Tus Tswv Coj Nws lub Koom Txoos

Kuv cov kwv tij uas tuav Vajtswv lub pov thawj hwj, hmo no kuv xav hais rau nej txog txoj kev zoo kawg nkaus uas tus Tswv siv kom coj Nws lub nceeg vaj nyob hauv lub ntiaj teb no. Nej kuj paub tej ntsiab cai tseem ceeb. Kuv thov kom tus Vaj Ntsuj Plig Dawb Huv yuav pom zoo tej ntawd rau nej.

Qhov thib ib, Yexus Khetos yog tus thawj coj ntawm lub Koom Txoos nyob hauv lub ntiaj teb no.

Qhov thib ob, Nws coj Nws lub Koom Txoos niaj hnub no thaum nws hu cov txiv neej los ua cov yaj saub, thiab Nws ua li no los ntawm kev tshwm sim.

Qhov thib peb, Nws muab kev tshwm sim rau Nws cov yaj saub puag thaum ub, Nws tseem ua li ntawd, thiab tseem yuav ua li ntawd.

Qhov thib plaub, Nws muab kev tshwm sim pom zoo rau cov uas ua hauj lwm rau Nws cov yaj saub.

Los ntawm tej ntsiab cai no, peb paub hais tias cov uas ua hauj lwm rau tus Tswv nyob hauv lub ntiaj teb no yuav tsum muaj kev ntseeg ruaj khov kho txog tus Tswv cov thawj coj ntawm Nws lub Koom Txoos.

Piv txwv hais tias, yuav tsum muaj kev ntseeg hais tias tus Tswv uas tau sawv rov los saib xyuas tej yam uas nyob hauv Nws lub nceeg vaj txhua hnub. Yuav tsum muaj kev ntseeg hais tias Nws hu tib neeg uas tsis zoo tag nrho ua tej hauj lwm tseem ceeb. Yuav tsum muaj kev ntseeg hais tias Nws paub tib neeg uas Nws hu zoo tag nrho, tsis hais lawv tej txuj ci thiab peev xwm, thiab tsis ua yuam kev thaum Nws hu tib neeg.

Tej zaum qhov no yuav ua rau ib txhia luag nyav los sis xav tsis tag—cov uas xav tias twb ua yuam kev thaum hu lawv ua hauj lwm thiab cov uas paub ib tug uas zoo li nws tsis tsim nyog ua lawv txoj hauj lwm hauv tus Tswv lub nceeg vaj. Kuv ntuas ob pawg no kom tos ntxiv ua ntej lawv yuav txiav txim mus txog thaum nej pom tej uas tus Tswv pom tso. Qhov uas nej yuav tsum txiav txim yog qhov uas nej muaj peev xwvm txais kev tshwm sim thiab ua raws li tej uas nej tau txais kiag.

Yuav tsum muaj kev ntseeg kom ua li ntawd. Nej yuav tsum muaj kev ntseeg ntxiv kom ntseeg hais tias tus Tswv tau hu cov tub qhe uas tsis zoo tag nrho kom coj nej. Kuv lub hom phiaj hmo no yog kom txhawb nej txoj kev ntseeg hais tias Vajtswv coj nej kev thaum nej ua hauj lwm rau Nws. Thiab qhov tseem ceeb ntxiv, kuv cia siab tias kuv yuav txhawb nej txoj kev ntseeg hais tias tus Tswv muab kev tshoov siab rau tib neeg tsis zoo tag nrho uas Nws tau hu los ua nej cov thawj coj.

Tej zaum, thaum xub thawj, nej yuav xav tias kev ntseeg tsis tseem ceeb rau tus Tswv lub Koom Txoos thiab lub nceeg vaj. Tiam si, tej zaum nej yuav kawm hais tias—txawm yog nej ua hauj lwm pov thawj hwj twg los, tsis hais tus Tswv tus yaj saub los yog ib tug uas tuav lub Pov Thawj Hwj Aloos tshiab—kev ntseeg yeej tseem ceeb heev.

Cia peb pib hais tias kev ntseeg rau ib pawg xib hwb los yog ib pawg dikas tus thawj tswj hwm muaj nqis npaum li cas. Yeej tseem ceeb rau nws ntseeg hais tias tus Tswv tau hu nws, txawm tus Tswv paub txog tus xib hwb tej kev qaug zog thiab tej kev muaj zog. Nws yuav tsum ntseeg tias tus txiv neej uas qhia txoj kev hu rau nws tau txais kev tshwm sim los ntawm Vajtswv tus Ntsuj Plig. Nws ob tug pab cuam thiab cov mej zeej hauv nws pawg yuav tsum muaj kev ntseeg zoo ib yam kom tsis txhob ntshai tso siab rau nws.

Kuv twb pom kev tso siab li no thaum ib hnub Sunday thaum sawv ntxov ib tug tub hluas nrog nws pawg dikas pawg thawj tswj hwm. Nws yog lawv tus teev ntawd tshiab. Pawg thawj tswj hwm hluas tau sib tham ua ke. Lawv twb sib tham txog ob peb yam uas lawv ua tau kom ua raws li tus npisov hais kom coj ib tug tub hluas uas tsis tshua muaj siab ntseeg rov qab los rau lub koom txoos. Tom qab lawv thov Vajtswv thiab sib tham, lawv twb tau hais kom tus teev ntawv mus rau tus tub hluas uas tseem tsis tau tuaj rau ib txoj kev sib ntsib thiab caw nws tuaj.

Tus teev ntawv tsis tau paub tus tub hluas no, tiam sis nws paub tias tus tub hluas niam txiv ib tug tsis tshua muaj siab ntseeg thiab ib tug tsis yog mej zeej es ib tug tsis tshua zoo siab. Tus teev ntawv ntxhov siab tiam sis nws tsis ntshai. Nws paub tias Vajtswv tus yaj saub tau hais kom cov uas tuav lub pov thawj hwj coj cov yaj uas poob zoo rov qab los. Thiab nws tau hnov nws pawg thawj tswj hwm thov Vajtswv. Nws tau hnov lawv sib tham pom zoo rau tus tub hluas uas yuav tsum cawm no lub npe thiab nws lub npe.

Kuv twb saib thaum tus teev ntawv taug kev mus txog tus tub hluas uas tsis tshua muaj siab ntseeg lub tsev. Nws maj mam taug mus zoo li nws yuav raug xwm txheej heev. Tiam sis ua ntej txog ib nrab teev xwb nws rov qab los nrog tus tub hluas, zoo siab luag nyav. Xyov nws puas paub li no thaum ntawd, tiam sis nws twb muaj kev ntseeg hais tias nws ua tus Tswv txoj hauj lwm. Txij thaum ntawd nws muaj kev ntseeg thiab nws twb loj hlob lawm ua ib tug tub tixb, ib tug txiv tsev, ib tug thawj coj rau cov tub hluas, thiab ib tug npisov.

Cia kuv hais txog qhov uas kev ntseeg muaj nqi li cas rau ib tug npisov. Tej lub sij hawm Vajtswv hu ib tug npisov uas tib neeg paub zoo. Pawg ntseeg cov mej zeej paub me ntsis txog nws tej kev qaug zog thiab nws tej kev muaj zog ntawm sab ntsuj plig, thiab lawv paub tias muaj lwm tus nyob hauv pawg ntseeg uas hu tau ua li ntawd—lwm tus uas zoo li lawv haj yam txawj ntse, laus, zoo dua, los yog zoo nraug dua.

Cov mej zeej no yuav tsum paub hais tias tus Tswv yog tus uas muab kev tshwm sim kom hu tus npisov no. Yog tsis muaj lawv txoj kev ntseeg, yuav nyuaj rau tus npisov, uas Vajtswv hu, kom txais kev tshwm sim uas nws yuav tsum muaj kom pab lawv. Nws yuav tsis vam meej yog tsis muaj cov mej zeej txoj kev ntseeg kom txhawb nqa nws.

Zoo siab uas cov mej zeej kuj xav tau tus npisov txoj kev ntseeg. Cia li xav txog tus Tswv tus tub qhe Vaj Ntxwv Npeyamis, uas coj nws cov neeg kom hloov siab lees txim. Tib neeg lub siab mos muag vim lawv ntseeg tias Vajtswv hu nws, txawm yog nws muaj tej kev qaug zog, thiab nws tej lus yog los ntawm Vajtswv. Nej nco qab tej uas cov neeg tau hais tias: “Muaj tseeb tiag, peb ntseeg tag nrho tej lus uas koj tau hais rau peb; … peb kuj paub tias tej lus ntawd yeej tseeb thiab tiag, vim yog tus Tswv uas Muaj Hwj Chim Loj Tshaj Plaws tus Ntsuj Plig, uas ua rau peb hloov loj heev, los sis hloov peb lub siab, xwv kom peb tsis txhob muaj siab xav ua phem ntxiv, tiam sis xav ua zoo tsis tu ncua mus li” (Mauxiyas 5:2).

Yog ib tug thawj coj yuav ua tau tus Tswv txoj hauj lwm, tib neeg txoj kev tso siab hais tias Vajtswv tau hu nws yuav tsum kov yeej lawv txoj kev saib nws tej kev qaug zog thiab tej yam tsis zoo. Nej nco ntsoov tias Vaj Ntxwv Npeyamis piav txog nws txoj hauj lwm ua ib tug thawj coj:

“Kuv tsis tau txib kom nej tuaj ntawm no xwv kom nej yuav ntshai kuv, los sis xwv kom nej yuav xav tias kuv tsis yog ib tug neeg uas txawj ploj txawj tuag.

“Tiam sis kuv zoo tib yam li nej, uas raug ywj rau tag nrho tej kev qaug zog ntawm lub cev thiab nruab siab; txawm li ntawd los cov neeg no tau xaiv kuv, thiab kuv txiv tau tsa kuv, thiab tus Tswv txhais tes tau cia rau kuv los ua ib tug kav thiab ib tug vaj ntxwv rau cov neeg no; thiab nws lub hwj chim uas loj tshaj txhua yam, tau ceev thiab tsom kwm kuv, los pab nej kom kawg lub siab thiab lub dag lub zog uas tus Tswv tau muab rau kuv” (Mauxiyas 2:10–11).

Tej zaum nej xav tias nej tus thawj coj hauv tus Tswv lub Koom Txoos qaug zog los sis xav tias nws muaj zog thiab txais kev tshoov siab. Txhua tus thawj coj yeej muaj tej yam uas yog kev qaug zog thiab tej yam uas muaj zog. Qhov uas pab tus Tswv cov tub qhe uas Nws hu los coj peb yog thaum peb saib lawv zoo li tus Tswv thaum Nws hu lawv.

Tus Tswv saib Nws cov tub qhe zoo tag nrho. Nws pom lawv tej txuj ci thiab yav tom ntej. Thiab Nws paub hais tias lawv lub siab nyiam hloov tau. Nws kuj paub tias lawv yuav hloov li cas los ntawm lawv txoj kev coj tib neeg.

Tej zaum nej muaj tej lub sij hawm thaum cov neeg uas Vajtswv hu nej coj tau txhawb nej dag zog. Muaj ib zaug thaum kuv yog tus npisov rau ib pawg tub hluas ntxhais hluas uas tsis tau yuav poj niam yuav txiv. Kuv tsis paub tseeb tus Tswv lub hom phiaj puas yog kom kuv pab Nws hloov lawv lub siab los sis yog kom lawv pab Nws hloov kuv lub siab.

Kuv yeej tsis to taub vim li cas cov tub hluas ntxhais hluas feem coob hauv pawg ntseeg ntawd xav tias Vajtswv tau hu kuv kom pab lawv tus kheej. Lawv twb pom kuv tej kev qaug zog tiam sis tsis quav ntsej txog tej ntawd.

Kuv nco qab txog ib tug tub hluas uas thov kuv ntuas nws txog nws txoj kev kawm ntawv. Nws yog ib tug tub kawm ntawv tshiab hauv ib lub tsev kawm ntawv qib siab zoo zoo. Ib lub lim tiam tom qab kuv ntuas nws, nws twb teem sij hawm nrog kuv tham.

Thaum nws tau los rau hauv lub hoob kas, nws ua rau kuv xav tsis thoob thaum nws nug hais tias, “Npisov, koj puas kam wb thov Vajtswv ua ntej wb sib tham? Thiab puas kam wb txhos caug? Thiab puas kam kuv thov Vajtswv?”

Nws tej lus nug ua rau kuv xav tsis thoob. Tiam sis nws zaj lus thov haj yam ua rau kuv xav tsis thoob. Nws twb thov zoo li no hais tias: “Leej Txiv Saum Ntuj Ceeb Tsheej, Koj paub tias lub lim tiam tas los Npisov Eyring tau ntuas kuv thiab tsis tau mus zoo. Thov tshoov nws lub siab kom nws paub tias kuv yuav tsum ua li cas.”

Tej zaum ua rau nej luag nyav, tiam sis kuv tsis tau luag hlo li. Nws twb paub tias tus Tswv xav kom nws ua dab tsi. Tiam sis nws hwm kuv uas yog nws tus npisov nyob hauv tus Tswv lub Koom Txoos thiab tej zaum xav kom kuv muaj cib fim ntseeg kuv tus kheej ntxiv kom txais tau kev tshwm sim thaum kuv ua txoj hauj lwm ntawd.

Ua li ntawd mas nws twb ua zoo. Tib lub sij hawm uas wb sawv ces zaum, kuv twb txais kev tshwm sim. Kuv qhia nws tias kuv twb xav tias tus Tswv xav kom nwa ua dab tsi. Nws twb muaj 18 xyoo thaum ntawd, tiam sis nws sab ntsuj plig yeej laus dua.

Nws paub lawm hais tias nws tsis tas mus nrog tus npisov tham txog qhov teeb meem zoo li ntawd. Tiam sis nws twb kawm kom txhawb nqa tus Tswv tus tub qhe txawm yog tus tub qhe ntawd qaug zog. Muaj ib hnub nws twb los ua ib ceg txheem ntseeg tus thawj tswj hwm. Nws twb siv qhov uas wb kawm ua ke: tus uas muaj kev ntseeg hais tias tus Tswv coj Nws lub Koom Txoos dhau los ntawm kev tshwm sim rau cov tub qhe uas Nws hu, tus Tswv yuav qhib rooj ntug ceeb tsheej rau tus ntawd, ib yam li Nws yuav ua rau nej.

Los ntawm lub sij hawm ntawd, kuv tau kawm hais tias tib neeg uas peb pab txoj kev ntseeg ua rau peb txais kev tshwm sim kom ua tau tus Tswv txoj hauj lwm, tej lub sij hawm pab peb ntau tshaj peb tus kheej txoj kev ntseeg.

Muaj ib yam uas kuv tau kawm ntxiv. Yog tias tus tub hluas tau txiav txim rau kuv vim kuv twb tsis tau muab lus ntuas zoo rau nws thawj thawj zaug, ces ntshe nws yuav tsis rov qab los nug kuv dua. Thiab vim nws xaiv tsis txiav txim rau kuv, nws twb tau txais kev pom zoo uas nws xav.

Muaj ib yam ntxiv kuv tau kawm uas tau pab kuv heev. Kuv xav tias nws tsis tau qhia leej twg nyob hauv pawg ntseeg hais tias kuv tsis tau muab lus ntuas zoo thaum xub thawj. Yog nws tau ua li ntawd, tej zaum ntshe lwm tus hauv pawg ntseeg yuav tsis ntseeg tus npisov txoj kev tshoov siab.

Kuv sim ua kom tsis txhob txiav txim rau tus Tswv cov tub qhe los yog hais txog lawv tej kev qaug zog. Thiab kuv sim coj yam ntxwv li ntawd kom qhia kuv cov me nyuam. Thawj Tswj Hwm James E. Faust hais txog ib txoj kev cai uas kuv sim ua kuv tus kheej. Kuv xav kom nej ua ib yam li no thiab:

“Peb … yuav tsum txhawb nqa thiab pom zoo peb cov thawj coj, vim hais tias … Vajtswv tau ‘hu thiab xaiv’ lawv. Txhua tus mej zeej ntawm lub Koom Txoos no txais tau kev ntuas los ntawm ib tug npisov los yog ceg ntseeg tus thawj tswj hwm, ib ceg txheem ntseeg los sis qhov chaw tshaj tawm txoj moo zoo tus thawj tswj hwm, thiab tus Thawj Tswj Hwm ntawm lub Koom Txoos thiab nws ob tug pab cuam. Tsis muaj ib tug ntawm cov kwv tij no uas thov Vajtswv kom hu nws ua li ntawd. Tsis muaj leej twg zoo tag nrho. Tiam sis lawv yog tus Tswv cov tub qhe, uas Nws hu dhau los ntawm cov uas muaj txoj cai txais kev tshoov siab li ntawd. Cov uas Vajtswv hu, txhawb nqa, thiab tsa yeej tsim nyog uas peb txhawb nqa lawv.

“… Kev saib tsis taus cov thawj coj ua rau neeg coob raug kev qaug zog thiab kev poob ntawm sab ntsuj plig. Peb yuav tsum tsis txhob ntsia ntsoov cov txiv neej uas tswj hwm peb tej kev qaug zog los sis tej yam tsis zoo thiab txhawb nqa lawv lub luag hauj lwm ” (“Called and Chosen,” Liahona, Kaum Ib Hlis Ntuj 2005, 54–55).

Tej lus ntuas no foom koob hmoov rau Vajtswv cov tub qhe txhua zaus.

Nyob hauv tus Tswv lub Koom Txoos thaum ub, cov thawj coj nyob ze tus Yaj Saub Yauxej Xamiv pib hais txog nws tej kev txhaum. Txawm yog lawv twb pom thiab paub tus Tswv pom zoo rau nws, lawv tej lus cem thiab kev khib siab yeej zoo li kab mob uas txawj kis. Ib tug ntawm Pawg Kaum Ob tug Thwj Tim tau coj yam ntxwv txog kev ntseeg thiab kev tso siab uas peb yuav tsum ua yog tias peb yuav ua hauj lwm hauv tus Tswv lub nceeg vaj.

Nov yog lub ceeb toom: “Ob peb tug txwj laug hais kom sib ntsib hauv lub tuam tsev rau tag nrho cov uas xav tias Yauxej Xamiv yog ib tug Yaj Saub uas tau poob lawm. Lawv xav tsa David Whitmer ua lub Koom Txoos tus thawj coj tshiab. … Tom qab peb mloog lawv hais lus tawm tsam tus Yaj Saub, Brigham [Young] sawv thiab ua tim khawv hais tias, ‘Yauxej yog ib tug Yaj Saub, thiab txawm lawv yuav thuam thiab liam nws li ub li no los xij, [tiam sis] lawv hais tsis tau hais tias nws tsis yog Vajtswv tus Yaj Saub; lawv tsuas muaj cai ua rau lawv txoj cai ploj mus, txiav txoj hlua uas muab lawv khi rau tus Yaj Saub thiab Vajtswv, thiab tog mus hauv ntuj txiag teb tsaus’” (Church History in the Fulness of Times Student Manual [Church Educational System manual, 2003], luam zaus 2, 174; kuj saib Teachings of Presidents of the Church: Brigham Young [1997], 79).

Muaj ib txoj xov uas khi peb rau tus Tswv thaum peb ua hauj lwm rau Nws. Txoj xov no pib ntawm qhov uas tus Tswv hu peb ua hauv Nws lub nceeg vaj, mus txog cov uas Nws hu tswj hwm peb hauv lub pov thawj hwj, thiab mus txog tus yaj saub, uas khi rau tus Tswv. Yuav tsum muaj kev ntseeg thiab kev txo hwj chim kom ua hauj lwm hauv qhov chaw uas tus Tswv hu peb, tso siab rau tus Tswv hais tias Nws tau hu peb thiab cov uas tswj hwm peb, thiab muaj kev ntseeg txhawb nqa lawv tag nrho.

Yuav muaj tej lub sij hawm, ib yam li nyob hauv Kirtland, thaum peb yuav tsum muaj kev ntseeg thiab coj ncaj ncees zoo li Brigham Young ua tej yam uas tus Tswv tau hu peb ua, muab siab npuab Nws tus yaj saub thiab cov thawj coj uas Nws tau tsa.

Kuv ua tim khawv tias tus Tswv Yexus Khetos yog tus uas coj kev. Nws coj Nws lub Koom Txoos thiab Nws cov tub qhe. Kuv ua tim khawv tias Thomas S. Monson yog tib tug neeg uas tuav thiab siv tag nrho cov yuam sij ntawm lub pov thawj hwj dawb huv nyob hauv lub ntiaj teb thaum lub sij hawm no. Thiab kuv thov kom tag nrho cov tub qhe uas txo hwj chim uas txaus siab ua hauj lwm zoo nyob hauv Yexus Khetos lub Koom Txoos uas tau txum tim rov qab los, lub uas Nws coj Nws tus kheej. Kuv ua tim khawv tias Yauxej Xamiv tau pom Vajtswv Leej Txiv thiab Yexus Khetos. Nkawd tau hais lus rau nws. Tau muab cov yuam sij pov thawj hwj txum tim rov qab los kom Leej Txiv Saum Ntuj Ceeb Tsheej cov me nyuam tau koob hmoov. Yeej yog peb lub luag hauj lwm kom ua tej yam uas tus Tswv hu peb ua raws li Nws lub hom phiaj. Los ntawm Yexus Khetos lub npe, amees.