Keremerm er a Chedaol tekoi
Lak kobechei olibesongel er a klechad mel tengetengii a llomes er a babeluades.
Sera August 21 er chelechal rak, eng eru el tekoi a dilubech el ulechau osengir a rechad er a beluulechad el rokir. A kot a sel oketiu el tanjiobi er a betik er a rengud el profet, el President Thomas S. Monson. Seikid el taem, e ng mla er ngi a urerek el mo er a Pacific Area e mlo mechas a renguk er a Resanto er a Australia, Vanuatu, New Zealand, me a French Polynesia el dimlak di lodengelii tial tokubets el sils er ngii, te dirrek el mla er a deureng el kirel. Ak ngeltengat el mlo sebechek el teloi er tir e oldeu el kirel a klaumerang me a beltik el reng er tir el mo er ngika el chetengakl chad. Ng klou lomekellomes el teletael el desa sel beltik el reng er a Ruriul-klebesei el Santo el mo er a profet.
Uaisei, el President Monson, a medengei el kmo te betok a sorir loureng e ra ungil tanjiobi el mo er ngii, meng ulechotii a kmal soal beresent er a tanjiobi: “Msikii a kmo ng techang el ngara chelsel a ringel malechub eng sabisi em rellii a kmo ngerang el kirel. Tiaikid a kulengit er ngii.”1 Ng betik a rengmam e melkakl er kau, e President Monson.
Keremerm
A tara dersta el duubech el teletael er a eanged el dilubech er a osisu el sils el ngiluu osengel a beluulechad el rokir a sera lobart a sils. Tiaikid a ketengel taem el lobart a sils er a Beluu er a Merikel rokir er a chelsel a oketiu me a kltiu el rak.2Ngar ngii a tal omesa bertel a sils? Msall ek telkib el smodii a teletelel.
A bertel a sils el rokir a duubech sel sekum a buil a mo er a delongelel a beluulechad me a sils, el tongetengii a dichel a sils el rokir.3Tiang a mechas a renguk er ngii. Omko komdasou er a sils el uaia klungel a taiia er a rrat ea domekesiu er a buil, eng di ua klungel, a kekerei el bad.
Meng mekera sebechel tia lomeskid a kleald, llomes ma klengar el sebechel diobart er a kmong ngerang el dongaisisiu el mo er ngii eng kmal kekerei?
Ng uaisei el sils a eua el dart el taem a klungel er a buil, ng dirrek el eua el dart el taem a cherridel er a beluulechad.4A dengara beluulechad e domes er ngii, e a klungel a sils me a buil a uaia di losisiu. E a ika lerung sel bol tal blechobech, ea buil a tongetengii a sils el rokir. A resechelik ma telungalek er ngak el mlara basio el obart a sils ervngii a uluchais er a teletelel a llomes er a bol dekedekii a ilkolk, a bduch a mle duum ea charm a mlo diak longitakl. A cheltel a eolt a mlo mekelekolt er a lobart a sils el mlo sebechel merou er 20 degrees Fahrenheit (11 degrees Celsius).5
Te milsaod el ual, mengas a rengud, e osebek a renguk, el medengei a lobart a sils eng ngarngii a ltemelii. Ng kired el mo kerekikl leng sebechel tomall osenged malechub e ke de mo “mikou” er a taem sel lobart. Tia sebechel mekedmokl sel dousbech a tokubets el klas el ruul lomecheliu a medad meng diak el metemall.
Okesiu
Osisiu el tekoi er a kmal kekerei el buil el sebechel tongetengii a dichel a kederir a sils, el mekodir a llomes me a kleldelel, e ng dirrek el sebechel lobart a chedaol klengar kid sel sekum e kede mechei a mekekerei el tekoi malechub a mondai— el kmal me kmeed meng— tongetengii a klungel, dichel, me a kleldelel a llomes er a Jesus Kristo me a klemerang er a klebokel el ebangkelio er Ngii.
A Elder Neal A. Maxwell a liluut el smodii tiang el dilu el kmo: “Ng dirrek el di kekerei el ngerang el uaia bechos er a chim, ea omnguu el mo kmeed er a medam, eng tongetengii osengem er a klou el sils. Ng di sils a dirk ngarisei le ngarngii. Kid a di kid el tongetengii osenged. Sel kuk desal mo meriked el kirel aikel diak el sal meklou a belkul tekoi, el uaia dengai el mo ruchei, eng mo mechitechut osenged el kirel a babeluades.”6
Ng bleketakl, el diak a ta er kid el meral ngarngii er a rengul el melenget er a osengel er a babeluades malechub e debecherei mel metenget a chedaol tekoi er a klengar er kid. Msall e domes a bebil er a teletael el ngosukid meng diak el metenget osenged er a chedaol tekoi el sebechel uchul a telemellel chedaol klengar kid.
Klas er a kid er a Ebangkelio: Osengem Lolemolem el ngara Ebangkelio
Kom dobedebkii a tekingek el kirel a tokubets el klas el dousbech sel domes a lobart a sils meng diak el metemall osenged malechub e bo de mikou? Sel domes a bertel osenged er a chedaol tekoi lousbech a ucheliu me a medemdemk el tekoi er a Reng a meskid a mui el osenged er a ebangkelio, e omecheliu er kid meng diak bo demikou er a chedaol tekoi.
Msall e domes a bebil er a okesiu. Tekingir a reprofet el ngara rengud me a Chedaol Reng el lomekrael er kid, eng sebeched lomes er a mla telkib el metenget er a iilkolk el llomes lokiu a “klas er kid er a ebangkelio,” el kmo a llomes a mla mertii a iilkolk.
Me ng mekera dousbech aikal klas er kid? Aikakid a bebil er a okesiu: A klass er a ebangkelio ouchais el kmo a Rubak a kmal soal a dolai er a sacrament er a bek el sandei, e dosuub chedaol llechukl e doluluuch er a bek el sils. Te ouchais er kid el kmo a Diablong a mo mengetikaik er kid meng diak doruul. Kede medengei el kmo a moktek er ngii a melai er a mimokl lomelilt er kid lousbech olibesongel me a ongetikaik er a beluulechad. Ngii mesera sils er a Job, eng mla er ngii ilkolk ra chedaol tekoi, el silodii el kmo: “Te mle soiseb er a iilkolk, meng mellomes a sils e tir a mengirbereb el di ua le klebesei.”7
Rodam ma rodos, sera kusaod el domes lolab a klas ra ebangkelio, ngak a diak dung diak lak domes e dosaod a omelasem el dechebangel malechub e lak domekerreu el kirel a ikal bedikl ma mekngit el cheraro a mla locha er medad. Ng diak du kede llechotel a medad—ng bai blitokl. Ak melekoi el kmo bai domes er a omelasem lokiu a osengel a ebangkelio. A Elder Dallin H. Oaks a millekoi el kmo “omes a duch el sebeched el mes a dolab el tekoi el dmak lungil a belkul.”8 A ues lokiu ebangeklio a rulii osenged el dmolech el mesa diak a ulebengelel.
Sel mousbech a klas er a kau er a ebangkelio, eng mo dmolech, e ungil, osengem er a tekoi el momdasou e ng meklou a belkul, mondai er kau, ongetikaik el me er kau, me a dirrek el telitur re kau. Ke mo mesa llomes el ngii a diak mesa omko ng diak mousbech.
Ngodech el tekoi, le ngdiak di le mekngit el teletael a uchul eng metenget osenged er a chedaol tekoi. Ng blechoel, ikel de semeriar ngii malechub e ngungil tekoi el soad el meruul meng blak a rengud el mo mechesang el kirel a sebechel tongetengii a llomes er a ebangkelio. Aikal kengaol teletael malechub eng olibesongel a sebechel uldimukl er ngii a tekoi er a skuul me a ungil besul, klisiich, soad el merul, me a duch er kid.
A President Dieter F. Uchtdorf a ulisechakl el kmo “ngii di lungil tekoi alsekum e kenguu el mo ngaruchei er a rokui eng sebechel mo uchul a klengit. … Ngarngii a taem e a klungiaol dosiik a mo kerior me a kmal soad el meruul tekoi a mo olibesongel.”9
Msall e ksaod el mo bleketakl a bebil er a okesiu el sebechel luchul eng metenget osenged er a chedaol tekoi.
Social Media
Sesei el buil er a memong e ak milngedecheduch er a Ongdibel ra Redil er a BYU.10 Ak milsaod el kirel a technology, luldimukl a social media, el sebeched lousbech “lomerk el kirel Osobel … er a bek el beluu, kebliil, omelekoi, me a rechad.”11 Aikal dongu a uldimukl er ngii a websites er a Ikelesia el rua LDS.org me a Mormon.org; Gospel Library, Mormon Channel, LDS Tools, me a Family Tree; me a social media platform el re ua Facebook, Istagram, Twitter, me a Pinterest. A ikaikid el donguu a mla mo uchul a million el kakerous el teletael er a cheldecheduch er a delongelir a rechad lokiu a social media e kmal mo ungil donguu el kirel omerk er a ebangkelio lobengterir a retelungalek, resechelei, me a dekaodengei.
Ng diak el iior er a rokui el klungiolel me a ungil teletelel a usbechellel aika el donguu, le ng di ngarngii a telmellel, alsekum e kede kuk kmal mo imis, eng sebechel tongetengid er a chedaol tekoi e sebechel tongetengii a dichel me a kleldelel ebangkelio.
A usbechellel a social media, mobile apps, me a games a sebechel nguu a kmal klou el temed e osengesii a techall el de kaseues. Sel bolak dekaseues eng sebechel tomall a chelbechiil, me a meklou a belkul chedaol tekoi el doruul, e mometitur el teloi er a seked, oumesingd a rengeasek.
Eru er a tekoi el tomellid er a chedaol tekoi. Ngarngii a ngodech losenged er sel ngii a klemerang me a omengaisisu.
Betok (a lak el ngii el rokui) er a ikal siasing a lecha er a social media a melekoi el kirel a ungil klengar—loumesind el diak el merang. Kede mla mes a klebokel el siasing er a ungil a besichel blai, me a ungil basio er a omilil, reklikmechur el chad el ngara siasing, me a ungil kedmeklel a kall, me a meringel er kid el mo ungaingii el teletelel a bedenged.
Tiakid, a locha, siasing er a chad el mesang er a social media. E ng di, tia diak lochotii sel cherrungel el siasing er a ikel meral duubech er a klengar ngika el chad.
Sel domekesiu a klengar kid el mo er a rebebil er a rechad el ungil, e cherrungel a klengar tir el ngara social media, e a bebil er a taem e kede omelchesiu el mekngit a rengud, mechechei, e ua bo lak el sebeched.
A tal chad el kmal betok el siasing er ngii a bla locholt er a media e millekoi el kmo, ng locha di oungellakel, “Ngera belkul a om ngara deureng alsekum eng diak mochotii er a media?”12
El uaikel le dilung a Sister Bonnie L. Oscarson er chelechal tutau, el uase a ungil klechad a diak el mei lokiu a rebetok el chad el sorir kau malechub el iidisir a resechelim er a social media malechub a rechad loltirakl er kid. Ng di, bai ngarngii, a rellii el kirel a ungil deleuill er kid lobengterri a rebebil e dochel a llomes er a klengar tir.
Altang, locha sebeched el mo meduch lolecholt er sel meral kid, e mes a betok el docherechur el kirel, e diak desal mo merat a rengud sel de ues a siasing lolecholt a ungil klengar le tiakid a dirrek el ngoikid el mo omekesiu er kid ra rebebil.
Omengaisisiu a diak di lolangch er kid er chelechal taem. A Apostol Paulus a ulemeklatk er a rechad er sel temel el kmo “te di tir el mengaisisiu er tir, e a dil tir el mengaisisiu er tir, a diak el ungil teletael.”13
Me a kmal betok lungil rolel a usbechellel a technology, mei me dousbech el olisechakl, omekellomes, e mengelechel er a rebebil el kmal mo ungil—e lak dousbech el lolecholt a olekong klemerang el kired. Mei e druul aikel rokui el sebeched el olisechakl e ochotii a llemalt el usbechellel a technology el mo er a merael mei el telcheroll e omeklatk er tir el kirel a kngtil me a telmellel. Sel dousbech a social media loltirakl er a ebangkelio, eng sebeched el torbengii meng diak bol tengetengii a chedaol klengar kid.
Kldidai el reng
Chelecha e kusaod el kirel sel cheuodel el melibas er kid el kldidai el reng. A kldidai el reng a ngodech er a ngariou el reng el ngii a “blak el reng el mo oltirakl er a soal a Rubak.”14 Sel kedidai a rengud, e kede di kid el chemat er kid e diak dechat er a rebebil, luldimukl er a Rubak. A kldidai el reng a blechoel soal mengaisichai; ng blekerdeled el soad el olab a betok e omdasou el oleko kede kuk ungil er a rebebil. A kldidai el reng a blechoel lochotii a ngasechereng malechub e kede ouketui er a rechad; e rullii a chad meng mengemekl e diak el soal meluluuch. A kldidai el reng, a mutechei lokiu, a blekerdelel a Kristo er a ngariou el reng.
A deleuill, er a rebetik er a rengud me a rechedal a telungalek, oumesingd a re kmeed el chedal a telungalek me a rebetik er a rengud—a deleuill er a sechal me a redil kaubuch—a kirel delalm er a ngariou el reng e diak a kldidai el reng er a chelsel.
Betok el rak ra memong e a merredel er a klou el kombalii a ulekerak el mo mesaod el kirel a kombalii er ngii el mla mochar er a tara meduch el chad. Ngii me a rebebil er a rengarbab el chad er tial kombalii a mle suebek a rengir a le bolak a urerir. Ng mle medengei el uase ngak a ungil medengelii ngika el ngarbab el chad lomechar tial kombalii, e ullengit me bo kungedecheduch er ngii e ko er a dmu ungil tekoi el kirel, e kedmeklii a temel a miting lobengkel. Ng rirekir a tekingel el dillii tiakid el tekoi: “Ke medengei el kmo te kmo ngerang? ‘A remedemdemk a mo nguemed!’”
Ak mlo medengelii a belkul a tekingel el ko er a uaia le ngellekelel. Ak mlo medengelii a belkul. Ng di ng mlarngii a klou a belkul suobel el kulemelchesiu el klou a belkul el mo er ngii. “Ak dula el kmo, “A mera er ngii, tilecha diak el ngii a belkul. A mera er ngii, ng kuk bai blitokl. ‘A remedemdemk … a mo kiei er a beluulechad’15seikid a belkul.”
Aikel kuk blak ues er a chelsel a Ikelesia me a urerek, e a rebebil er tirkel mera el ngarbab, e kot el ungil chad a tirkel medemdemk e ngariou a rengrir el chad.
A ngariou el reng me a delemdemk el reng a kmal osisiu el tekoi. Ng kired el mo medengei el kmo ng diak a mo soiseb er a rengedel a Dios, ng di tirkel medemdemk e ngariou a rengrir.”16
Nglunguchek me dolasm el mengeroid er kid er a ikel melenget chedaol tekoi el kldidai el reng e bo durrekodel er a kldung me a ngariou el reng.
Ulebongel
A ulebongel, e a tengetengel a dichel a sils, a meral, klebokel el teletael er a beluulechad el klebekelel, kleldelel, me a dichel a sils a sebechel metenget el rokir er a kmal di kekerei el klalou, el uchul a iilkolk me a kelekolt.
Osisu el tekoi a sebechel desang er a chedaol tekoi, el kekerei e diak a kmal ultutelel klalou a sebechel me kmeed e tongetengii a klebekekel, kleldelel, me a dichel babeluades el ngara chelsel ebangkelio er a Jesus Kristo, el metechir er a mekelekolt el iilkolk.
A klas er a mad a ruul lomecheliu osenged er a basio el telenget a llomes er ngii meng diak el metemall.17 A klas er a Ebangkelio luldimukl er a klemedengei me a klaumerang er a osisechakl er a ebangkelio me a chedaol ruoll a meskid osenged el kirel ebangkelio el sebechel lomecheliu er a chad er a tengetengel chedaol tekoi.
Alsekum me kemetik er a kmong ngerang el ua lolenget er a deureng ma llomes er a ebangkelio er a kngengar er kau, e ak kulengit er kau me bom momes lokiu osengel ebangkelio. E lak becherei a diak a ultutelel el tekoi mel tengetengii osengem er a ngarab el uldasu el kirel a deureng. Ng belkul a kmo, la ko bechei olibesongel er a klechad mel tengetengii a llomes er a babeluades el kirem.
Klaumerang
Ak sioning el kmo ng diak el iior er a iilkolk el melenget osenged er a llomes er a ebangkelio, le llomes a di ngarngii. Sel uchul ongeald, klemerang, me a llomes a ebangkelio er a Jesus Kristo. Ak sioning el kirel a oubeltik el reng el Chedam er a Babeluades; me a Ngelekel Sechal, er a Jesus Kristo, me a Ngerchelel el Osobeled e Olsobel er kid. El ngara ngklel a Jesus Kristo, amen.