Hat blong Wido

Mi bin gat bigfala blesing blong wok long medel blong ol Sent blong Pasifik long ol adalt laef blong mi. Fet, lav, mo ol naesfala sakrifaes blong ol strong Sent ia oli fulumap mi wetem insperesen, bigfala tangkyu mo glad. Stori blong olgeta i semmak long hemia blong yufala

Mi ting se olgeta Sent ia oli gat plante samting we i semmak long hemia blong wido ia we Sevya i lukluk taem Hem i “sidaon … mo stap lukluk ol man we oli stap sakem kleksen blong olgeta. Mo i gat plante rijman we oli stap sakem plante mane.

“Nao wan wido woman i kam we hem i pua tumas mo hem i sakem tu smol mane.  …

“Nao Jisas i singaot ol man blong hem oli kam long hem, mo i talem long olgeta se, ‘Tru mi talem long yufala: Kleksen we wido ia i sakem i moa long ol mane we ol narafala man oli sakem.

“[From] … [olgeta ia] oli bin sakem haf mane blong olgeta we i stap nating nomo. Be woman ia we i pua, hem i sakem olgeta mane we hem i gat, we i blong pem kaekae blong hem long hem.”¹

Nomata tufala mane blong hem i wan smolsmol vatu nomo, be long Sevya, presen blong hem i bigwan tumas, from hem i givim evri samting. Long tetaem ia, Sevya i save fulwan wido ia from presen blong hem i soem hat blong hem. Kwaliti mo bigfala lav mo fet blong hem, i olsem se hem i givim mo semtaem, hem i save se ol samting we “hem i wantem,” bae God i givim.

Mi bin luk semmak kaen hat ia long ol Sent long Pasifik. Long wan smol vilej long wan long ol aelan ia, wan olfala man mo waef blong hem, tufala i akseptem invitesen blong ol misinari blong askem Lod wetem tru tingting sapos ol lesen we oli stap tijim long tufala oli tru. Long semmak taem, tufala i stap tingting long risal blong komitmen we bae tufala i mekem sapos ansa we bae tufala i kasem bae i lidim tufala blong akseptem gospel we i kambak. Tufala i bin livim kaekae mo prea blong save sapos Jos mo Buk blong Momon i tru. Ansa long prea blong tufala i bin kam olsem wan swit be klia voes: “!Yes! !I tru!”

Afta we tufala i kasem witnes ia, tufala i jusum blong kasem baptaes. Hemia i no bin wan joes we i fri. Desisen mo baptaes blong tufala bae i spolem gud tufala long plante wei. Tufala i lusum wok, tufala i sakrifaesem ol laef stael blong tufala, ol impoten frensip oli en, mo sapot, lav mo respek we i kam long famli i nomo gat. Naoia tufala i wokbaot i go long jos evri Sandei, kasem ol nogud lukluk long ol fren mo neiba we oli stap wokbaot long nara saed.

Long ol had situesen ia, oli bin askem gudfala brata ia olsem hem i filim abaot desisen blong hem blong joenem Jos. Simpol mo strong ansa blong hem: “?I tru, yes i tru? Joes blong mitufala i klia.”

Tufala niu konvet ia i rili gat fasin olsem hemia blong wido ia. Tufala, olsem wido ia, i bin “givim evri samting” we tufala i save givim, mo tu, tufala i save se tufala i stap givim evri samting we tufala i “gat.” Olsem risal blong hat we i biliv mo fet we i strong long ol hadtaem ia, ol harem nogud blong tufala i nomo hevi. Tufala i bin kasem help long ol memba blong Jos we oli visitim tufala, mo wanwan long tufala i bin kam strong tru long seves blong tufala long ol koling blong Jos.

Afta we oli givim “evri samting,” bigfala dei i bin kam taem tufala i mared long tempol olsem wan famli we i no save finis. Olsem Hem i mekem long ol konvet long taem we Alma i lida, “Lod i bin mekem olgeta oli kam strong blong mekem se oli save karem ol hevi samting blong olgeta isi nomo, mo oli bin stap andanit wetem bigfala glad mo fasin blong wet longtaem long evri wok blong Lod.”² Hemia i hat blong wido we i kamaot long eksampol blong tufala gudfala kapol ia.

Bae mi tokbaot wan nara eksperiens we hat blong wido ia i kamaot fulwan. Long Samoa, mifala i wok wetem ol vilej kaonsel blong letem ol misinari blong prijim gospel. Sam yia i pas, mi toktok wetem wan jif blong wan vilej we ol misinari oli no save go long hem blong plante, plante yia. Toktok blong mi i hapen i no longtaem i pas afta we bigfala jif i bin openem vilej long Jos, mo letem ol misinari blong tijim olgeta we oli intres blong lanem abaot gospel mo ol doktrin blong hem.

Afta long plante yia, blong gat niufala jenis ia, mi wantem save long saed blong wanem i happen we i mekem bigfala jif blong mekem aksen ia. Mi bin askem long saed blong hemia, mo jif we mi bin stap toktok long hem i ansa: “Wan man i save laef long tudak blong wan smol taem, be bae wan taem i kam we bae hem i wantem blong kam long laet.”

Bigfala jif, long opening blong vilej, i soem hat blong wido—wan hat we i sofsof taem faea mo laet blong trutok i kamkamaot. Lida ia i rere blong lego plante yia blong fasin blong folem kastom, blong fesem plante oposisen mo stanap strong, blong mekem se ol narawan oli save kasem blesing. Hemia i wan lida we hat blong hem i lukluk nomo long gudlaef mo hapines blong ol pipol blong hem, be i no long kastom, kalja mo paoa blong hemwan. Hem i lego ol wari ia folem wanem we Presiden Thomas S. Monson i bin tijim yumi: “Taem yumi folem eksampol blong Sevya, laef blong yumi bae i stap olsem wan janis blong stap olsem wan laet long laef blong ol narawan.”³

Laswan, bae mi serem wetem yu wan moa eksperiens long medel blong ol Sent blong Pasifik we rus blong hem long saed blong spirit i stap dip insaed long sol blong mi. Sam yia i pas, Mi bin wan yang kaonsela blong bisop long wan niu wod long Amerikan Samoa. Mifala i gat 99 memba we i gat insaed ol fama, ol man blong wok long tin kampani, ol man we oli wok long gavman mo ol famli blong olgeta. Taem fas Presidensi i talemaot long 1977 se bae oli bildim wan tempol long Samoa, evriwan long mifala i bin glad tumas mo stap talem tangkyu. Blong aot long Amerikan Samoa mo go long tempol long tetaem ia, bae mifala i mas travel i go long Hawae o Niu Silan. Rod i sas tumas, mekem se plante long ol fetful memba blong Jos oli no save pem.

Long tetaem ia, oli askem ol memba blong givim mane blong bildim tempol. Long semmak tingting ia, bisoprik blong mifala i askem ol memba blong wod blong prea, mo tingting gud long wanem oli save givim. Oli putum wan dei blong ol famli oli kam tugeta blong oli save givim ol donesen blong olgeta. Afta, taem ol donesen ia oli openem long praevet, bisoprik blong mifala i bin gat tingting i stap daon mo hat i brok from fet mo gudfala hat blong ol naesfala memba blong wod blong mifala.

From mi save wanwan famli mo situesen blong olgeta, mi filim wan strong mo bigfala tingting blong sapraes, respek, mo tingting we i stap daon. Olgeta donesen ia, long evri wei, oli olsem tufala mane blong wido blong tudei, we oli givim wetem glad hat, nomata ol samting we “oli wantem;” mo oli givim wetem glad from blesing ia we oli promesem blong bildim wan tabu tempol blong Lod long Samoa. Ol famli ia oli bin givim evri samting we oli save givim, i go long Lod, wetem fet se bae oli no go sot long wan samting. Presen blong olgeta i soem hat blong olgeta we i olsem hemia blong wido. Evriwan we oli givim, oli bin mekem wetem glad hat mo wetem glad, from se hat blong wido insaed long olgeta i save luk wetem ol ae blong fet, i go long bigfala blesing blong ol famli blong olgeta, mo evri pipol blong Samoa mo Amerikan Samoa, blong ol jeneresen we bae oli kam. Mi save se ol tabu ofring blong olgeta, tu smol mane blong wido, Lod i save mo i akseptem.

Hat blong wido ia blong givim tu smol mane i wan hat we bae i givim evri samting taem hem i mekem ol sakrifaes; taem hem i go tru long hadtaem, taem oli spolem hem, mo taem oli sakemaot hem, mo taem hem i karem fulap kaen hevi trabol. Hat blong wido, i wan hat we filim mo i save laet mo trutok, mo bae i givim eni samting blong akseptem trutok ia. Hat ia, i stap helpem tu ol narawan blong luk semmak laet ia, mo kam long semmak level blong glad mo hapines we i no save finis. Laswan, hat blong wido, oli makem se hem i wan hat blong wido taem hem i givim evri samting blong bildimap kingdom blong God long wol.

Yumi mas joen olsem ol Sent raon long wol blong mekem wanem we i nid blong gat hat blong wido, we yumi glad tru from ol blesing, we long en, i stretem nid. Prea blong mi blong wanwan long yumi i wan rikwes blong gat hat ia we i save karem ol harem nogud blong yumi, blong mekem ol sakrifaes we i nid, mo gat tingting ia blong givim mo mekem. Mi promes se Lod bae i no save lego yu wetem nating. Hat blong wido ia i fulap long tangkyu se Sevya i wan “man we i harem nogud plante taem mo i savegud olgeta samting we i stap mekem man i harem nogud”⁴ blong mekem se yumi no save testem “kap we i konkon.”⁵ Long medel blong ol wiknes mo foldaon blong yumi, mo from olgeta samting ia, Hem i gohed blong stretem han blong Hem we oli bin nilim from yumi. Bae Hem i leftemap yumi sapos yumi wantem blong kam long laet blong gospel blong Hem, hang long Hem, mo letem Hem i givim ol “samting we yumi wantem.”

Mi testifae long bigfala lav we yumi save serem olsem ol disaepol mo ol man blong folem blong Lod Jisas Kraes. Mi lavem mo sastenem Presiden Thomas S. Monson olsem profet blong God long wol ia. Buk blong Momon i wan nara witnes blong Jisas Kraes long wol, mo mi invaetem evri man blong ridim mo faenemaot ol mesej insaed long hem we oli blong yu. Evriwan we i akseptem invitesen blong kam long Hem bae i faenem pis, lav, mo laet. Jisas Kraes i bigfala Eksampol blong yumi mo Ridima. Hem i tru long Jisas Kraes nomo, mo long merikel blong Atonmen blong Hem we i no save finis, we bae yumi save kasem laef we i no save finis. Mi mi wan witnes long olgeta samting ia, long tabu nem blong Hem, we i Jisas Kraes, amen.