen: …

“Pun neiwe At a mano, 0 pwan manau sefan; A mwanecheno, O pwan pwasefan.

Aiersefan fan iten Kich meinisin

Pwi me fefinei, kich meinisin sia ussun ewe at mi monuchono. Kich meinisin sipwe pusin “ekiek ngeni inisich” —epwe fan chommong—me finata ewe an sefan ngeni imwach. Ina ew mochen sia fori iteitan, non unusen manauach.

Iteitan sia ochufengeni aiersefan ngeni tipis mi watte a auchea epwe wor “ew watten ekesiwin.” 7 Nge aiersefan ina ren meinisin—ekkana ra fefetan non “an mi efeiengaw me [ra] morukono”8ussun chok pwan ekkewe “ra tonong non [ewe] an chokis” me ra mochen repwe fetenafochono.”9 Aiersefan a uweikichenong won ir me ruu kewe an mi pung me onomukich won ewe ar mi pung. Ina fan iten ekkewe ra karan poputa ne nuku, ekkana ra fen nuku non unusen manauer, me ekkewe mi murinno ar repwe popusefan ne nuku. Ussun Elter Davit A. Bednar a aiti ngenikich: Napengeni kich sia weweochuti pwe ewe Achesefan a for fan iten chon tipis. Use kon fat, nge sia sinei me weweiti pwe ewe Achasefan pwan fan iten souneng—fan iten mwan mi murinno me fefin mi anneasochis, unusoch, me  … achocho ngeni ar repwe murinono.”10

Uwa karan chok feino ngeni ew nenien an misineri kaeo ussun angang misineri nupwen ew mwichen minefon misineri ra wareto. Uwa mefi tong ussun upwe fen kechiw non netipei nupwen uwa kakaton ir me nenengenir uwa kuna ewe nukunuk non meser kewe. Ra fokkun mesemesen atapwanapwan me pwapwa pwan meseik. Mwirin ew ekiek a toriei: “Ra fen sisinei nuku ngeni aier. Iei popun ra ur ren pwapwa me epinukunuk.”

Use mwo ekieki pwe wewen ir meinisin a wor ar watten tipis me noom, nge uwa ekieki pwe ir ra sinei ifa ussun repwe aier; ra fen kaeo pwe aiersefan mi murinno, me ra moneta me atapwanen ar repwe aporousa ei porous mi apwapwa ngeni fonufan.

Iei met a fis nupwen sipwe mefi ewe pwapwan aiersefan. Ekieki ewe minen apiru an Enos. A pusin wor an fansoun ekiek sefan, me murin ai we tipis a totonuno, netipan a muttir kun ngeni osupwangen ekkoch. Enos a aea unusen manauan non ena fansoun ne tingor ngeni meinisin aramas ar repwe aier.me “pwapwa non nap seni ewe minen fonufan.”11 Aiersefan a fori ena, a okunu netipach ngeni atongeach kewe, pokiten sia sinei pwe ewe pwapwa sia mefi pwan fan iten meinisin.

Aiersefan a ew Mettoch Sia Fori Non Unusen Manauach

A wor emon chiechiei a marita non famini ir mi apwangapwang non ei mwichefen. Nupwen a emon anuon, a pwan ekiek sefan me a ekieki pwe epwene amonata an epwe no misineri.

A winiti emon misineri mi fokkun murinno. Non an ewe omuchunoon ran me mwen epwe niwin sefan ngeni nenian, ewe presetenin misin a interfiuni me a ureni pwe epwe apasa an kapasen pwarata. A fori, me murin a foropachei noun ewe presetenin misin nupwen a kechiw, ewe preseten a apasa, “ Elter, kopwe tongeni nemenono ika amam mettoch meinisin ka chok karan fen pwarata non chok maram ika kosap sopweno ne fori ekkewe mettoch ra aueta om kapasen pwarata non ewe aewin neni.”

Chienei we a ureniei mwirin pwe a fen iotek me anneani ekkewe pukefel iteitan seni ewe fansoun a niwin seni an angangen misineri. Seni an achocho ne “anneani ewe kapasen Kot mi murinno” a emweni non ewe an mi pung.”12

En ena ka amonata ngeni angangen misineri me en ena ka fen niwin, makketiw. Ese naf om kopwe chok awora ew kapasen pwarata, kopwe pwan fokkun sopweno me apochokuna. Ussun meinisin misineri ra fen sinei, ika ouwa kouno ne okunu pechemi won efoch pasiken, epwe turuno me ika ouwa kouno ne apochokuna ami kapasen pwarata, epwe apwangapwangeno. Ei chok pwan nongonong a pwan fich ngeni aiersefan—ew mettoch sipwe fori non unusen manauach, esap chok och mettoch sipwe sinei fan ew chok non unusen manauach.

Ngeni meinisin ion mi kukkuta omusomusen tipis—ewe sarafo, ewe sarafo nipich mei mukono, sam me in, sam me in chinnap, me ewer pwan mwo semen me inen samach chinnap—Uwa tingor ngenikemi pwe oupwe niwiniti imwemi. Iei ewe fansoun oupwe poputa. Ousap amangano ami ranin aiersefan.13

Nupwen ka fori ena ekiek, sopweno ne fetan won ewe an. Samach a chok witiwit an epwe etiwakich, poun kewe a chok eitieu iteiten ran fan itom.14 Ewe niffang a namot fan iten ewe achocho.

Chemeni ekkei kapas seni Nifai: “Oupwe feinno mwemi fiti ami pochokunen mochen non Kraist awora ew unusochun saramen epinukunuk, me ew tongen Kot me aramas meinisin. Ina minne, ika oupwe feinno mwemi, kametip won ewe kapasen Kraist, me achocho ngeni nesoponon, negeni, ewe Sam a apasa: Oupwe aani ewe manau ese much.”15

Fan ekkoch ei sai epwe nikinikin pwe mi nakatam—Nge me murin, iei ewe sai ngeni manau ese much nge epwe ew apwapwan sai ika pwe si achocho ngeni fiti ach ennetin nuku non Jises Kraist me epinukunuk non an ewe Achasefan, uwa pwarata pwe seni ewe fansoun sia eipwata pechech won ewe anen aiersefan. Sia tingor an ewe Chon Amanau ewe manamanen amanaua ngeni non manauach. Ena manaman epwe onukucharei pechech, anapano ach kuna, me anononueno ach popun ach sipwe chok sopweno ne feinno mwach, eipw me eipw, tori ewe ranin eningano nupwen sia wesewesen niwinsefan ngeni imwach non nang me rongorongo an Samach non Nang apasa ngenikich, “ouwa fokkun achocho.”16 Fan iten Jises Kraist, amen.