Ewe Samon a Emweni An Mwichefen

Pwi achengicheng ekkewe a wor ami pristutun Kot, nepwinei ua mochen upwe kapas ussun ewe murinon aan ewe Samon a emweni An ewe Muu non me won ei fonufan. Ouwa fen sinei annukun kewe.

Aewin, Jises Kraist I ewe mokuren ewe Mwichefen non unusen fonufan.

Oruan, I a emweni An ewe Mwichefen ikenai ren an porous ngeni ekkewe mwan ra koko ngeni ar repwe soufos seni pwarata.

Ounungatin, I a ngeni noun soufos pwarata me nom, I mi chok pwan ngenir, me epwe chok pwan sopweno ne fori.

Oruanun, I a ngeni ekkewe ra angang fan emwenien noun soufos pochokunen pwarata.

Seni ekkana annuk, sia esinna pwe an ewe Samon emweni an Mwichefen a murinno epwe wor wachimuken pochokunen nuku seni meinisin io mi angang ngeni I me won ei fonufan.

Ussun ew awewe, epwe wor nuku ach sipwe achifouwa pwe ewe Samon mi manausefan a mamasa iteiten ran tichikin porousen an ewe muu. Epwe wor nuku pwe sipwe achifouwa pwe I a kori aramas rese unusoch ar repwe angang non wis ren epinukunuk. Epwe wor nuku pwe sipwe achifouwa pwe I a sineochu ekkewe aramas a korir, ren ir me ruu ren ar tufich me ar tongeni, me pokiten ei ese mo fori och mwan non an kori ekkewe aramas.

Ren ena ekkei mokutukut a pwarano ew memefin tipemwaramwar ussun met ewe a fen porous ussun ngeni ekkoch ir chon ei mwich— ir me ruepek ra ekieki pwe pusin ar kokko ar repwe angang meni epwe  ew mwan ussun chok pwan ekkewe ra ekieki ekkoch ra sinei pwe rese nukunuk pwe ir mi tufich ngeni ewe wis ra koko ngeni ar repwe angang non an ewe Samon ewe muu. A kapasen aurour ngeni ami me ruepek pwe oupwe awesano ami kapasen kapung tori ami oupwe kunaochu met ewe Samon a kuna. Ewe kapasen kopung kopwe fori, nge kosap fen fori pwe mi wor rem ewe tufich om kopwe angei pwarata me mokutukut won nge esap wor om nuokus.

Epwe wor nuku ne fori. Me epwe wor wachimuken nuku ne achifouwa pwe ewe Samon a kori chon angang rese unusoch ar repwe emwenuk. Ai auchean popun non ei pwinin ai upwe forata ami nuku pwe Kot a emwenuk non om angang ngeni I. Me akkaouchean, ai anean pwe upwe forata ami nuku pwe ewe Samon a amwasanga aramas rese unusoch I a korir pwe repwe noumi sou emwen

Meni kopwe ekieki, me mwan, ena nuku ese namot ngeni fefeitan an ewe Samon ewe Mwichefen me muu. Nge, kopwe kuna pwe—ina mwo ika met wis ka wiseni non ewe pristut, ika inai noun ewe Samon ewe soufos ika emon minefo mi wor an Pristut seni Aaron—ena nuku mi auchea.

Sipwe poputa ren met wewen ena nuku ren emon presetenin mwichen sense. Mi auchea ren I an epwe wor an nuku pwe ewe Samon a kokori won winikapan, mi sinei an ewe sense apwangapwang me pochokun. Epwe wor an nuku pwe ewe mwan a wau ewe kokko a angei pwarata ren ewe Ngunun Kot, Noun kewe chon aninis me chon an ewe mwich mi murinno epwe pwan wor rer pwan ena nuku ar repwe tapweno mwirin non nukunuk.

Ua kuna ussun ewe epinukunuk nupwen emon at a mommot ren noun ewe presetensin mwichen sounkowa non ew sosorun Raninfen. I nour ewe minefon seketeri. Ekana onuwonun presetensi ra auroura fengenir. Ra porous ussun ekkoch anen ar repwe aponueta an ewe pisop tingor ar repwe uweisefanieto ngeni fan emon at mi patapateno. Mwirin iotek me poporous, ra ngeni ewe seketeri ewe angang an epwe no ngeni imwen ewe at ewe ese fafan me kokorato.

Ewe seketeri ese sisinei ewe at, nge a sinei pwe emon me nein semen me inen ewe at kewe emon mi patapateno me ewe emon esap I chon ewe Mwichefen. Ewe seketeri a mefi osukosuken an ekiek nge ese nuokus. A sinei pwe ewe soufosun Kot a ureni ekkewe mi wor ar pristut pwe repwe uweisefanieto ewe siip mi monuchono. Me a pwan rong ewe iotek an noun kewe presetensi. A rong pwe ra tipeew ngeni won iten ewe at me won itan ewe sounkowa.

Uwa akkatona nupwen ewe seketeri a fetanita won ewe an ngeni imwen ewe at mi patapatano. A fetanemang ussun nge epwe feinong non osukosuk. Nge a niwinsefanitiw won ewe an fiti ewe at, a emenimen me pwapwa. Use fat ika a sinei, nge a feinno fiti nuku pwe I a nom won ew angang an ewe Samon. Ena nuku a nom ren atewe me a marino non ekkewe ier nupwen an a emon misineri, emon sam, emon sou emwenin ekkewe onuwon, me emon pisop.

Sipwene porous ussun met wewen nuku ren emon pisop. Emon pisop fan ekkoch a kokko an epwe anisi aramas ir mi sineochu I. Chon ewe wart ra sinei ekkoch mettoch ussun apwangapwangen inisin me pochokunan non pekin ngun, me ra sinei pwe ekkoch non ewe wart ita repwe koko ngeni wis—ekkoch a och ar sukun, ra nipwakoch, ra murinno, ika mesemeseoch.

Ekkei chon mwichefen repwe sinei pwe ewe kokkon wis ussun emon pisop a feitto seni ewe Samon, seni pwarata. Ika ese wor ar nuku, ewe pisop a kokko meren Kot epwe weires an epwe angei ewe pwarata mi murinno ngeni an epwe anisir. Esap fefeita ika ese wor ewe nuku an ekkewe chon mwichefen ar repwe tipeew ngeni atewe.

Apwapwan, ewe osokurun mi pwan pung. Ekieki ussun noun ewe Samon ewe chok angang King Benjamin, ewe a emweni noun kewe aramas ngeni aiersefan. Netipen ekkewe aramas ra pweteteno ren ar nuku pwe I a kokko seni Kot, ina mo ika mi wor an apwangapwang me an kewe kapas a feitto seni Kot. Ka chemeni met kewe aramas  ra apasa: “Ewer sia nuku ekkewe kapas meinisin ka apasa ngenikich, iwe, sia pwan sinei ussun pungun me ennetin pokiten Ngunun ewe Samon mi tekia a manaman, ewe mi pwan forata eu ekkesiwin watte non kich are non netipach, pwe sisap chiwen tupuno ngeni mi ngaw, pwe sipwe chok sopweno ach fofor murinno” (Mosiah 5:2).

Ren emon souemwen an epwe fetanoch non ewe angangen ewe Samon, ewe nukunuk an ekkewe aramas pwe I a kokko seni Kot epwe pochokunono an nenengeni ussun an kewe pochokun me apwangapwan. Oua chemeni ifa ussun an King Benjamin awewei angangen an ewe souemwen:

“Use echimwakemi pwe oupwe feita non ei neni pwe oupwe nuokusitiei, are oupwe pwan ekieki pwe ngang uwa nap seni aramas mi manau.

“Pun ngang emon ussun chok ami, inisi mi pwan angei ekkewe sokopaten semwen ussun chok ami, pwan ussun chok non mokurei; nge ina mo nge oua finieita, uwa pwan angei ai epinipin me ren semei we, iwe, uwa riaffou me ren poun ewe Samon pwe upwe emon chon nemeni kemi pwe noumi king; iwe, fan pwisin an manaman a tumunuei pwe upwe anisikemi non ukukun an aiti ngeniei, non mokurei, ngeniei ai pochokun.”(Mosiah 2:10–11).

Noumi kewe sou emwen non an ewe Samon ewe Mwichefen meni repwe apwangapwang me aramas ika repwe pwa ngonuk pwe ir mi pochokun me mwasangasang. Ewe ennetin pwe meinisin sou emwen mi chok nofit ussun ekkei nikinik me pwan ekkoch. Met a anisi chon angangen ewe Samon ekkewe ra koko ngeni ar repwe emweni kich pwe nupwen sia tongeni nenengenir pwan non chok ewe napanap ewe Samon a fori nupwen a kokorir.

Ewe Samon kunaochu noun kewe chon angang. I a kuna ar nipwakoch me ar fansoun mwer. Me I a sinei ifa ussun napanaper epwe tongeni siwin. I a pwan sinei ifa usun repwe tongeni siwin meren met ar sinei ren ekkewe aramas repwe emwenir.

Meni epwe pwan wor om sinei ussun om pochokunono ren kewe aramas ka koko ngeni om kopwe angang ngenir. A wor ew fansoun uwa koko ngeni ai upwe emon pisop ren ekkewe onuwon nipich. Use fat ika ewe popun an ewe Samon pwe epwe ren met ekesiwin upwe tongeni anis ngeni ai upwe fori non ekkewe onuon nipich ika ekkewe ekesiwin I a sinei repwe fori non ngang.

Ngeni ew kauk use weweiti, napengeni ekkei anuwon non ena wart ra nikinikin pwe ussun ngang uwa koko seni Kot akaewin fan iter. Ra kuna ai apwangapwang nge rese mut ngeni ifa ussun ar nenengeniei.

Ua chemeni emon onuon ewe a tingor ren aninis ussun an mochen sukun. Uwa awora. Ew wik mwirin a for ewe fansoun an epwe churiei.

Nupwen a tonong non ewe ofes, a amairuwei ne tingor, “Pisop, kich mi tongeni iotek me mwen sipwe porous? Me kich mi tongeni fotopuku? Me kose mochen upwe iotek?”

An ewe tingor a amairuwei. Nge an ewe iotek a fen kon nap an amairuwei. An ewe iotek a apasa iei ussun: “Semei Kot non Nang, Ka sinei pwe Pisop Eyring a ngeniei kapasen ourour non ewe wik a no, nge ese fis. Kose mochen amef ngeni an epwe sinei met upwe fori iei.”

Iei meni kopwe emenimen ren ena, nge use. I a fen sinei met ewe Samon a mochen epwe fori. Nge I a afona ewe ofes an ewe pisop non an ewe Samon ewe Mwichefen me a mochen ngang upwe angei ewe tufich ai upwe awora wachimuken epinukunuk ai upwe angei pwarata non ena kokko.

A ponuta. Non chok ewe fansoun am ouwa uta me motiw, ewe pwarata a feito rei. Uwa ureni atewe met uwa mefi ewe Samon epwe mochen I epwe fori. I a chok 18 [engon me wanu] ierin non ena atun, nge a fokkun pochokun non pekin ngun.

I a fen sinei pwe ese pwan namot an epwe no ren emon pisop ren och osukosuk. Nge a kaeo an epwe tipeew ngeni noun ewe Samon kewe chon angang apwangapwang pwan mo noun ewe pisop. I a winiti emon presetenin steik. I a chemeni me aponueta ekkewe nesen am ouwa kaeo fengen: ika a wor om nuku pwe ewe Samon a emweni an ewe Mwichefen seni pwarata ngeni ekkana chon angang rese unusoch a kokorir, ewe Samon epwe sukano asamachon nang ngeni I, ussun pwan ngeni kemi.

Seni metena a fis, ua kaeo ewe nesen pwe ewe nuku an ekkewe aramas sia angang ngenir, fan ekkoch nap seni pusin ach nuku, a ngeni kich pwarata non an ewe Samon angang.

Mei pwan wore w nesen ngeniei. Ika ena at epwe opunguwei ren ai use ngeni murinon kapasen aurour ren ewe aewin, ese tongeni an epwe pwan niwin an epwe tingor sefan. Iwe ren an finato an esap apunguwei, a angei ewe pungunon a mochen.

Pwan ew nesen seni met ewe a fis a fokkun namot ngeniei. Ussun met uwa sinei, ese tongeni ureni emon non ewe wart pwe use ngeni murinon kapasen aurour akomwan ewe. Ika e fori ena, iwe epwe ekisano ewe nuku an ekkoch non ewe wart ar repwe epinukunuku an ewepisop mokutukutun memmef.

Uwa sotuni ai usap apungu chon angangen ewe Samon ika porous ussun ark ewe apwangapwang. Me uwa achocho ne aiti ena pwe epwe ew pisekin apiru ngeni nei kewe. Preseten James E. Faust a aporousa ew kapasen achifouwa upwe sotuni ne fori non manauei. Ua aporousa ngeni kemi:

“Kich … a murinno sipwe anisi me tipeew ngeni nouch kewe sou emwenin non neniach, pun ir … ra kokko me kefinita.’ Meinisin chon ewe Mwichefen repwe angei kapasen aurour seni emon pisop ika emon presetenin pranch, ew steik ika presetenin misin, me ewe Presetenin ewe Mwichefen me chiechian kewe. Ese wor emon me nein ekkei mwan tingor an kokko. Ese wor me neir a unusoch. Nge ir ekkewe chon angangen ewe Samon, ra koko seni Iseni ekkana mokutukutun memef. Ekkana ra kokko, ra ketiw, me ngenir wiser a mumuta ngenir ach sipwe etiwer me anisir. …

“…Osufonungaw ren sou emwenin ecclesiastical a efisata chomong ar repwe riaffouni apwangapwang non pekin ngun me turutiw. Sipwe omusano ekkewe nipwakingaw, mwan, ika Apwangapwang an ekkewe mwan ra koko ngeni ar repwe nemenikich, me anisi ewe wis ra wiseni” (“Called and Chosen,” Liahona, Nov. 2005, 54–55).

Pwe kapasen ourour ra efeiochu chon angangen Kot non mettoch meinisin.

Non ekkewe ran nepoputan ewe Mwichefen an ewe Samon, sou emwen ir mi kan ngeni ewe Soufos Joseph Smith ra poputa re porous ussun an kewe mwan. Pwan mwo fiti meinisin met ra kuna me sinei ussun an uta fiti ewe Samon, nikinikin ar esit me nonouo a mwitir chou fetan. Emon me nein ekkewe Engon me Ruemon a awora ngenikich meinisin ekkewe nongonongun nuku me pochokunen aninis epwe wor rech ika sipwe angang non an ewe Samon ewe muu.

Iei ewe repot: “Ekkoch elter ra kori ew mwich non ewe tempel ren ekkewe ra ekieki pwe Joseph Smith I ese chiwen nimenimoch an epwe emon soufos. Ra ekiekin fini David Whitmer epwe ewe minefon sou emwenin ewe Mwichefen. … Mwirin sia rongorong ngeni ewe anini fan iten ewe Soufos, Bringham [Young] a uta me a pwarata, pwe Joseph I emon Soufos, me uwa sinei, pwe repwe kapas mi ngaw fan itan me osufonungawei I ren ukukun ar mochen; rese tongeni ataeno ewe finitan ewe Soufosun Kot, ra chok tongeni ataeno ar na pusin mumuta, kateno ewe akoko nefiner ewe a ochufengenir ngeni ewe Soufos me ngeni Kot, me tinireno ngeni hell’” (Church History in the Fulness of Times Student Manual [Church Educational System manual, 2003], 2nd ed., 174; see also Teachings of Presidents of the Church: Brigham Young [1997], 79).

Mi wor ena terech a ochufengenikich ngeni ewe Samon non ach angang. A akoko ngeni ian sia koko ngeni ach sipwe angang ian non ewe muu, feita ngeni ekkana ra koko ngeni ar repwe nemenikich non ewe pristut, me ngeni ewe soufos, ewe a riri ngeni ewe Samon. Epwe wor nuku me tipetekison ne angang non ewe neni mine sia koko ngeni, ach sipwe epinukunuk pwe ewe Samom a korikich me ekkana ra nemenikich, me tipeew ngenir fiti unusen nuku.

Epwe wor fansoun, epwe ussun chok ekkana non ekkewe ranin Kirtland, nupwen kich mi chiwen mochen ewe nuku me ewe wenechar ussun Brigham Young ne angang non ewe wis ewe Samon a kokorikich ngeni, aninisoch ngeni Noun we soufos me ngeni ekkewe sou emwen A kokorir.

Uwa apasa ngeni kemi ai tekisosonun me apwapwan pwarata pwe ewe Samon Jises Kraist I ewe chon nemenem. I a emweni An Mwichefen me noun kewe chon angang. Ua pwarata ai kapasen pwarata pwe Thomas S. Monson I chok ewe emon mwan a omochu me anganga ekkewe kien ewe pristut mi pin won fonufan. Me uwa tingor ekkewe feioch won meinisin ekkewe tekisosonun chon angang ekkewe ra pwapwaiti ar repwe angang me angangoch non ewe Mwichefenin Jises Kraist mi niwinsefanito. Ua pwarata pwe Joseph Smith a kuna Kot ewe Sam me Jises Kraist. Ra porous ngeni. Ekkewe kien ewe pristut ra niwinsefanito ren ewe feiochun meinisin noun Samach Kot won Nang kewe. Iei wisach me ach epinukunuk ach sipwe angang non neniach non an ewe Samon popun. Non iten Jises Kraist, amen.