Ia Outou Saili Mai Totonu o Tusi Sili

I le taeao po o se tasi aso, sa ou vaaia ai se katepila fiaai ua faalafi lelei i luga o se pupurosa matagofie i se togalaau e vaaia lelei. Mai se vaaiga o ‘au ua leai ni lau, sa iloagofie e oo lava i se tagata faasamasamanoa, sa ‘ati’ati atu lona ala i nai lau mu’amu’a i ona ‘aulamu faataumaoi. I se tulaga faavaliata, sa ou mafaufau ai e tele katepila ua faalalafi; e maua i le lalolagi atoa ae ua matua popoto lava i le faafoliga ma o nisi taimi tatou te faatagaina ai i latou i a tatou togalaau, ma e aunoa ma so tatou iloa, ua latou ‘atia o tatou a’a faaleagaga ma a tatou rosa aupito mananaia o tagata o o tatou aiga ma uo.

Ua tatou ola i se taimi ua faulai ai faamatalaga sese e uiga i o tatou talitonuga. I taimi faapena, o le le puipuia ma le le faalolotoina o o tatou a’a faaleagaga o se valaaulia lea ia ‘atia e i latou o e saili e faaumatia lo tatou faatuatua ia Keriso ma lo tatou talitonuga i Lana Ekalesia toefuataiina. I le taimi o le Tusi a Mamona, sa saili ai Seseroma e faaumatia le faatuatua o e na talitonu.

O ana taga ma upu o le “o se mailei a le fili, lea ua ia … tatao e pupue ai [le] nuu, ina ia mafai ona ia aumai [i latou] i lalo o lana pule, ina ia mafai ona ia sio faataamilo [i latou] i ana filifili” (Alema 12:6). O loo i ai foi i aso nei na lava mailei, ma sei vagana ua tatou mataala faaleagaga ma fausia se faavae mautu i luga o lo tatou Togiola (tagai Helamana 5:12), tatou te ono maua i tatou lava ua noanoatia i filifili a Satani ma taitai filemu atu ai i tatou i le ala i seoli lea e tautala i ai le Tusi a Mamona (tagai 1 Nifae 8:28).

Na tuuina mai e le Aposetolo o Paulo se lapataiga i ona taimi e faatatau i o tatou aso: “Aua o a’u nei ua ou iloa lenei mea, … ia te outou lava tagata e tautala mai i mea faapiopio, e fetoso ese ai le au soo ia mulimuli ia i latou” (Galuega 20:29--30).

O lana lapataiga ma lapataiga a o tatou perofeta ma aposetolo ua faamanatu mai ai ia te i tatou e tatau ona tatou faia mea uma tatou te mafai e faamalolosia ai i tatou lava faaleagaga mai upu a e tetee ma taufaasese. A o ou asiasi atu i uarota ma siteki o le Ekalesia, e faagaeetia lava a’u i mea ou te vaai i ai, faalogo, ma lagonaina pe a tali mai ma le naunautai ma le faamaoni le Au Paia i aoaoga a le Faaola ma Ana auauna.

O le faateleina o le tausiga o le aso Sapati o se tasi lea o faataitaiga o tagata o le au paia ua faamalolosia faaleagaga i latou lava e ala i le ua’i atu i valaaulia faaperofeta.O le faamalolosia atili ua iloagofie i le faateleina o galuega i le malumalu ma talafaasolopito o aiga a o faatasia e aiga o latou augatuaa e ala i sauniga o le malumalu. E atili malolosi o tatou faavae faaleagaga pe a avea tatalo faamaoni faaletagata lava ia ma faaleaiga ma lagolago o lo tatou faatuatua, pe a tatou salamo i aso taitasi, sailia le mafutaga ma le Agaga Paia, ma aoao e uiga i lo tatou Faaola ma Ona uiga auaumama ma taumafai ia avea faapei o Ia (tagai 3 Nifae 27:27).

O lo tatou Faaola o Iesu Keriso, o le Malamalama o le Lalolagi, ma o loo talo mai o Ia tatou te mulimuli atu ia te Ia. E tatau lava ona tatou vaavaai atu ia te Ia i taimi uma aemaise pe a i ai po pogisa ma le matagia pe a tolotolo mai i totonu pei se puaoa sosolo, matagi malolosi o le masalosalo ma le le mautonu. Pe a oo ina tusitusilima mai “le isi itu o le vaitafe, [i le mea] o i ai se fale tele ma le ateatea [o tu ai]” (1 Nifae 8:26) ma foliga mai o loo tata’i atu oe i le uiga o le faatauemu, ta’ufaatauvaaina, ma talotalo mai, ou te talosaga atu ia vave ona e faliu ese ina ia le faatauanauina oe i auala taufaasese ma faatogafiti e aveesea ai oe lava mai le upumoni ma ona faamanuiaga.

E ui o le vave ona faliu ese o le a fesoasoani, ae o le a le lava lena mea i nei ona po aua o loo tautalagia, tusitusia, ma faalialia mea mataga. Na aoao mai i tatou e Elder Robert D. Hales, “Vagana ua tatou punouai atoatoa e ola i le talalelei---ola ai ma lou ‘loto atoa, manatu, mafaufau ma le malosi atoa’---e le mafai ona e fatuina se malamalama faaleagaga e lava e tetee atu ai le pogisa” (“Out of Darkness into His Marvelous Light,” Liahona, July 2002, 78). O le mea moni, o lo tatou naunau e mulimuli ia Keriso, o le malamalama o le lalolagi (tagai Ioane 8:12), o lona uiga e tatau ona tatou faatinoina Ana aoaoga. E faamalolosia i tatou faaleagaga, mautu, ma puipuia pe a tatou galulue i le afioga a le Atua.

O le tele o le malamalama i o tatou olaga, o le itiiti foi lea o atalafoia. Peitai, e tusa lava foi pe tele le malamalama e siomia ai i tatou ae tatou te aliali atu lava i tagata ma faamatalaga e ta’useseina o tatou talitonuga ma tofotofo ai lo tatou faatuatua. Na tusia e le Aposetolo o Iakopo e faapea “o le tofotofoina o lo outou faatuatua e tupu ai le onosai” (Iakopo 1:3). Faatasi ai ma lea malamalamaaga, na aoao mai ai Elder Neal A. Maxwell e faapea “o se soo onosai … o le a le te’i lava pe faataumaoia pe a ta’useseina le Ekalesia” (“Patience" [Brigham Young University devotional, Nov. 27, 1979], speeches.byu.edu).

O le a i ai fesili e uiga i le talafaasolopito o le Ekalesia ma talitonuga o le a tulai mai. O le mea tatou te liliu e sue ai tali sa’o e moomia ai se faaeteetega tele.E leai se mea e maua mai i le sailia o manatu ma lagona o e le lava se iloa po o e foi ua leai se talitonuga i le lotu. O le fautuaga sili lava na tuu mai e le Aposetolo o Iakopo: “Afai ua leai se poto i so outou, ina ole atu ia i le Atua” (Iakopo 1:5).

O le ole atu i le Atua e tatau ona taimua le suesue ma le faaeteete, aua ua tatou i ai i lalo o se poloaiga e saili “mai totonu o tusi sili ona lelei upu o le poto; … saili i le aoaoina, e ala lava lea i le suesue ma le faatuatua foi” (MF&F 88:118). E tumu nei tusi i le tamaoaiga, na tusia e taitai o le Ekalesia e musuia mai le lagi ma ua aloaiaina, e saogalemu, ma o sikola faatuatuaina o le talafaasolopito o le Ekalesia ma aoaoga faavae. I le fai atu ai o na mea, e leai lava se tusi o na tusi e taea le malualii o le afioga faaalia a le Atua i tusi paia ua faamaonia aloaia. Mai nei itulau manifinifi ua mafiafia i faatofala’iga faaleagaga, ua tatou aoao mai ai upumoni e ala i le Agaga Paia ma faateleina ai le malamalama.

Sa talosagaina e Peresitene Thomas S. Monson, ia “tatou e suesue ma le agaga tatalo ma mafaufau loloto i le Tusi a Mamona i aso taitasi” (“O Le Mana o le Tusi a Mamona,” Liahona, Me 2017, 87).

E tele ni tausaga ua mavae, a o avea o se peresitene o le Misiona a Fiti i Suva, sa i ai se aafiaga o ni faifeautalai na toe faamalosia i latou e le mana liua o le Tusi a Mamona.I se aso vevela ma susu le tau, sa taunuu atu ai ni faifeautalai se toalua i se aiga i le nuu laitiiti i Labasa.

Sa tali mai le tu’itu’i i le faitotoa e se toeaina sa faalogologo a o molimau atu faifeautalai i le moni o le Tusi a Mamona. Na la tuu atu ia te ia se kopi ma valaaulia e faitau ma tatalo ia ona iloa, e faapei o i la’ua, o le afioga ia a le Atua. E puupuu lava lana tali. “O taeao ou te toe foi ai e fagota. O le a ou faitauina a o ou i ai i le sami, ma a ou foi mai, e mafai ona oulua toe asia a’u.”

A o alu o ia, sa faia siitaga, ma i ni nai vaiaso mulimuli ane, sa toe foi atu se soa fou o faifeautalai e asiasi i le faifaiva. O le taimi lea ua ia faitauina atoa le Tusi a Mamona, sa ia maua se faamaoniga o lona moni, ma sa manao o ia ia iloa atili.

Na faaliliuina lenei alii e le Agaga Paia, o le sa molimauina le moni o upu taua i itulau uma o mea na tutupu ma aoaoga faavae ua loa ona aoaoina ma faasaoina mo o tatou aso i le Tusi a Mamona.O faamanuiaga lava ia e tasi o loo avanoa mo i tatou taitoatasi.

O le fale o se nofoaga lelei tele lea mo aiga e suesue ai ma fefaasoaai malamalamaaga taua mai tusitusiga paia, o upu a perofeta soifua ma maua ai anomea o le Ekalesia i le LDS.org. O iina o le a e maua ai se anoanoai o faamatalaga e uiga i autu o le talalelei e pei o tala o le Uluai Faaaliga.A o tatou suesue mai tusi sili ona lelei, tatou te puipuia i tatou lava mai ‘aulamu faataumaoi o loo saili e ‘ati’ati o tatou faavae faaleagaga.

E ui i a tatou tatalo uma, suesuega, ma le manatunatu loloto, atonu e i ai lava ni nai fesili e lei taliina, ae e le tatau lava ona avea lena mea ma mea e faaumatia ai le afimumu o le faatuatua lea e mumu i totonu o i tatou. O na fesili o se valaaulia e atiina ae lo tatou faatuatua ma e le tatau ona tuu i ai se faamuamua a o i ai ni o tatou masalosaloga. O le ute lea o le talitonuga faalelotu ia aua nei i ai se tali mautu i fesili uma, aua o le tasi lea o faamoemoega o le faatuatua. I lena manatu, na aoao mai Elder Jeffrey R. Holland e faapea “a alia’e mai na taimi ma oo mai faafitauli, ma a le vave ona maua se vaifofo, ia taofi mau i mea ua uma ona outou iloa ma tutu malolosi seia oo mai se isi malamalama” (“Le Alii e, ua Ou Faatuatua,” Liahona, Meay 2013.

Ua tatou vaaia i lo tatou siomaga le olioli o le anoanoai o e ua tutu malolosi e ala i le faafaileleina pea lava pea o o latou faavae faaleagaga. Ua lava ma totoe lo latou faatuatua ma le usiusitai latou te maua ai le faamoemoe sili i lo latou Faaola, ma ua pogai mai iina le fiafiaga sili. Latou te le faapea mai ua latou iloa mea uma, ae ua latou totogiina le tau ia lava ai mea latou te iloa ia maua ai le filemu ma ola ai ma le onosai a o latou saili ia iloa atili. O lea fuaiupu ma lea fuaiupu, ua faamausali ai lo latou faatuatua ia Keriso, ma ua latou tutu malosi atu ai o ni tagatanuu faatasi ma le Au Paia.

Ia tatou ola ina ia le maua se avanoa i le taimi nei po o se isi lava taimi, o aulamu faataumaoi o katepila ua faalalafi, i o tatou togalaau matagofie o loo vaavaaia lelei ina ia mafai ona tatou tutumau “mausali i le faatuatua ia Keriso, e oo i le iuga” (Alema 27:27). I le suafa o Iesu Keriso, amene.