Plwacn ac Mwe Fahkwack sac
Fahkwack nuh ke sucu pa kahs in ahkkweye luhn Leum nuh ke ma pwacye ke wosasuc kuh enenuh in ahkkweye kuht liki ma elyah ke sucu.
Kahlwem ke mwe fahkwack luhn Alu uh, mempucr ke Alu luhn Jisus Kraist luhn Mwet Luhlahlfongi ke Lwen-sahflah uh ahkinsewowoyeyuck ke mwe luti na wowo ac ohiyac siena ke liye luhn facluh uh. Kuht wi ac finne wo likina met ah ke mukwikwi puhs facluh uh, tuhsruhk oasr kuhtuh pac mukwikwi luhn facluh ma kuht tiac wi ke kuht suk in moulkihn luti luhn Jisus Kraist ac Mwet Sap Lal, kwewana ma met ac ma inge uh.
I.
Ke sie puhpuhlyuck, Jisus el ahkuhtweyac kwaclos suc “lohng pweng uh” tuhsruhk eklac “tiana isus fahko” ke pweng sac “kupoiya” ke “elya lun faclu ac lungse lalos nu ke mwe kasrup uh” (Matthew 13:22). Tohkoh, Jisus el ahkpwacyeyacl Peter ke el tiac nuhnkuh “ma tuku sin God me, a ma sin mwet uh,” fahk, “Ac tuh mwe mea nu sin sie mwet el fin eis lal faclu nufon, a moul lal tuhlac? (Matthew 16:23, 26). Ke luti sahflah Lal, El fahk nuh sin Mwet Sap Lal, “Kowos funu ma lun faclu, na mwt faclu lukun lungse kowos oana mwet lalos: tusruktu kowos tia ma lun faclu, … mwet faclu srungakowos” (John 15:19; oacyacpac liye John 17:14, 16).
Oacpacna, sihm luhn Mwet Sap luhn Jisus met ah pacl nuh kwewa orekmakihn luhmah luhn “facluh” in fahkwack ma siena nuh ke luti luhn wosasuc uh, “Tia etai luman moul lun mwet faclu” (Rome 12:2), Mwet Sap Paul el luti. “Tu ma su mwet faclu pangon lalmwetmet ma lalfon yurin God” (Sie Corinth 3:19). Ac, “Liyaung,” el sensenkackihn, “tuh wangin mwet in akkohsye kowos … ke kutena lalmwetmet kikiap lun mwet, ke sramsram matu lun fwil somlah, liki ngun koluk ma leumi faclu, ac tia ma sin Christ” (Colossae 2:8). Mwet Sap James el luti lah “kawuk lun faclu pa mwet lokoalok lun God[.] Kutena mwet su lunges ma lun faclu el sifacna oru elan mwet lokoalok lun God” (James 4:4).
Puk luhn Mormon kwacna orekmakihn luhmah ma siena liki “facluh” inge. Nephi el palye kuhnanuclac sahflah luhn “elos suc muhsahiyuckyak in pwengpweng ye muhtuhn facluh, ac elos suc suk in … ma luhn facluh” (1 Nephi 22:23; oacyacpac liye 2 Nephi 9:30). Alma el kalyei elos suc “fuhlwactwack … ke ma wacngihn srihpac luhn facluh” (Alma 31:27). Mwemwe lal Lehi ac ahkkahlwemye lah elos ma suk in ukwe iron rod, kahs luhn God, fah puhlakihn ma luhn facluh uh. Mwet ke “lohm luhlahp ac mwesahs” se Lehi el liye ah “kihsen isruhn ac srihsrsrihsr” ke “kihfihn paholos” (1 Nephi 8:26–27, 33). Ke ararama lal kahlwem ke mwemwe se inge, Nephi el lotwelah lah ahkkoluk ac siena inge tuhkuh sin “mwet pucspucs fin facluh, … facluh ac lahlmwetmwetiyac, … insefuhlwact luhn facluh” (1 Nephi 11:34–36).
Meac kalmacn mwe sensen ac ma sap luhn ma suhmuhslah inge ke in tiac ma luhn facluh kuh ma sap mihsenge uh pa in fuhlweack facluh (D&C 53:2). Prestuhn Thomas S. Monson el ahkfototoyelah luti inge: “Kuht enenuh in taran na ke sie facluh ma som loeslac liki ma luhn nguhn uh. Enenuh se tuh kuht in lain ma nuh kwewa ma tiac fahsr fal nuh ke akwuck lasr uh, sruhnga oruh se ma in fuhlweack ma se ma kuht luhngse emet uh: moul ma pahtpaht ke tohkohsrahi luhn God.”1
God El oraclah facluh se inge fal nuh ke plwacn Lal in sang sie acn luhn tuhlihk nguhn Nahtuhl in eis mahno suc pa sie step enenweyuck nuh ke wolacna El kena nuh sin tuhlihk Nahtuhl. Ke oasr kain in tohkohsrahi ac wolacna uh, kena yohk se luhn Pahpah tuhmasr Inkuhsrao nuh sin tuhlihk Nahtuhl pa ma Prestuhn Monson el pahngon “moul ma pahtpaht ke tohkohsrahi luhn God,” suc pa moul ma pahtpaht yurin God luhn sucu. Ma se inge yohk liki na molwelah uh. Prestuhn Russell M. Nelson el ahkacsmakihnye kuht, “Ke plwacn netok luhn God, molwelah uh ma nuh sin kais sie, [tuhsruhk] moul ma pahtpaht yurin God ma nuh sin sucu.”2
Fohlohkyak luhn wosasuc luhn Jisus Kraist ac moklweyuck ke mwe fahkwack luhn sucu suc ngwac sruhmuhn tok, pa luti enenweyuck in ahkoekuhtlac ke moul se inge nuh ke moul ma pahtpaht yurin God uh. Ke kuht ac enenuh in moulkihn masap luhn macruht ac kuhtuh pac facsin ahkmuhnahs facluh uh, elos suc ahkwot nuh ke moul yurin God uh enenuh in oruh sulwaclah lalos sifacna ke moul in sucu uh fal nuh ke ohiyac luhn Leum pacl elos oasr ke ohiyac luhn facluh uh.
Ke moul in mahno se inge, wacngihn esam lasr ke ma met liki isuslac lasr, ac inge kuht puhla ma lain. Kuht kapwack ac mahtuhlah in nguhn ke sulwaclah in ahkos ma sap luhn God sikalweni in nuh sulwaclah na ma wo. Ma inge weacng enenweyacn olwelah ac akwuck ac auliyak pacl sulwaclah lasr koluk uh. Ke lwacyacn sahyac an, fin wacngihnlac luhlahlfongi lasr ke plwacn luhn God ac seahkos kuh tilac oruh ma ma enenweyuck uh, kuht som liki kapwack ac wolac uh. Puk luhn Mormon luti muh, “Moul se inge pa pacl luhn mwet uh in ahkolah in ohsun nuh sin God” (Alma 34:32).
II.
Mwet Luhlahlfongi ke Lwen-sahflah ma etuh plwacn wolacna luhn God uh oasr selos sie akihlen na wowo ke facluh ma kahsrwelos akihlen srihpen masap luhn God, tiac eklac luhn akwuck enenweyuck Lal, ac muhtwacwacyacn ip kunacn Mwet Lahngo lasr, Jisus Kraist. Iwaclah luhn Mwet Lahngo lasr use nuh sesr sie inkacnek in kuhtanglah misac ac, fin kuht auliyak, molikuhtlac liki ma koluk. Ke akihlen sacn, Mwet Luhlahlfongi ke Lwen-sahflah eis kuh in srelah ma yohk srihpac emet ac oruh ac ahkinsewowoyeyuck ke kuh in muhtweng toasr ac kweok ke moul se inge.
Ac sikyak, mukwikwi lalos suc srihke in ukwe plwacn in molwelah luhn God kuh in oraclah nuhnak tiac wo kuh finne tiac insese luhn mwet ke sucu ma tiac luhlahlfongi mwe luti kac uh. Ac oasr pacl nuh kwewa tiac insese se inge. Fihl nuh kwewa ma suk in ukwe plwacn luhn God uh puhlakihn ma upac. Pacl met ah, mwet pahluh Isaiah el tuh sang kuh nuh sin mwet Israel, suc el pahngon “kowos su etu ma suwohs, suc eis mwe luti luk.” Nuh selos el fahkwack, “Nimet sangeng ke mwet uh angon kowos, … ac fahk kas in akkolukye kowos” (Isaiah 51:7; oacyacpac liye 2 Nephi 8:7). Tuhsruhk lah meac oraclah tiac insese nuh selos ma tiac kahlwem kuh luhlahlfongi plwacn luhn God uh, elos ma kahlwem uh wacna sapkihnyuck in sulwaclah ohiyac luhn Leum likina ohiyac luhn facluh uh.
III.
Plwacn luhn wosasuc ma kais sie sucu enenuh in ukwe in ahkolah nuh ke moul ma pahtpaht ac moul yurin God uh tahklac ke mwe fahkwack se ke 1995 luhn Alu uh, “Sucu; Sie Mwe Fahkwack nuh fin Facluh.”3 Fahkwack la, pwacye, siena la liki ma sap pacl ngwe, oruh, ac kahsruh luhn facluh se kuht muhta kac uh. Ke lwen lasr uh, ma siena kahlwem emet uh pa tuhkweni muhta tiac macruht, macruht luhn mukul mukul kuh muhtwacn muhtwacn, ac tuhfahlah tuhlihk ke kain kuhpahsr inge. Elos ma tiacna luhlahlfongi kuh srihke in moul yurin God ac ma pahtokyuck ke ohiyac luhn facluh uh motko mwe fahkwack se luhn sucu inge muh fahk se na luhn ma sap uh suc enenuh in ayaollac. Ke lwacyacn sahyac an, Mwet Luhlahlfongi ke Lwen-sahflah ahkkweye lah mwe ahkkahlwemye luhn sucu ahkuhtweyac kain in kuhpahsr luhn sucu ma ip yohk srihpac emet ke muhsahyak netok lasr uh kuh in sikyak kac.
Kuht mwet loh ke pihsrpihsr ac yohkwelihk insese luhn mwet uh ke tuhkweni muhta tiac macruht ac macruht luhn mukul mukul ac muhtwacn muhtwacn uh. Insese ke petsac in pahtok, lutlut, ac finne suhmaht enenweyuck uh oraclah elyah upac nuh sin Mwet luhlahlfongi ke Lwen-sahflah. Kuht enenuh in srihke in ahkfwelye siyuck nuh ke ukweyacn ma sap luhn wosasuc ke moul ac luti lasr sifacna uh finne ke kuht suk in ahkkahlwemye luhngse nuh sin nuh kwewa uh.4 In oruh ohinge, kuht kuhtuh pacl sun elyah tuhsruhk in tiac sahngweng ma Isaiah el pahngon muh mwet uh “ahngon kowos.”
Mwet eklac ke Mwet Luhlahlfongi ke Lwen-sahflah luhlahlfongi lah mwe fahkwack luhn sucu utuckuh ke apkuhran in yac longoul limekohsr somlah ah ac ingacna lwenglah nuh ke kahs pucspucs, pa ahkuhtweyac wowo ke ma pwacye ke wosasuc luhn Leum kuht enenuh in ahkkweye kuht, ke ma upac in pacl inge ke sucu uh. Mwe srihkasrak luo pa macruht luhn mukul mukul muhtwacn muhtwacn ac tuhkweni muhta tiac macruht. Yac na 18 tukun mwe fahkwack luhn sucu uh, court luhlahp United States sang lwelah ke macruht luhn mukul mukul muhtwacn muhtwacn, Ekuhllah akwuck se ke macruht muhkwena nuh sin sie mukul ac sie muhtwacn ke tausin yac. Percent na ahklut se ke tuhlihk Macrke isuslac nuh sin sie ninac tiac macruht nuh sin pahpah ma kahkahsrihk na kihluck. Percent 5 ke 1960,5 percent 32 ke 1995,6 ac ingena percent 40.7
IV.
Mwe fahkwack ke sucu muhtwacwacack in fahk “lah macruht inmahsrlon sie mukul ac sie muhtwacn ma ahkkweyeyucklac sin God ac tuh sucu uh pa ma yohk se ke plwacn luhn el suc oraclah nuh ke moul netok luhn tuhlihk nahtuhl.” Oacyacpac fahk kuh “lah sie mwet el kuh in mukul se kuh muhtwacn se ma el eis ke moul se el muhta we met liki el tuhkuh nuh facluh ah, ac moul se inge ac moul netok ma pahtpaht.” Ac tahfwelah fahk lah “God el sapkihn lah kuh muhtahl in oraclah tuhlihk enenuh in tuhkuh yurin mukul ac muhtwacn pahyuck se muhkwena.”
Mwe fahkwack se ahkkweyelah tuhtahflah luhn mukul tuhma ac muhtwacn kiyac in isus fahko in puhs ac kunohkohn “muhtahl in luhngse ac karihngihn sie sin sie ac tuhlihk nahtuhlos”: “Tuhlihk uh oasr suwohs lalos in isuslac sin pahpah ac ninac ma pahyuck, ac in tuhfweyucklac sin pahpah se ac ninac suc ahok kuhnlah ac ahkos sie moul luhn sie pahyuck.” Ke muhtahl sensenkihnyuck in wacngihn ahkkoluk nuh sin mukul tuhma muhtwacn kiyac kuh tuhlihk, ac ahkkweyeyucklac lah “Engan ke moul in sucu kuh in wo fin sucu uh moulkihn luti luhn Leum Jisus Kraist.” Sahflah, pahng in pahtok “ma inge in sang karihngihn ac ahkkweye sucu in pa u se ma yohk emet ke acn se uh.”
Ke 1995 Prestuhn se ke Alu uh wi Mwet Sap 14 sahyac tuh use fahk in luti yohk srihpac inge. Ekihn sie fanna sin Mwet Sap itkohsr ah srack moul, nga puhlakihn enenuh se in akacsruhi meac pwacnwacng oasr mwe fahkwack luhn sucu se in etweyuck sin elos kwewa suc nuhnkuh kac uh.
Pihrihkyuck ma ahkkahlwemye enenuh luhn sie mwe fahkwack ke sucu tuh tuhkuh nuh sin mwet kol luhn Alu uh puhs liki yac 23 somlah ah. Mwe lut se nuh sin kuhtuh ma nuhnkuh muh mwe luti pwacye ke macruht ac sucu uh kahlwem tari in wacngihn sulpac fahk kac.8 Ne ohinge, kuht puhla ahkkweyeyuck ac sroacng oruh. Mwe sramsram sacn sollac ac sramsramkihnyuck sin mempucr ke U luhn Singucul Luo ke apkuhran yac se. Kahs uh tohuyak, nuhnkweyuck, ac ahkwoyeyuck. Ke pruhe kuht tahfwelah in siyuck sin Leum ke pihrihkyuck Lal ke ma kuht enenuh in fahk ac enenuh in fahk fuhkah. Kuht kwewa luti “lain nuh ke lain, mwe luti nuh ke mwe luti,” oacna ke Leum El olwelah (liye D&C 98:12).
Ke oruh se ke fwackyuck inge, sie nguhsr ke ma sihmlac tuh ituckyang nuh sin Prestuhnsi se Met, suc pa taran ac fahkwelihk luti ac mwe luti nuh kwewa luhn Alu uh. Tukun Prestuhnsi liye ac oruh pac eklac sahflah nuh kac, na mwe fahkwack ke sucu uh fahkwelihk sin Prestuhn luhn Alu uh, Gordon B. Hinckley. Ke miting se luhn muhtwacn ke Septempuh 23, 1995 ah, el tuh sruhmuhn mwe fahkwack se ke kahs inge: “Ke srihpen nuhnak tiac pwacye puhs luhn facluh ma elos muh pwacye uh, ke srihpen kikiacp ke ma sap ac ma yohk srihpac uh, ke srihpen mwe sruhf ac ahklahlfon in kahkahsrihk ahkfohkfohkyelah facluh, kuht sensenkackihn ac sensenkackihn met liki.”9
Nga fahkwack luhlahlfongi lah mwe fahkwack ke sucu pa sie fahk luhn ma pwacye netok, luhngse luhn Leum nuh sin tuhlihk Nahtuhl suc suk ke moul ma pahtpaht. Pa muhtwacwacyacn luti luhn Alu uh ac oruh ke yac 22 somlah ah ac fah fahlacna nuh ke pacl fahsruh uh. Nuhnkuh in pa inge, luti, moulkihn na kom ac ahkinsewowoyeyuck ke kowos fahsr nuh met nuh ke moul ma pahtpaht.
Yac angaul somlah ah, Prestuhn Ezra That Benson el luti lah “we nuh kwewa oasr srihkasrak nuh selos ac pacl lalos in tu ac ahkpwacyeye sifacna.”10 Nga luhlahlfongi ohiyacsr ac orekmakihnyacn mwe fahkwack luhn sucu uh pa sie sin srihke luhn we se inge. Nga pruhe ke Mwet Luhlahlfongi ke Lwen-sahflah nuh kwewa in tu kuh ke srihke sacn.
Nga kaliyac ke luti lal Prestuhn Gordon B. Hinckley fahk ke yac luo tukun mwe fahkwack luhn sucu tuh fahkwelihk ac. El fahk: “Nga liye sie pacl na wowo tok uh ke sie facluh na upac. Fin kuht sruokyacna ma yohk srihpac lasr uh, fin kuht muhsahyak ke ma wo pahpah ac ninac kiyacsr luti kuht, fin kuht ahkostwen ye muhtuhn Leum, fin kuht moulkihn na wosasuc, kuht ac ahkinsewowoyeyuck ke sie ohiyac suwohs ac wo. Ac fah liyeyuck kuht oacna mwet sollac ma konwacack inkacnek nuh ke sie engan yohk.”11
Nga fahkwack ke ma pwacye ac yohk srihpac netok luhn mwe fahkwack se luhn sucu fwackyak sin Leum Jisus Kraist nuh sin Mwet Sap Lal nuh ke moul yurin God luhn tuhlihk Nuhtin God (liye Doctrine and Covenants 131:1–4), ke inen Jisus Kraist, amen.