Ang paghinulsol Dalayon nga Positibo

Tuman ka masami ginapinsar naton ang paghinulsol bilang isa ka bagay nga miserable kag makahalanusbo. Apang ang plano sang Dios plano sang kalipayan, indi plano sang pagkamiserable! Ang paghinulsol makatib-ong kag makapadungog. Ang sala amo ang nagadala sang kasubo.² Ang paghinulsol amo ang aton rota sa pagpalagyo! Subong sa ginpaathag ni Elder D. Todd Christofferson: “Kon wala ang paghinulsol, wala sang tunay nga pag-uswag ukon pagsanyug sa kabuhi.... Paagi lamang sa paghinulsol nga mabaton naton ang nagapasag-uli nga grasya ni JesuCristo kag kaluwasan. Ang paghinulsol … nagatuytoy sa aton padulong sa kahilwayan, kumpiyansa, kag paghidaet.”³ Ang mensahi ko sa tanan—labi na sa batan-on—amo nga ang paghinulsol dalayon nga positibo.

Kon kita nagahambal parte sa paghinulsol, wala lamang kita nagahambal parte sa mga pagtinguha nga magsanyug. Ang matuod nga paghinulsol mas kapin sangsa sina—ini gin-inspirar paagi sa pagtuo kay Ginuong JesuCristo kag sang Iya gahum nga magpatawad sang aton mga sala. Subong sa gintudlo sa aton ni Elder Dale G. Renlund, “Kon wala ang Manunubos, … ang paghinulsol mangin isa lamang ka miserable nga pagbag-o sang pamatasan.”⁴ Kita sarang magbag-o sang aton pamatasan sa aton kaugalingon, apang ang Manluluwas lamang ang makakuha sang aton mantsa kag mga palas-anon, nagapakasarang sa aton nga magsunod sa banas sang pagtuman nga may kumpiyansa kag kabakod. Ang kasadya sang paghinulsol kapin sangsa kasadya sang pagpangabuhi nga desente. Ini kasadya sang kapatawaran, sang pagkamatinlo liwat, kag sang pagka mas malapit sa Dios. Kon matilawan ninyo ining kasadya, wala sing mas diutay nga makabaylo sini.

Ang matuod nga paghinulsol naga-inspirar sa aton nga maghimo sang aton pagtuman nga isa ka panaad—isa ka kasugtanan, sugod sa bunyag kag ginabag-o liwat kada simana sa Paniyapon sang Ginuo, ang sacramento. Didto nagabaton kita sa promisa nga sarang “dalayon nga mag-upod ang iya Espiritu sa [aton],”⁵ upod ang tanan nga kasadya kag paghidaet nga nagahalin sa Iya padayon nga pag-upod. Ini ang bunga sang paghinulsol, kag ini ang nagahimo sang paghinulsol nga puno sang kasadya!

Naluyagan ko gid ang paanggid parte sa nadula nga anak nga lalaki .⁶ Makahulogan ang parte sa tion sang pagdesisyon sang ang anak “nakatalupangod sa iya kahimtangan.” Nagalingkod sa lugar sang baboyan, gusto kontani nga “magkaon sang pagkaon sang baboy agod mauli-ulian ang iya kagutom,” nabal-an niya sang ulihi nga wala lamang niya gin-usikan ang palanublion halin sa iya amay apang amo man ang iya kaugalingon nga kabuhi. May pagtuo nga basi batunon sia liwat sang iya amay—kon indi bilang anak kondi bilang isa ka suluguon lamang—sia nagpamat-ud nga kalimtan ang nagligad nga pagkarebelde niya kag magpauli.

Masami ako magpamangkot parte sa malawig nga pagpanglakaton sang anak pauli. May mga tion bala nga sia nagduhaduha kag nagpamangkot, “Paano ako batunon sang akon amay?” Siguro basi naghana sia nga magbalik sa baboyan. Siguro ang istorya mangin tuhay kon sia nag-untat. Apang ang pagtuo nagduso sa iya nga magpadayon, kag ang pagtuo naghimo sa iya amay nga magbantay kag mapainumuron nga nagahulat, tubtob sang ulihi:

“Sang malayo pa sia, nakita sia sang iya amay. Naluoy gid ang amay sa anak, gani nagdalagan sia pakadto sa anak, ginhakos, kag ginhalokan niya sia.

“Dayon naghambal ang anak sa iya, Tay, nakasala ako sa Dios kag sa imo. Indi na ako takos nga tawgon nga imo anak.

“Apang ang amay nagtawag sa iya mga suluguon, Dali, kuhaa ninyo ang pinakamatahum nga bayo, kag ipabayo sa iya; kag suksuki man ninyo sia sang singsing kag sapatos: …

“Kay abi ko nga patay na ining akon anak, pero karon nabuhi; Nadula sia, pero karon nakita.”

Mga kautoran, kita tanan nadula nga mga anak. Kita tanan dapat “makatalupangod sa aton mga kahimtangan” —sa madamo nga beses—kag magpili nga magpauli. Ining pagpili ginahimo naton sa matag-adlaw sa bug-os naton nga kabuhi.

Permi naton ginatabid ang paghinulsol sa dalagko nga mga sala nga nagakinahanglan sang “isa ka dako nga pagbag-o.”⁷ Apang ang paghinulsol para sa tanan—sa yadtong mga nagtalang sa “gindumilian nga mga banas kag nagkaladula”⁸ subong man sa yadtong “nakasulod na [sa] makitid kag masipot nga banas” kag karon nagakinahanglan sa “pagdutdot pasulong.”⁹ Ang paghinulsol angay nga nagabutang sa aton sa husto nga banas kag nagabilin sa aton diri. Ini para sa yadtong mga nagsugod sa pagpati pa lang, yadtong padayon na nga nagapati, kag sa yadtong mga dapat magsugod sa pagpati liwat. Subong sa gintudlo ni Elder David A. Bednar: “Ang kalabanan sa aton maathag nga nakahangop nga ang Pagpasag-uli para sa mga makasasala. Apang ako indi sigurado, kon bala nabal-an kag nahangpan naton nga ang Pagpasag-uli para man sa mga santos—para sa maayo nga mga lalaki kag mga babayi nga matinumanon, takos, kag … nagatinguha nga mangin mas maayo.”¹⁰

Bag-o lang nagbisita ako sa MTC sang ang grupo sang bag-o nga mga misyonaryo nag-abot. Natandog gid ako samtang ginlantaw ko sila kag naobserbahan ang kasanag sa ila mga mata. Daw sila tuman ka malaumon kag masadya kag mapagsik. Dayon ang panghunahuna nag-abot sa akon: “Sila nakaangkon sang pagtuo padulong sa paghinulsol. Amo ini kon ngaa sila napuno sang kasadya kag paglaum.”

Wala ko ginhunahuna nga ina nagakahulogan nga sila tanan may seryosong mga kalapasan sa ila kabuhi nga nagligad, apang ginhunahuna ko nga sila nakabalo kon paano maghinulsol; natun-an nila nga ang paghinulsol positibo; kag sila handa kag luyag gid nga magpaambit sining mensahi nga puno sing kasadya sa kalibutan.

Amo ini ang matabo kon mabatyagan naton ang kasadya sang paghinulsol. Talupangda ang halimbawa ni Enos. Sia may ara man sang kaugalingon nga “pagtalupangod sa iya kahimtangan” nga tion, kag pagkatapos nga ang iya “konsiyensya nangin malinong,” ang balatyagon niya gilayon nga nagkadto sa kaayohan sang iban. Ginhatag ni Enos ang nabilin niya nga kabuhi sa pag-imbitar sa tanan nga katawhan nga maghinulsol kag “nagkasadya sa sini labaw pa sa sinang iya sang kalibutan.”¹¹ Ang paghinulsol nagahimo sina; ini nagapaulikid sang aton mga tagipusuon sa aton isigkatawo bangud nabal-an naton nga ang kasadya nga aton nabatyagan gintuyo para sa tanan.

May abyan ako nga naghalin sa di-tuman ka aktibong LDS nga pamilya. Sang sia batan-on nga hamtong, sia man “nakatalupangod sa iya kahimtangan” kag nagpamat-ud nga maghanda para sa isa ka misyon.

Nangin labing maayo sia nga misyonaryo. Sa katapusan nga adlaw antes sia magpauli, gin-interbyu sia sang iya mission president kag ginpangabay nga magpamatuod. Ginhimo niya, kag pagkatapos sang paghakos nga may luha, ang presidente nagsiling, “Elder, sarang mo malimtan ukon ihimutig ang tanan nga imo ginsaksihan sa pila lamang ka mga bulan kon indi mo pagdayonon nga buhaton ang mga butang nga unang nagtukod sang imo pagpamatuod.

Sang ulihi ang abyan ko nagsiling sa akon nga sia nagpangamuyo kag nagbasa sa mga kasulatan adlaw-adlaw sugod sang sia nagpauli halin sa mission. Ang padayon nga “mabatiti sang maayo nga pulong sang Dios” nagpabilin sa iya “sa husto nga dalan.”¹²

Kamo nga nagahanda para sa lubos-panahon nga mga mission kag kamo nga nagapauli, talupangda ini! Indi lamang bastante ang makaangkon sang pagpamatuod; dapat ninyo imentenar kag pabakuron ini. Subong sa nabal-an sang kada misyonaryo, kon untatan mo ang pagsikad sa bisekleta, matumba ini, kon untatan ninyo ang pagpabakod sang inyo pagpamatuod, ini magahuyang. Ang amo man nga prinsipyo nagakadapat sa paghinulsol—ini bug-os kabuhi nga buluhaton, indi kaisa-lamang-sa-kabuhi nga inagihan.

Sa tanan nga nagapangita sang kapatawaran—batan-on, mga batan-on nga hamtong, mga ginikanan, mga lolo kag lola, kag huo, bisan pa ang mga lolo kag lola sa tuhod—ginadapit ko kamo nga magpauli. Karon amo ang tion nga magsugod. Indi magpabuyanbuyan sa inyo adlaw sang paghinulsol.¹³

Dayon, kon kamo nakahimo sinang desisyon, magpadayon nga nagasunod sa banas. Ang aton Amay nagahulat, nahidlaw nga magbaton sa inyo. Bukas ang Iya mga butkon “sa tanan nga kalawig sang adlaw” para sa inyo.¹⁴ Ang padya kaangay sa pagtinguha.

Dumdoma ining mga tinaga halin kay Nephi: “Magdutdot kamo pasulong nga may kalig-on kay Cristo, nagaangkon sang himpit nga kasanag sang paglaum, kag gugma sa Dios kag sa tanan nga tawo. Gani, kon magadutdot kamo pasulong, nga nagapaayaw sa pulong ni Cristo, kag magapadayon tubtob sa katapusan, yari karon, ang Amay nagasiling: Kamo makaangkon sang kabuhing walay katapusan.”¹⁵

Kon kaisa ang pagpanglakaton daw sa malawig—labi sa tanan, ini ang pagpanglakaton padulong sa kabuhing walay katapusan. Apang ini sarang nga mangin masinadyahon nga pagpanglakaton kon himuon naton ini nga may pagtuo kay JesuCristo kag may paglaum sa Iya Pagpasag-uli. Nagapamatuod ako nga sa tion nga kita magsugod sa paghinulsol, gina-imbitar naton ang nagatubos nga gahum sang Manluluwas sa aton mga kabuhi. Inang gahum makapabakod sang aton mga tiil, makapalapad sang aton panan-aw, kag makatudok sang aton panaad nga magpadayon sa pagsulong, tapak sa tapak, tubtob sa sinang mahimayaon nga adlaw sang kita makapauli sa ulihi sa aton langitnon nga puluy-an kag mabatian ang aton Amay sa Langit nga magsiling sa aton, “Maayo kag masaligan ka.”¹⁶ Sa ngalan ni JesuCristo, amen.