Dou Vakasaqara mai na iVola Vinaka

Ena mataka lailai ni dua na siga ena vulaikatakata, au raica e dua na banuve e via kana tu ka vunitaki vinaka ena dua na veirosi. Ena irairai ni so na tabana sa sega tu na drauna, ena kila e dua sara mada ga e sarasara wale tu ga ni sa kana curuma tiko na veidrauna malumu ena galegalena rerevaki. Ena yaloyalo oya, au vakasamataka na levu ni tamata era vaka tu na banuve era tu e vuravura ka levu era vunitaki vinaka eda solia tu vei ira na galala mera curu mai ena noda bula, ia qai kani kidacala era sa mai kania yani na wakani noda bula vakayalo kei na nodra na noda itokani kei ira na lewe ni noda matavuvale.

Eda bula ena dua na gauna sa takalevu kina na itukutuku lasu ni noda vakabauta. Ena veigauna vakaoqo, ni da sega ni taqomaka ka vakatitobutaka na wakada vakayalo eda sa veisureti tiko kina me laukana mai vei ira era tovolea tiko me ra vakarusa noda vakabauti Karisito kei na noda vakabauta na Nona Lotu vakalesui mai.Ena gauna ni iVola i Momani, sai Sisoromi ka a segata me vakarusa nodra yalodina na vakabauta.

Na nona ivalavala kei na vosa “sai koya oqo na nona vere na meca, ka biuta koto me rawai kemuni kina, mo ni vakarorogo kina vua, me na qai vesuki kemuni ena nona sinucodo” (Alama 12:6). Na vere vata oqori era sa tu nikua, vakavo ga kevaka eda yadra tiko vakayalo ka tara cake e dua na yavu tudei vua na noda Dauveivueti (raica na Ilamani 5:12), e rawa ni da kunei keda ni da sa vesuki tu ena sinucodo nei Setani ka tuberi vakamalua sobu ena veisalatu vakatabui ka tukuni ena iVola i Momani (raica na 1 Nifai 8:28).

E vakarogoya na iApositolo o Paula e dua na ivakaro ni qaqarauni ena nona gauna ka na yaga talega ena gauna oqo: “Niu sa kila oqo, … ena tubu cake talega eso na tamata vei kemudou, era na vosataka na ka e veivakacalai, me mari ira kina era sa lotu me ra muri ira” (Cakacaka 20:29–30).

Na nona ivakaro kei na nodra na noda parofita kei na iapositolo e vakananuma vei keda ni sa dodonu me da cakava na veika kece eda rawata me da taqomaki kina vakayalo mai na vosa ni veisaqasaqa kei na veicavilaki. Niu sikovi ira na tabanalevu kei na iteki ni Lotu, au laveti ena veika au raica, rogoca, ka vakila ena nodra sotava vakavinaka ena yalodina na Yalododonu na ivakavuvuli ni iVakabula kei ira Nona italai.

Na kena sa tubu na rokovi ni Siga ni Vakacecegu e vale kei na lotu e dua na ivakaraitaki ni nodra sa taqomaki ira tiko vakayalo na lewenilotu ena nodra rogoca na veisureti vakaparofita. Sa ivakadinadina ni vakuri tiko na veivaqaqacotaki na kena sa tubu na cakacaka ni valetabu kei na tuvakawa mai vei ira na matavuvale ena nodra sokumuni ira na tubudra ena cakacaka vakalotu ni valetabu. Ena titobu cake na wakada vakayalo ni sa yaco na masu yalodina ni tamata yadua kei na matavuvale me itataqomaki ni noda vakabauta, ni da veivutuni e veisiga, vaqara na veitokani ni Yalo Tabu, vulica na noda iVakabula kei na nona itovo ka saga me da yaco me vakataki Koya (raica na 3 Nifai 27:27).

O Jisu Karisito na noda iVakabula na rarama kei vuravura, ka sa kacivi keda me da tokoni keda meda muri Koya. Sa dodonu meda dau rai Vua ena veigauna kece, vakauasivi ni sa yaco mai na veibogi buto ka voravora ni sa liwa na cava ni lomalomarua kei na veilecayaki, me vaka na kabukabu vavaku ni sa curu mai.Kevaka sa gole mai vei iko na idusi mai na “taikadua ni uciwai, [na vanua sa tu kina] e dua na vale levu ka vakaitamera” (1 Nifai 8:26) ni veivakalialiai, veivakalolovirataki, ka veisureti, au kerea mo gole tani mo kua kina ni rawai mai na ivadi ca me tawasei iko tani mai na dina kei na kalougata.

Ia e se bera ni rauta ena gauna oqo ni sa cavuti, volai, ka vakaraitaki na veika ca.E vakavulica vei keda o Elder Robert D. Hales ni ”vakavo kevaka o sa soli iko taucoko tiko ki na bulataki ni kosipeli—bulataka ena yalomu taucoko, kaukauwa, nanuma kei na nomu igu’—ena sega ni rawa ni o vakavurea na rarama vakayalo e ganita me biliga tani na butobuto” (“Mai na Butobuto ki na Nona Rarama Vakasakiti,” Liahona, Julai 2002, 78). E dina sara, na noda gagadre me da muri Karisito, o koya na Rarama kei Vuravura (raica na Joni 8:12), sa kena ibalebale me da muria na Nona ivakavuvuli. Eda vaqaqacotaki vakayalo, taqomaki, ka maroroi ni da cakava na vosa ni Kalou.

Na levu ga ni rarama ena noda bula, na lailai sobu ni ruguruguwa. Ia, ena loma sara mada ga ni rarama levu eda tadolavi tu vei ira na tamata kei na vakasama ka sega ni duavata kei na ka eda vakadinata ka tovolea noda vakabauta. E vola na iApositolo o Jemesa ni “sa vakatubura na dauvosota na vakatovolei ni nomudou vakabauta” (Jemesa 1:3). Ena vakasama oqo, e vakavuvulitaka kina o Elder Neal A. Maxwell ni ”na tisaipeli dauvosota … ena sega ni kidroa se tuvakasuka ni tukuni vakailasu na Lotu” (“Patience Brigham Young University devotional, Nove. 27, 1979], speeches.byu.edu).

Dau tubu mai na taro me baleta noda itukutuku makawa ni Lotu. Me qarauni vinaka na vanua eda gole kina me baleta na kena isau dodonu. Ena sega ni dua na ka e rawa ni da via kila na nodra rai kei na vakasama o ira era sega ni kila se sega ni taleitaka. Na ivakasala vinaka duadua a solia na iApositolo o Jemesa: “Kevaka e dua vei kemudou sa lailai vua na vuku, me kerea vua na Kalou” (Jemesa 1:5).

Na kerekere vua na Kalou me na tarava mai na vuli vakavinaka, ni da sa bolei me da vakasaqara “mai na ivola vinaka na vosa ni yalomatua; dou vakasaqara na kila ka, io ena vuli kei na vakabauta.” (V&V 88:118). E levu sara tu na mataqali ivola vakaoqo, era vola na iliuliu ni Lotu uqeti vakalomalagi kei ira na vuku kilai, taqomaki, ka nuitaki ena itukutuku makawa ni Lotu kei na ivunau. Niu sa tukuna oqori, e sega ni dua e sivia na vakaturaga ni vosa vakatakilai ni Kalou ena ivolanikalou ni yalododonu. Mai na veidraunipepa mamare ia vavaku ena veivakasama vakayalo, eda vulica kina na dina mai na Yalo Tabu ka levu cake noda rarama.

Sa vakauqeti keda o Peresitedi Thomas S. Monson “me da vulica ena masumasu ka vakananuma titobu na iVola i Momani e veisiga” (“Na Mana ni iVola i Momani Liaona, Me 2017, 87).

Ena vica na yabaki sa oti niu peresitedi tiko ni Tabana ni Kaulotu e Suva Viti, era a sotava eso na daukaulotu e dua na ka ka vaqaqacotaka vei ira na mana ni veisau ena iVola i Momani. Ena dua na yakavi katakata qai matenacagi, erau yaco yani e rua na daukaulotu ena dua na itikotiko ena vanua ni vagalala lailai mai Labasa.

A sauma mai na tukituki e katuba e dua na kena turaga ka vakarorogo ni rau vakadinadinataka na daukaulotu na dina ni iVola i Momani. Erau solia vua e dua na ilavelave ka sureti koya me wilika ka masulaka me kila, me vakataki rau, ni sai koya na vosa ni Kalou. E lekaleka na kena isau mai vua: “Ni mataka au sa lesu tale i qoli. Au na wilika niu soko tu, niu sa lesu mai, drau qai mai sikovi au tale.”

Ni lako tu, a yaco na veisau, ni oti e vica na macawa erau a lesu tale me lai sikova na dauqoli na daukaulotu vou. Ena gauna oqori sa wilika oti o koya na iVola i Momani taucoko, rawata na veivakadeitaki ena kena dina, ka vinakata me kila eso tale na ka.

E veisautaka na turaga oqo na Yalo Tabu, o koya sa vakadinadinataka na dina ni veimalanivosa taleitaki ena veidrauna yadua ni veika e yaco kei na ivunau ka a vakavuvulitaki ena dua na gauna balavu sa oti ka maroroi tu me baleta noda gauna ena iVola i Momani. Na veivakalougataki vata oqori esa tu me baleti keda.

Na vuvale sa vanua uasivi sara me ra vulica ka wasea vata kina na matavuvale na veivakasama vinaka mai na ivolanikalou, nodra vosa na parofita bula ka raica na iyaragi ni Lotu ena LDS.org. E kea o na raica kina na levu ni itukutuku me baleta na ulutaga vakosipeli eso me vaka na italanoa ni iMatai ni Raivotu. Ni da vuli mai na ivola vivinaka, eda sa taqomaki keda tiko mai na gusu rerevaki eso era segata tu me ra kanalaka na wakada vakayalo.

Ena noda masumasu, vuli, kei na vakanananu vakatitobu, ena vo tu beka eso na taro se bera ni saumi, ia me da kakua ni laiva oqori me bokoca na yameyame ni vakabauta ka caudre tiko e lomada. Na taro vakaqori e veisureti me da tara noda vakabauta ka sega ni dodonu me vakuria e dua na gauna ni lomalomarua e tasiri mai. Sai koya saraga oqo na yaga ni lotu me kakua ni vakadeitaka e dua na isaunitaro, ni sai koya oqori e dua na inaki ni vakabauta. Ena vuku ni ka oqori, sa vakavulica kina vei keda o Elder Jeffrey R. Holland “ni sa yaco mai na veitiki ni gauna vakaoqori ka basika mai na leqa, e sega ni yaco totolo mai na kena iwali, kukuva matua toka na veika o sa kila rawa tiko ka tudei me yacova ni sa yaco mai na ikuri ni vuku Turaga, Au sa Vakabauta se Liaona,Me 2013, 94).

Eda raica wavoliti keda na nodra reki e vuqa era tudei tu ena nodra dau vakania vinaka na wakadra vakayalo. Na nodra vakabauta kei na talairawarawa sa rauta me solia vei ira na inuinui cecere ena iVakabula, ka basika mai kina na bulamarau cecere. Era sega ni kaya ni ra kila na ka kecega, ia era sa sauma na kena isau me ra kila na veika era na kunea kina na vakacegu ka bula ena vosota vakadede ni ra segata me ra kila vakalevu cake. Mai na ivakavuvuli ki na ivakavuvuli, sa vakataudeitaki na nodra vakabauta vei Karisito, ni ra tudei tu vakalewenivanua vata kei ira sa Lotu.

Me da dui bula o keda yadua me kakua kina ni kunea na gusu rerevaki ni banuve vunitaki e dua na tikina, sega ena gauna oqo kei na veigauna kecega, ena noda bula me “tudei sara [noda] vakabauta na Karisito, me yacova na ivakataotioti” (Alama 27:27). Ena yaca i Jisu Karisito, emeni.