O Le Loto o le Fafine ua Oti Lana Tane

Ua faamanuiaina tele a’u i le auauna atu i Au Paia o le Pasefika mo le tele o lo’u olaga faatagatamatua. O le faatuatua, alofa, ma ositaulaga ofoofogia a nei Au Paia tuuto ua faatumulia ai a’u i musumusuga, lotofaafetai, ma le olioli. O a latou tala e tai pei foi o a outou tala.

Na oo mai se manatu ia te a’u faapea o nei Au Paia e talitutusa lava ma le fafine ua oti lana tane lea na matauina e le Faaola a o Ia “nofo … ua silafia foi e ia le vao tagata o lafo tupe i le mea e teu ai tupe; e toatele foi o e mauoa ua tele a latou ua lafo i ai.

“Ua alu ane foi le tasi fafine mativa ua oti lana tane, ua lafo ane ai tupe iti e lua, o le kotane e tasi ia. …

“Ona valaau atu lea o ia i ona soo, ua fetalai atu ia te i latou, E moni, ou te fai atu ia te outou, o mea a lena fafine mativa ua oti lana tane, ua lafo i le mea e teu ai tupe, ua sili ia i a latou uma na lafo i ai:

“Aua … ua latou lafo nisi mea mai a latou mea ua tele; ao ia ua mativa ua ia lafo ana mea uma sa ia te ia, o ana mea uma e ola ai.”¹

E ui o ana tupe iti e lua o se saofaga itiiti tele, ae i le Faaola ua sili atu le taua o lana meaalofa, ona sa ia avatu mea uma. I lena lava taimi, na silafia lelei e le Faaola le fafine ua oti lana tane, aua sa faaali atu ia te Ia [Iesu] i lana meaalofa lona loto. O le tulaga ma le loloto o lona alofa ma le faatuatua o se mea sa ia tuu atu ma le iloa o le a tausia lona “manao.”

Na ou vaai i lena lava loto e tasi i Au Paia o le Pasefika. I se tamai aai i se tasi o nei motu, sa taliaina ai e se tama matua ma lona faletua le valaaulia a faifeautalai ina ia ole atu ma le faamaoni i le Alii pe moni lesona ia na aoao ai i laua. I lenei faasologa, sa la mafaufau ai foi i taunuuga o tautinoga o le a manaomia ona la faia pe afai o le tali la te mauaina e oo atu ai i le la taliaina o le talalelei toefuataiina. Sa la anapopogi ma tatalo ina ia iloa le moni o le Ekalesia ma le moni o le Tusi a Mamona. Na oo mai le tali i a la tatalo i le tulaga o se faamautinoaga malie ae manino: “Ioe!” E moni lava!”

O le mauaina o lenei molimau, sa la filifili ai ina ia papatiso. Sa le o se filifiliga na le aunoa ma ni taunuuga patino. O le la filifiliga ma papatisoga sa o faatasi ma se tau maualuga. Sa leai ni la galuega, ositaulaga o la tulaga faaleagafesootai, faamutaina faauooga taua, ma sa leai se lagolagosua, alofa, ma le faaaloalogia a aiga. Ua la savavali nei i le Lotu i Aso Sa taitasi, fesuiai fetepaaiga le mautonu ma uo ma tuaoi o e na savavali mai le isi itu.

I nei tulaga faigata, na fesiligia lenei uso lelei po o a ni ona lagona e uiga i le la faaiuga e auai i le Ekalesia. O lana tali faigofie ma le le maluelue o le “e moni, a ea? Sa manino le ma filifiliga.”

O nei Au Paia e toalua faatoa liliu mai na i ai moni lava le loto o le fafine ua oti lana tane. O i laua, e pei o le fafine ua oti lana tane, “na lafo mea uma” na ia i laua, ma tuuina atu ma le iloa o la “manao.” O se taunuuga o o la loto talitonu ma le faatuatua tumau i na taimi faigata, na faamamaina ai a la avega. Sa lagolagoina ma siomiaina i laua e tagata lagolagosua ma auauna atu o le ekalesia, ma sa faamalosia patino i laua i le la auaunaga i valaauga o le Ekalesia.

Ina ua uma ona tuuina atu “mea uma” sa ia i laua, na oo mai le aso sili ona maoae mo i laua ina ua latou faamau i le malumalu o se aiga e faavavau. E pei ona Ia faia i tagata liliu mai i le taitaiga a Alema, “Ioe, sa faamalosia i latou e le Alii ina ia mafai ona latou tauave ma le faigofie a latou avega, ma sa latou gauaʼi atu ma le fiafia ma le onosai i le finagalo atoa o le Alii.”² E faapena le loto o le fafine ua oti lana tane o loo faataitaia e lenei ulugalii matagofie.

Ou te fia talanoa atu e uiga i se isi aafiaga lea na iloa manino ai le loto o le fafine ua oti lana tane. I Samoa, matou te galulue faatasi ma aufono o nuu ina ia maua le faatagaga e talai atu ai e faifeautalai le talalelei. I nai tausaga ua mavae, sa faia se ma talanoaga ma se matai mai se nuu lea na faasa ai faifeautalai mo le tele o tausaga. O le ma talanoaga sa faia i se taimi e lei mamao atu talu ona tatalaina e le matai taua le Lotu i totonu o le nuu, faataga ai a tatou faifeautalai e aoao atu i latou e fia aoao e uiga i le talalelei ma ona aoaoga faavae.

I le mavae ai o le tele o tausaga, o le mauaina o lenei liliuga faavavega, sa ou fia iloa ai po o le a se mafuaaga ua a’e ai se tofa i lenei matai taua ma faia ai lenei faatinoga. Sa ou fesili atu e uiga i lenei mea, ma sa fai mai le matai sa ma talanoa, “E mafai ona ola se tagata i le pouliuli mo se taimi, ae o le a i ai le taimi o le a ia fia sau ai i le malamalama.”

O le tatalaina [o le lotu] e le matai taua o le nuu, na faataitai ai le loto o le fafine ua oti lana tane—o se loto e faamaluluina pe a faaalia le mafanafana ma le malamalama o le upumoni. Sa naunau lenei taitai ina ia lafoai le tele o tausaga o tu ma aga masani, fetaiai ma le tele o le tetee, ma tu mausali ina ia faamanuiaina ai isi. O se taitai lenei sa taulai atu lona loto i le manuia ma le fiafia o lona nuu, nai lo le mafaufau i tu ma aga masani, aganuu, ma le malosi faaletagata lava ia. Sa ia tuuesea na popolega ona o le mea na aoao mai e Peresitene Thomas S. Monson ia i tatou: “A tatou mulimuli i le faataitaiga a le Faaola, o lo tatou avanoa lenei e avea ai ma se malamalama i olaga o isi.”³

Ma le mea mulimuli, sei ou faasoa atua ia te outou se isi aafiaga se tasi i totonu o le Au Paia o le Pasefika lea e tamauina loloto ma faalelagaga i lou agaga. I le tele o tausaga ua mavae, sa avea au ma se fesoasoani talavou i se epikopo i se uarota fou i Amerika Samoa. E toa 99 le matou au paia e aofia ai ni faifaatoaga tau atiae, tagata faigaluega tuuapa, tagata faigaluega o le malo, ma o latou aiga. Ina ua faasilasila mai e le Au Peresitene Sili i le 1977 o le a fausia se malumalu i Samoa, sa matou faaalia uma le olioli ma le lotofaafetai. O le malaga i le malumalu mai Amerika Samoa i lena taimi na manaomia ai le malaga atu a le o Hawaii po o Niu Sila. O se malaga taugata tele lenei [malaga] ma sa le gafatia e le toatele o tagata faamaoni o le Ekalesia.

I le gasologa o lena taimi, na uunaia tagata o le ekalesia e foai atu i se tupe mo fale e fesoasoani i le fausiga o malumalu. I lena agaga, na talosagaina ai e lo matou au epikopo tagata o le uarota ina ia mafaufau ma le agaga tatalo i mea e mafai ona latou foai mai. Na setiina se aso mo aiga e potopoto ai e tuuina mai a latou foai. Mulimuli ane, ina ua tatalaina faalilolilo nei foai, sa faalotomaualaloina ma ootia le matou au epikopo i le faatuatua ma le lima foai o tagata matagofie o le matou uarota.

O le iloaina o aiga taitasi ma o latou tulaga, sa ou lagonaina se lagona malosi ma tumau o le maofa, faaaloalo, ma le lotomaualalo. O nei mea, i soo se auala, o ni tupe itiiti a fafine ua oti a latou tane i nei ona po ma ua tuuina mai ma le saoloto mai o latou “manaoga” ma le olioli i le faamanuiaga folafolaina o le fausiaina o se malumalu paia a le Alii i Samoa. O nei aiga ua faaapaiaina mea uma latou te mafaia i le Alii, ma le faatuatua o le a le tuulafoaia i latou. O le latou meaalofa na faaalia ai o latou loto, o loto a fafine ua oti a latou tane. O i latou uma na foai sa faia ma le loto malie ma le fiafia aua sa i ai i totonu o i latou le loto o le fafine ua oti lana tane ma ua mafai ai ona latou vaai atu ma mata o le faatuatua i faamanuiaga silisili o loo faapolopolo mai mo o latou aiga, ma tagata uma o i Samoa ma Amerika Samoa, mo augatupulaga e mulimuli mai. Ou te iloa na silafia ma taliaina e le Alii a latou taulaga faapaiaina ma a latou tupe iti a le fafine ua oti lana tane.

O le loto o le fafine ua oti lana tane lea na tuuina atu ana tupe iti e lua o se loto o le a tuuina atu mea uma i le faia o ni ositaulaga; i le onosaia o faigata, sauaga, ma le teena; ma i le tauaveina o avega o le tele o ituaiga. O le loto o le fafine ua oti lana tane o se loto ua lagonaina, ma iloa le malamalama o le upumoni ma e tuuina atu soo se mea e taliaina ai lena upumoni. E fesoasoani foi i isi ia iloa lena lava malamalama e tasi ma o mai i le fuataga lava e tasi o le fiafia ma olioli e faavavau. Ma le mea mulimuli, o le loto o le fafine ua oti lana tane ua faaiugaina i se naunautaiga e tuu atu mea uma mo le fausiaina o le malo o le Atua i le lalolagi.

Sei o tatou auai faatasi o ni Au Paia i le lalolagi atoa i le faia o mea e talafeagai ina ia maua ai le loto o le fafine ua oti lana tane, olioli moni i faamanuiaga ma faatumuina le “manao” lea e taunuu i ai. O lau tatalo mo i tatou taitoatasi o se aioiga ina ia i ai le loto e tauave ai avega, faia ni ositaulaga talafeagai, ma ia maua le loto e tuuina atu ai ma faia. Ou te molimau atu o le a le tuulafoaia outou e le Alii ia manaonao. O le loto o le fafine ua oti lana tane ua tumu i le faafetai faapea o le Faaola o “le tagata faanoanoa, ua masani foi ma le tiga”⁴ ina ia tatou le tofo i le “ipu oona.”⁵ E ui i o tatou vaivaiga ma faaletonu, ma ona o i latou, ua faaauau ai pea ona Ia ofoina mai Ona aao, lea na tuia mo i tatou. O le a Ia siiina i tatou i luga pe a tatou naunau e o mai i le malamalama o Lana talalelei, taliaina o Ia, ma faataga o Ia e faatumu o tatou “manao.”

Ou te molimau atu e uiga i le alofa sili lea e mafai ona tatou faasoa atua o ni soo o le Alii o Iesu Keriso. Ou te alofa ma lagolagoina Peresitene Thomas S. Monson o se perofeta a le Atua i le fogaeleele. O le Tusi a Mamona o le isi molimau ia Iesu Keriso i le lalolagi, ma ou te valaaulia tagata uma ina ia faitau i ai ma iloa ona savali mo outou. O i latou uma o e talia le valaaulia a le Alii ina ia o mai ia te Ia o le a maua le filemu, alofa, ma le malamalama. O Iesu Keriso o lo tatou Faataitai Sili ma le Togiola. Ua na o Iesu Keriso, ma le vavega o Lana Togiola Le Iu, e mafai ai ona tatou maua le ola e faavavau. Ou te molimau atu i lenei mea i Lona suafa paia, o Iesu Keriso, amene.