Ang Ginoo Mangulo sa Iyang Simbahan

Minahal kong kaigsoonan nga naghupot sa priesthood sa Dios, karong gabii nanghinaut ako sa pagpamulong bahin sa maanindot nga paagi diin ang Ginoo nangulo sa Iyang gingharian sa yuta. Nakahibalo na kamo sa mga sukaranan. Nag-ampo ako nga ang Espiritu Santo mokumpirmar niini nganha kaninyo.

Una, si Jesukristo ang pangulo sa Simbahan sa tibuok yuta.

Ikaduha, gipanguluhan Niya ang Iyang Simbahan karon pinaagi sa pagpamulong ngadto sa kalalakin-an nga gitawag isip mga propeta, ug Siya mibuhat niini pinaagi sa pagpadayag.

Ikatulo, mihatag Siya og pagpadayag ngadto sa Iyang mga propeta sa dugay nang panahon, sige pa gihapon, ug mopadayon sa pagbuhat sa ingon.

Ikaupat, naghatag siya og mokumpirmar nga pagpadayag ngadto niadtong moserbisyo ubos sa pagpangulo sa Iyang mga propeta.

Gikan niana nga mga sukaranan, giila nato nga ang pagpangulo sa Ginoo sa Iyang Simbahan nagkinahanglan og dako ug lig-ong pagtuo gikan sa tanan kinsa nag-alagad Kaniya dinhi sa yuta.

Pananglitan, gikinahanglan ang hugot nga pagtuo aron makatuo nga ang nabanhaw nga Ginoo nagbantay sa inadlaw-adlaw nga mga detalye sa Iyang gingharian. Gikinahanglan ang hugot nga pagtuo aron makatuo nga nagtawag Siya og dili hingpit nga mga tawo ngadto sa pagserbisyo sa pagsalig. Gikinahanglan ang hugot nga pagtuo nga nakaila kaayo Siya sa mga tawo nga iyang gitawag, ang ilang mga kapasidad ug potensyal, ug mao nga dili masayop ang Iyang mga pagtawag.

Kana makapayam-id o makapalingo-lingo sa pipila nga ania dinhi nga naminaw—nagtuo nga basin ang ilang kaugalingong tawag sa pagserbisyo sayop ingon man kadtong dili makatuo nga aduna silay kapabilidad sa dapit sa gingharian sa Ginoo. Ang akong tambag ngadto sa duha ka grupo mao nga idelantar ang mga paghukom hangtud nga mas makita ninyo og maayo unsa ang nakita sa Ginoo. Hinoon, ang paghukom nga kinahanglan ninyong himoon, mao nga kamo adunay kapasidad sa pagdawat og pagpadayag ug sa paglihok niini nga walay kahadlok.

Gikinahanglan ang hugot nga pagtuo sa pagbuhat sa ingon. Gikinahanglan niini ang gani mas dakong hugot nga pagtuo aron makatuo nga ang Ginoo mitawag og dili hingpit nga mga sulugoon sa pagpangulo ninyo. Ang akong katuyoan karong gabhiuna mao ang pagpalig-on sa inyong pagtuo nga ang Dios nagsugo kaninyo sa pagsebisyo Kaniya. Ug ang mas importante, nga akong panghinaut nga mapalig-on ang inyong pagtuo nga ang Ginoo nagdasig sa dili perpektong mga tawo nga Iyang gitawag isip inyong mga lider.

Maghunahuna kamo, sa sinugdanan, nga ang ingon nga pagtuo dili importane sa kalampusan sa Simbahan sa Ginoo ug sa gingharian. Hinoon, inyong madiskubrihan—bisan unsa pa ang inyong calling sa priesthood, gikan sa propeta sa Ginoo hangtud sa bag-ong tighupot sa Aaronic Priesthood—kanang hugot nga patuo mahinungdanon.

Atong sugdan kon unsa ang ipasabut sa pagtuo alang sa usa ka presidente sa korum sa mga teacher o sa deacon. Importante kini alang kaniya nga makabaton og hugot nga pagtuo nga ang Ginoo personal nga mitawag Kaniya, nasayud sa mga kahuyang ug kalig-on niana nga teacher. Kinahanglan siyang magbaton og hugot nga pagtuo nga ang lalaki kinsa moisyu sa tawag nakadawat og pagpadayag pinaagi sa Espiritu sa Dios. Ang iyang mga magtatambag ug mga sakop sa iyang korum nagkinahanglan sa samang hugot nga pagtuo sa pagsunod kaniya uban sa walay kahadlok nga pagsalig.

Nakita nako ang ingon nga pasalig sa dihang ang batang lalaki mitupad sa iyang kapangulohan sa korum sa deacon sa Dominggo sa buntag. Siya mao ang ilang bag-ong gitawag nga secretary. Kana nga batan-on kapangulohan nagtinambagay. Naghisgut sila bahin sa pipila ka mga paagi nga ilang matuman ang gisugo sa bishop nga pasimbahon og balik ang dili kaayo aktibo nga batang lalaki. Human sa pag-ampo ug panaghisgot, ilang gipili ang secretary sa pag-adto sa balay sa batang lalaki kinsa wala gayud moadto sa miting ug aron dapiton siya.

Ang secretary wala makaila sa batang lalaki, apan nakahibalo siya nga ang usa sa ginikanan sa bata dili kaayo aktibo ug ang lain dili miyembro ug dili mahigalaon. Ang secretary mibati og kabalaka apan wala mahadlok. Nasayud siya nga ang propeta sa Dios naghangyo sa mga tighupot sa priesthood sa pagpabalik sa nawala nga karnero. Ug nakadungog siya sa pag-ampo sa iyang kapangulohan. Nakadungog siya nga gisabutan nila ang pangalan sa batang lalaki nga luwason ug ang iyang kaugalingong pangalan.

Nagtan-aw ko sa dihang ang secretary milakaw sa karsada paingon sa balay sa dili kaayo aktibo nga batang lalaki. Hinay siyang naglakaw nga mura og padulong sa dakong kakuyaw. Apan sulod sa tunga sa oras mibalik siya uban sa batang lalaki, nagpahiyum ug malipayon. Dili ko sigurado kon nakahibalo naba siya, apan milakaw siya uban sa hugot nga pagtuo nga siya anaa sa buluhaton sa Ginoo. Kana nga pagtuo nagpabilin kaniya ug milambo paglabay sa iyang katuigan isip usa ka misyonaryo, usa ka amahan, usa lider sa young men, ug usa bishop.

Hisgutan nato ang bahin sa unsay kahulugan sa ingon nga pagtuo alang sa usa ka bishop. Ang bishop usahay gitawag sa pagsebisyo sa mga tawo kinsa nakaila niya pag-ayo. Ang mga miyembro sa ward nakahibalo sa iyang tawhanong kahuyang ug sa iyang espirituhanong kalig-on, ug nakahibalo sila nga ang uban diha sa ward mahimo unta nga matawag—ang uban nga daw mas edukado, mas sinati, mas hapsay, o gani mas ambungan.

Kini nga mga miyembro kinahanglang makahibalo nga ang tawag isip usa ka bishop naggikan sa Ginoo, pinaagi sa pagpadayag. Kon wala ang ilang pagtuo, ang bishop, nga natawag sa Dios, maglisud nga makakuha og pagpadayag nga iyang gikinahanglan aron sa pagtabang nila. Dili siya molampos kon wala ang hugot nga pagtuo sa mga miyembro aron mopaluyo kaniya.

Makapalipay, nga ang sukwahi tinuod usab. Hunahunaa ang sulugoon sa Ginoo nga si Haring Benjamin, kinsa nangulo sa mga tawo sa paghinulsol. Ang kasingkasing sa mga tawo napahumok pinaagi sa ilang pagtuo nga siya gitawag sa Dios, bisan sa iyang tawhanong kahuyang, ug ang iyang pulong naggikan sa Dios. Hinumdumi unsa ang gisulti sa mga tawo miingon: “Oo, kami mituo sa tanan nga mga pulong diin ikaw namulong ngari kanamo; … ug usab, kami nasayud sa ilang pagkatinuod ug kamatuoran, tungod kay ang Espiritu sa Ginoong Makagagahum, nakahimo og dako nga kausaban dinhi kanamo, o dinhi sa among mga kasingkasing, nga kami wala nay hilig sa pagbuhat og dautan, apan sa pagbuhat og maayo sa kanunay” (Mosiah 5:2).

Para molampus ang lider sa buluhaton sa Ginoo, kinahanglan nga ang pagsalig sa mga tawo nga siya gitawag sa Dios mopatigbabaw sa ilang pagtan-aw sa iyang mga kakulangan ug mortal nga mga kahuyang. Nakahinumdom kamo kon giunsa sa pagpasabut ni Haring Benjamin ang iyang kaugalingong tahas sa pagkalider:

Ako wala magsugo kaninyo sa pag-anhi dinhi nga kamo kinahanglan mahadlok kanako, o nga kamo kinahanglan maghunahuna nga ako sa akong kaugalingon labaw kay sa usa ka tawo nga mortal.

Apan ako sama sa inyong mga kaugalingon, ilawom sa tanan nga matang sa mga kahuyang sa lawas ug hunahuna; apan ako gipili niini nga mga katawhan, ug gipahinungod sa akong amahan, ug gitugutan sa kamot sa Ginoo nga ako mahimo nga magmamando ug usa ka hari ibabaw niini nga mga katawhan; ug giampingan ug gipanalipdan sa iyang dili hintupngan nga gahum, nga makaalagad kaninyo uban sa tanan nga gahum, hunahuna ug kusog diin gihatag sa Ginoo ngari kanako (Mosiah 2:10–11).

Ang inyong lider sa Simbahan sa Ginoo posibling huyang para ninyo ug tawhanon o sa inyong tan-aw lig-on ug dinasig. Sa pagkatinuod anaa sa matag lider kadto nga mga kinaiya ug daghan pa. Ang makatabang sa mga sulugoon sa Ginoo kinsa gitawag sa pagpangulo kanato mao ang atong pagtan-aw kanila sama sa pagtan-aw sa Ginoo dihang Siya mitawag kanila.

Ang Ginoo hingpit nga nagtan-aw sa Iyang mga sulugoon. Nakita Niya ang ilang potensyal ug ang ilang umaabut. Ug nasayud Siya kon sa unsang paagiha mausab ang ila gayud nga kinaiyahan. Nasayud Siya kon unsaon nila nga mausab pinaagi sa ilang kasinatian uban sa mga tawo nga ilang gipanguluhan.

Tingali nakasinati na kamo nga nalig-on pinaagi sa mga tawo diin kamo gitawag nga inyong alagaran. Sa makausa natawag ko nga bishop sa mga young single adult. Dili ko sigurado kon ang mas dakong katuyoan sa Ginoo alang ba sa kausaban nga akong ikatabang Kaniya nga himoon ngadto nila o sa kausaban nga nasayran Niya nga ilang mahimo ngari nako.

Sa punto nga wala nako masabti, kadaghanan niadtong batan-on niana nga ward miisip nga gitawag ako sa Dios alang ra gayud kanila. Nakita nila ang akong mga kahuyang apan wala magpaapekto niini.

Nakahinumdom ko og usa ka batan-ong lalaki nga nangayo og tambag bahin sa mga pagpili og edukasyon. Usa siya ka freshman sa maayo kaayo nga unibersidad. Usa ka semana ang milabay human nga nahatag nako ang tambag, nakig-appointment siya nako.

Sa pag-abut niya sa opisina, nasurprisa ko niya nga mihangyo, “Bishop, mahimo bang mag-ampo ta sa dili pa ta mag-istorya? Ug mahimo bang mangluhod kita? Ug mahimo bang ako ang mag-ampo?”

Nasurprisa ko sa iyang hangyo. Apan mas nasurprisa ko sa iyang pag-ampo. Ingon niini ang pagkasulti: “Langitnong Amahan, Ikaw nakahibalo nga si Bishop Eyring mihatag nako og tambag sa miaging semana, ug wala kini mosalir. Palihug dasiga siya nga makahibalo sa unsay akong buhaton karon.”

Karon mahimong magkatawa kamo niana, apan ako wala. Nakahibalo na siya unsay gusto sa Ginoo nga iyang buhaton. Apan gitahud niya ang katungdanan sa bishop sa Simbahan sa Ginoo ug tingali gusto nga makabaton ko og higayon nga maangkon ang mas dakong pasalig sa pagdawat og pagpadayag niana nga calling.

Misalir kini. Sa among pagtindog ug dayon nanglingkod, miabut kanako ang pagpadayag. Gisultihan nako siya sa akong gibati nga gusto sa Ginoo nga iyang buhaton. 18 anyos pa lang siya niadtong panahona, apan hingkod na sa espirituhanong katuigan.

Nasayud na siya nga dili na siya kinahanglan moadto pa sa bishop sa ingon adto nga problema. Apan nakat-on siya sa pagpaluyo sa sulugoon sa Ginoo bisan sa iyang mortal nga mga kahuyang. Sa kaulahian nahimo siyang presidente sa Stake. Gidala niya ang leksyon nga among nakat-unan: kon kamo adunay hugot nga pagtuo nga ang Ginoo naggiya sa Iyang Simbahan pinaagi sa pagpadayag ngadto niadtong dili perpekto nga mga sulugoon nga Iyang gitawag, ang Ginoo moabli sa mga bintana sa langit ngadto kanila, ingon usab Siya diha kaninyo.

Gikan niana nga kasinatian, akong gidala kana nga leksyon nga ang hugot nga pagtuo sa mga tawo nga atong giserbisyohan, usahay molabaw pa sa atong kaugalingong pagtuo, mohatud kanato sa pagpadayag diha sa pagserbisyo sa Ginoo.

Aduna pay laing leksyon alang kanako. Kon kana nga batang lalaki mihukom nako tungod sa akong kapakyas sa paghatag niya og maayong tambag sa unang higayon, wala na gayud unta siya mobalik aron mangutana pag-usab. Ug busa, pinaagi sa pagpili nga dili mohukom kanako, nakadawat siya sa kumpirmasyon nga iyang gitinguha.

Apan aduna pay laing mapuslanon kaayo nga leksyon kanako gikan niana nga kasinatian. Sigun sa akong nahibaloan, wala gayud siya misulti ni bisan kinsa sa ward nga wala ko mihatag niya og maayong tambag sa sinugdanan. Kon gibuhat pa siya niana, nakapakunhod unta kini sa pagtuo sa uban diha sa ward aron mosalig sa inspirasyon sa bishop.

Maningkamot ako nga dili mohukom sa mga sulugoon sa Ginoo o isulti ang ilang klaro nga kahuyang. Ug naningkamot ako sa pagtudlo nianang ehemplo sa akong mga anak. Si Presidente James E. Faust mipakigbahin og panultihon nga akong gipaningkamutan nga akong mapuslan. Ako kining ipakigbahin kaninyo:

“Kinahanglan … kita mosuporta ug mopaluyo sa atong lokal nga mga lider, tungod kay sila … ‘gitawag ug napili.’ Tanang miyembo niini nga Simbahan mahimong makadawat og tambag gikan sa bishop o presidente sa branch, stake o presidente sa misyon, ug sa Presidente sa Simbahan ug sa iyang mga kauban. Walay usa niining mga kaigsoonan nga nangayo sa iyang katungdanan. Walay usa nga perpekto. Bisan pa niana sila mga sulugoon sa Ginoo, Iyang gitawag pinaagi niadtong adunay katungod sa inspirasyon. Kadtong gitawag, gipaluyohan, ug gi-set apart dunay katungod sa atong pagsuporta.

“… Ang pagkawalay respeto sa mga lider nga ecclesiastical miresulta sa daghan nga nag-antus sa espirituhanong pagkaluya ug pagkalaglag. Mopasaylo gayud kita sa bisan unsay makita nga mga pagkadili perpekto, mga kasaypanan, o mga lama sa mga tawo nga gitawag sa pagdumala kanato, ug respetuhan ang katungdanan nga ilang gihuptan” (“Gitawag ug Gipili,” Liahona, Nob. 2005, 54–55).

Kana nga tambag nakapanalangin sa mga sulugoon sa Dios ubos sa tanang mga kondisyon.

Sa sayo nga panahon sa Simbahan sa Ginoo, ang mga lider nga suod ni Propeta Joseph Smith misugod sa pagsulti sa iyang mga sayop. Bisan sa tanan nilang nakita ug nahibaloan sa iyang posisyon uban sa Ginoo, ang ilang diwa sa pagpanaway ug pagpangigi dali kaayong mikuyanap. Usa sa Napulog Duha mitakda og sumbanan sa hugot nga pagtuo alang natong tanan ug kamaunungon nga gikinahanglan gayud nato kon kita moserbisyo sa gingharian sa Ginoo.

Ania ang report: “Pipila sa mga elder gipatawag sa usa ka miting sulod sa templo alang sa tanan niadtong mikonsiderar ni Joseph Smith nga usa ka napukan nga Propeta. Tumong nila ang pagpili ni David Whitmer isip bag-ong lider sa Simbahan. … Human sa pagpaminaw sa mga argumento batok sa Propeta, si Brigham [Young] mitindog ug mipamatuod, ‘si Joseph usa ka Propeta, ug ako nasayud niini, ug nga sila mahimong mobagulbol ug mopakaulaw kaniya kutob sa ilang gusto, sila dili makalaglag sa pagkatudlo sa Propeta sa Dios, sila makaguba lamang sa ilang kaugalingong awtoridad, makaputol sa nagbugkos kanila ngadto sa Propeta ug ngadto sa Dios ug makaunlod sa ilang mga kaugalingon ngadto sa impyerno’” (Church History in the Fulness of Times Student Manual [Church Educational System manual, 2003], 2nd ed., 174; tan-awa usab sa Mga Pagtulun-an sa mga Presidente sa Simbahan: Brigham Young [1997], 79).

Adunay kutay nga nagbugkos kanato sa Ginoo sa atong pagserbisyo. Nagkonektar kini sa bisan asang dapit kita gitawag sa pagserbisyo sa gingharian, hangtud niadto gitawag sa pagdumala nato diha sa priesthood, ug ngadto sa propheta, nga nagbugkos ngadto sa Ginoo. Gikinahanglan ang pagtuo ug kamapaubsanon sa pagsebisyo sa dapit diin kita gitawag, sa pagsalig nga ang Ginoo mitawag nato ug niadtong kinsa midumala kanato, ug sa pagpaluyo kanila sa hingpit nga pagtuo.

Adunay mga panahon, sama sa mga panahon sa Kirtland, kon kita magkinahanglan sa hugot nga pagtuo ug kaligdong sa usa ka Brigham Young sa pagbarug sa dapit diin ang Ginoo mitawag kanato, maunungon sa Iyang propeta ug sa mga lider nga Iyang gitawag.

Akong ihatag kaninyo ang akong balaan ug gani malipayong pagsaksi nga ang Ginoo si Jesukristo ang nagdumala. Gigiyahan Niya ang Iyang Simbahan ug sa Iyang mga sulugoon. Mohatag ko sa akong pagsaksi nga si Thomas S. Monson lang ang bugtong tawo nga naghupot ug makagamit sa tanang yawe sa balaang priesthood sa yuta niining panahona. Ug nag-ampo ko og mga panalangin sa tanang mga mapaubsanon nga mga sulugoon nga andam ug maayo kaayong nagsebisyo sa gipahiuli nga Simbahan ni Jesukristo, diin nangulo Siya sa personal nga paagi. Mopamatuod ko nga si Joseph Smith nakakita sa Dios nga Amahan ug ni Jesukristo. Nakigsulti sila kaniya. Ang mga yawe sa priesthood napahiuli alang sa panalangin sa tanang mga anak sa Langitnong Amahan. Mao kini ang atong misyon ug ang atong pagsalig sa pagserbisyo sa atong dapit sa kawsa sa Ginoo. Sa pangalan ni Jesukristo, amen.