Mosiik a Kot el Ungil Hong

Tal dirke tutau, ak milsa songerenger e bek bedengel a iro rngii el melaitul el ngara klebokel bung. Sel domes aikal rechelel a dellomel el mla mo diak a llel, ng bleketakl a domes rngii el uase ng blak a rengul menga llel tial dellomel lolab aikal betok el kekul. Ng tekoi el blo, kumdasou er ngii el uase ngkmal betok a rechad eldi uai a melaitul; el bebil a de betik ra beluulechad, el meduch lomart er tir ma bebil ra taem e te soiseb ra klengar er kid, e sel taem el debetik, eng mla kmang a uchetemed el chedaol m re telungalek er kid ma resechelid.

Kid a kiei ra taem el betok el blulak el tekoi a kirel a klechelid er kid. Aikal taem, el uaisei, alsekum eng diak el mesisiich a risel chedaol klengar rekid eng sebeched el mechetikaik er tirkel osiik el melemall ra klaumerang er rekid ra Kristo ma klaumerang er kid ra mla moluut el Ikelesia er Ngii. A taem ra Babier ra Mormon, eng mle Zeezrom el melemall ra klaumerang er tirkel mle oumerang.

A omerellel ma tekingel a mle “bedikl ra cherarou, el mengiil … lomdechem ra rechad, eng mo sebechel [ngoiteterir] el mo oltirakl rngii, e bo lorenged er [tir] ra bambatel” (Alma 12:6). Aikal bedikl a ngarngii ra chelchal sils, e a lsekum eng diak dekerekikl el toketekii a dodai er kid ra Osobel (mesa Helaman 5:12), eng sebeched el melechet ra lechetel a Diablong e ngoikid el mora ngodech el rael lolekoi er ngii a Babier ra Mormon (mesa 1 Nephi 8:28).

Apostol Paulus a mle omeklatk ra taem er ngii a osisiu el mei er rekid ra chelechal sils: “Ak medengelii, … a teletelir a recahd, el mo melekoi a mekngit el tekoi, el mengesuseu ra roltirakl” (Rrellir 20:29–30).

Ng milngelechel e dirrek el milngelechel ra re profet ma re apostol me lomeklatk er kid el kired el meruul aikel rokui el sebeched el mo mesisiich ra chedaol tekoi meng sebeched el lodngakl a ultok ma ongetikaik. Sel kuldingel a wards ma stakes ra Ikelesia, eng mo smiich a renguk ak ues, remenges, e omelchesiu ra re Santo el blak a rengrir el olngesenges a osischeklel Osobel ma Remesiungel.

Sel kid a mesisiich el mengull ra Chedaol sils a tara okesiu ra chedaol klisichir a rechedal a ikelesia lorrenges a tekingel a profet. A lmuut el lolisiich a chemolt ra ureor ra templo ma ureor ra reksii ra telungalk e lengai a ngklir a rebeldekir el mora templo. A chedaol luchetemed a mo dmolech e a ngara rengud el nglunguched ma nglunguuch ra telungalek a mo uchul a klaumerang er kid, sel douchul a rengud ra bek el sils, e losiik ra Chedaol Reng, e dosuub ra Osobeled me a Blekerdelel e dolasm el mo uai Ngii (mesa 3 Nephi 27:27).

A Osobeled, el Jesus Kristo, a Llomes ra Beluulechad, e Ngii olengit er kid el mo oltirakl er Ngii. Ng kired el blechoel di omes er Ngii e oumesind sel sekum eng kora ngarngii a iilkolk ma ses el eolt el mei ra klengar kid el rullid el mo rau a rengud e oumededenger, el uai a chetechat, sel lemei. Alsekum aikel chim el kuk “ngara bitang ra omeuachel, [el] ngarngii sel klou e meteteu el blai el [dechor]” (1 Nephi 8:26) a di bedul kau el kora oltuub, e melenguul, e mengesuseu e rkau, e a kulengit me kedi mereched lobult el mo cheroid meng diak mechetikaik ra blulak ma mekngit el teletael el ngii a choridau ra klemrang ma klengeltengat.

Ng di tiang a di molnesonges er chelchal taem el mekngit el tekoi a dorrenges, llechukl, ma di chemolt. A Elder Robert D. Hales a mle olisechakl el uase “ng kirem el kmal mui loltirakl ra ebangkelio—loba rokir el ‘rengum, bedengem, uldesuem ma klisichem’—le lak e ng diak el sebechem lotebedii a mesisiich el chedaol llomes el mo choridii a illkolk” (“Out of Darkness into His Marvelous Light,” Liahona, July 2002, 78). Ng klemerang, a blak el reng er rekid el mo oltirakl ra Kristo, el ngii a Llomes ra Beluuelchad (mesa Johanes 8:12), a belkul a kmo ng kired el meruul a osischeklel. Kid a ngmai a chedaol olisiich, e mo mesisiich, e selbechakl sel doltirakl a tekingel a Dios.

Sel klou a llomes ra klengar kid, eng kekerei a techellel a iilkolk. Ngdi, a le klou a llomes e kid a teloi ra rechad ma tekoi el ngodech a uldesuir ra ikel kid a oumerang e melasm e mengitigaik a klaumerang er kid. A Apostol Jakobus a milluches el kmo “a omelasm ra klaumerang er [kid] a uchul a kelou el reng” (Jakobus 1:3). Tiaikid el uldasou, e a Elder Neal A. Maxwell a mle olisechakl el uase a “klou a rengul el loltirakl … a diak el bol mechas a rengul malechub e bol mechitechut sel sekum a rechad a melekoi a blulak el kirel a Ikelesia” (“Patience” [Brigham Young University devotional, Nov. 27, 1979], speeches.byu.edu).

A ker el kirel a reksii ra Ikelesia er kid ma klaumerang er rekid a ngarngii. A bo dosiik a meral nger eng kired el mo kerekikl. Ng diak a ngerang el denguu sel dosiik a moktek ra uldesuir tirkel tir a diak el mui el medengei. A kmal lungil tekoi a bilskid a Apostol Jakobus: “A le ngarngii a rrau a rengul ra llomes, e loker ra Dios” (Jakobus 1:5).

Oker ra Dios a okiu uchei ra ungil omesuub, lekid a kired el mesuub ra chedaol llechukl e osiik “aikel kot e lungil babier; … osiik omesuub, lokiu omesubed ma dirrek el klaumerang” (D&C 88:118). Ng kmal betok aikal babier, el luluches a remellomes el mengeteklel a Ikelesia, el lungil, e merang el reksii ra osisechakl ra Ikelesia. Tiaikid a uchul, eng diak a ngidil ngerang el mo ngarbab ra mla mocholt el tekingel a Dios el ngara chedaol llechukl. Aikal meliliut el llel a babier, el mui ra llomes, ade subii a klemerang lokiu Chedaol Reng e mo klou a llomes el dobang.

President Thomas  S. Monson, el millekoi er kid el “mo mesuub e melbedebek ra Babier ra Mormon ra bek el sils” (“The Power of the Book of Mormon,” Liahona, May 2017, 87).

Sesei el rak ra memong, ra kusiou el merredel ra Fiji Suva Mission, a bebil ra misionari a siliseb ra teletael el mle smisichii a klou el klisichel a Babier ra Mormon. Ng mle mekeald e meringel a sils ra teru el elder a mlora chimol kekerei el blai el ngara Labasa.

Te milengod ra chesimer e a chimol sesechebuul chad a mle orrenges ra remisioanri el melekoi el kirel a klemerang ra Babier ra Mormon. Te milsang a babilngel e ulengeit er ngii el mo menguiu e meluluuch el, uai tir, el kmo tiang a tekingel a Dios. A nger ngii a mle kedeb: “A klukuk ak mora chei. Ak mo menguiu er ngii ra kereker, e sel kmei, e kemiu a lmuut el me oldingel.”

Sera le ngara kereker, eng mlorngii a rengodech el misionari, ma sesei el sandei ra uriul, a kuk beches el misionari a mlo oldingel er ngika el chad ra omenged. Tiakid el taem eng mla menguiu er tial rokir el Babier ra Mormon, e mla nguu oterekeklel el kmo ng klemerang, e soal muut el mesuub a betok.

Ngkal chad a mla obult lokiu a Chedaol Reng, el mle sioning ra klemrang ra mekreos el tekoi ra bek el llel a babier ma osisechakl ra ngara mong e medechel el mei er chelechal sils el ngii a Babier er a Mormon. Tial osisiu el klengeltengat a medechel el kired.

A blai a kot el lungil basio el telungalek a mesuub e kauchais a meklou a belkul suobel ra chedaol llechukl, ma tekingir a re profet e dirrek el ngmai a babier ra Ikelsia e lokiu a LDS.org. Ke metik a betok el tekoi el kirel a ebangkelio el uai a Kot el Ues. Sel dosuub a kot el lungil babier, e kede mucheliu ra mekngit el ongetikaik e losiik el melemall a chedaol luchetemed.

A rokui el nglunguched, omesubed, ma dolbedebek, eng locha direke ngarngii a ker el diak ke dengai a nger ngii, ng di ngdiak ke debecherei tiang me lokodir a ngeuil a klaumerang er kid. A ikal ker a ongit el mo meleketek ra klaumerang e diak el bol luchul a rraureng er kid. Ng kmal moktek ra klechelid el diak dengai a mui el nger ra bek el ker, le tiang a tara moktek ra klaumerang. Seikid a uchul e a, Elder Jeffrey R. Holland a mla olisechakl er kid el kmo “sel mei a ikal taem el morngii a kerid, a nger a diak el dil mereched el mei,bo murrekodel a ikel kau a mlamo medengei e bom dechor el mesisiich el morsel mluut el ngmai a dechelel a klemedengei” (“Lord, I Believe,” Liahona, May 2013, 94).

Kede mesa deureng ra rebetok el chad el iliuekl er erkid el mesisiich el dechor e melemolem el melisiich a chedaol luchetemir. A klaumerang ma blekongesenges er tir a ungil el mesterir a urungulir ra Osobelir, e seikid e ngii a dubech a deureng. Ng diak el dul kmo te medengei a rokui el tekoi, eng di te meringel loureor el mo medengei a betok meng sebechir el nguu a budech e mo klou a rengrir sel losiik el muut el mo medengei a betok. De rsesei el suobel, e a klaumerang er tir ra Kristo a mo mesisiich, e tir a dechor lultebechel el teloi ra re Santo.

A dersta er kid bode kiei el kerekikl ma ongetikaik ra melaitul bo lak a basio er ngii er kid, ra chelechang e melemolem, ra klengar er kid me dolemolem el “mesisiich ra klaumerang ra Kristo, el mora ulebongel” (Alma 27:27). El ngara ngklel a Jesus Kristo, amen.