Anahn Akan Mwohtail
Pali laud en anahn akan kin kala dierek nan ataial peneinei kan, ward kan, oh wasan kousob kan.
Me keren, kitail iang kadehde lapalahn kahpwal soh kesikpe kei me kawelahr Mexico, United State, Ehsia, Caribbean, Africa. Mwekid wet kasaledahr mwahu en aramas kid kei me widahr soahng tohto pwe irail en kak sewese irail me milahr nan kahpwal de anahn oh irail kan me nsensuwedkilahr arail peneinei me melahr akan. I inenen perenkihda ahi kilang irail peinakapw akan en Texas oh Florida me patehng aramas tohto kei ni arail likauih seht oangoahng kan me Helping Hands ntingie oh iang kamwkamwakelehda ihmw akan me ohkilahr hurricane o. Me tohto pahn men kohla iang sawas wasahu ma e keren. Ahpw mwahu, pwe kumwail kidahr amwail sawas en sewesehda kahpwalo. Amwail kadek oh limpoak me inenen mwuledek duwehte dahme Sises Krais ketin wia.
Rahnwet I men sair ehu soangen wiepen sawas me I pehm me inenen kesempwal ong emen emen kitail sohte lipilipil wasa kitail mihmi ie. Ohng kitail koaros me kilang rohng en mwekid me ahpwtehn wiawi o ahpw ahniki pepehm me e sohte kak sawas, Pasapengo mihmihte mwohtail.
Saounkomouro padahngki, “Pwe me kin men doarehla pein ah mour, e pahn pwupwsang: ah me pahn pangala eh mour pwehki ngehi, e pahn ale.”1Presiden Thomas S. Monson masanih duwen iren pwuhk sarawi wet: “I kamehlele me Sounkomouro mahmasaniong kitail me, ihte ma kitail udahn pahn papah mehtei kan ni mehlel, e pahn mie kahrepen atail mour. Irail kan me kin medemedewehte pein paliwararail oh palingehnirail pahn luwetala oh irail pahn mehla, ah irail me pahn kin papah mehtei kan pahn keirda oh kehlail—oh irail pahn komourla.”2
Kitail momour nan ansou ieu me atail doadoahki cell phone, tablet, de soahng teikan me pid internet wie lalaudla sang atail ehu ong aramas akan me mihmi limwahtail. Kitail weliankida mesmesage de kadar message nan internet sang ni atail pahn pein kilengiehng aramas men oh kouruhr ohng, de pil koskosoipene nan pwungen riemen. Ihte me kitail kediropwkihier meh depe me pahn pwungki de leliki dahme kitail kin kihda nan internet sang atail pwoalehdi kempoakepahtail kan oh kasalehiong atail limpoak ong irail oh tehk dahme udahn arail anahn. E mwahu ma kitail doadoahki internet ong ni pousehwei rongamwahu en Sises Krais oh kin wehwehiong atail peneinei oh kempoakepahtail kan, ahpw ma kitail sohte wehwehki iamwomwen atail pahn doadoahki neitail dipwsou kan, kitail pahn nsenohkihla pein kitail oh manokehla me kahrepen momourki rongamwahu iei en papah.
I ahniki limpoak laud oh pwoson ohng kumwail me pwulopwul kan koaros. I kilangehr oh kehn amwail ineng en papah oh men wekidala mehkot nan sampah. I kamehlele me pali laud en tohn mwomwohdiso ese me papah me wia poahsoan en arail inou kan oh wia karaspen atail pahn idawehn Sises Krais. Ahpw I pil kin medewe me ekei pak e kin mengei en sohte kapwaidapwukoah kesempwal kan me kitail pahn papahki mehteikan pwehki kitail kin pwunodkihda mehteikan de kitail kin raparapahki soahng laud me kitail kak wekidkihla sampah ahpw kitail sohte kilang me mie anahn en sawas laud nan atail peneinei, kempoakepahtail kan, nan atail ward kan, oh atail wasahn kousoan akan. Kitail kin nsensuwedkihla ansou me kitail kin kilang kahpwal oh anahn laud en mehteikan me dohsang kitail ahpw kitail kakete sohte kilang me mie aramas emen me mihmi limwahtail me anahne atail sawas.
Sister Linda K. Burton koasoaiahda soai en Reliefe Society presiden men dene, nan 1990s [kid duwopwiki duweisek] lih menet kin sewese aramas teikan, e kin kihpene tehi oh walahng aramas akan me kin anahne. “Ih oh nah serepeino kin audehkihda sdosahu tehi kohsang London ong Kosovo. Ni ah pwupwuralahng ni imwehu e pehmada pepehm mwahu ehu me inenen sairada nan ah mohngiong. Iet pepehmo: ‘Dahme ke wiahn udahn mwahu. Met samwalahr ni imwomwo, kowe kohla imwen mehn impemo, ohsewese ih!’”3
Ia mwahu en doarehla sampah ma kitail pohnsehse anahn en irail kan me karanih kitail oh irail kan me kitail keieu poakpoake? Iawen kesempwal en kamwahuiala sampah, ma irail me mihmi limwahtail kan mihmi nan kahpwal kitail ahpw sohte tehk? Samatail Nanleng kakete ketkihdoirail kan me anahnei kitail limwahtail pwe E mwangihier me kitail me keieu kak seweseirail.
Aramas koaros kak diarada ahl en sawas me duwehte dahme Sises Krais ketin wia. Me keren nei sounsawas, Sister Carol F. McConkie kosoiaiongie nein nah seri kisin serepein sounpar 10(eisek) men ede Sarah me, ni a sou me e esehda me ah nohnohu soumwahu, e koasoanehdi me e pahn sawas. E panginda rie kisin serepein tikitiko, sewese en likouda, piroasida ngih kau, wiahda moangehu, oh mwengehn menseng pwe ah nohnohu en kak koamoal. E wia sawas pwukat ni sohte me peki pwehki e kilang anahn akan oh inengieng en wia. Kaidehnte Sarah kapereniada ah nohnohu, ahpw I kamehlele me e peren pwehki e sewesehda aramas emen me e poakpoake oh ni ah wiwia met e kakehlailiala ehupenehn nan pwungen ih oh riehu. Presiden James E. Faust koasoaia: “Papah mehteikan kak tepida ni sohte lipilipil en sounpar. … E sohte akahk en paundepe, e wia koasoandi ehu nan peneinei. .”4
Kumwail serih kan eseiawen amwail nohno oh pahpa oh tohn amwail peneinei kin peren ansou me kumwail kin sawas ni imwamwail kan? Kumwail me mihmi nan sounpar en me pwulopwul kan, ih amwail pwukoah keieu laud iei kahkehlailih oh sewese amwail peneinei kan ni ansou kumwail pahn kin sohng en wekidalal sampah. Amwail kadek oh sewese riamwail kan oh amwail nohno pahpa kin sewesehda oh kakairada ehupene oh luke Ngehno ong nan imwamwail kan. Wekidala sampah pahn tepsang nan ahmw peneinei.
Ehu wasa me kitail kak dokehki atail papah iei rehn atail peneinei kan nan atail ward. Ekei pak neitail serih kan kak idek rehtail peidek wet, “Dahme karehda I anahne kohla mutual? I sohte nohn pereniki.”
Ma ansouo I wia nohno de pahpa mwahu, I pahn nda, “Dahme ke medewehki me ke kolahn mutual pwehki ahmw pahn pereniki?”
Kempoakepahi pwulopwul ko, I kak inoukiong kumwail me ansou koaros pahn mie aramas sopwoupwou men wasa me ke kin sarawi iehn, me kin mihmi nan kapwaloh anahne kempoakepah, de kin medewe me sohte me men patehngirail. Mie mehkot kesempwal me ke kak wiahieng nan mihting kan de kemwekid kan, oh Kauno pil kupwurki ke en kilengseli oh kilangada emen me ke pahn sewese duwehte dahme E ketin wiahier.
Elder Elder D. Todd padahngki, “Kahrepe keieu kesempwal me Kauno sapwelimankihki mwomwohdiso iei en wiahda kousoan en souleng ehu me pahn sawas pene nan ahl tehtiko me kolahng mour soutuk.’” E doulahte oh masanih, “Mwomwohdiso wet sohte wiawikihda emente; mehlel kitail koaros malipil ong papah. Kitail me pwoaren mese, peh, moange, neh, oh ekei kisehn palinwar en Krais.”5
Mehlel me kitail kin kohla Sarawi wihk koaros pwe kitail en patehng tiahk sarawi kan, alehdi kaweid kan, oh audaudkihda ngehno, ahpw ehu kahrepe kesempwal ken iang pwe, nin duwen ahmw wia kisehn peneinei en ward oh werek en Sises Krais, kitail pahn sawaspene nan pwungatail, kakehlailih emen emen, oh rapahki soangen wiepen papah oh kakehlailda me ke pahn wiaiong emenemen. Kaidehn kitail pahn alehdihte oh wahsang dahme mwomwohdiso kiong kitail; kitail anahne wia soun kihwei oh wapeseng. Mwahnakapw oh peinakapw akan, nia amwail pahn iang mutual mwurin met, mwohn ahmw pwokada noumw cell phone oh kilang dahme kempoakepahmw kan wiwia, uhdi, kilengseli, oh idek rehmw, “Ihs me anahneie rahnwet?” Ke kak wia kih en sewesehda mour en mehteikan de kakehllailiada kempoakepahmw kan me mihlahr nan kahpwal.
Peki rehn Sahm Nanleng en kasalehiong uhk irail kan me anahne ahmw sawas oh padahkiong uhk ia mwomwen ahmw kak seweseirail. Tamataman me Sounkomouro kalapw padahk ong aramas tohto ansoutehkis.
Mehkot sairie nan summero ansou me nein nait pwutako kisin pwwutak Ethan sounpar 17[eisek isuh] ndahngie me, ngehno kaweid sang ni karasaras en ah nohnohu, eh kapakapki rahn koaros en kak ahniki ansou mwahu en papah emen aramas. Ni aht mihmi nan ah peneinei, I tehkada mwomwen ahn Ethan wiwia ong riehkau ni ah kin kanengamah, limpoak, oh kadek; sawas mwahu ong ah nohno pahpa; oh mwomwen ah men sewese mehteikan. I pereniki mwomwen ah nsenohki aramas akan me mihmi limwah oh ineng en papah irail. E wia mehn karasaras ong ie. Wiwiahn Ethan wia, luke en Kauno en seweseikitail en diarada wiepen atail pahn papah, pil pahn karehiong Ngehno en kapehdangpeseng pwoaren masatail kat kitail en kilangada irail kan me mihmi limwahtail, kilangada “emen” me anahnei kitail rahno, oh en ese ia mwomwen atail kak padahk ong irail.
Me pahn patehng ahmw papah ahmw peneinei oh pil tohn ahmw ward, rapahkihda ansou mwahu en pil sewese mehn mpomw kan oh tohn ahmw kousoan. Ansou me pekipek en sawas ong lapalahn kahpwal soh kesikpe wet, nan rahn akau koaros se rapahki soangen sawas dah me tohn aht ehriahu kak sawaski ong irail kan me anahne sawas. I ahpwtehn alehdi kaweid ehu sang rehn Ehria Presiden men me kin wie pahpa nan whei ehu me diren kahpwal en palinwar, dene ahl me keieu mwahu en papah irail tohn wehi teikan nan sampah me anahne sawas iei en pwain meiroang en kaisihsol, sawaskihda mwohni ong nan Humanitarian Aid Fund, oh rapahkihda ia mwomwen ahmw papah tohn ahmw wasahn kousoan. Na songte medewe ia wen sampah ah pahn akapida ma kitail koaros idawehn kaweid wet!
Rieik ohl oh lihoko, ahpw mehlel irail me pwulopwul kan, ansou me kumwail kin nantiong pwe en duwehla Sounkomour Sises Krais oh momourki inou kan me kumwail wiadah, kumwail pahn aliale kapai iangahki ineng en katikitikiala kahpwal akan oh sewesehda me semwehmweh kan. Tamataman me ekei anahn laud kan kakete sang rehn irail kan me mihmi mwohmwail. Tepda papah sang nan pein imwomw oh pein ahmw peneinei. Ehupene pwukat me pahn kak poatoapoat. Duwehte ma—mwein ihte ma—ma ahmw peneinei sohte pahn mwahu, ke kak diar mwomen ahmw pahn papah, sewesehda, oh kakehlailih. Tepda wasa ke mih ie, poakong irail, oh kaunopada soangen peneinei da me ke men ahniki ehu rahn.
Kapakapki sawas en esehda irail kan nan ahmw peneinei en ahmwward me anahne limpoak oh sawas. Mwahu sang ahmw pahn iang Sarawi oh peidengki “Dahme I pahn alehdisang nan mihting wet?” idek, “Ihs me anahneie rahnwet? Dahme I ahniki me I kak sawaski?”
Ansou me ke kin kapaida ahmw peneinei oh tohn ahmw ward, rapahkihda soangen wiehpe da me ke kak sewesehki tohn ahmw wasahn kousoan. Ma mie ahmw ansou reirei en papah de awahte depe nan ehu sounpwong, ahmw sawaspahn kapaida ahmw mour oh pil pahn kapaiukada ni soangen ahl tohto me ke sohte pahn medewe.
Presiden Spencer W. Kimball koasoia: “Koht mwahngih kitail, oh e kin ketin mahmasanih kitail. Ahpw e kin kalapw doadoahngki emen aramas pwehn kaksewesehda atail anahn akan.”6 Kitail udahn pahn ese me e wia sohso oh kapaiieun nia ahtail pahn kanekehla doaodahk en Samatail Nanleng ansou me kitail pahn sewesehda Sapwellime serih kan met iei ahi kapakap ni mwaren Sises Krais, amen.