Kev Hloov Siab Lees Txim Yeej Yog Qhov Zoo
Thaum lub sij hawm uas peb tab tom taug txoj kev hloov siab lees txim, peb cia tus Cawm Seej lub hwj chim txhiv dim los rau hauv peb lub neej.
Tau ntau xyoo tas los, Thawj Tswj Hwm Gordon B. Hinckley tau los saib ib lub tsev kawv ntawv qib siab cuam pob football. Nws tuaj tshaj tawm hais tias yuav muab tshav cuam pob tis npe raws li tus kws qhia pawg cuam pob ntev heev, es tsis ntev nws yuav so tsis ua hauj lwm ntxiv. Pawg no xav xav yeej kev sib tw ntawd kom hwm lawv tus kws qhia pawg cuam pob. Lawv caw Thawj Tswj Hwm Hinckley mus xyuas lawv chav hloov khaub ncaws thiab hais lus txhawb nqa lawv. Nws tej lus tshoov lawv lub siab, ces pawg ntawd twb yeej kev sib tw thiab thaum lub caij sib tw tiav lawm lawv twb yeej ntau.
Hnub no, kuv xav hais lus rau cov uas txhawj hais tias lawv twb tsis yeej hauv lawv lub neej. Qhov tseeb yog qhov uas peb “txhua tus puav leej ua txhaum thiab tu ncua Vajtswv lub hwj chim lawm.”1 Txawm muaj ib txhia uas yeej txhua lub caij thaum ntaus pob ncaws pob, tsis muaj leej twg ua li ntawd nyob hauv peb lub neej. Tiam sis kuv ua tim khawv tias tus Cawm Seej Yexus Khetos tau theej peb lub txhoj thiab muab lub txiaj ntsim uas yog kev hloov siab lees txim rau peb—kom peb muaj ib txoj kev rov qab cia siab thiab muaj ib lub neej zoo.
Kev Hloov Siab Lees Txim Ua rau Peb Zoo Siab
Feem ntau peb xav tias kev hloov siab lees txim yog ib yam nyuaj siab thiab tu siab. Tiam sis Vajtswv txoj hau kev yog txoj hau kev zoo siab, tsis yog txoj hau kev nyuaj siab! Kev hloov siab lees txim yeej txhawb nqa thiab ua kom zoo. Yog kev txhaum uas ua rau yus tsis zoo siab.2 Kev hloov siab lees txim yog peb txoj kev dim! Zoo li Txwj Laug D. Todd Christofferson piav hais tias: “Yog tsis muaj kev hloov siab lees txim ces tsis muaj kev vam meej tiag tiag hauv lub neej no. … Tsuas yog los ntawm kev hloov siab lees txim xwb peb thiaj txais tau Yexus Khetos txoj kev theej txhoj thiab kev cawm seej. Kev hloov siab lees txim … ua rau peb muaj kev thaj yeeb, kev cia siab thiab kev nyob kaj siab lug.”3 Kuv zaj lus rau txhua leej txhua tus—qhov tseem ceeb yog rau cov tub hluas ntxhais hluas—qhia tias kev hloov siab lees txim yeej yog qhov zoo.
Thaum peb hais txog kev hloov siab lees txim, peb tsis hais txog kev kho peb tus kheej xwb. Kev hloov siab lees txim yeej tsis yog li ntawd xwb—yog kev ntseeg tus Tswv Yexus Khetos thiab Nws lub hwj chim zam txim rau peb tej kev txhaum. Ib yam li Txwj Laug Dale G. Renlund qhia peb hais tias, “Yog tsis muaj tus Txhiv Dim, … kev hloov siab lees txim tsuas yog kev hloov yus tus cwj pwm uas tsis muaj kev zoo siab hlo li.”4 Peb hloov tau peb tus cwj pwm peb tus kheej los tau, tiam sis tsuas yog tus Cawm Seej tshem tau peb tej kev txhaum thiab ris peb lub nra, ua rau peb tso siab thiab muaj zog txaus taug txoj kev mloog lus.Kev xyiv fab los ntawm kev hloov siab lees txim tsis yog kev xyiv fab vim yus ua neej zoo xwb. Yog kev xyiv fab thaum txais kev zam txim, thaum yus rov qab los ua neeg huv, thiab kev txav ze dua rau Vajtswv. Tom qab yus muaj kev xyiv fab li ntawd, ntshe tsis muaj dab tsi pauv tau.
Kev hloov siab lees txim tiag tiag ua rau peb xav cog lus tias peb yuav mloog lus—yog kev khi lus, uas pib thaum ua kev cai raus dej thiab rov qab khi lus txhua lub lim tiam thaum noj tus Tswv pluas mov, yog lub cim nco txog. Thaum ntawd peb txais kev cog lus hais tias peb yuav muaj Nws tus ntsuj plig nrog peb nyob txhua lub sij hawm,5 nrog kev xyiv fab thiab kev kaj siab lug uas los ntawm qhov uas peb muaj Nws nrog peb tsis tu tsis tseg. Nov yog tej yam uas muaj los ntawm kev hloov siab lees txim, thiab ua rau peb xyiv fab thaum hloov siab lees txim!
Yuav Tsum Tsis Txhob Thim Thaum Hloov Siab Lees Txim
Kuv nyiaj zaj lus piv txwv txog tus tub ua txhaum.6 Muaj ib yam uas tshoov kuv lub siab thaum lub sij hawm tseem ceeb uas tus tub ua txhaum “nco dheev.” Nws zaum zov npua, xav “noj cov plhaub taum uas npua noj,” nws thiaj li paub tias tsis yog nws nkim nws txiv lub cuab tam lawm xwb tiam sis nws twb nkim nws lub neej thiab. Nws muaj kev ntseeg hais tias tej zaum nws txiv yuav txais yuav nws—yog tias tsis pub nws ua ib tug tub ntshe tej zaum yuav cia nws ua tub qhe—nws thiaj li txiav txim siab tso kev ntxeev siab tseg thiab rov qab mus tsev.
Ntau zaus kuv tau xav txog lub sij hawm ntev uas tus tub taug kev rov qab mus tsev. Puas tau muaj tej lub sij hawm thaum nws tos thiab xav hais tias, “Kuv txiv mam li ua li cas rau kuv?” Tej zaum nws mus ob peb ruam rov qab mus rau cov npua. Cia li xav seb zaj dab neeg no yuav zoo li cas yog tias nws twb thim lawm. Tiam sis kev ntseeg pab nws mus tom ntej, thiab kev ntseeg ua rau nws txiv ua siab ntev saib thiab tos ntsoov, mus txog:
“Thaum nws los tsis tau txog uas tseem nyob hov deb, nws txiv pom nws thiab hlub nws kawg; nws txiv dhia loo mus puag nkaus tus tub nwj.
“Tus tub hais rau leej txiv hais tias, Txiv, kuv ua txhaum rau Vajtswv thiab ua txhaum rau koj lawm. Kuv tsis tsim nyog ua koj tus tub lawm.
“Tiam sis leej txiv hais rau cov tub txib hais tias, Nej tsawg tsuag nqa cev ris tsho uas zoo zoo tuaj rau nws hnav. Nqa nplhaib tuaj rau nws coj, muab khau tuaj rau nws rau: …
“Rau qhov kuv tus tub no twb tuag lawm, tiam sis nim no nws ciaj rov los; nws twb ploj lawm, tiam sis nim no nws rov los.”
Txhua tus Hloov Siab Lees Txim Los Tau
Cov kwv tij thiab cov muam, peb txhua tus yog cov neeg ua txhaum. Peb yuav tsum “nco dheev”—ntshe tsis yog ib zaug xwb—thiab xaiv ib txoj kev uas coj peb rov qab mus tsev. Yog ib yam uas peb xaiv txhua hnub, tas peb lub neej.
Feem ntau peb xav tias kev hloov siab lees txim yog ib yam yus ua thaum ua txhaum loj heev yus thiaj yuav tsum hloov siab loj heev.7 Tiam sis txhua tus hloov siab lees txim los tau—cov uas ua loj leeb nyob hauv “tej kev uas txwv tsis pub mus thiab ploj mus”8 thiab cov uas “tau los rau hauv txoj kev ti thiab nqaim” thiab yuav tsum “thawb mus lawm tom hauv ntej.”9 Kev hloov siab lees txim ua rau peb taug txoj kev yog thiab pab peb taug txoj kev yog mus ntxiv. Kev hloov siab lees txim yuav pab cov uas nyuam qhuav ntseeg, cov uas yeej ib txwm ntseeg, thiab cov uas yuav tsum rov qab los ntseeg. Xws li Txwj Laug David A. Bednar qhia hais tias: “Peb sawv daws feem coob to taub hais tias txoj Kev Theej Txhoj yog rau cov neeg uas ua txhaum. Tiam sis, kuv tsis paub tseeb seb peb puas paub thiab to taub tias txoj Kev Theej Txhoj kuj yog rau ib tsoom haiv neeg ntseeg thiab—rau cov txiv neej thiab poj niam zoo uas mloog lus, tsim nyog, thiab txawj xav thiab … sim ua neeg zoo dua.”10
Tsis ntev tas los kuv tau mus xyuas ib qhov chaw cob qhia cov tub txib thaum ib pawg tub txib tshiab tuaj. Kuv txais kev tshoov siab thaum kuv saib lawv thiab pom qhov kaj nyob hauv lawv qhov muag. Zoo li lawv txawj ntse thiab zoo siab thiab kub siab heev. Ces ua rau kuv xav hais tias: “Lawv twb muaj kev ntseeg txaus kom hloov siab lees txim. Yog li no lawv thiaj li muaj kev xyiv fab thiab kev cia siab.”
Kuv tsis xav tias qhov no txhais hais tias lawv txhua tus tau ua txhaum loj heev ua ntej, tiam sis kuv xav hais tias lawv paub hloov siab lees txim; lawv twb kawm hais tias kev hloov siab lees txim yog ib qho zoo; thiab lawv twb npaj siab thiab xav qhia zaj lus xyiv fab no rau neeg ntiaj teb.
Muaj li no thaum peb txais kev xyiv fab los ntawm kev hloov siab lees txim. Cia li xav txog Enos tus yam ntxwv. Twb muaj ib lub sij hawm thaum nws “nco dheev,” thiab tom qab nws “txoj kev muaj txim ploj huv tib si,” nws muaj siab xav pab lwm tus. Enos twb siav tas nws lub neej caw txhua tus neeg hloov siab lees txim thiab “tau zoo siab rau txoj lus tshaj tej uas nyob hauv lub ntiaj teb.”11 Kev hloov siab lees txim yuav ua li ntawd; yuav ua rau peb muaj siab xav txog peb cov neeg zej zog vim peb paub tias txhua leej txhua tus txais tau peb txoj kev xyiv fab.
Yuav Tsum Hloov Siab Lees Txim Tas Yus lub Neej
Kuv muaj ib tug phooj ywg uas loj hlob nyob hauv ib tsev neeg uas tsis tshua muaj siab ntseeg. Thaum nws yog ib tug tub hluas, nws kuj “nco dheev” thiab txiav txim siab npaj ua ib tug tub txib.
Nws yog ib tug tub txib zoo kawg. Hnub kawg ua ntej nws yuav rov qab mus tsev, qhov chaw tshaj tawm txoj moo zoo tus thawj tswj hwm xam phaj nws thiab hais kom nws hais lus tim khawv. Tus tub txib tau ua li ntawd, thiab tom qab nkawd sib puag, tus thawj tswj hwm hais tias, “Txwj laug, ntshe ob peb lub hlis tom ntej, koj yuav hnov qab los yog xyeej txhua yam uas koj ua tim khawv txog yog koj tsis ua tej yam uas ua rau koj muaj zaj lus tim khawv ntxiv li lawm.”
Kuv tus phooj ywg tau qhia kuv tias nws twb thov Vajtswv thiab nyeem vaj lug kub txhua hnub txij thaum nws ua tub txib rov qab los tsev. Qhov uas “Vajtswv txoj lus zoo tau tu” nws txhua lub sij hawm tau pab nws taug txoj kev yog.12
Nej cov uas npaj ua tub txib thiab nej cov uas yuav rov qab los, cia li nco ntsoov qhov no! Yeej tsis txaus yog nej muaj ib zaj lus tim khawv; nej yuav tsum saib xyuas thiab txhawb nqa zaj lus tim khawv ntawd. Ib yam li txhua tus tub txib ntxhais txib paub, yog nej tsis tuam ko taw ntxiv thaum caij luv thij, lub luv thij ntawd yuav vau, thiab yog nej tsis txhawb nqa nej zaj lus tim khawv, ntshe yuav tsis muaj zog. Lub ntsiab cai no yeej zoo ib yam thaum hais txog kev hloov siab lees txim—yog ib yam yus ua tas yus lub neej, tsis yog ib yam yus ua ib zaug hauv yus lub neej.
Hais rau tag nrho cov uas nrhiav kev zam txim—cov tub hluas ntxhais hluas, cov niam tsev txiv tsev, cov pog yawg, thiab cov yawg suav thiab pog koob—kuv caw nej rov los. Tam sim no yog lub sij hawm pib. Tsis txhob laug sij hawm rau hnub uas nej hloov siab lees txim.13
Ces, tom qab nej tau txiav txim ua li ntawd, cia li taug txoj kev ntawd tsis tu tsis tseg. Peb Leej Txiv tos nej, xav txais nej. Nws ncav tes txhua lub sij hawm tos nej.14 Yeej tsim nyog kom siv zog thiaj txais tau nqi zog ntawd.
Cia li nco ntsoov tej lus no los ntawm Nifais hais tias: “Yog li ntawd, nej yuav tsum txiv mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus. Yog li ntawd, yog tias nej yuav thawb lawm tom hauv ntej, mloog ntsoov Khetos tej lus, thiab nyiaj mus kom txog thaum kawg, saib seb, Leej Txiv hais li no tias: Nej yuav tau txoj sia nyob mus ib txhis.”15
Tej lub sij hawm peb yuav xav tias txoj kev uas peb taug mus yeej ntev heev—vim hais tias, yeej yog ib txoj kev mus rau txoj sia nyob mus ib txhis. Tiam sis txoj kev ntawd yuav ua rau peb xyiv fab yog tias peb muaj kev ntseeg Yexus Khetos thiab kev cia siab rau Nws txoj Kev Theej Txhoj thaum peb taug mus. Kuv ua tim khawv tias thaum lub sij hawm uas peb tab tom taug txoj kev hloov siab lees txim, peb cia tus Cawm Seej lub hwj chim txhiv dim los rau hauv peb lub neej. Lub hwj chim ntawd yuav ua rau peb sawv khov kho, ua rau peb lub zeem muag loj dua, thiab ua rau peb mob siab ntxiv mus tom ntej, ib ruam ntxiv rau ib ruam, mus txog thaum hnub zoo kawg nkaus thaum peb rov qab los txog peb tsev nyob saum ntuj ceeb tsheej thiab hnov peb Leej Txiv Saum Ntuj Ceeb Tsheej hais lus rau peb tias, “Koj ua zoo heev.”16 Los ntawm Yexus Khetos lub npe, amees.