Ewe Pinawan Manau ewe a Feitiw Seni Nang

Ewe ran mwirin an Jises ewe amongoni ekkewe 5,000 aramas non Galilee ren “nimefou pinawa mi for seni barley pwan ruomon iik,”¹ Ii apwan afanafan ngeni ekewe aramas non Capernaum. Ewe Chon Amanau a sinei pwe chommong ekkoch me neir rese mweimweiti an kewe afanafan.² Ina pwata a pwan pesei ngenir watten ewe “mongo epwe nonnom tori manau ese much. Iei ei mongo ewe Noun Aramas epwe ngeni kemi.”³ Jises a apasa ngenir:

“Ngang ewe pinawan manau.

“Ami kewe newo ra mongo ewe manna non ewe fonu pon, nge ra mano.

“Ika emon epwe mongo ewe pinawa mi feitiw seni nang, iwe esap mano.

“Ngang ewe pinawan manau mi feitiw seni nang. Ika emon epwe mongo ei pinawa upwe ngeni, iei futukei, upwe fangeno pun fonufan epwe manau.”⁴

An ewe Chon Amanau awewe ese weweoch me ren ekkewe chon rongorong pun ra wesewesen ekieki pun i epwe fangeno futukan. Ra nuokus ren ewe ekiek, ra apasa, “Ifa ussun an atei epwe tongeni ngeni kich futukan pwe sipwe mongo?”⁵ Jises a sopweno ne awewei:

“Ewer upwe apasa ngeni kemi, ika ouse mongo futuken ewe Noun Aramas o pwan unumi chchaan, esap wor manau remi.

“Iteiten aramas meinisin mi mongo futukei o unumi chchaai repwe kuna manau ese much. Iwe upwe amanauereta non ewe soponon ran.

“Pun futukei, iei ewe mongo mi ennet o chchaai, iei ewe minen un mi ennet.”⁶

Iwe a apasa ussun anononun ewe wewen An kapas awewe:

“Ion epwe mongo futukei o unumi chchaai epwe nonnom non ngang o ngang upwe pwan nonnom non i.

“Ewe Sam mi manau a tinieito, iwe pokiten i ua pwan amanu. Epwe chok pwan iei ussun, ion epwe mongo futukei epwe manau punun ngang.”⁷

Nge ekkewe chon rongorong rese weweiti met Jises a apasa, me “chommong … , ra rong ei afanafan, iwe ra era, ‘Ei afanafan mi fakkun weires. Io epwe tongeni ausening ngeni ei sokkun afanafan?’… [Me] chommong me nein chienan Jesus kewe ra su seni, rese chuwen nuku i.”⁸

Mwongo seni futukan me uun seni chaan ina ew an mi sokono ne atoura ifa sokkun sipwe uweieto ewe Chon Amanau non manauach—non nonnomwuch—pwe sipwe ew chok. Ifa ussun an ei epwe fis?

Akkom, sia wewe pwe ren an asorano inisin me chaan, Jises a achesefan faniten ach kewe tipis me afen akkufu mano, iir me ruw inis me ngun.⁹ Nge, sia fen mongo seni futukan me uun seni chaan nupwen sia angei ewe pochokun me feioch seni An Achasafan.

Ewe annuk ren Kraist a pwari met sipwe fori pwe sipwe angei ewe umoumochun ewe achasafan. Sipwe nuku non Kraist, me aier me papatais, me angei ewe Ngun mi Fel, “iwe mwirin epwe feito ew omusomusen ami kewe tipis seni ekkei me seni ewe Ngun mi Fel.” ¹⁰ Iei ewe aan, ach mumuta ngeni an ewe Chon Amanau umwoumochun achasafan ngeni ewe aan mi aukukkun me chokisikis mi emwen ngeni Muun we.

“Ina minne, ika oupwe feino mwemi [won ena aan], kametip won ewe kapasen Kraist, me nikitu tori nesoponon, nengeni, iei anon ewe Sam: Oupwe weri ewe manau esemuch.

“… Nengeni, iei ewe nongonong mi ennet an Kraist, me ewe chok ew nongonong mi ennet an ewe Sam, me an ewe Nau, me an ewe Ngun mi Fel, minne a ew chok Kot, ese wor nesoponon.”¹¹

Ewe esisinen ewe sakramenin an ewe Samon we Fetannap mi ningeoch ach sipwe nenengeni. Ewe pinawa me konik a achechemen inisin me chaan minne I ewe Pinawan Manau me Konikin manau,¹² amemefi ngeni kich, achema ngeni kich ussun ewe riaffou a fori fanitach. Nupwen ewe pinawa a kinikin, sia chechemeni ewe riafou a tori inisin ewe Chon Amanau. Elter Dallin H. Oaks a nenengeni pwe “pokiten a tatakisitiw, ekis me ekis kinikinin ewe pinawa mi sokono, usun chok ewe emon a ani mi pwan sokono. Kich meinisin mi sokono ach tipis sipwe aier seni. Mi sokono mettoch mi auchea ngenikich ach sipwe pochokun me non ewe Achasefan an ewe Samon Jises Kraist, ewe sia chemeni non ei angang.”¹³ Nupwen sia un ewe konik, sia ekieki usun ewe cha a kus seni me non Gethsemane me won ewe irapenges me an manaman.¹⁴ Ach sinei pwe “ese wor mettoch mi nimengaw a tongeni tonong non muun we,” sia finata pwe sipwe choni “ekkewe ra fen nimeti ufer kewe non [chan ewe Chon Amanau] pokiten ar nuku, me aierin ar kewe tipis, me ar nikitu ngeni nesoponon.”¹⁵

Ua kapas ussun ach angei an ewe Chon Amanau chenin achasafan minne a uweiano ach kewe tipis o nimetano. Nge kapas awewe ren mwongo seni futukan me uun seni chaan a watte wewen, nge sipwe for fengeni ewe feioch me napanap an Kraist, o su seni ewe chon uungeni me winiti Souneng “seni ewe achasafanin Kraist ewe Samon.”¹⁶ Nupwen sipwe mwongo seni ewe pinawan sakramen me unumi ewe konik iteitan wiik, epwe och ne kaeo epwe ifa ussun ach sipwe wesen arap ngeni an mwokutukut me an ese wor tipisin non manauan me pwan kaeo ngeni ren nonnomwuch non mamawach. Jises ese tongeni achasafan faniten ekkoch me nukun Ii chinon chok ika ese tipis. Pwokiten pwungoch ese wor an nemenem won Ii, Ii a aani asor manauan ren neniach me menemenochun pwungoch iwe anapano umoumoch. Nupwen sipwe chechemeni me atekiataan An ewe asoren achasafan, sipwe pwan ekieki usun manauan ese tipis.

Ei a affata pwe sipwe achocho ach sipwe apwonueta wisach. Sise tongeni ach sipwe chok kinamwene nonnomw nge sipwe wesen fori ach angang “tori ukukun tekian an Christ we manau mi unusoch.”¹⁷ Ussun seman King Lamonai non ewe Puken Mormon, sipwe achocho ngeni ach sipwe poutano meinisin ach kewe tipis¹⁸ me tumwunoch ngeni met ewe Samon a mochen sipwe fori fengeni.

Non ekkewe ran ano ese towaw, emon chiechiei a ureniei ew mettoch a fen sapeseni ren emon presetenin misin. Ii a mefi weires ren an reirei me asenipato ukukun ekkoch wiik an epwe asoso non. Fansoun an a pwak, ii a pwungueta fansoun an epwe anea me ekekeiek ussun ekewe pukfel. Ew neanowas nupwen a ekieki ussun an ewe Chon Amanau kewe afanafan non sopun 27 non 3 Nifai, a annuteno. Nge ii apwan apasa:

“Ua mefi non ai tan minne ua kuna fatochun unusen nonnomun manauei. Ngang ua kuna tipisi, ai kewe angang mi ngaw, me fansoun … ngang use sinei engino ngeni aramas, kapach ekkewe mettoch mei mwurino ai upwe apasa me awesi. … [Ew] unusen … [kuna usun] manauei non ekkoch chok fansoun, nge ussun mi fen tameno. Ua pwaata, mairu me… mwirin chok uwa turuno won pwasukui unukun ewe nenien annut me pwoputa iotek, ren omwusemwusen tipisi, tou seni ena memef uwa mefi non ngasangasei ussun use mwo memefi me nomw.

“Me mwen ewe tan, use sinei pwe mi [wor] watten auchea upwe aier. Tipisi me ai kewe nipwakingaw ra fatochuno ngeniei iwe ewe sukkun nefinei we akkom me ewe pinin me ochchun Kot a pwano [ussun] minion mwain. Non ai we iotekin neanowas uwa apasa ai kapsen kinisou ngeni ewe Sam won Nang me ngeni ewe Chon Amanau ren unusen ngasangasei ren met ra fen fori ngeniei me ren nefinei me pwunuwei ua aucheani me nei kewe. Non aiwe fofotupwuku ua mefi an Kot tong me umoumoch mi anonon ina mwo ika ngang mi mefi pwe use nimenimoch. …

“Ngang mei tongeni apasa pwe use mwo nene ngeni ei pwopwuta seni ena ran. … Netipei a siwin. … Met a tapw ina met ngang ua achocho ngeni ren kawatenon wewee ngeni ekkoch, ngeni watten ukukkun tong, kapach ngeni ewe napanap mi pochokun ne kapas allim. … Ngang mei tongeni weweiti ewe afanafanen nuku, epinukunuk me ewe nifangen aier sefan apwano non ewe Puken Mormon [ussun] esapw seni nomw.”¹⁹

Mi fakkun auchea ne esina pwe ei fatochun an sinei usun tipisin me nipwakingaw ngeni ei ochun aramas ese netipengaw ika ese pwan emweni ngeni memef mi ngaw. Ewer, a niwokus me nemenemeno. A mefi pochokunen ren an mochen aier. Ii a fen tipetekison, opwan mefi menemenoch, kinamwe, me epinukunuk—wesewesan apinukunuk—pwunun Jises Kraist, “ewe pinawan manau mi feitiw seni nang.”²⁰

Chiechiei we a kapas ussun ewe sukkun nefin ian a nomw ian ren an ewe tan me ewe pin an Kot. Pinino ina epwe pwungun kapas. Ren mwongo seni ewe futuk me uun seni ewe chaan Kraist wewen ne tapweenoi met mi pin. Kot a annuku, “Oupwe aramas mi pin pun ngang mi pin.”²¹

Enoch a aiti ngeni kich, Aiti ngeni noumi kewe, pwe aramas meinisn, repwe aier, pwe repwe tongeni tongon non ewe muun Kot, pwe ese tongeni wor och mettoch mi nimengaw epwe nomw ikewe, ika tonong non nenian; ren, non kapasen Adam ewe, Aramas mi Pin ina itan ewe, me ewe itan noun we Anamon ewe Noun Aramas, pwan mwo Jises Kraist.²² Ai we emon kukkun aat, ngang ua ekieki pwata non ewe Testamen Soffo Jises a pwan iteni (me pwisin eita ngeni Ii) pwe Ii ewe Noun Aramas nge Ii ewe Noun Kot, nge Enoch a chok afataochueno pwe ekkei itenap ir esisinen An pin—Ii ewe Noun Aramas mi pin, Kot ewe Sam.

Ika sia mochen tonong non Kraist me mwut ngeni epwe tonong non kich,²³ iwe ewe pin met sia mochen, ren inis me ngun.²⁴ Sia kutta non ewe tempel ian a mak “Pin ngeni ewe Samon.” Sia kutta non ach apwupwunu, famini, me imwach kewe. Sia kutta iteitan wiik nupwensia pwapwa non an ewe Samon ran mi pin.²⁵ Sia kutta non mettochun ranin manauach: ach afanafan, ufach, ach ekiek. Ussun Preseten Thomas S. Monson a apasa, “Kich ewe pungunon met sia aneani, met sia kuna, met sia pwan rong me sia ekieki.”²⁶ Sia kutta ach sipwe pin me sipwe mwarei irapenges iteitan ran.²⁷

Sister Carol F. McConkie, a kakkaton: “Sia essina ewe chommong sossot, me osukosuk, minne epwe weitikich seni meinisin mettoch mi mwurino me nimenimoch mwen Kot. Nge manauach mi fen awora ngeni kich ewen tufich ne fini mi pin. Napanon iteitan ewe asor sia fori ne komwoch ren ach kewe pwon a enukunuku kich ach sipwe pin.”²⁸ Me upwe pwan apachata ngeni “ewe asor sa fori”, ewe angang sia fori.

Sia sinei pwe “nupwen [sia] angang ngeni [chiechiach] aramas [sia] chok angang ngeni [ach] Kot.”²⁹ Me ewe Samon a achema ngeni kich pwe angang ngeni pwich kewe ina met a nomw nukanapen manauan me nikinikin. “Pun ewe mo Noun Aaramas ese feito pwe aramas repwe angang ngeni, nge a feito pwe epwe angang o fangeno manauan pwe epwe amanaua chommong aramas.”³⁰ Preseten Marion G. Romney a awewe ochuw: “Angang ngeni ekkoch esapw ew mettoch si nikitu ngeni won ei fonufan pwe sipwe tongeni angei ewe pwungun ngeni ewe muun selestial. Angang ina ewe nongonong tekian manau non ewe muun selestial.”³¹

Zechariah a osuni pwe non ena ranin an ewe Samon fansoun minenium, ekkewe mwo pennin ekewe oris repwe pwan pwarata ekkewe mak, “Mi epinipinino ngeni ewe Samol.”³² Non mirit, ekkewe paionier ra fori ei achechem, “Mi epinipinino ngeni ewe Samol” a cheu fetan iteitan ran pwan ekewe metoch, ekena mettoch a no ngeni ewe nuku me mwichefen. A pwan mak won kapen me peneichen me a print won setifitetin afeiochun ekewe Fiik, me won finaiken Relief Society. “Mi epinipinino ngeni ewe Samol” a pwapwano ren ewe asamwachon Zion, ewe sitowa ZCMI. A pwan pwa won efoch ama non Promontory, Utah, me won ew drum an ekkoch chon band. “Mi epinipinino ngeni ewe Samol” a mak won mechan sukun asamen imwen Preseten Brigham Young, ewe imwen Heehive. Meni ekkei mettoch mi kapas usun pin mi pwa non neni epwe sokono ngeni ekkoch, nge ra affata ifa usun auchean unusochun me nikitun ach ekiek epwe pin.

Mongo seni futuken ewe Chon Amanau me uun seni chaan weween sipwe wau seni manauach ekewe metoch ese fich ngeni nonnomwun manauen me mina ach sipwe manaueni manauan kewe. Iei ewe watten wewen aier: esapw chok kun seni ekkewe tipis sia fen sapseni nge “okunu ngasangasach ngeni netipen Kot”³³ fetan no mwan. Ussun afen fis ngeni chienei we non an ewe tan, Kot epwe pwari ngeni kich ach mwan me nipwakingaw, nge ina epwe pwan anisi kich ne okunu ach nipwakingaw ngeni nipwachok.³⁴ Ika sia wesen tingorei, “Met upwe pwan fori?”³⁵ Ese tongeni poutikicheno ach sipwe aseser fetan, nge non tong Ii epwe ponuweni faniten ach pwapwa, me epwe pwan ngeni kich apinukunuk.

A pochokunen sotuni, o apwan fakkun anuwokus ika pwe non ach achocho ren ach sipwe pin, iwe kich mi akanamon. Nge ewe ennet pwe kich sise akanamon. Mei wor rech ewe tong ese much an Kot, ewe umoumochun Kraist, ewe chon ourur me mas ren ewe Ngun Mi Fel, me ewe echiechi me aninis ren ekewe Souneng ren inisin Kraist. Kich sisapw pwapwa ren ia sa nomw ian, nge sisap pwan netipengaw.

Ua apasa ai kapasen pwarata ren Jises Kraist, “ewe pinawan manau mi feitiw seni nang,”³⁷ me “iteiten aramas meinisin mi mongo [futukan] o unumi [chchaan] repwe kuna manau ese much,”³⁸ non iten Jises Kraist, amen.