Auliyak uh Wo Pacl Nuh Kwewa

Pacl pucs kuht nuhnkuh muh auliyak uh sie me na koluk ac suhpwacr. Tuhsruhk plwacn luhn God plwacn in engan, ac tiac plwacn in suhpwacr! Auliyak uh ma in sruhk ac ahkwoye. Ma koluk uh use suhpwacr.² Auliyak uh inkacnek lasr in kahing liki ma koluk. Oacna Elder D. Todd Christofferson el fahk: Sahyacn auliyak uh, wacngihn ma in ahkwoye moul uh. … Auliyak muhkwena uh kuht eis kuh luhn iwaclah ac luhng kuhlwacng luhn Jisus Kraist ac molwelah. Auliyak uh …srihsrngikuhti nuh ke sukohsohk, puhlaik, ac mihs.”³ Pweng luhn nuh sin mwet nuh kwewa—yohk nuh sin mwet fuhsr—auliyak uh ma wo pacl nuh kwewa.

Ke kuht sramsram ke auliyak, kuht tiac sramsram muhkwena ke orekma sifacna in ahkwoye. Auliyak pwacye uh yohk liki ma inge—ma moklweyuck sin luhlahlfongi ke Leum Jisus Kraist ac kuh Lal in nuhnak muhnahs ma koluk lasr. Oacna Elder Dale G. Renlund el luti kuh, “Sahyacn Mwet Molwelah, … auliyak uh oacna ohiyac suhpwacr in ahkwoye.”⁴ Kuht kuh in sifacna srihke eklac ohiyacsr, tuh Mwet Lahngo El muhkwena kuh in eislah ma fohkfohk lasr ac sruhkwack ma toasr lasr, oruh kuh in fahsr ke inkacnek luhn ahkostwen ke puhlaik ac kuh fokoko. Engan luhn auliyak yohk liki engan luhn moul wo. Engan luhn nuhnak muhnahs, luhn sifil nwacsnwacslac, ac fototolac nuh sin God. Ke kowos puhlakihn engan sacn, wacngihn ma sahyac kuh in oruh oacna sie.

Auliyak pwacye uh ngihsrwekuhti in oruh ahkostwen lasr in oacna kena lasr—wuhlweacng se, muhtwacwacack ke pacptais ac ahksasucyeyuck kais sie wik ke Kuhfa luhn Leum, sackracmacn. Ke ma inge kuht eis olwelah se lah “Nguhn Lal in kuh in [wi kuht] pacl nuhkwewa,”⁵ ke engan ac mihs nuh kwewa ma tuhkuh sin kuhlwacng Lal pacl nuh kwewa. Pa inge fahko luhn auliyak, ac pa inge oruh auliyak in ma engan!

Nga luhngse puhpuhlyuck ke sie wen suc tulac.⁶ Oasr ma yohk ke pacl yohk srihpac se ke wen tuhlac se el “asmakla.” Muhta inimac luhn pig uh, finsrak el kuh in “akkihpye insial ke kulun bean nun pig uh,” el tari na akihlen lah el sislah mwe kahsruhp luhn pahpah tuhmwacl oacyacpac moul lal. Ke luhlahlfongi lah pahpah tuhmwacl ac kuh in eisacl—fin tiac oacna wen nahtuhl na sahp mwet kuhlwacnsap lal—el otwelah nuhnak lal in forlah liki moul koluk lal met ah ac fohlohk nuh lohm sel ah.

Nga kwacna motko ke fuhfahsryucsr loes luhn lal nuh lohm sel ah. Kuh oasr pacl el tahfuhluo ac nuhnkuh, “Pahpah tuhmuhk ac fah eisyuc fuhkah?” Sahp el kuluhkoht kuhtuh nuh yurin pig uh. Nuhnkuh ke puhpuhlyuck se inge arulacna sienna el fin fuhlwack. Tuh luhlahlfongi uh pahtok el nuh met, ac luhlahlfongi uh oruh pahpah tuhmwacl in kalweni tu ngwetngwet sano ke inse puhsisacl, nwe ke nuh:

“Ke el srakna fahsr loesla liki lohm sel uh, papa tumal ah liyalak ac arulana pakomutal, ac el kasrusr nu yurin wen natul, kafiselma in paol ac ngok mutal.

“Na wen sac fahk, ‘Papa, nga orekma koluk lain God ac lain kom. Tia fal in sifilpa pangpang nga wen nutum.’

“Tusruktu papa sac fahk nu sin mwet kulansap lal, ‘Sulaklak, use sie nuknuk na kato ac sang nokmulang. Sand pac sie ring nu ke paol, ac fahluk nu ke nial: …

“Mwehen wen se nutik inge tuh misa, ac inge el sifil moul; el tuhlac, ac inge koneyukak el.’”

Tamuhlwel ac tahmtahel, kuht nuh kwewa mwet tuhlac. Kuht nuh kwewa enenuh “asmakla”—inkaiyacn pacl pucs—ac sulwaclah inkacnek kol nuh ke lohm ah. Sulwaclah se kuh oraclah lwen nuh kwewa, ke moul lasr nohfohn.

Kuht kwacna nuhnkuh auliyak uh wiwina ma koluk na luhlahp ma enenuh “sie eklac na yohk.”⁷ Tuhsruhk auliyak uh ma nuh sin mwet nuh kwewa—elos suc forfor fin “inkacnek sruhngwacyuck na tuhlac”⁸ oacpacna elos suc “ilyak nuh ke inkacnek suwohs ac ohsrihksrihk” ac inge enenuh “ahkwot nuh met.”⁹ Auliyak kwewana fihlikuhti nuh ke inkacnek suwohs ac kahsruh kuh in muhta kac inkacnek pwacye. Ma nuh sin mwet suc muhtwacwacack luhlahlfongi, elos suc luhlahlfongi met me, ac elos suc enenuh sifil pac luhlahlfongi. Oacna Elder David A. Bednar el luti: “Inkaiyacsr kahlwem suwohs lah Iwaclah ma nuh sin mwet koluk. Tuh, nga tiac etuh na pwacye lah kuht etuh an kahlwem lah Iwaclah ma pac nuh sin mwet luhlahlfongi—nuh sin mukul ac muhtwacn wo suc ahkos, nwacsnwacs, ac … srihke in wo liki met ah.”¹⁰

Pacl fototo ah nga muhtwacta acn luti luhn misineri ke u in misineri sasuc elos yucme. Nga purukyuck yohk ke nga liyacltahl ac akihlen kahlwem in muhtahlos. Kwacna sahromrom ac engan na pwacye. Na nuhnak se tuhkuh: “Elos puhlakihn luhlahlfongi in auliyak. Pa inge srihpac se elos sesseslah ke engan ac finsrak.”

Nga tiac pahngon kalmac pa elos nuh kwewa orekma ma koluk luhlahp ke moul lalos met, tuh nga nuhnkuh pwacye lah elos etuh ohiyacn auliyak; elos lotwelah auliyak na wowo se; ac elos ahkolah ac rahrah in akacsruhi pweng engan se inge nuh yurin mwet fin facluh.

Pa inge ma sikyak ke kuht puhlakihn engan luhn auliyak. Nuhnkuh ke srihkasrak luhn Enos. Oasr pacl “asmakla” sifacna lal, ac tukun ma inge “mwacta luhn ma koluk [lal] wacngihnlac,” insiyacl fohrohk sa nuh sin ohiyac wo luhn mwet sahyac. Ke lusen moul lal nohfohn Enos el suli mwet nuh kwewa in auliyak ac “engankihn yohk liki ma luhn facluh.”¹¹ Auliyak uh oruh ma inge; ekuhllah insiyacsr nuh sin mwet wiyacsr, ke srihpen kuht etuh engan ma kuht puhla ma nuh sin mwet nuh kwewa.

Oasr kawuck se luhk suc kapkapwack in sucu Mwet Luhlahlfongi ke Lwen-sahflah se suc suhka wi alu. Ke el mahtuhlac, el oacyacpac “acsmaklac” ac sulwaclah el in ahkolah ke misin se.

El ekihn misineri na wowo se. Ke lwen sahflah lal met liki el fohlohk nuh lohm sel, misin prestuhn sac sramsram nuh sel ac sikyak el in fahkwack luhlahlfongi lal. El oraclah, ac tukun pacl sacohk se, prestuhn el fahk, “Elder, kom kuh in muhlkuhnlah kuh lahfwekihn ma nuh kwewa ma kom tuhfahna fahkwack kac ke lusen mahlwem na pucs kom fin tiac kalweni oruh ma ma ahkfokokoye luhlahlfongi lom met ah.”

Kawuck se luhk fahk nuh sihk tok lah el pruhe ac riti ma suhmuhslah lwen nuh kwewa ke pacl el fohlohk liki misin lal me. “Karihngihnyuckyang ke kahs wo luhn God” pacl nuh kwewa oruh el in muhta ke “inkacnek pwacye.”¹²

Kowos suc ahkolah ke misin pacl nohfohn ac kowos suc ac fohlohk, esamlah! Tiac fal in eis luhlahlfongi muhkwena; kowos enenuh karihngihn ac ahkfokokoye. Oacna misineri nuh kwewa elos etuh, kowos fin tui kahsruhsr bicycle, ac fah puhtatlac, ac kowos fin tui in ahkkweye luhlahlfongi lowos, ac fah muhnahslah. Ip sepacna inge ma nuh ke auliyak—ma ke lusen moul nohfohn, tiac pacl sefanna luhn moul uh.

Nuh suwos kwewa suc suk ke nuhnak muhnahs—mwet fuhsr, mwet lolacp fuhsr, ninac pahpah, ninac pahpah mahtuh, ac ahok, ninac pahpah mahtohoh—nga suli kowos in fohlohk nuh lohm ah. Ingena pacl in muhtwacwacack. Ni met kohtwaclah pacl in auliyak lowos.¹³

Na, ke pacl kowos oraclah sulaclah sacn, liyacacng inkacnek uh. Pahpah tuhmasr el sano kom, kena eiskomyak. Pahol ahsroelihk nuh suwos “ke lwen fohn.”¹⁴Opi ke ma na wo se ke orekma uh.

Esam kahs inge sel Nephi: “Kowos enenuh in ahkwot nuh met ke luhlahlfongi kuh in Kraist, in oasr kahlwem suwohs luhn finsrak, ac luhngse God ac mwet nuhkwewa. Ohinge, kowos fin ahkwot nuh met, mongo ke kahs luhn Kraist, ac muhtweng ne ke ne sahflah, liye, ohinge Pahpah El fahk: Kowos fah moul ma pahtpaht.”¹⁵

Kuhtuh pacl uh fuhfahsryucsr uh kwacna loeloes—pwacyena, fuhfahsryucsr se nuh ke moul ma pahtpaht. Tuh ac kuh in fuhfahsryucsr engan se kuht fin fahsr ke luhlahlfongi ke Jisus Kraist ac finsrak ke Iwaclah Lal. Nga fahkwack lah pacl se met kuht fahsr ke inkacnek luhn auliyak, kuh ngihsre kuh molwelah luhn Mwet Lahngo nuh in moul lasr. Kuh se ngacn fah ahkfokokoye niyacsr, ahkyohkye kahlwem lasr, ac ahkloalye oaru lasr in ahkwot nuh mwet, kais kuhtuh, nwe ke na lwen wolacna sacn ke kuht fohlohk nuh yurin lohm inkuhsrao sesr ac lohng puhsrwen Pahpah tuhmasr Inkuhsrao fahk nuh sesr, “Wona orekma lom.”¹⁶ Ke inen Jisus Kraist, amen.