Ukoukori man Booki Aika Moan te Raoiroi Taekaia

N te moaningabong teuana, I noora te nimwatoi ae e baki ao ni kawakinaki raoi inanon te buakonikai n rooti ae tikiraoi. Taraakin tabeua bwebwena aika a tuai riki baaia, e mataata riki nakon temanna ae aki taratara raoi are e kabotaua ma te nimwatoi ni kakaea kawaina rinanon kangkantakin banikai ni wiina aika a kakamaku. Ma te kanikina, I aki kona ni buokia ma au kantaninga bwa iai tabeman aomata aika titebo ma te nimwatoi aei; a kona ni kuneaki ni kabuta te aonaaba ao tabeman a rangin ni wanawana ni bitiia bwa ti na butimwaaia inanon maiura, ao imwain ae ti ataia, a tia ni kanaki wakaan tamneira ma ara utu ao raoraora.

Ti maeka n te bong are e rikirake iai buren te rongorongo ibukin ara koaua aika a bati. N taai n aron aikai, kabwaka ni katani ao ni kananoi wakaara n tamnei bon te kakao nakon kamaunakiia irouia ake a ukoukoria ni kamatei ara onimaki iroun Kristo ao ara onimaki n Ana Ekaretia ae kaokaki. N tain Ana Boki Moomon, bon Teeterom are e tangiria ni kamaunanakoa aia onimaki taan kakoaua.

Ana mwakuri ao ana taeka bon “ana bwai ni kamwane te tia kaitara, are e … kawenea bwa e na kamwaneia [te] botanaomata, bwa e aonga ni uoti [ngkami] nako aan ana tautaeka, bwa e aonga ni katobibi [ngkami] n ana taurekereke” (Aramwa 12:6). Bwaai ni kamwane aikanne iai n te bong aei, ao ni karokoa ae ti tauraoi n tamnei ao ni katea aara ni koaua are te Tia Kabooira (taraa Ereman 5:12), ti kona ni kuneira ni kabaeaki n ana taurekereke Tatan ao ni kairaki ni karaurau rikaaki nakon te kawai ae katabuaki ae taekinaki n Ana Boki Moomon (taraa 1 Nibwaai 8:28).

Te Abotoro Bauro e anga te kauring n ana bong are e kaineti ma ara bong: “Ba I ata aei, … ao ane a na teirake aomata mai ibuakomi n atong baika bwaoua, bwa a aonga ni katikiia taian reirei ri mwiia” (Mwakuri 20:29–30).

Ana kauring ao mairouia ara burabeti ao abotoro a kauringiira bwa ti riai ni karaoi ni kabane aika ti kona ni karikirakeia tamnei ni kaitarai taeka ni kakaitara ao ni kamwane. Ngke I kawari uoote ao titeiki n te Ekaretia, I kaungaaki man te bwai ae I nooria, ongo, ao n namakinna ngke Aomata Aika itiaki a kaeka ma te kukurei ao te onimaki nakon ana reirei te Tia Kamaiu ao Ana toro.

Rikiraken karinean te bong ae te Tabati bon teuana te katooto irouia membwa ni karikirakeia n tamneia man aia ongotaeka nakon aia kakao burabeti. Kakorakora riki tabeua a nooraki man rikiraken te tembora ao mwakuri n rongorongon te utu ae a karaoaki irouia utu ngkai a ikotiia aia utu rinanon otenanti n te tembora. Aan tamneira a korakora riki ngkana aia tataro n tangira bon irouia ao n utu a riki bwa boutoka n ara onimaki ao ngkana ti rairinanora ni katoabong, ukoukora ana iraorao te Tamnei ae Raoiroi, ao n reirei aron te Tia Kamaiu ao anuan maiuna ao ni kekeiaki n riki n ai Arona (taraa 3 Nibwaai 27:27).

Ara Tia Kamaiu, Iesu Kristo, bon Otan te Aonaaba, Ao E kaoira bwa ti na Iria. Ti riai n Taraia n taai nako riki ngkana iai kataaki aika kaangaanga ngkana iai namakin n raraoma ke n aki koaua, n aron waekoan ao matenin te mabubu, n rikirake. Ngkana te tabonibai ae kotokoto man “iteran te karaanga n ran, [te tabo] are e [tei] iai te kateitei ae bubura ma ni mwawaawa” (1 Nibwaai 8:26) e taraa n ae bon kainetiko ni kaenaenako, ni keweiko, ao ni bubuti, I tuatua bwa ko na waekoa n tannako (mai irouia aika a kaenaenako) bwa e na aki anaaki nanom man bwaai aika kewe ao ni kamangaongao ni kamaenakoko man te koaua ao ana kakabwaia.

E ngae n anne, aio n ti ngaia e na bon aki tau n te tai aei ngkana a tia bwaai aika a kaangaanga kaetakiia n taekinaki, ni koreaki, ao ni katamneiaki. E reireiniira Unimwaane Robert D. Hales, ”Ti ngkana ko kabanea am tai ni maiuakina te euangkerio—ni maiuakinna ma ‘nanomi, marurungimi, ami iango ao korakorami ni kabane’—ko aki kona ni karekea tamnein te oota ae tau n totokoa te roo” (“Out of Darkness into His Marvelous Light,” Liahona, Turai 2002, 78). Ni koauana, nanora n ira Kristo, are bon Ootan te Aonaaba (taraa Ioane 8:12), nanona bwa ti na mwakuri iaon Ana reirei. Ti kakorakoraaki, kamanoaki, kawakinaki n te tamnei ngkana ti mwakuri iaon Ana taeka te Atua.

Ngkana e korakora te oota ni maiura, ao e na uarereke te nanououa. E ngae n anne, riki ngkana ti katobibiaki n te oota ae mwaiti, ti kaitibo ma aomata ao n taekinna bwa e aki kabwarabwaraa raoi ara onimaki ao ni kataa ara koaua. E koroia te Abotoro Iakobo bwa “kataan [ara] onimaki bwa e karika te nanomwaaka” (Iakobo 1:3). Ma te atatai ae nano aei, e reirei Unimwaane Neal A. Maxwell bwa ”Ana reirei Iesu ae taotaonannano… e na aki mimi ke ni kabaeaki ngkana e aki taekinaki koauan raoi te Ekaretia” (“Patience” [Brigham Young University devotional, Nov. 27, 1979], speeches.byu.edu).

Titiraki iaon rongorongon ao ana koaua ara Ekaretia aika a bae n tabekaki. Taabo ake ti na ukeuke iai ni kakaea te reke ae eti e tangira te taratara raoi. Akea te bwai ae e na karekeaki ni kakaean aia taratara ao aia iango aika aki tau kaongoaia ke naake a tia ni bua aia koaua n te Ekaretia. Te kabanea n raoiroi n reirei e kanakoaki iroun te Abotoro Iakobo: “Ngkana akea ana rabakau temanna i buakomi, ao e na butia te Atua” (Iakobo 1:5).

Titirakinan te Atua e na rimwiaki ma te kamatebwai raoi, ibukina bwa ti mena iaan aia kariaia booki aika tabu n ukoukori “man booki aika moan te raoiroi taeka ni wanawana; ukoukora te rabakau, n te kamatebwai ao n te onimaki naba” (R&B 88:118). E korakora mwaitin booki ma man booki aikai, aika a koreaki irouia taan kairiiri n te Ekaretia aika a kairaki mai ieta ao ni kinaaki, kawakinaki, ao rongorongon te Ekaretia ao ataein te reirei n te tua aika onimakinaki. Man ae taekinaki, akea (mai ibuakon booki aika koreaki irouia taan kairiiri n te Ekaretia) aika riaon kakawakin ana taeka te Atua aika kaokaki inanon booki aika tabu aika a tia ni kariaiakaki. Man iteraniba aika manii aikanne aika a kamatentenaki ma atatai aika nano n tamnei, ti reirei koaua rinanon te Tamnei ae Raoiroi ao n rikirake inanon te oota.

E a tia Beretitenti Thomas S. Monson ni bubutiira “n tataromwaaka ni kamatebwaia ao n iangoa raoi Ana Boki Moomon ni katoa bong” (“Mwaakan Ana Boki Moomon,”Riaona, Meei 2017, 87).

Tabeua te ririki n nako, ngke I beku bwa te beretitenti n te Fiji Suva Mition, iai aia taneiai tabeman mitinare are e a manga kakorakora inanoia mwaakan Ana Boki Moomon n rairi naano. N te bong teuana ae kabuebue man kakarau teutana, uoman mitinare a roko ni mweenga aika a uarereke i Labasa.

Te karebwerebwe iaon te mataroa e kaekaaki iroun te mwaane ae a kara are e kakauongo ngke a kaota aia kakoaua mitinare iaon koauan Ana Boki Moomon. A anganna ana boki ao n tuangnga bwa e na wareware ao n tataro bwa e na ataia, n aron ae a ataia ngaiia, bwa bon ana taeka te Atua. Ana kaeka e uarereke: “N ningabong ngkana I oki n akawa. N na warekia ngkana I mena i taari, ao ngkana I oki, kam kona ni manga kawarai.”

Ngke e a nako, e karaoaki te kaibibiti, ao tabeua te wiiki imwiina, toaia mitinare aika a boou a oki ni kawara te tia akawa. N te tai aei e a tia ni warekia ni kabanea Ana Boki Moomon, e a tia ni karekea kamatoaan koauana, ao n tangiria n reiakina ae mwaiti riki.

E a tia te mwaane aei n rairaki iroun te Tamnei ae Raoiroi, are e kakoauai koauan taeka aika kakawaki iaon iteraniba nako ni bwaai ao n reirei ake a reiakinaki n taai ake ngkoa ao ni kawakinaki ibukin ara bong n Ana Boki Moomon. Te kakabwaia ae ai aron anne e tauraoi nakoira n tatabemaniira nako.

Te mweenga bon te tabo ae riai ibukiia utu bwa a na kamatebwaia ao n tibwauai atatai aika kakawaki man booki aika tabu ao aia taeka burabeti ao ni karekei bwaai n reirei n te Ekaretia n te LDS.org. Ikekei ao ko na karekei rongorongo aika mwaiti iaon te euangkerio n aron rongorongo man te Moan Kaotioti. Ngkana ti kamatebwai man booki aika kabanea n tamaroa, ti kamanoira man wiin te nimwatoi ae kakamaaku are e na kang wakaara n tamnei.

Ni kabane ma ara tataro, kamatebwai, ao ara iango, e na bae n iai tabeua titiraki aika a tuai kaekaaki, ma ti riai n aki kariaia titiraki aikanne ni kabua te onimaki ae rikirake inanora. Titiraki aikanne bon kakao ni katei ara onimaki ao (titiraki aikai) a na aki anganaki te moanibwai ngkana iai nanououara. Bon te itera teuana ae rangin ni kakawaki n te aro n aki karekea te kaeka ni koaua nakon titiraki ni kabane,ibukina bwa aio teuana te kantaninga n te onimaki. Man te iango anne, e a tia Unimwaane Jeffrey R. Holland n reireiniira bwa “ngkana a roko kaangaanga aikanne aki roko ni waekoa, taua ni kamatoa ao ko a tia n ataia ao n tei ni matoatoa ni karokoa a roko atatai riki tabeua” (“Lord, I Believe,” Liahona, Meei 2013, 94).

Ti noori ni katobibiira kimwareireia aika mwaiti aika a tei ni matoatoa man teimatoaia ni kamwarakea wakaaia n tamnei. Aia onimaki ao aia ongotaeka e tau n anganakiia te kaantaninga ae tamaroa iroun te Tia Kamaiu, ao man anne e roko te kukurei ae korakora. Naake a tei ni korakora aki kantaningaia bwa a na atai bwaai ni kabane, ma a tia ni kekeiaki n ataa ae tau ni karekea te rau ao ni maeka ma te taotaonaki n nano ngkai a ukoukoria ni kan ataa ae mwaiti riki. Teutana imwiin teutana, aia onimaki e a matoatoa inanon Kristo, ao a tei ni matoatoa n tabeia ae ngaia taan buoka n aba ma ake a Itiaki.

Ti na bane ni maiu bwa e aonga wiin te nimwatoi ni kangkanti n aki reke ana tabo, tiaki ngkai ke ni bon akea, inanon maiura bwa ti aonga n teimatoa “n nene n onimaki iroun Kristo, ni karokoa naba te toki” (Aramwa 27:27). N aran Iesu Kristo, amen.