O Manaoga i o Tatou Luma
O nisi o o tatou manaoga taua e mafai ona tatou taulimaina o loo i totonu o o tatou lava aiga, i a tatou uo, i o tatou uarota, ma i o tatou nuu.
I nai aso talu ai sa tatou molimauina ai se fuainumera tele o mala faalenatura, i Mekisiko, le Iunaite Setete, Asia, le Atu Keripeane, ma Aferika. Ua faaalia ai le tulaga silisili i tagata a o faia se mea e le faitau afe e fesoasoani ai ia i latou o e na lamatia pe na manaomia ma e na maliliu. Sa ou fiafia i le vaai atu i tamaitai talavou i Texas ma Florida o e, faatasi ai ma isi, na ofuina mitiafu Lima Fesoasoani ma o loo fesoasoani e faamama fale mai mea na faaleagaina ina ua mavae afa talu ai nei. E faitau afe isi o e semanu e fiafia e o atu i nofoaga o loo manaomia tele ai le fesoasoani pe ana le mamao. Nai lo lena, ua outou ofoina atu se foai limafoai e faaitiitia ai le mafatia. O lo outou agalelei ma le agaalofa e musuia ma e faaKeriso.
O le aso, ou te fia tau atua se vaega o le auaunaga ou te lagona e taua mo i tatou uma—e tusa lava po o fea o tatou i ai. Mo i latou o e sa maimoaina talafou o mea na tutupu talu ai nei ma sa lei iloa po o le a le mea e fai, atonu o loo i ai lava le tali i o tatou luma.
Sa aoao mai le Faaola, “Aua ai se fia faasaogalemuina lona ola, e maumau ai ia te ia: a o lē faamaumau i lona ola ona o a’u, e faasaoina e ia.”1 Na saunoa mai Peresitene Thomas S. Monson e uiga i lenei mau: “Ou te talitonu ua ta’u mai e le Faaola ia i tatou, sei vagana ua tatou faamaumau o tatou ola ona o isi, o le a itiiti se faamoemoega o o tatou lava olaga. O i latou o e ola mo na o i latou lava, e iu ina galoma atu le faaleagaga, ma maumau ai lo latou ola, a o i latou o e faaaoga o latou lava ola e auauna atu ai i isi, e ola ma lauusiusi—ma faasaoina ai o latou ola.”2
O loo tatou ola i se aganuu lea ua atili faateteleina lo tatou taulai atu i se tamai lau laitiiti i o tatou lima nai lo tagata o loo siomia ai i tatou. Ua suitulaga le tesi ma savali i ala faasalalau mo le vaai moni i fofoga o se tasi ma ataata atu po ua seasea foi maua se talanoaga faafesagai. Ua tele ina tatou popole pe toafia “tagata e mulimuli mai” ma “mananao” ia i tatou, nai lo le faauouo atu o se uo ma faaali atu le alofa, popole, ma le fiafia moni. E ui o tekinolosi i aso nei e mafai ona maoae i auala e faasoa ai le talalelei a Iesu Keriso ma fesoasoani ia i tatou e tumau ai le fesootai atu i aiga ma uo, a tatou le faaeteete i le auala tatou te faaaoga ai a tatou masini patino, e mafai foi ona tatou taulai ia i tatou lava ma faagalo le ute o le ola ai i le talalelei o le auauna atu.
Ua ia te au le alofa tele ma le faatuatua ia te outou o e o i ai i o outou tausaga o le talavou ma talavou matutua. Ua ou vaai ma lagonaina o outou manao e auauna atu ma faia se eseesega i le lalolagi. Ou te talitonu o le toatele o tagata o le ekalesia e mafaufau i le auauna atu o se vaega autu o a latou feagaiga ma le avea ma soo. Ae ou te manatu foi o nisi taimi e faigofie ai ona misi ni avanoa silisili e auauna ai i isi ona o loo faalavelaveina i tatou pe ona o loo tatou vaavaai mo auala maoae e suia ai le lalolagi ma tatou le vaai ai i nisi o manaoga sili ona taua e mafai ona tatou taulimaina o loo i totonu o o tatou lava aiga, i a tatou uo, i a tatou uarota, ma i o tatou nuu. E ootia i tatou pe a tatou vaai i mafatiaga ma le tele o manaoga o i latou o loo mamao mai tatou, ae atonu tatou te toilalo e vaai o loo i ai se tagata o loo manaomia la tatou faauoga o loo nofo tonu i o tatou autafa i le vasega.
Sa faamatala e Sister Linda K. Burton le tala o se peresitene o le Aualofa a le siteki o le, sa galulue ma isi, e aoina mai ie sosoo mo tagata e manaomia le fesoasoani i le vaitaimi o le 1990. “Sa la ave atua ma lana tama teine se loli e tumu i na ie soosoo mai Lonetona i Kosovo. I lana malaga toefoi i le fale, sa ia mauaina se uunaiga faaleagaga lemafaaseseina lea na goto ifo i lona loto. O le uunaiga lenei: “O le mea ua e faia o se mea lelei tele. Alu loa i le fale, savali atu i le alatele, ma auauna atu i ou tuaoi!’”3
O le a se lelei o le a i ai i le faasaoina o le lalolagi pe afai tatou te faatuatuanai manaoga o i latou e sili ona latalata mai ia i tatou ma i latou e sili ona tatou alolofa i ai? O le a se taua o i ai i le faaleleia o le lalolagi pe afai o loo tauivi tagata o siomia ai i tatou ae tatou te le iloaina? Atonu na tuu e le Tama Faalelagi i latou e manaomia i tatou ia sili ona latalata ia i tatou, aua ua silafia e sili ona fetaui i tatou mo le taulimaina o o latou manaoga.
E mafai e tagata uma ona sailia ni auala e ofo atu ai le auaunaga faaKeriso. Sa ta’u mai e lo’u fesoasoani, o Sister Carol F. McConkie, talu ai nei e uiga i le tama teine a lana tama e 10 tausaga o Sara, ina ua ia iloa ua gasegase lona tina, sa filifili e ia lava e fesoasoani atu. Sa ia fafagu i luga lona uso laitiiti, fesoasoani e fai ona ofu, fufulu ona nifo, fai lona ulu, ma inu lana ti ina ia mafai ona malolo lona tina. Sa ia faia le leoa lenei faatinoga faigofie o le auaunaga e aunoa ma le faatonuina aua sa ia vaaia se mea e manaomia ma sa naunau ai e fesoasoani. E le gata sa faamanuia e Sara lona tina, ae ou te mautinoa sa ia lagona le olioli i le iloaina sa ia faamamaina le avega a se tasi sa ia alofa i ai ma, a o faia, sa faamalosia ai le la sootaga ma lona uso. Sa saunoa Peresitene James E. Faust: “O le auauna atu i isi e mafai ona amataina e toetoe lava o soo se tupulaga. … E le tau faia i se fua maoae, ma e sili ona tamalii i totonu o se aiga.”4
Pe o iloa e a outou fanau le taua tele i o outou matua ma tagata o le aiga pe a outou vaavaai mo ni auala e auauna atu ai i le aiga? Mo i latou i o outou tausaga talavou, o le faamalolosia ma auauna atu i tagata o le aiga e tatau ona i ai i a outou faamuamua maualuga a o outou vaavaai mo ni auala e suia ai le lalolagi. O le faaali atu o le agalelei ma le popole mo o outou tei ma matua e fesoasoani e fatu ai se agaga o le lotogatasi ma valaaulia ai le Agaga i totonu o le aiga. O le suia o le lalolagi e amata i le faamalolosia o lou lava aiga.
O se isi eria o le taulaiga mo a tatou auaunaga e mafai ona faia i o tatou aiga i uarota. O nisi taimi e fesili mai ai le ma fanau, “Aisea e tatau ai ona ou alu i le Mutuale? E faaletele sa’u mea o maua mai ai.”
Afai sa ou maua se taimi faalematua lelei, ou te tali atu, “O le a le mea ua e manatu ai e te alu i le Mutuale ona o se mea e te maua mai ai?”
Au uo talavou e, e mafai ona ou faamautinoa atu o le a i ai lava se tasi i sauniga uma o le Ekalesia e te auai ai o loo tuuatoatasi, o loo feagai ma ni luitau ma manaomia se uo, pe o ia lagona e le o faitaulia. Ua ia te oe se mea taua e saofaga atu i sauniga ma gaoioiga uma, ma e finagalo le Alii e te vaavaai solo i lau tupulaga ona auauna atu lea e pei ona Ia faia.
Sa aoao mai Elder D. Todd Christofferson: “O se mafuaaga tele ua faia ai e le Alii se ekalesia, o le fatuina lea o se nuu o le Au Paia o le a lagolago ai e le tasi le isi i le “ala sa’o ma le vaapiapi lea e tau atu i le ola e faavavau.’” Na ia faaauau, “O lenei tapuaiga e le na o ia lava e popole i ai; ae ua valaauina i tatou uma e auauna atu. O i tatou o mata, lima, ulu, vae, ma isi itutino o le tino o Keriso.”5
E moni tatou te auai i a tatou sauniga Lotu i vaiaso taitasi e faatino sauniga, aoao aoaoga faavae, ma ia musuia, ae o le isi mafuaaga taua tele mo le auai o le, i le avea ma se aiga o le uarota ma soo o le Faaola o Iesu Keriso, tatou te vaavaaia le tasi ma le isi, faamalosiau i le tasi, ma saili auala e auauna ma fefaamalosia’i ai le tasi ma le isi. Ua le na o i tatou o ni e taliaina ma ave mea ua ofoina mai i le lotu; e manaomia foi i tatou ina ia avea ma tagata e tuuina atu ma ni e e sauniaina. Tamaitai talavou ma alii talavou, o le isi taimi e te i ai i le Mutuale, nai lo le piki i luga o lau telefoni e vaai po o a mea a au uo o fai, taofi, vaavaai solo, ma fesili ia te oe lava, “O ai o manaomia au i le aso?” Atonu o oe o le ki e aapa atu ma pai atu i le olaga o se paaga pe tuuina atu se faamalosiauga i se uo o loo tauivi le leoa.
Ole atu i lou Tama Faalelagi e faaali mai ia te oe i latou o siomia oe o manaomia lau fesoasoani ma uunaia oe i le auala sili e auauna atu ai ia i latou. Ia manatua sa masani lava ona auauna atu le Faaola i se tagata e toatasi i le taimi.
O le atalii o le ma tama, o Ethan e 17 tausaga. Sa ou ootia i lenei taumafanafana ina ua ia ta’u mai ia te au e faapea, na uunaia o ia i le faataitaiga a lona tina, e tatalo o ia i aso taitasi ia maua se avanoa e auauna atu ai i se tagata. A o matou faaaluina se taimi ma lona aiga, sa ou matauina le taulimaina e Ethan o ona uso ma tuafafine i le onosai, alofa, ma le agalelei ma e fesoasoani i ona matua; ma vaavaai mo ni auala e aapa atu ai i isi. Sa faagaeetia lava au i lona nofouta mo tagata o loo siomia o ia ma i lona manao e auauna atu ia i latou. O ia o se faataitaiga ia te au. I le faia o le mea o faia e Ethan—o le valaaulia o le Alii e fesoasoani ia i tatou e saili auala e auauna atu ai, o le a mafai ai e le Agaga ona fesoasoani e faapupula o tatou mata ia iloa manaoga o siomia ai i tatou, ia vaai i le “toatasi” o manaomia i tatou i lena aso, ma ia iloa le auala e auauna atu ai ia te ia.
E faaopoopo i le auauna atu i lou aiga ma tagata o lau uarota, vaavaai mo ni avanoa e auauna atu ai i o outou tuaoi ma le nuu. E ui e i ai taimi e talosagaina ai i tatou e fesoasoani atu i se mala ogaoga, ae o aso taitasi ua fautuaina i tatou e vaavaai mo ni avanoa i o tatou lava eria e siitia ma fesoasoani ia i latou o manaomia le fesoasoani. Sa aoaoina au talu ai nei e se Peresitene o le Eria, o loo auauna atu i se atunuu e tele luitau faaletino, e faapea o le auala sili e fesoasoani ai ia i latou i isi vaega o le lalolagi o le totogi lea o se taulaga anapogi limafoai, foai atu i le Tupe o Fesoasoaniga Alofa a le Ekalesia, ma vaavaai mo ni auala e auauna ai ia i latou i lou lava nuu po o fea lava o e nofo ai. Tau lava ina manatu i le faamanuiaina o le lalolagi pe a mulimuli tagata uma i lenei fautuaga!
Uso e ma tuagane, ma e aemaise lava le autalavou, a o outou taumafai e avea atili e pei o le Faaola o Iesu Keriso ma ola i a outou feagaiga, o le a faaauau pea ona faamanuiaina outou i naunauga e faamama i mafatiaga ma fesoasoani ia i latou e le tagolima. Ia manatua atonu o nisi o manaoga silisili o i latou ia o loo outou fesaga’i. Amata lau auaunaga i o outou lava fale ma i totonu o o outou lava aiga. O loo i ai sootaga e mafai ona faavavau. E tusa lava pe afai—ma atonu aemaise lava pe afai—o le tulaga o lou aiga e itiiti ifo ma le atoatoa, e mafai ona e maua auala e auauna ai, siitia, ma faamalolosia. Amata i le mea o e i ai, alofa ia i latou i o latou tulaga o i ai, ma saunia mo le aiga e te fia manao ai i le lumanai.
Tatalo mo le fesoasoani ia e iloa i latou i lou aiga o le uarota e manaomia le alofa ma le faamalosiauga. Nai lo le auai i le lotu ma le fesili “O le a sa’u mea o le a maua mai lenei sauniga?” fesili, “O ai o manaomia a’u i le aso? O le a sa’u mea e saofaga atu?
A o outou faamanuiaina o outou lava aiga ma tagata o le uarota, vaavaai mo ni auala e faamanuia ai i latou i o outou nuu i le lotoifale. Pe o i ai sou taimi mo se auaunaga tele pe na o ni nai itula e mafai ona tuuina atu i se masina, o a outou taumafaiga o le a manuia ai olaga ma manuia ai foi oe i auala e te lei amata mafaufauina.
Na aoao mai Peresitene Spencer W. Kimball: “E silafia i tatou uma e le Atua, ma na te leoleoina i tatou. Ae e masani lava, o se isi tagata e faaauala mai ai lona taulimaina o o tatou manaoga.”6 E tatau ona taitasi i tatou ma iloa o le avanoa e le laumaua ma le faamanuiaga le punouai e faataunuu le galuega a lo tatou Tama Faalelagi a o tatou taulimaina manaoga o Ana fanau o la’u tatalo lea i le suafa o Iesu Keriso, amene.