Ol Nid long Fored blong Yumi
Sam long ol impoten nid we yumi save help wetem oli stap insaed long ol famli blong yumi, long medel blong ol fren blong yumi, insaed long ol wod blong yumi, mo ol komuniti blong yumi.
Long ol dei we oli jes pas yumi witnesem wan bigfala namba blong disasta, long Meksiko, Yunaeted Stet, Esia, Karaib, mo Afrika. Ol disasta ia i mekem taosen pipol oli kamaot blong helpem olgeta we oli stap long denja o nid mo oli lusum ol samting. Mi bin glad blong luk ol yang woman long Teksas mo Florida wetem plante narafala, we oli putum yelo “Han blong Help” T-sot mo oli stap help blong kliarem doti insaed long ol haos we hariken i mekem. Plante taosen moa oli glad blong go long ol ples we i gat bigfala nid sapos ol ples ia oli kolosap. Be, yu bin givim moa help blong mekem safaring i laet. Open hat mo sore blong yufala oli givim insperesen mo oli ol fasin olsem hemia blong Kraes.
Tedei mi wantem tokbaot wan pat blong seves we mi filim se i impoten blong evriwan—nomata wanem ples we yumi stap long hem. Long yumi we yumi bin luk nius folem ol samting we i jes hapen mo filim se yumi nogat paoa inaf blong help, ansa blong hem i stap long fored blong yumi nomo.
Sevya i tijim, “Man we i wantem sevem laef blong hem, hem bambae i lusum laef blong hem, be man we i lusum laef blong hem from mi, hem bambae i sevem laef blong hem.”1 Presiden Thomas S. Monson i tokbaot skripja ia: “Mi bilif se Sevya i stap talem long yumi se kasem taem we yumi lusum yumiwan long seves blong ol narafala man, laef blong yumi i gat wan smol stamba tingting nomo. Olgeta we oli tingbaot olgetawan nomo long en oli kam smol long saed blong spirit, mo long tok haed, bae oli lusum laef; be olgeta we oli givim olgetawan long seves blong ol narafala man oli gro mo gat sakses—mo long en, oli sevem laef blong olgeta.”2
Yumi laef long wan kalja we, plante moa long yumi i lukluk nomo long smol skrin long han blong yumi bitim we yumi lukluk long ol pipol raon long yumi. Yumi putum ol teks mo Fesbuk blong yumi long ples blong lukluk wan man stret long ae blong hem mo smael o, samting we i nomo stap hapen tumas, i blong lukluk man long fes mo storian tugeta. Yumi lukluk moa long hamas man i folem yumi mo laekem pej we yumi gat bitim blong putum han raon long wan fren mo soem lav, wari blong yu long hem, mo gat interes we i ril long hem. Semmak olsem we teknoloji blong tedei i save serem mesej blong gospel blong Jisas Kraes i go olbaot mo i helpem yumi stap konek wetem famli mo ol fren, sapos yumi no lukaotgud long wei we yumi yusum ol mobael o tablet blong yumi, yumi tu, bae yumi stat blong lukluk nomo long yumiwan mo fogetem se impoten pat blong stap laef folem gospel, hem i seves.
Mi gat bigfala lav mo fet long olgeta long yufala we i yangfala i stap yet mo ol yang adalt. Mi bin luk mo filim we yufala i wantem tumas blong givim seves mo mekem wan jenis insaed long wol ia. Mi biliv se plante long ol memba oli luk se, seves, i hat blong ol kavenan blong olgeta mo blong stap olsem wan disaepol. Be mi ting tu, se, samtaem hem i isi blong mestem sam long ol bigfala janis blong givim seves long ol narafala from ol samting oli blokem yumi o from yumi stap lukaotem ol bigfala wei blong jenisim wol, mo yumi no luk sam long ol impoten nid we yumi save mitim insaed long ol famli blong yumiwan, long medel blong ol fren blong yumi, insaed long ol wod blong yumi, mo insaed long ol komuniti blong yumi. Hat blong yumi i brok taem yumi luk safaring mo bigfala nid blong olgeta narasaed long wol, be maet yumi mestem, mo yumi no luksave se i gat wan we i nidim blong yumi fren wetem hem, we i stap sidaon narasaed nomo long yumi long klas.
Sista Linda K. Burton i talem stori blong wan stek Rilif Sosaeti presiden we i stap wok wetem ol narafala man, blong kolektem ol blanket blong pipol long nid long yia 1990. “Hem mo gel blong hem i draevem wan trak we i fulap wetem ol blanket, oli aot long London i go long Kosovo. Long rod blong hem i gobak long haos, hem i kasem wan filing long saed blong spirit dip insaed long hat blong hem. Filim ia hemia: ‘Wanem we yu bin mekem hem i wan gudfala samting tumas. Naoia !gobak long haos, wokbaot i go narasaed rod mo givim seves long neiba blong yu!’”3
?Wanem i gud blong sevem wol sapos yumi no wantem lukluk long ol nid blong olgeta kolosap nomo long yumi mo olgeta we yumi lavem tumas? ?Hamas valiu nao i gat i stap taem yumi fiksim wol sapos olgeta raon long yumi oli stap fesem hadtaem mo yumi no luksave? Papa long Heven i maet putum olgeta ia raon long yumi, wetem tingting ia se yumi nao ol stret man blong save mitim ol nid blong olgeta.
Evriwan i save faenem ol wei blong givim seves olsem Kraes i mekem. Kaonsela blong mi, Sista Carol F. McConkie, i talem long mi i no longtaem i pas abaot 10 yia apu pikinini gel blong hem Sarah we, taem hem i luksave se mama blong hem i sik, hem i disaed hemwan blong help. Hem i wekemap smol sista blong hem, helpem hem blong jenis, brasem tut, mekem hea, mo kakae brekfas blong mekem se mama blong hem i save spel. Sera i no blesem mama blong hem nomo, be mi mi save se hem i filim glad blong save se hem i mekem wari blong wan man we hem i lavem i laet, mo taem hem i stap mekem olsem i mekem rilesensip blong hem wetem sista blong hem i kam strong. Presiden Jemes E. Faost i talem: “Givim seves long narafala i save stat long en yia … Hem i no nid blong stap long wan bigfala skel, mo i klin fasin insaed long famli.”4
?Ol pikinini blong yu oli luksave hamas i impoten long papa mo mama blong yu mo ol memba blong famli taem yu lukaotem ol wei blong givim seves long hom? Long olgeta yangfala, blong mekem famli blong yu i kam strong moa mo blong givim seves long famli blong yu, i sud stap insaed long ol top samting blong lukluk long hem fastaem taem yu stap lukluk long ol wei blong jenisim wol. Blong stap soem fasin we i kaen mo wari blong yu long ol pikinini blong yu mo papa mo mama blong yu bae help blong krietem wan filing blong yuniti mo invaetem Spirit insaed long hom. Blong jenisim wol i stat taem yumi mekem i kam strong ol famli blong yumiwan.
Wan nara eria blong lukluk plante long hem long seves blong yumi i long ol famli insaed ol wod long yumi. Samtaem ol pikinini blong mifala bae oli askem kwestin ia long mifala: “?From wanem nao mi mas go long Miutuol? Mi no lanem plante samting tumas long hem.”
Sapos mi gat wan gudfala taem blong tij olsem wan mama, mi bae talem: “?Wanem nao i mekem yu tingting se yu go long Miutuol from samting we yu go blong lanem aot long hem?”
Ol yangfala fren blong mi. Mi promesem yufala se bae oltaem i gat wan man long evri Jos miting we yu go we i stap hemwan, we i stap go tru long ol jalenj mo i nidim wan fren, o i filim se hem i no pat blong wan samting. Yufala i gat wan impoten samting blong givim long evri miting o aktiviti, mo Lod i wantem tumas blong luk yufala raon long ol fren blong yufala, mo afta tij o givhan olsem we Hem bae i mekem.
Elda D. Todd Christofferson i bin tijim, “Wan bigfala risen we Lod i gat Jos i blong krietem wan komuniti blong ol Sent we bae oli sastenem olgeta wanwan “long stret mo smol rod ia we i lid i go long laef we i no save finis.” Hem i go hed blong talem se: “Relijin ia i no tingting long hemwan nomo; be, oli singaot yumi blong givim seves. Yumi nao ol ae, ol han, hed, ol leg, mo nara memba blong bodi blong Kraes.”5
Hem i tru se yumi go evri wik long ol Jos miting blong yumi tekpat long ol odinens, lanem doktrin, mo kasem insperesen, be nara impoten risen blong go long Jos hem i, olsem wan wod famli mo wan disaepol blong Sevya Jisas Kraes, yumi lukaot long wanwan long yumi, yumi leftemap tingting blong wanwan long yumi, mo faenem ol wei blong givim seves mo mekem wanwan long yumi i kam strong moa. Yumi no ol man blong stap risivim mo tekem nomo wanem we jos i givim; yumi nid blong stap olsem ol man blong givim mo saplaem samting. Ol yang woman mo yang man, nekis taem yu go long Miutuol, no pikimap fon blong yu mo luk wanem ol fren blong yu oli stap mekem. Stop, lukluk raon, mo askem yuwan, ?“Hu i nidim mi tedei?” Yu bae save stap wan ki blong go aot mo tajem laef blong wan fren o leftemap tingting blong wan fren we i stap traehad kwaet hemwan nomo.
Askem Papa long Heven blong i soem yu olgeta raon long yu we oli nidim help blong yu mo blong oli givim insperesen long yu long wei we yu save givim gudfala seves long olgeta. Tingbaot se, Sevya, plante taem i helpem wan long wan taem, mo afta wan narawan.
Apuboe blong mitufala, Etan, hem i gat 17 yia. Hat blong mi i glad tumas long sama taem, taem hem i talem long mi se, eksampol blong mama blong hem i bin givim insperesen long hem, mekem se hem i stap prea evri dei blong gat wan janis blong givim seves long wan man. Taem mitufala i stap tugeta wetem famli blong hem, mi luk olsem wan Etan i tritim brata mo ol sista blong hem wetem fasin blong save wet longtaem, lav mo fasin blong stap kaen; mo hem i helpem gud papa mo mama blong hem, mo i lukaotem ol wei blong helpem ol narafala. Mi mi sapraes long wei we hem i save gud ol man raon long hem mo wantem tumas blong hem i blong helpem olgeta. Hem i wan eksampol long mi. Blong mekem olsem we Etan i mekem—blong stap invaetem Lod blong helpem yumi faenem ol wei blong givim seves—bae i letem Spirit blong openem ol ae blong yumi blong luk ol nid raon long yumi, blong luk “wan” ia we i nidim yumi long dei ia, mo blong save olsem wanem blong helpem hem.
Antap long seves blong yu long famli blong yu mo ol memba blong wod blong yu, lukaotem ol janis blong givim seves long neiba mo komuniti. Samtaem bae oli singaot yumi blong help long ol bigfala disasta, long evri dei wokbaot blong yumi oli leftemap tingting blong yumi blong lukaot ol janis long ol eria blong yumi blong leftemap mo helpem olgeta long nid. I no longtaem i pas mi kasem instraksen long wan Eria Presiden, we i stap givim seves long wan kantri we plante oli stap fesem plante jalenj blong laef long wol, se bes wei blong helpem olgeta long nid long ol nara pat blong wol i blong pem wan gudfala fas ofring wetem glad hat, givim mane long Jos Yumaniterian fan mo lukaotem ol wei blong givim seves long olgeta long komuniti blong yu weaples yu stap. !Traem tingbaot olsem wanem wol bae kasem blesing sapos evriwan i folem kansel ia!
Ol brata mo sista, mo speseli ol yut. Taem yu traehad blong kam moa olsem Sevya Jisas Kraes mo folem ol kavenan blong yu, yu bae gohed blong kasem blesing wetem wantem tumas blong yu blong helpem olgeta we i safa mo helpem olgeta we ol nogat janis ia. Tingbaot se sam long ol bigfala nid oli stap long fored blong yu. Statem seves blong yu long hom blong yu mo insaed long ol famli blong yu. Hemia nao ol rilesensip we oli no save finis. Iven sapos—ating speseli sapos—family situesen blong yu i no stret evriwan, yu save faenem ol wei blong givim seves, leftemap, mo mekem wan i kam strong. Statem weaples yu stap, lavem olgeta olsem we oli stap, mo rere from famli we yu wantem gat long fiuja.
Prea from help blong luksave olgeta insaed long ol famli long wod we oli nidim lav mo toktok blong leftemap tingting blong olgeta. Blong mekem se yu no go long jos wetem kwestin ia “?Wanem nao bae mi kasem aot long miting ia?” askem, “?Hu i nidim mi tedei? ?Wanem nao mi save mekem blong help?”
Taem yu stap blesem ol famli blong yuwan mo ol wod memba, lukaotem ol wei blong blesem olgeta insaed long lokol komuniti blong yu. Taem we yu gat taem blong mekem bigfala seves o save givim sam aoa nomo long wan manis, ol hadwok blong yu bae i blesem ol laef, mo tu, i blesem yu long ol wei we yu no save pikjarem.
Presiden Spencer W. Kimball i tijim: “God i luksave yumi, mo hem i stap lukaotgud long yumi. Be plante taem, hem i yusum wan nara man blong lukluk long ol nid blong yumi.”6 Bae yumi wanwan i luksave janis mo blesing we i stap blong tekpat blong finisim wok blong Papa long Heven taem yumi lukluk long ol nid blong ol pikinini blong Hem, hem i prea blong mi long nem blong Jisas Kraes, amen.