Chexsik’oq sa’eb’ li hu q’axal chaab’il

Eq’la chaq sa’ jun li kutan, kiwil jun li ch’ina motzo’ li yoo xtz’okajik ut muqmu chi us sa’ jun li ch’ina-usil uutz’u’uj. Rik’in naq li roq li utz’u’uj maak’a’ chik lix xaq, moko ch’a’aj ta xk’eeb’al reetal naq yoo chixk’uxb’al chixjunileb’ li xaq rik’in li ruuch re kaw rib’. Jo’ chanchan jun jaljookil ru aatin, xink’oxla naq wankeb’ li kristiaan li chanchaneb’ li ch’ina motzo’ a’in; neke’tawman chiru chixjunil li ruchich’och’, a’b’an xb’aan xseeb’aleb’, q’axal wi’chik jaljookeb’ ru li rilob’aal jo’kan naq naqakanab’eb’ chi ok sa’ li qayu’am, ut naq maji’ naqak’e reetal, ak xe’xk’ux li qamusiq’ejil xe’ ut xxe’ileb’ ajwi’ li qajunkab’al ut li qamiiw.

Wanko sa’ jun li hoonal naq xiikil li esil ink’a’ ch’olch’o ru chirix li naqapaab’. Sa’ eb’ li hoonal jo’ a’in, naq ink’a’ naqakol rix ut ink’a’ naqak’e chi k’iik li qamusiq’ejil xe’, a’an chanchan jun b’oqok re taak’uxe’q li qaxe’ xb’aaneb’ li ani neke’raj sachok re li qapaab’aal chirix li Kristo ut li naqapaab’ chirix lix Iglees li k’ojob’anb’il wi’chik. Sa’ lix kutankil lix Hu laj Mormon, laj Tzeesrom kiraj xsachb’al lix paab’aaleb’ laj paab’anel.

Lix b’aanuhom ut li raatin a’an “jun xraʼal laj xikʼ ilonel, li kixkʼojobʼ aʼan re xchapbʼal li tenamit, re naq [tixkʼameb’] chi wank rubʼel xwankil aʼan, re naq [tixsutiheb’] rikʼin lix bʼakʼlebʼ chʼiichʼ ” (Alma 12:6). Eb’ li ra’al a’an toj wankeb’ ajwi’ anajwan, ut wi ink’a’ nokoyo’le sa’ musiq’ej ut ink’a’ taqak’ojob’ qib’ rub’el xwankil laj Tojol qix (chi’ilmanq Helaman 5:12), taqataw naq b’aqb’ooko tana’ xb’aan lix b’ak’leb’ ch’iich’ laj tza ut naq a’an yoo chiqab’eresinkil toj sa’eb’ li b’e ink’a’ us xk’amb’al li yeeb’ileb’ wi’ resil sa’ lix Hu laj Mormon (chi’ilmanq 1 Nefi 8:28).

Li apostol aj Pablo kixyaab’asi jun li tijom sa’ lix kutankil, li na’oksiman ajwi’ sa’ li qakutan: “Xb’aan naq ninnaw naq … sa’ eeyanq ajwi’ laa’ex wanqeb’ winq te’wakliiq chixyeeb’al k’a’aq re ru ink’a’ us re xk’amb’aleb’ laj paab’anel chirixeb’ ” (Hechos 20:29–30).

Lix tijom a’an ut lix tijomeb’ li qaprofeet ut apostol neke’xjultika qe naq chi anchal qach’ool tento taqayal qaq’e chixkawresinkil qib’ sa’ musiq’ej re xkuyb’al rab’inkil li aatin aj b’alaq’. Naq nawula’aniheb’ li teep ut li oqech re li Iglees, nawaklesiik inch’ool xb’aan li nawil, li nawab’i, ut li naweek’a naq eb’ laj Santil Paab’anel neke’xsume chi chaab’il ut chi tiik ruheb’ lix k’utum li Kolonel ut lix moos.

Lix k’iijik li roxloq’inkil li hilob’aal kutan a’an yal jun reetalil naq eb’ li komon neke’xkawob’resi rib’ sa’ musiq’ej rik’in rab’inkil li profeetil b’oqb’al. Jun chik reetalil li kawob’resink-ib’ a’an lix k’iijik li k’anjel re li santil ochoch ut li resilal li junkab’al naq eb’ li junkab’al neke’xch’utub’ lix xe’toon rik’in li k’ojob’anb’il k’anjel re li santil ochoch. Cham chik neke’xe’eni rib’ li qamusiq’ejil xe’ naq li tijok qajunes ut sa’ li junkab’al nakana choq’ roqechal li qapaab’aal ut naq naqajal qak’a’uxl rajlal kutan, naqasik’ li rochb’eenihom li Santil Musiq’ej, ut nokotzolok chirix laj Kolol qe ut chanru a’an ut naqayal qaq’e chi wulak jo’ chanru a’an (chi’ilmanq 3 Nefi 27:27).

Laj Kolol qe, li Jesukristo, a’an lix Saqen li Ruchich’och’, ut a’an nokoxb’oq chixtaaqenkil. Tento taqil a’an chiru chixjunil li hoonal ut mas wi’chik wi wankeb’ li q’ojyin aak’ab’ ru sa’ wi’ nachal li kaq-sut-iq’ re li wiib’ank ch’oolej jo’ jun li choql na’ok sa’ muqmu. Wi li ru’uj uq’ej li wankeb’ “chixjunpakʼalil lix haʼil li nimaʼ, [b’ar wi’ wan] jun kabʼl li nim ut paapo xsaʼ,” (1 Nefi 8:26) chanchan ta wi’ naq neke’k’utuk aawe rik’in eetz’unk, b’ach’b’ach’il, ut q’unb’esink ch’oolej, nintz’aama naq taasutq’isi aawib’ chiruheb’ sa’ junpaat re naq ink’a’ taaq’unob’resiiq aach’ool xb’aan li b’alaq’il ut maa’us aj na’leb’ re aajachb’al rik’in li yaal ut eb’ li osob’tesink wan re.

A’b’anan, moko tz’aqalaq ta junes a’in sa’ li kutan anajwan naq nayeeman, natz’iib’aman ut nak’utman li k’a’aq re ru po’b’il ru. Li Elder Robert D. Hales kixk’ut chiqu, “Wi ink’a’ k’eeb’ilaq eech’ool ut q’axtesinb’ilaqex chixyu’aminkil li evangelio—xyu’aminkil rik’in chixjunil lee raam, lee musiq’, lee k’a’uxl ut lee metz’ew—ink’a’ naru taawanq li jo’ k’ihal li musiq’ejil saqen taa’ajmanq ru re xsachb’al ru li q’ojyin.” (“De la oscuridad a Su luz maravillosa,” Liahona, Julio 2002, 78). Relik chi yaal, li qajom re xtaaqenkil li Kristo, lix Saqen li Ruchich’och’ (chi’ilmanq Jwan 8:12), naraj naxye naq took’anjelaq a’ yaal jo’ chanru lix k’utum. Kawob’resinb’ilo, k’eeb’il qametz’ew, ut kolb’il qix sa’ musiq’ej naqak’anjela li raatin li Dios.

Wi mas nim li saqen sa’ li qayu’am, mas b’ab’ay li mu nak’utun. A’b’anan, wan naq us ta naab’al li saqen wan, toj neke’chal li kristiaan ut li aatin li neke’xjal ru li naqapaab’ rik’in tik’t’i ut neke’xyal rix li qapaab’aal. Li Apostol aj Santiago kixtz’iib’a naq “li xyalb’al rix li [qapaab’aal] nak’amok chaq li kuyuk” (Santiago 1:3). Rik’in li na’leb’ a’in, li Elder Neal A. Maxwell kixk’ut, “Jun tzolom li wan xkuyum … moko taasachq ta xch’ool chi moko taat’ane’q ta naq te’aatinaq chirix li Iglees rik’in tik’ti’ ” (“Patience” [Brigham Young University devotional, Nov. 27, 1979], speeches.byu.edu).

Neke’chal li patz’om chirix resilal li qaIglees ut li napaab’aman aran. Aajel ru li na’ajej naqasik’ wi’ lix yaalil sumenkileb’ li patz’om a’an. Maak’a’ natawmank naq naqatz’il rix lix na’leb’eb’ li ani mas b’ab’ay neke’xnaw malaj li ani po’b’ileb’ xch’ool. Li na’leb’ q’axal wi’chik chaab’il kik’ehe’ xb’aan li Apostol aj Santiago: “Wi wan junaq eere yoo chi majelo’k xna’leb’, chixtz’aamaq re li Dios” (Santiago 1:5).

Rub’elaj naq naqapatz’ re li Dios, xb’een wa tento taqatz’ileb’ rix li loq’laj hu chi us, xb’aan naq taqlanb’ilo chixsik’b’al “saʼebʼ li hu qʼaxal chaabʼil li aatin re chaabʼil naʼlebʼ ” ut “chixsikʼb’al xkʼulbʼal [qanawom], rikʼin li tzolok ut rikʼin ajwiʼ li paabʼaal” (Tz. ut S. 88:118). Wan xiikil li sahil tasal hu a’in, tz’iib’anb’ileb’ xb’aaneb’ laj jolominel re li Iglees musiq’anb’ileb’ xb’aan li choxa jo’ ajwi’ xb’aaneb’ aj nawonel ru li resilal ut lix tzol’leb’ li Iglees li nawb’ileb’ ru, maak’a’eb’ xxuwajelil, ut chaab’ileb’ xna’leb’. Us ta chixjunil a’an, maajun reheb’ naxq’ax ru li xnimal ru aatin k’utb’esinb’il xb’aan li Dios sa’eb’ li loq’laj hu. Chiruheb’ li jayil perel a’an li nujenaqeb’ chi musiq’anb’il na’leb’, naqatzol li yaal rik’in li Santil Musiq’ej ut chi jo’kan jun xk’iijik li qasaqen.

Li Awa’b’ej Thomas S. Monson, kixtz’aama qe “naq rajlal kutan taqatzol ut taqatz’il rix lix Hu Laj Mormon rik’in jun tij sa’ qach’ool” (“Lix wankilal lix Hu laj Mormon,” Liahona, Mayo 2017, 87).

Junjunqeb’ chihab’ chaq anajwan, naq yookin chaq chi k’anjelak jo’ awa’b’ej re li mision Fiji Suva, junjunqeb’ li misioneer ke’xk’ul li kixkawob’resiheb’ sa’ lix wankil lix Hu laj Mormon chi jalok ch’oolej. Sa’ jun li kutan jwal tiq, wiib’ li misioneer ke’wulak chaq sa’ jun ochoch sa’ jun li ch’ina k’aleb’aal aran Labasa.

Naq ke’xtoch’ li okeb’aal ke’sumeek xb’aan jun li cheekel winq, li kirab’iheb’ li misioneer chixyeeb’al lix nawomeb’ xch’ool chirix lix yaalalil lix Hu laj Mormon. Ke’xk’e jun hu re ut ke’xb’oq chirilb’al ru ut chi tijok chirix re xnawb’al, jo’ eb’a’an, naq a’an li raatin li Dios. Lix sumehom a’an a’in: “Wulaj nikinxik wi’chik chi karab’k. Tinwil ru naq wanqin chaq sa’ li palaw, ut naq tinq’ajq chaq, naru texchalq wi’chik chiwula’aninkil.”

Naq toj maji’ naq’aj chaq li winq ke’jale’ li misioneer, ut wiib’ oxib’ xamaan chik chirix a’an, wiib’eb’ chik ak’ misioneer ke’q’aj re rula’aninkil laj kar. Sa’ li hoonal chik a’an, ak rilom chik ru chixjunil lix Hu laj Mormon, kixk’ul jun lix sumenkil naq tz’aqal yaal, ut kiraj xnawb’al xkomon chik xna’leb’.

Li winq a’an kijale’ xch’ool xb’aan li Santil Musiq’ej, li kixch’olob’ xyaalal lix chaq’alil ru li aatin sa’ li junjunq chi perel chirix li kik’ulman ut li tzol’leb’ k’utb’ileb’ chaq junxil ut li k’uulanb’il choq’ re li qakutan sa’ lix Hu laj Mormon. Li osob’tesink a’an wan choq’ qe chiqajunjunqal.

Li junkab’al a’an li na’ajej q’axal chaab’il re xtzolb’al ut xwotzb’al li chaab’il na’leb’ chirixeb’ li loq’laj hu ut li raatineb’ li yo’yookil profeet jo’ ajwi’ re roksinkileb’ li k’anjeleb’aal re li Iglees sa’ li LDS. org. Aran teetaw naab’aleb’ li esil chirix lix na’leb’ li evangelio jo’ li esileb’ chirix li Xb’een K’utb’esink. Naq nokotzolok sa’eb’ li chaab’il hu, naqakol qib’ chiru li ruuch reheb’ li ani neke’raj xk’uxb’al li qamusiq’ejil qaxe’.

Us ta nokotijok, nokotzolok, ut nokotz’ilox-ix sa’ qak’a’uxl, toj naru naq taawanq li qapatz’om maji’ sumenb’ileb’, a’b’an moko taqakanab’ ta naq a’an tixchup lix xamlel li paab’aal li lochlo sa’ li qaam. Eb’ li patz’om a’an, a’aneb’ jun b’oqb’al re xwaklesinkil li qapaab’aal ut ink’a’ re xwa’tesinkil jun li hoonal re li wiib’ank ch’oolej. A’an a’an tz’aqal lix sahil ru li paab’aal naq maak’a’ xsumenkil chixjunileb’ li patz’om, xb’aan naq a’an jun reheb’ lix k’anjel li paab’aal. Chirix li na’leb’ a’an, li Elder Jeffrey R. Holland kixk’ut qe “naq te’wulaq li hoonal a’an ut te’chalq li ch’a’ajkilal, ut lix yiib’ankil li ch’a’ajkilal a’an moko junpaat ta, chapomaq eerib’ rik’in lee nawom ak wan ut wanqex aran toj reetal naq teek’ul xkomon eenawom” (“Creo,” Liahona, Mayo 2013, 94).

Naqileb’ sa’ qasutam lix sahileb’ xch’ool naab’aleb’ li xaqxookeb’ chi tiik rik’in xch’olaninkileb’ lix musiq’ejil xe’. Lix paab’aleb’ ut li ab’ink chiru li Dios neke’xb’aanu tz’aqal re xk’eeb’al jun royb’enihomeb’ rik’in laj Kolol reheb’, ut aran nayo’la li sahil ch’oolejil. Ink’a’ neke’xye naq neke’xnaw chixjunil li k’a’aq re ru, a’b’an ak xtojomeb’ lix tz’aq li nawom tz’aqal re taawanq xtuqtuukilaleb’ re yu’amink rik’in xkuyumeb’ naq toj neke’xsik’ xtzolb’al xkomon chik. Chi junjunqil li raqal, lix paab’aaleb’ k’ojob’anb’il rib’ chi tz’aqal sa’ li Kristo, ut xaqxookeb’ chi kaw jo’ rech tenamitileb’ laj Santil Paab’anel.

Chiqayu’ami taxaq qayu’am chiqajunilo re naq li ruuch re li muqmuukil motzo’ ink’a’ naru te’xtaw xna’aj, ink’a’ anajwan chi moko sa’ li chalel, re naq tookanaaq “chi tiik sa’ li qapaab’aal chirix li Kristo, toj sa’ roso’jik” (Alma 27:27). Sa’ xk’ab’a’ li Jesukristo, amen.