E Taitai e le Alii Lana Ekalesia

O’u uso pele o e ua umia le perisitua a le Atua, o le po nei ou te fia tautala atu e uiga i le ala matagofie o loo taitaia ai e le Alii Lona malo i le lalolagi. Ua outou iloa faavae autu taua. Ou te tatalo o le a faamautu atu e le Agaga Paia [na faavae autu taua] ia te outou.

Muamua, o Iesu Keriso o le ao o le Ekalesia i le lalolagi atoa.

Lona lua, o loo Ia taita’ia Lana Ekalesia i ona po nei e ala i le tulei mai i alii ua valaauina o ni perofeta, ma ua ia faia e ala i faaaliga.

Lona tolu, ua loa ona Ia tuuina mai faaaliga i Ana perofeta, o loo Ia faia pea lava, ma o le a faaauau pea ona faia.

Lona fa, Na te tuuina mai faaaliga faamautu ia i latou o e auauna atu i lalo o le taitaiga a Ana perofeta.

Mai na faavae autu taua, ua tatou iloa ai e manaomia e le taitaiga a le Alii o Lana Ekalesia le faatuatua tele ma le mausali mai ia i latou uma o e auauna atu ia te Ia i le lalolagi.

Mo se faataitaiga, e manaomia le faatuatua e talitonu ai o loo vaavaaia e le Alii toetu auiliiliga o Lona malo i aso taitasi. E manaomia le faatuatua e talitonu ai Na te valaauina tagata e le atoatoa i tofiga o le faatuatuaina. E manaomia le faatuatua e talitonu ai Na te silafia atoatoa ia tagata Na te valaauina, i o latou malosiaga ma o latou gafatia, ma o lea e le sese lava se mea na te faia i Ana valaauga.

E ono aumaia e lena mea se soisoi po o se lulu o le ulu i nisi o lenei aofia—o i latou ua manatu e sese lo latou valaauga e auauna atu faapea foi i latou o vaavaai faalemafaufau atu i nisi latou te iloa e foliga e le fetaui i o latou tofiga i le malo o le Atua. O la’u fautuaga i vaega uma ia o le, ia faatuatuai i na ituaiga o faamasinoga seia mafai ona e iloa atu le mea o loo silafia e le Alii. O le faamasinoga e tatau ona e faia, nai lo lena, o le ua ia te oe le mana e maua ai faaaliga ma e galue ai e aunoa ma le fefe.

E manaomia ai le faatuatua ia e faia ai. Ma e manaomia ai le faatuatua e sili atu e talitonu na valaauina e le Alii ni auauna tagata e le atoatoa e taitai outou. O lo’u faamoemoega i le po nei o le fausia lea o lou faatuatua faapea e taitai e le Atua oe i lau tautua ia te Ia. Ma e sili atu foi ona taua, o lo’u faamoemoe o le fausia o lou faatuatua e faapea e musuia e le Alii tagata e le atoatoa ua Ia valaauina e fai ma ou taitai.

Atonu e te manatu, muamua, o lena faatuatua e le taua mo le manuia o le malo o le Ekalesia a le Alii ma le malo. Peitai, e mafai ona e iloaina—po o fea lava e te i ai i le filifilli o le auaunaga faaleperisitua, mai le perofeta a le Alii i se tagata fou e umia le Perisitua Arona—e tatau lava ona i ai lena faatuatua.

Se’i o tatou amata i le uiga o le faatuatua i se peresitene o le korama a aoao po o se tiakono. E taua ia te ia ona i ai le faatuatua ua valaauina o ia e le Alii lava Ia, ma le silafia lelei o vaivaiga ma malosiaga o lena aoao. E tatau ona i ai lona faatuatua faapea o le tagata na tuuina atu le valaauga, na mauaina faaaliga e ala i le Agaga o le Atua. O ona fesoasoani ma uso o lana korama e manaomia foi lena lava faatuatua e mulimuli ia te ia ma le talitonuga mautinoa e aunoa ma le fefe.

Sa ou vaaia lena talitonuga mautinoa ina ua saofafai se tamaitiiti faatasi ma le au peresitene o lana korama a tiakono i le taeao o se tasi Aso Sa. O ia o la latou failautusi faatoa tofia. Sa fefautuaa’i faatasi lena au peresitene talavou. Sa latou talanoa i ni auala eseese e mafai ona latou faataunuu ai le talosaga a le epkopo e toe aumai se tamaitiiti ua le o toe toaga mai i le lotu. Ina ua uma se tatalo ma le talatalanoaga, sa latou tofia le failautusi e alu i le fale o se tamaitiiti e lei sau lava i se fono ma valaaulia o ia.

E lei iloa e le failautusi le tamaitiiti, ae na ia iloa o se tasi o matua o le tamaitiiti ua le o toe lotu ae o le isi e le auai i le ekalesia ma e le agalelei. Sa lagona e le failautusi le popole ae e le i fefe. Sa ia iloa na talosagaina e le perofeta a le Atua le au perisitua e toe aumai mamoe ua leiloloa. Ma sa ia faalogo i le tatalo a lana au peresitene. Sa ia faalogo ua latou malilie i le igoa o le tamaitiiti ina ia laveaiina ma lona igoa.

Sa ou matauina le taimi na savali atu ai le failautusi i le magaala agai i le fale o le tamaitiiti ua le toe lotu. Sa ia savalivali lemu e faapei ua aga atu o ia i se mea matautia. Ae i le totonu o le afa itula na toe savavali mai o ia faatasi ma le tamaitiiti i le auala, ma le ataata fiafia. Ou te le o mautinoa pe na ia iloa i lena taimi, ae sa alu o ia ma le faatuatua o loo i ai o ia i le feau a le Alii. Sa tumau ia te ia lena faatuatua ma faatupulaia i le tele o tausaga a o avea o se faifeautalai, se tama, se taitai o alii talavou, ma se epikopo.

Se’i o tatou talanoa pe o le a le uiga i se epikopo o lena ituaiga o faatuatua. O nisi taimi e valaauina ai se epikopo e auauna atu i tagata e iloa lelei o ia. E iloa e tagata o le uarota se mea e uiga i ona vaivaiga faaletagata ma ona malosiaga faaleagaga, ma latou te iloaina foi e i ai isi i le uarota sa tatau ona tofia—o isi e foliga e sili atu lo latou a’otauina, sili atu le poto masani, sili atu ona tauagafau, pe aulelei foi.

E tatau i nei tagata ona iloa o le valaauga e auauna atu o se epikopo e sau mai le Alii, e ala i faaaliga. A aunoa ma lo latou faatuatua, o le a sili ona faigata i le epikopo o le na valaauina e le Atua ona maua faaaliga na te manaomia e fesoasoani ai ia te i latou. O le a le manuia o ia e aunoa ma le faatuatua o tagata o le uarota e lagolagoina o ia.

Ma le fiafia, e moni foi lona faafeagai. Mafaufau i le auauna a le Alii le Tupu o Peniamina o le sa ta’ita’ia lona nuu e salamo. Sa faamaluluina loto o tagata e ala i lo latou faatuatua na valaauina o ia e le Atua ma o ana upu na mai le Atua. Tou te manatua la latou tala: “Ioe, ua matou talitonu i upu uma na e saunoa mai ai ia te i matou; o lenei foi, ua matou iloa lo latou mautinoa ma le moni, ona o le Agaga o le Alii Mamana Aoao, lea ua ia faia se liuga tele i totonu o i matou, po o i totonu o o matou loto, ua le toe i ai so matou manao e fai mea leaga, ae ia faia mea lelei e le aunoa” (Mosaea 5:2).

Mo se taitai ia faamanuiaina i le galuega a le Alii, o le faatuatuaga o tagata faapea na valaauina o ia e le Atua e tatau ona malosi atu nai lo o latou manatu i ona faaletonu ma vaivaiga faaleolaga nei. Tou te manatua le faamalamalamaina atu e le Tupu o Peniamina o lana matafaioi faaleta’ita’i:

“Ou te lei poloai atu ia te outou ia outou o mai iinei ina ia outou matataʼu mai ia te aʼu, pe ina ia outou manatu ai ua sili atu aʼu lava ia i lo se tagata soifua.

“Ae ua pei lava aʼu o outou, e oo i ai vaivaiga eseese uma o le tino ma le mafaufau; peitai ua filifilia aʼu e lenei nuu, ma faapaiaina e loʼu tamā, ma tuu mai e le aao o le Alii ia avea aʼu o se pule ma se tupu i luga o lenei nuu; ma sa tausia ma faasaoina e lona mana lē mafaatusalia, e auauna atu ia te outou ma le manatu atoa, mafaufau, ma le malosi atoa ua tuu mai e le Alii ia te aʼu” (Mosaea 2:10–11).

Atonu o lou taitai i le Ekalesia a le Alii e foliga mai ia te oe e vaivai ma ua na o se tagata soifua, pe foliga mai foi e malosi ma musuia. O le mea moni o taitai uma o se su’ifefloi o na uiga ma isi. O le mea e fesoasoani i auauna a le Alii o e ua valaauina e taitai i tatou pe a tatou taumafai e vaai atu ia i latou faapei ona silasila atu ai le Alii pe a Ia valaauina i latou.

E silasila atu atoatoa le Alii i Ana auauna. E silasila atu i o latou gafatia ma o latou lumanai. Ma Na te silafia le ala e mafai ona suia ai o latou natura. Na te silafia foi le ala e mafai ai ona latou suia e ala i aafiaga ma tagata o le a latou ta’ita’ia.

Atonu na i ai sou aafiaga o le faamalosia o oe e tagata sa valaauina oe e te auauna atu i ai. Na valaauina a’u foi e fai ma epikopo o le autalavou nofofua matutua. Ou te le o mautinoa pe o faamoemoega o le Alii e mo suiga e mafai ona ou faia ia i latou po o suiga sa Ia silafia o le a latou faia mo au.

I se tulaga ou te lei malamalama ai, o le tele lava o na talavou i lena uarota sa galulue faapei na valaauina au e le Atua faapitoa mo i latou. Sa latou vaai i o’u vaivaiga ae sa latou vaavaai i talaatu o na vaivaiga.

Ou te manatua se tasi alii talavou sa talosagaina sa’u fautuaga mo ana filifiliga faalea’oa’oga. Sa avea o ia o se tamaitiiti aoga o le tausaga muamua i se iunivesite lelei tele. Na mavae se vaiaso mulimuli ane sa ou tuuina atu ai ia te ia se fautuaga, na ia toe faatulagaina se taimi ma te talanoa

Ina ua sau i lo’u ofisa, sa ia faate’ia au i le fesili mai, “Epikopo, e mafai ona ta tatalo a e ta te lei talanoa? Ma pe mafai ona ta tootutuli? Ma pe mafai ona ou tatalo?”

Sa faateia a’u i ana talosaga. Ae sa sili ona faate’ia a’u i lana tatalo. Sa tau foliga faapea lana tatalo: “Tama Faalelagi, Ua e silafia na tuu mai e Epikopo Eyring ia te au se fautuaga i le vaiaso ua mavae, ma e le’i aoga. Faamolemole ia musuia o ia ia iloa pe o le a le mea ou te faia nei.”

Ia atonu e te soisoi i lena mea, ae o a’u e leai. Sa ia iloa lelei le mea sa finagalo le Alii na te faia. Ae sa ia faamamaluina le tofi o se epikopo i le Ekalesia a le Alii ma atonu na manao ia ou maua le avanoa e maua ai se talitonuga mautinoa sili atu e maua ai faaaliga i lena valaauga.

Sa aoga. O le taimi lava na ma tutu ai i luga ma nonofo i lalo, sa oo mai ai le faaaliga ia te au. Sa ou ta’u atu ia te ia le mea sa ou lagonaina e finagalo le Alii na te faia. Sa na o le 18 ona tausaga i le taimi lea, ae sa matua i le faaleagaga.

Sa ia iloa lelei e le tau alu o ia i se epikopo mo lena ituaiga o faafitauli. Ae sa ia aoao e lagolago le auauna a le Alii tusa lava pe i ai ona vaivaiga faaleolaga nei. Na mulimuli ane avea o ia ma peresitene o le siteki. Sa ia tauaveina pea lena lesona sa ma aoaoina faatasi: afai e te faatuatua e taitai e le Alii Lana Ekalesia e ala i faaaliga i na auauna le atoatoa Na te valaauina, o le a tatala e le Alii pupuni o le lagi ia te ia, e faapei foi ona Ia faia ia te outou.

Mai lena aafiaga, sa ou tauaveina foi lena faatuatua o tagata tatou te auauna i ai, o nisi taimi e sili atu lo latou faatuatua nai lo i tatou, e aumaia ai faaaliga i le galuega a le Alii.

Sa i ai foi se isi lesona mo au. Pe ana fai e faamasinoina au e lena taulealea i lo’u le tuuina atu o se fautuaga lelei ia te ia, semanu e le toe foi mai lava e toe fesili mai. Ma o lea, o le filifili e aua nei faamasinoina o ia, sa ia maua ai le faamautuuga na ia manao ai.

Ae o le isi lesona mai lena aafiaga sa aoga tele ia te au. O lo’u iloa, na te lei ta’uina lava i se tasi o le uarota faapea ou te lei tuuina se fautuaga lelei ia te ia i le taimi muamua. Pe ana ia faia lena mea, e ono faaitiitia le faatuatua o isi o le uarota e faatuatuaina ia musumusuga a le epikopo.

Ou te taumafai e aua nei faamasinoina auauna a le Alii pe tautala foi e uiga i o latou vaivaiga iloagofie.Ma ou te taumafai e aoao atu e ala i faataitaiga i la’u fanau. Sa faasoa mai e Peresitene James E. Faust se mataupu faavae o loo ou taumafai e fai mo’u. Ou te faasoaina atu ia te outou:

“O i tatou …e manaomia ona fesoasoani ma lagolago o tatou taitai i le lotoifale, aua o i latou … ua ‘valaaulia ma filifilia.’ O tagata uma o lenei Ekalesia e mafai ona maua fautuaga mai se epikopo po o se peresitene o le paranesi, se peresitene o le siteki po o se misiona, ma le Peresitene o le Ekalesia ma e latou te galulue. E leai se tasi o nei uso sa talosaga mo lona valaauga. E leai se isi e atoatoa. Ae o i latou o auauna a le Alii, na valaauina e Ia e ala ia i latou ua i ai le aia tatau i faaaliga. O i latou ua valaauina, lagolagoina, ma vaetofia ua i ai le aia tatau mo la tatou lagolago. 

“… O le le migao i taitai faale-Ekalesia ua afua ai ona mafatia le toatele i vaivaiga ma toilalo faaleagaga. E tatau ona le amanaia ni le atoatoa, o lape, po o ni aleu o alii e tofia e pulefaamalumalu ia i tatou, ma lagolago le tofi o loo latou umia” (“Called and Chosen,” Liahona, Nov. 2005, 54–55).

O lena fautuaga e faamanuiaina ai auauna a le Atua i lalo o tulaga uma lava.

I popofou o le Ekalesia a le Alii, sa amata e taitai na latalata i le Perofeta o Iosefa Samita ona talanoa e uiga i ona masei. E ui i mea uma na latou vaai i ai ma iloa i lona tulaga ma le Alii, sa sosolo lo latou uiga faaalia o le faitio ma le lotomatau’a e pei o se mala. Sa tuu mai e se tasi o le Toasefululua mo i tatou le tagavai o le faatuatua ma le lotonuu e tatau ona tatou maua pe afai tatou te fia tautua i le malo o le Alii.

O le lipoti lea: “Sa talo e ni toeaina se fonotaga i le malumalu mo i latou uma ua manatu o Iosefa Samita o se Perofeta amioletonu. Sa latou faamoemoe e tofia Tavita Uitimera e fai ma taitai fou o le Ekalesia. Ina ua uma ona faalogologo atu i lafoga e faasaga i le Perofeta, sa tulai a’e Polika [Iaga] ma molimau atu, ‘O Iosefa o se Perofeta, ma ou te iloaina lena mea, ma atonu latou te matua’i olopalaina o ia ma ta’uleagaina e tusa ma lo latou manao; ae e le mafai ona latou faataumaoia le tofiga o le Perofeta a le Atua, ua na o la latou lava pule e mafai ona latou faataumaoia, motusi pitofilo o loo noatia ai i latou i le Perofeta a le Atua, ma gotouga ifo ai i latou lava i seoli’” (Church History in the Fulness of Times Student Manual [Church Educational System manual, 2003], 2nd ed., 174; tagai foi Teachings of Presidents of the Church: Brigham Young [1997], 79).

O loo i ai se pitofilo o loo noatia ai i tatou i le Alii i a tatou auaunaga. Po o fea lava e valaauina i tatou e auauna ai i le malo e fesootai lava, e oo atu lava ia i latou e valaauina e pulefaamalumalu ia i tatou i le perisitua, ma i le perofeta, o le ua noatia i le Alii. E manaomia ai le faatuatua ma le lotomaualalo e auauna atu ai i le nofoaga e tofia i ai i tatou, e faalagolago i le Alii na tofia i tatou ma i latou o e pulefaamalumalu ia i tatou, ma lagolagoina i latou i le faatuatua atoa uma.

O le a i ai taimi, e pei ona i ai i ona po o Katelani, o le a tatou manaomia ai le faatuatua ma le amiosa’o e pei o Polika Iaga e tutu atu ai i le tofiga e valaauina i ai i tatou e le Alii, ma le lotonuu i Lana perofeta ma taitai na Ia tofia.

Ou te tuu atu la’u molimau maua’i ae tumu i le olioli o le Alii o Iesu Keiriso o loo tu i le foe. O loo Ia taitaia Lana Ekalesia ma Ana auauna. Ou te molimau atu o Thomas S. Monson ona pau lea o le tamalii o loo umia ma faaaogaina ki uma o le perisitua paia i le lalolagi. Ma ou te talosagaina faamanuiaga i luga o auauna lotomaualalo uma o e o loo auauna atu lelei atu ma le matua naunauta’i i le Ekalesia toefuataiina a Iesu Keriso. Ou te molimau atu na vaai Iosefa Samita i le Atua le Tama ma Iesu Keriso. Na La tulei atu ia te ia. Na toefuatai mai ki o le perisitua mo faamanuiaga o fanau uma a le Tama Faalelagi. O la tatou misiona ma lo tatou faatuatuaga o le auauna atu lea i tofiga i le galuega a le Alii. I le suafa o Iesu Keriso, amene.