Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?

Thaum xyoo 1986, kuv raug caw los mus hais lus rau ntawm ib lub tsev kawm ntawv qib siab hauv Accra, Ghana. Nyob ntawd kuv txawm ntsib ib co neeg muaj koob meej coob heev, suav ib tug vaj ntxwv rau ib pawg neeg Afikas. Thaum kuv thiab tus vaj ntxwv no sib tham ua ntej kuv sawv los mus hais lus, tus vaj ntxwv hais lus rau kuv tsuas yog dhau ntawm nws tus neeg txhais lus, es tus neeg ntawd txhais lus rau kuv. Kuv teb rau tus neeg txhais lus thiab nws mam li txhais kuv cov lus teb ntawd rau tus vaj ntxwv.

Tom qab kuv hais lus tas, tus vaj ntxwv rov qab los nrhiav kuv, tiam sis zaum no nws tsis muaj nws tus txhais lus. Kuv xav tsis thoob thaum nws hais lus Akiv zoo kawg nkaus rau kuv—twb yog tus Poj Vaj Ntxwv cov lus Akiv thiab!

Tus vaj ntxwv no coj zoo li nws tsis to taub ib yam. “Es koj yog leej twg?” nws nug kuv.

Kuv teb hais tias, “Kuv yog ib tug Thwj Tim ntawm Yexus Khetos.”

Tus vaj ntxwv nug hais tias, “Koj yuav qhia kuv dab tsi txog Yexus Khetos?”

Kuv rov qab nug nws ib lo lus nug hais tais: “Koj puas kam kuv nug koj saib koj twb paub dab tsi txog Nws lawm?”

Tus vaj ntxwv teb, es kuv paub tias nws rau siab kawm Phau Vaj Lug Kub Npaiv Npaum thiab nws hlub tus Tswv.

Ces kuv txawm nug nws saib nws puas paub txog Yexus Khetos txoj kev saib xyuas thiab qhia cov neeg uas nyob teb chaws Amelikas yav thaum ub?

Raws li kuv tau xav, nws tsis tau paub txog.

Kuv piav hais tias tom qab uas tus Cawm Seej txoj kev raug ntsia saum ntoo khaub lig thiab sawv rov los, Nws nqis los xyuas cov neeg uas nyob teb chaws Amelikas yav thaum ub, es Nws qhia lawv Nws txoj loo zoo. Nws txhim tsa Nws lub Koom Txoos thiab hais kom Nws cov thwj tim ceev ib phau ceev xwm txheej txog Nws txoj kev qhia lawv.

“Phau ceev xwm txheej ntawd,” kuv hais txuas ntxiv, “yog phau ntawv hu ua Phau Ntawv Maumoos. Phau no yog ib zaj lus tim khawv ntxiv txog Yexus Khetos. Nws nrog Phau Vaj Lug Kub Npaivnpaum ua khub vaj lug kub.”

Thaum ntawd ces, tus vaj ntxwv txawm txaus siab mloog heev. Kuv tig mus rau tus thawj tswj hwm ntawm qhov chaw tshaj tawm txoj moo zoo ntawd thiab nug nws saib nws puas muaj ib Phau Ntawv Maumoos. Nws thau ib phau ntawv hauv nws lub hnab los.

Kuv txawm qhib phau ntawv ntawd nthuav mus rau 3 Nifais tshooj 11, thiab tus vaj ntxwv thiab kuv nyeem ua ke tus Cawm Seej zaj hais rau cov neeg Nifais. Ces kuv txawm muab Phau Ntawv Maumoos ntawd pub rau nws. Kuv tseem nco ntsoov tus vaj ntxwv no cov lus teb, nws hais tias, “Txawm koj muab pov haum los yog nyiaj txiag pub rau kuv los, yeej tsis zoo npaum li qhov uas paub ntxiv txog kuv tus Tswv Yexus Khetos.”

Tom qab uas tus vaj ntxwv hnov tau lub hwj chim ntawm tus Cawm Seej cov lus hauv 3 Nifais, nws txawm hais tias, “Yog tias kuv hloov siab los ntseeg thiab koom lub Koom Txoos, kuv mam li coj kuv cov neeg nrog kuv los koom.”

“Auj, Vaj Ntxwv,” kuv teb zoj, “tsis yog li ntawd. Kev hloov siab los ntseeg yog nyob ntawm tus neeg nws tus kheej xwb. Tus Cawm Seej txhawb pab cov Neeg Nifais ib leej dhau ib leej. Txhua tus neeg txais ib zaj lus ua tim khawv hais txog Yexus Khetos txoj moo zoo.”¹

Daim Duab

Yexus Khetos qhuab qhia cov Neeg Nifais

Kuv cov kwv tij thiab cov muam, Phau Ntawv Maumoos muaj nqi npaum li cas rau nej? Yog tias leej twg yuav muab ib co pov haum los sis Phau Ntawv Maumoos pub rau nej, nej yuav xaiv qhov twg? Tiag tiag, nej saib qhov twg muaj nqi ntau tshaj?

Thaum lub tuam rooj sab laj no tuas hnub Sunday yav sawv ntxov thaum lub Plaub Hlis Ntuj 2017, Thawj Tswj Hwm Thomas S. Monson taij thiab thov kom “peb txhua tus yuav mob siab thov Vajtswv thaum kawm thiab ntsuam xav txog Phau Ntawv Maumoos txhua txhua hnub.”² Neeg coob heev tau ua raws li peb tus yaj saub hais.

Cia kuv hais tias kuv thiab Riley wb tsis paub tias leej twg yog thaij koj daim duab. Saib seb Riley tab tom nyeem nws Phau Ntawv Maumoos nrog rau ib daim kem phau ntawv “Kuv Yog Vajtswv Me Nyuam.”

Daim Duab

Thawj Tswj Hwm Nelson thiab Riley nyeem cov vaj lug kub

Muaj ib qho hwj chim los thaum Vajtswv ib tug me nyuam nrhiav kom paub ntxiv txog Vajtswv thiab Nws Leej Tub. Tsis muaj lwm phau ntawv uas qhia tej qhov tseeb no uas meej meej thiab muaj hwj chim ntau tshaj Phau Ntawv Maumoos.

Txij thaum Thawj Tswj Hwm Monson yaum kom peb ua li ntawd rau lub hli tas los no, kuv tau sim ua raws li nws cov lus ntuas thiab. Kuj muaj ntau yam, tiam sis kuv tau txheeb tseg ob peb yam uas qhia tias Phau Ntawv Maumoos yog dab tsi, saib nws pom zoo rau dab tsi, saib nws tsis pom zoo rau dab tsi, saib nws ua tiav dab tsi, saib nws piav meej meej txog dab tsi, thiab saib nws nthuav tawm dab tsi. Saib Phau Ntawv Maumoos li ntawd tau tshoov kuv lub siab thiab pab kuv ntau heev! Kuv yaum kom nej txhua tus xav txog tej yam ntawd thiab.

Thaum rau lub hli no, kuv tau caw ob peb pawg neeg—suav kuv cov Kwv hauv Pawg Kaum Ob tug Thwj Tim, cov tub txib hauv Chile, thiab cov thawj tswj hwm thiab lawv cov poj niam uas sib sau ua ke hauv Argentina—los xav txog peb lo lus nug uas kuv xav yaum nej kom xav txog hnub no hais tias:

Qhov thib ib, nej lub neej yuav zoo li cas yog tias tsis muaj Phau Ntawv Maumoos? Qhov thib ob, nej yuav tsis paub dab tsi? Thiab qhov thib peb, nej yuav tsis muaj dab tsi?

Tej pawg neeg no tau zoo siab teb cov lus nug no ncaj nraim ntawm lawv tej siab los. Nram qab no yog ob peb yam uas lawv hais:

“Yog tias tsis muaj Phau Ntawv Maumoos, kuv yuav ntxhov siab txog tej kev qhia thiab tej kev xav uas tsis sib haum xeeb hais txog ntau yam. Kuv yuav rov qab nyob li qub ua ntej kuv nrhiav tau lub Koom Txoos, thaum kuv nrhiav kom tau kev txawj ntse, kev ntseeg, thiab kev cia siab.”

Muaj dua ib tug hais tias: “Kuv yuav tsis paub txog tus Vaj Ntsuj Plig Dawb Huv lub luag hauj lwm hauv kuv lub neej.”

Muaj dua ib tug hais tias: “Kuv yuav tsis to taub meej meej saib kuv txoj hauj lwm hauv lub ntiaj teb no yog dab tsi!”

Muaj dua ib tug neeg teb hais tias: “Kuv yuav tsis paub hais tias muaj kev ua zoo zuj zus tuaj tom qab lub neej no. Vim yog Phau Ntawv Maumoos, kuv paub hais tias muaj ib lub neej tom qab lub neej no. Es qhov ntawd yog lub hom phiaj uas peb sawv daws sim ncav kom tau.”

Txoj lus kawg no tau ua rau kuv xav txog lub neej ntau xyoo dhau los thaum kuv yog ib tug kws kho mob uas pab tus kws phais neeg. Ib txoj kev lav ris uas ib tug kws phais neeg ris yog, qee zaum, nws yuav tsum qhia ib tsev neeg thaum lawv ib tug neeg uas lawv hlub tas sim neej. Nyob hauv ib lub tsev kho mob uas yog kuv qhov chaw ua hauj lwm thaum ntawd, muaj ib hoob uas tej phab ntsa yog tej ntaub pam rwb xwb, es nyob ntawd tej tsev neeg mam li txais xov xwm phem li ntawd. Nyob ntawd, ib txhia neeg yuav quaj nyiav thiab muab lawv lub taub hau tsoo phab ntsa pam rwb ntawd. Kuv yeej los xav qhia cov neeg ntawd hais tias kev tuag, txawm tias yeej nyuaj rau cov neeg uas tseem nyob, yeej yog ib yam uas yuav tsum muaj rau hauv peb lub neej nyob mus ib txhis li. Kev tuag cia peb nce qib mus rau lwm lub ntuj.³

Muaj dua ib tug neeg teb kuv cov lus nug hais tias: “Kuv tsis muaj lub ntsiab ua neej mus txog thaum kuv nyeem Phau Ntawv Maumoos. Txawm hais tias kuv tau thov Vajtswv thiab mus tshawj tag nrho kuv lub neej, Phau Ntawv Maumoos tau pab kuv nrog Leej Txiv Saum Ntuj Ceeb Tsheej sib txuas lus tiag tiag, thawj thawj zaug.”

Muaj dua ib tug hais tias: “Tsis muaj Phau Ntawv Maumoos, kuv yuav tsis to taub hais tias tus Cawm Seej tsis yog nyiaj theej kuv tej kev txhaum, tiam sis nws kuj kho tau kuv tej kev mob thiab tej kev tu siab.”⁴

Ib tug ntxiv: “Kuv yuav tsis paub hais tias peb muaj yaj saub uas coj tau peb.”

Yog tias peb yuav rau rau siab nyeem Phau Ntawv Maumoos ntshawv ntshis, ua li ntawd yuav hloov tau peb lub neej. Kuv ib tug ntxhais xeeb ntxwv uas tab tom ua ntxhais txib, Muam Olivia Nelson, tau cog lus rau ib tug neeg kawm txoj moo zoo hais tias yog tias nws yuav nyeem Phau Ntawv Maumoos txhua txhua hnub, ces nws cov khab nees ntawm nws tej kev xeem tom lub tsev kawm ntawv qib siab yuav zoo zuj zus tuaj. Nws nyeem txhua hnub, thiab nws cov khab nees zoo tuaj tiag.

Daim Duab

Muam Olivia Nelson

Kuv cov kwv tij thiab cov muam, kuv ua tim khawv hais tias Phau Ntawv Maumoos yog Vajtswv txoj lus tseeb tiag tiag. Nws muaj cov lus teb rau lub neej no cov lus nug tseem ceeb tshaj. Nws qhia txog Khetos tej lus qhuab qhia.⁵ Nws hais dav dav thiab meej meej txog tej tseeb “meej meej thiab muaj nuj nqi heev”⁶ uas tau xiam dhau ntawm ntau tiam neeg thiab ntau txoj kev txhais phau Vaj Lug Kub Npaiv Npaum.

Phau Ntawv Maumoos muaj cov lus qhia uas muaj hwj chim thiab meej tshaj plaws hais txog Yexus Khetos txoj Kev Theej Txhoj, ntau dua lwm phau ntawv qhov twg los xij. Phau no qhia saib txoj kev yug dua tshiab txhais li cas tiag tiag. Los ntawm Phau Ntawv Maumoos peb kawm txog txoj kev sau haiv neeg Ixayees rov qab los nyob ua ke. Peb paub hais tias yog vim li cas peb thiaj nyob hauv lub ntiaj teb. Tej qhov tseeb no thiab lwm cov yog qhia yam muaj hwj chim heev hauv Phau Ntawv Maumoos, ntau dua lwm phau ntawv huv tib si li. Lub hwj chim tag nrho ntawm Yexus Khetos txoj moo zoo yog muaj nyob hauv Phau Ntawv Maumoos. Tiag tiag li.

Phau Ntawv Maumoos qhia meej meej txog tus Xib Hwb tej lus qhia thiab nws nthuav tawm tus yeeb ncuab tej kev haub kev ntxias.⁷ Phau Ntawv Maumoos qhia tej lus qhuab qhia tseeb kom thiaj rhuav tej kab lis kev cai teev ntuj uas tsis muaj tseeb—xws li txoj kev xyaum yuam kev muab me nyuam mos liab ua kev cai raus dej.⁸ Phau Ntawv Maumoos pab kom lub neej no muaj ib lub ntsiab thaum nws yaum kom peb xav txog qhov zoo ntawm lub neej nyob mus ib txhis li thiab “kev zoo siab uas tsis paub kawg.”⁹ Phau Ntawv Maumoos rhuav tej kev ntseeg tsis muaj tseeb hais tias yuav nrhiav tau kev zoo siab thaum ua phem ua qias¹⁰ thiab hais tias lam tau lam coj ua ib tug neeg zoo yog tib yam uas yuav tsum ua kom thiaj rov qab mus cuag tau Vajtswv.¹¹ Nws rhuav tshem mus ib txhis li qhov cuav uas hais tias kev tshwm sim kawg rau phau Vaj Lug Kub Npaiv Npaum thiab hais tias lub ntuj ceeb tsheej kaw lawm.

Thaum kuv xav txog Phau Ntawv Maumoos, kuv xav txog lo lus hwj chim. Tej qhov tseeb hauv Phau Ntawv Maumoos muaj lub hwj chim kho peb lub neej, nplij peb lub siab, coj peb rov qab los, txhawb nqa peb, ntxiv zog rau peb, ua rau peb zoo siab, thiab ua rau peb nyob kaj siab lug.

Kuv cov kwv tij thiab cov muam, kuv cog lus hais tias thaum nej ke thov Vajtswv ke kawm Phau Ntawv Maumoos txhua txhua hnub, nej yuav txiav txim siab zoo dua—txhua hnub. Kuv cog lus hais tias thaum nej xav txog tej yam uas nej kawm, lub rooj ntug yuav qhib plho, thiab nej yuav txais lus teb rau nej cov lus nug thiab kev coj rau nej lub neej. Kuv cog lus hais tias thaum nej rau rau siab nyeem Phau Ntawv Maumoos, nej yuav tiv thaiv nej tus kheej tawm ntawm tej kev phem uas muaj niaj hnub nim no, suav tus kab mob ntawm kev saib duab liab qab thiab lwm yam muaj yees taus.

Thaum twg kuv hnov leej twg, suav kuv tus kheej thiab, hais tias, “Kuv paub tias Phau Ntawv Maumoos muaj tseeb,” kuv xav qw nrov hais tias, “Zoo heev, tiam sis hais li ntawd xwb tsis txaus!” Peb yuav tsum xav tob tob hauv “qhov chaw tob tshaj plaws” hauv peb tej siab tej ntsws,¹² hais tias Phau Ntawv Maumoos yog Vajtswv txoj lus tiag tiag. Peb yuav tsum xav li ntawd tob tob heev npaum li peb yuav tsis xav ua neej ib hnub twg yog tias tsis muaj Phau Ntawv Maumoos. Thawj Tswj Hwm Brigham Young tau hais tias, “Kheev lam kuv muaj lub suab nrov npaum li xob quaj xya zaus kom tsa tau cov neeg sawv”¹³ los ntseeg hais tias Phau Ntawv Maumoos muaj tseeb thiab muaj hwj chim.

Peb yuav tsum coj zoo li tus tub txib no uas tab tom ua tub txib hauv teb chaws Yus Lauv. Nws ntseeg tob tob hais tias Phau Ntawv Maumoos muaj tseeb ces nws cia li khiav mus nqa ib phau dawb ceev no mus rau ib tug txiv neej hauv ib lub phoj uas nws thiab nws tus khub nyuam qhuav nrhiav tau.

Daim Duab

Tus tub txib khiav

Kuv ua tim khawv hais tias Yauxej Xamiv yog tus yaj saub ntawm lub caij nyoog kawg no. Nws yog tus uas, dhau ntawm lub txiaj ntsim thiab lub hwj chim ntawm Vajtswv, tau txhais phau ntawv dawb huv no. Nov yog phau ntawv tseem ceeb uas yuav pab npaj lub ntiaj teb rau tus Tswv txoj kev Rov Los Zaum Ob.

Kuv ua tim khawv tias Yexus Khetos yog Vajtswv uas muaj txoj sia nyob Leej Tub. Nws yog peb tus Cawm Seej, peb tus Txhiv Dim, peb tus Yam Ntxwv, thiab tus uas Sawv Tam peb nrog rau Leej Txiv. Nws yog tus Mexiyas uas Vajtswv tau cog lus tias yuav los, tus Mexiyas uas tau nyob lub ntiaj teb no, thiab Nws yuav yog tus Mexiyas uas yuav nrog peb nyob ib txhiab xyoos. Kuv ua tim khawv kawg siab kawg ntsws hais tias Phau Ntawv Maumoos qhia peb txog Yexus Khetos thiab Nws txoj moo zoo.

Kuv paub tias Thawj Tswj Hwm Thomas S. Monson yog Vajtswv tus yaj saub nyob hauv lub ntiaj teb niaj hnub no. Kuv hlub thiab txhawb nqa nws kawg siab kawg ntsws. Kuv ua tim khawv li no los ntawm Yexus Khetos lub npe dawb ceev, amees.