’Ia ’ī roa ho’i tō ’oe na ’oa’oa
’O Iesu Mesia te tumu o te mau fa’aorara’a ato’a, o te hau ’e o te haerera’a mure ’ore i mua.
Te mau taea’e ’e te mau tuahine, e ’oa’oa iti rahi te putuputura’a ’e ’outou. ’E teie ho’i tā’u e hina’aro e paraparau atu ia ’outou i teie po’ipo’—te roa’ara’a te ’īra’a o te ’oa’oa.
’Ua pia te hō’ē ve’a i ma’iri a’enei : « ’Ua fa’a’āueue te mau ti’arepura’a i te fenua ’e i te ao nei ».1 Mai te vero rahi ’e te pape pu’e i te ve’ave’a ’e te pa’urā, mai te auahi tānina ’e te ’āueuera’a fenua i te mau tama’i ’e te mau ma’i ha’apohe, e au ē, tē « ’ārepurepu roa [ra] te ao pā’āto’a nei ».2
’Ua mirioni te ta’ata ’o tei fa’aāteahia iō rātou ra, e’ita ato’a e roa’a ’ia tai’o i tei ’oto i roto i teie mau tāmatara’a. Te pe’ape’a i roto i te mau ’utuāfare ’e i roto i te mau pupu ta’ata ’e tae noa atu te mau ’arora’a i roto ia rātou iho mai te mata’u, te fē’a’a ’e te mau tīa’ira’a manuia ’ore, efa’atupu ato’a te reira i te hepohepo. Penei a’e e mea pa’ari ’ia feruri i te ’oa’oa ’o tā Lehi i ha’api’i ’ei fā nō te orara’a.3 ’Ua ui a’ena tātou i te hō’ē taime : « I hea vau e fāri’i ai i te hau ? Tei hea te tauturura’a ? »4 E uiui tātou : « Nāhea te ’oa’oa e roa’a ai iā’u noa atu te mau fifi o te orara’a tāhuti nei ? »
E au ē e mea ’ōhie roa te pāhonora’a, tera rā ’ua ’itehia te parau mau o te reira i te tau o Adamu. E ’itehia te ’oa’oa tāmau ’ia riro ana’e tō tātou Fa’aora ’o Iesu Mesia ’ei ha’apūra’a ’e ’ia orahia te ’evanelia mai tei ha’api’ihia e ana. Rahi noa atu ā tō tātou ’ite, tō tātou fa’aro’o ’e tō tātou pe’era’a ia Iesu-Mesia, rahi noa ato’a atu tō tātou māramaramara’a ē, ’o ’oia te tumu o te mau fa’aorara’a ato’a, o te hau ’e o te haerera’a mure ’ore i mua. Tē tītau nei ’oia ia tātou tāta’itahi ’ia haere iāna rā,5 e tītaura’a tā te peresideni Henry B. Eyring i parau ē, « te hō’ē tītaura’a faufa’a roa a’e ’o tā te ta’ata e ti’a ’ia fāri’i ».6
Roa’a te ’ite ia Iesu Mesia ra
Nāhea tātou e haere iāna ra ? I ’ēperēra i ma’iri a’enei, ’ua tūra’ihia tātou e te peresideni Russell M. Nelson rāua ’o M. Russell Ballar ’ia tuatāpapa i « Te Mesia Ora »7 ’ei tuha’a ha’api’ira’a nō ni’a i te Fa’aora. E rave rahi ’o tei fāri’i i teie tītaura’a ’e ’o tei ha’amaita’ihia. ’Aita i maoro a’enei, ’uahōro’a te hō’ē hoa iti i tāna mau tamari’i pa’ari i te nene’ira’a o te reira ma te hōho’a ’evanelia nō te fa’ahōho’a i te pereota tāta’itahi. ’Ua tūra’i ’oia i tāna mau tamari’i ’ia tauturu i tāna mau mo’otua ’ia hāro’aro’a ’e ’ia tāmau ’ā’au i te reira. Tau taime i muri mai, ’ua fa’a’ite mai tō’u hoa i te hōho’a tāviri o tāna mo’otua ono matahiti, ’o Laynie, tei fa’ahiti i tāna i tāmau ’ā’au ma te ’ana’anatae ’e te hau. ’Ua feruri a’era vau, mai te peu ē ’ua roa’a i te hō’ē tamari’i ono matahiti ’ia nā reira, ’o vau ato’a ïa !
’A tuatāpapa ai au i te orara’a ’e te mau ha’api’ira’a a Iesu Mesia ma te pāpū a’e ’e ’a pūpū ai au iā’u i te tāmau-’ā’au-ra’a i « Te Mesia Ora », ’ua pūai roa atu tō’u ’ā’au mēhara ’e tō’u here i tō tātou Fa’aora. Tei roto i te pereota tāta’itahi o taua parau fa’auru ra te hō’ē a’ora’a ’e ’ua ha’amaitai ho’i i tō’u māramaramara’a i tōna mau ti’ara’a hanahana ’e tāna misiōni i te tāhuti nei. Te mea ’o tā’u i ha’api’i ’e i ’ite i roto i tō’u ’ā’au i taua taime tuatāpapara’a ra, ’ua ha’apāpū ïa ē, ’o Iesu Mesia « te māramarama [mau], te ora [mau] ’e te ti’aturira’a [mau] o te ao nei ».8 Tē fa’a’ite nei te mau parau ’āruera’a iāna, a te mau peropheta tahito ’e a te mau peropheta i te mau mahana hope’a nei, tei pāpa’ihia ’e tei parauhia : « Tōna ’ē’a e arata’i nei i te ’oa’oa i roto i teie orara’a ’e te orara’a mure ’ore rā i roto ïa i te ao a muri a’e ».9
Fa’aro’o ia Iesu Mesia
’A tuatāpapa ai ’outou i te orara’a ’e i te ha’api’ira’a a te Mesia nā roto i te mau rāve’a rau ato’a ’e pūai atu ïa tō ’outou fa’aro’o iana. E ’ite ’outou ē, ’ua here ’oia ia ’outou tāta’itahi ’e tē hāro’aro’a pāpū ato’a nei ia ’outou. I roto i tōna orara’a 33 matahiti i te tāhuti nei, ’ua pāto’ihia ’oia, ’ua hāmani-’ino-hia, ’ua fa’aruru i te porori ’e te po’ihā, te rohirohi,10 te vai ’ōna ana’e iho, te parau ’ino, te taparahi ’e i te pae hope’a ra, te hō’ē pohe ri’ari’a roa i te rima o te feiā hara.11 I roto i te ’ō i Getesemane ’e i ni’a i te sātauro i Kalavari, ’ua fa’a’oroma’i ’oia i te tā’āto’ara’a o tō tātou māuiui, te mau ’ati, te mau fa’ahemara’a, te mau ma’i ’e te mau humara’a.12
Noa atu te huru o te mau mea i ’otohia tātou, ’o ’oia te tumu o te fa’aorara’a. Te feiā ’o tei fa’aruru i te mau hāmani-’ino-ra’a, te mau pau rahi, te ma’i tauunu ’aore rā te mau māuiui o te humara’a, te mau parira’a ha’avare, te mau ha’avīra’a faufau ’aore rā te pau pae varua nā roto i te hara ’aore rā te ’ite ’ore, e fa’a’āfaro-pauroa-hia ïa e te Fa’aora o te ao nei. Tera rā, e’ita ’oia e tomo ’aita ana’e e tītaura’a manihini. E ti’a ia tātou ’ia haere iāna ra ’e e fa’ati’a tātou iāna ’ia fa’atupu i tāna mau temeio.
I te hō’ē mahana maita’i nō te tau tupura’a rā’au, ’ua vaiiho vau i te ’ōpani fare ’ia matara noa nō te mata’i haumarū. Marere mai nei te hō’ē manu iti nā te ’ōpani ē ’ite a’era ē, e ’ere te reira te vāhi i hina’arohia e ana. Rere huanane noa atu ra i roto i te piha ma te tito tāmau i ni’a i te hi’o māramarama ’ia matara a’e ’oia. ’Ua tāmata vau i te arata’i marū iāna i rāpae nō tōna rā ri’ari’a, ’ua rere ’ōna i te ātea ’ē. I muri iho, ’ua rere ’oia i ni’a a’e i te pāruru o te māramarama nō te rohirohi i te ’ohu-noa-ra’a. ’Ua rave au i te upo’o porōmu ’e ’ua fa’anu’u marū noa ē tae roa atu i te vāhi i reira te manu hitahita e ’āpa’e ra. ’A toro noa ai au i te upo’o porōmu i pīha’i iho i tōna ’āvae, ’ua tāmata te manu e tīpae mai i roto i te veuveu. Haere marū roa a’era vau i te pae ’ōpani ma te tāpe’a pāpū i te porōmu. Te tāpaera’a iho ā vau i te ’ūputa matara, vitiviti roa atura te manu i te marerera’a i tōna ti’amāra’a.
Mai tāua manu ra, e ri’ari’a ato’a tātou ’ia ti’aturi nō te mea ’aita tātou e hāro’aro’a ra i te here mau o te Atua ’e tōna hia’ai ’ia tauturu ia tātou. ’Ia tuatāpapa ana’e tātou i te fa’anahora’a a tō tātou Metua i te Ao ra ’e i te misiōni a Iesu Mesia, i reira tātou e ’ite ai ē, tā rāua fā hō’ē roa ’o tō tātou ïa ’oa’oa ’e tō tātou haerera’a i mua mure ’ore.13 E au rāua i te tauturu mai ia tātou mai te mea e ani tātou, e ’imi ’e e pātōtō ho’i.14 ’Ia fa’a’ite tātou i te fa’aro’o ’e ’ia mahora tātou ma te ha’eha’a i tā rāua pāhonora’a, e riro mai tātou ’ei ta’ata ti’amā i te mau tā’ōti’ara’a o tō tātou māramarama ’ore ’e o tō tātou mau mana’o hape, ’e e roa’a ’ia fa’a’itehia mai te ’ē’a.
’O Iesu Mesia ato’a te tumu o te hau. E tītau manihini ’oia ia tātou ’ia « tūru’i i ni’a i [tōna] rima ’ā’ano »15 ’e ’ua fafau mai i te « hau… ’o tei hau ’ē atu i te ’ite ta’ata nei »,16 e mana’o e tae mai ’ia parau mai tōna Vārua « i te hau i tō… [tātou] ’ā’au »17 noa atu te huru tāmatara’a e hā’ati nei ia tātou. E tāfifira’a ānei o te ta’ata iho, e fifi ’utuāfare ānei ’aore rā e ’ārepurepura’a huira’atira ānei, e tae mai te hau ’ia vai tō tātou ti’aturi ē, e mana tō te Tamaiti fānau tahi a te Atua nō te tāmarū i tō tātou vārua māuiui.
’O Snježana Podvinski te hō’ē tuahine nō te hō’ē pupu iti feiā mo’a i Karlovac (Koroatia),’o tei tūru’i i ni’a i te Fa’aora i te pohera’a tāna tāne ’e tōna nā metua i roto i te hō’ē ārea ono ’āva’e i te matahiti i ma’iri a’enei. Noa atu tōna māuiui rahi, ’ua ’ite pāpū ’oia ē, e mea mure ’ore te ’utuāfare, i fa’a’ohipa ai ’oia i tāna moni ha’aputu nō te reva i te hiero i reira ’oia i ta’atihia ai i tāna tāne ’e i tōna nā metua. ’Ua fa’a’ite ’oia ē, ’ua riro tāua mau mahana ra i roto i te hiero ’ei taime faufa’a roa nōna i roto i tōna orara’a. Maoti tōna ’itera’a pāpū nō ni’a ia Iesu Mesia ’e tāna tūsia tāra’ehara, ’ua ’ite ’ōna i roto i tōna ’ā’au i te hau ’e te fa’aorara’a ’o tei riro ato’a ’ei ha’apūaira’a i te feiā ’ati a’e iāna.
’Ua rahi atu ā te ’ō e roa’a mai nā roto i te fa’aro’o ia Iesu Mesia, i te fa’aorara’a noa ’e te hau. Mai tā te peresideni Henry B. Eyring i fa’a’ite : « ’Ua māuruuru roa vau nō te mau rāve’a rau a te Fatu i te fāra’a mai iā’u nā roto i te Fa’aa’o i tō’u hina’arora’a i te hau. Teie rā, ’aita tō tātou Metua i te Ao ra e māna’ona’o noa nei i tō tātou maita’i, tē māna’ona’o rahi roa atu nei ’oia i tō tātou haerera’a i mua ’e i ni’a ».18
Maoti te tāra’ehara o Iesu Mesia, tei roto te mau ō nō te tāra’ehara ’e te ti’afa’ahoura’a, e nehenehe tātou e tātarahapa, e taui ’e e haere i mua ē a muri noa atu. Maoti te mana tāna i hō mai ’a ha’apa’o noa ai tātou, e nehenehe tātou e riro rahi atu ā i te noa’a mai ia tātou iho. ’Aita paha tātou e hāro’aro’a hope roa nāhea rā, terā rā ’o tātou tāta’itahi tei ’ite i te fa’arahira’a te fa’aro’o ia Iesu Mesia tei fāri’i ato’a i te hō’ē hāro’aro’a rahi a’e i tō tātou iho ta’ata hanahana ’e tō tātou tumu hanahana, ’o te arata’i ia tātou ’ia rave i te mau fa’aotira’a e tuea i terā ’ite.
Noa atu e tūpa’i teie ao ia tātou i raro roa i te fāito o « te animala »,19 nā te ’itera’a ē, ’o te Atua tō tātou Metua e ha’apāpū ia tātou ē, e fāito hanahana tō tātou ’e te fafaura’a ari’i. Noa atu e ha’api’i te ao ia tātou ē, ’aita e hōrora’a tō teie orara’a, nā te ’itera’a ē, ’ua fa’atupu te Tamaiti fānau tahi a te Atua nō tātou te fa’aorara’a ’e te ti’afa’ahoura’a e hōro’a i te tīa’ira’a i te haerera’a mure ’ore i mua.
Pe’e ia Iesu Mesia
Rahi atu ā tā tātou e ha’api’i nō ni’a ia Iesu Mesia, rahi noa atu ā tō tātou fa’ahotura’a i te fa’aro’o iāna ’e tō tātou hina’aro e pe’e i tōna hi’ora’a. E riro te ha’apa’ora’a i tāna mau fa’auera’a ’ei hia’ai rahi roa a’e nō tātou. E hina’aro ’ū’ana tō tātou ’ā’au i te tāmarū i te mau māuiui o vetahi ’ē mai iāna i nā reira ato’a, ’e e hina’aro tātou ’ia roa’a ato’a ia rātou te hau ’e te ’oa’oa i ’itehia e tātou.
Nō te aha te tāmatara’a ’ia rave mai iāna ato’a ra, e riro ai ’ei pūai hope ? Nō te mea ’ia fa’a’ohipa tātou i tō tātou fa’aro’o, e fa’a’ite pāpū mai te Vārua Maita’i i te parau mau mure ’ore.20 ’Ua ha’api’i Iesu i tāna ra mau pipi ’ia ha’apa’o i tāna mau fa’auera’a nō te mea ’ua ’ite ’oia ē, ’ia pe’e tātou i tōna hi’ora’a, e ha’amata ïa tātou i te ’oa’oa ’e ’a haere noa ai tātou nā tōna ra ’ē’a, e roa’a ia tātou te ’īra’a o te ’oa’oa. ’Ua fa’a’ite ’oia : « I parau atu vau ia ’outou i teie nei mau parau, ’ia vai ā tō’u ’oa’oa ia ’outou ’e ’ia ti’a ato’a ho’i tō ’outou ’oa’oara’a ».21
’Ua patuhia ānei tō tātou ’itera’a pāpū i ni’a i te niu papa o Iesu Mesia ’e tāna evanelia ? ’Ia nene’i mai te mau vero o te orara’a ia tātou, e ’imi huanane ānei tātou i te hō’ē buka rāve’a ’ōhie ’aore rā e pia tātou i te tītaura’a tauturu i ni’a i te natirara ? Nā te fa’ata’ara’a i te taime nō te patu ’e nō te ha’apūai i tō tātou ’ite ’e i tō tātou ’itera’a pāpū nō Iesu Mesia e fa’ahotu i te ’āpī e rave rahi i roto i te mau taime hepohepora’a ’e te tāmatara’a. Te tai’ora’a i te pāpa’ira’a mo’a ’e te feruri-hōhonu-ra’a i te parau a te mau peropheta ; te fa’aitoitora’a ’ia pure pāpū ’outou iho ; te ravera’a i te ’ōro’a mo’a i te mau hepetoma ato’a ma te ’ā’au tae ; te tāvinira’a mai te au i te hina’aro o te Fa’aora—e riro mai teie mau ohipa ri’i ’ei papa patura’a orara’a tei ’ī i te ’oa’oa.
E aha te mea e fa’a’oa’oa ia ’outou ? Te ’itera’a i te feiā i herehia ’ia hope te mahana ’ohipa rahi ? Te māuruuru i te ’ohipa i rave-maita’i-hia ? Te ’anapa i roto i te mata o te feiā tei tauturuhia te hopoi’a ? Te mau parau o te hō’ē hīmene ’o tei ha’aputapū i tō ’outou ’ā’au ? Te aroha rima o te hō’ē hoa pāpū ? ’A rave i te hō’ē taime ’ōmo’e nō te feruri i tō ’outou mau ha’amaita’ira’a ’e i muri iho ’a ’imi i te rāve’a nō te ’ōperera’a i te reira. ’A toro ai ’outou i te rima tāvini nō te fa’ateitei i tō ’outou mau taea’e ’e tuahine i tō ’outou aroā ’aore rā nā te ao nei, e tupu mai te hō’ē hau pūai a’e ’e te fa’aorara’a rahi a’e ’e te haerera’a i mua rahi a’e.
Haere mai iāna. Tē fa’a’ite pāpū nei au ē, ’ia rōtahi ’outou i tō ’outou orara’a i ni’a ia Iesu Mesia ’e ’ite ’outou i te ’oa’oa i roto i tō ’outou vaira’a, noa atu ā te reira. ’Oia mau, « ’o ’oia ana’e »,22 te pāhonora’a. ’A fa’ata’a i te taime ’e ’a rave i te taime nō te ’ite ia Iesu Mesia nā roto i te tuatāpapara’a itoito, te fa’ahotura’a i te fa’aro’o rahi a’e iāna ’e te tāmatara’a ’ia riro rahi atu ā mai iana ra te huru. ’A nā reira ai tātou, e ’oi’oi ato’a tātou i te parau mai ia Laynie iti ē : « ’Ia ha’amāuruuruhia te Atua nō te hōro’a fāito ’ore o tāna Tamaiti hanahana ». 23 I te i’oa ha’amaita’i ’e te mo’a o Iesu Mesia, ’āmene.