Uldasou er a mo Suobel me a Chisel a Telungalek
A chisel a telungalek a moktek ra klemerang ra ebangkelio ra Rubak el kired loltirakl ra cheslel a meringel taem ra telungalek.
Ng bleketakl er a chelsel sel chais er a telungalek el kmo, a rechedal a Ikelesia er a Jesus Kristo er a Uriul-klebesei el Santo a ngeltengat er a ngarbab el osisechakl e kakerous osenged er a beluulechad. Kede teloi e dirrek el ngoriakl er a betok el tekoi er a beluulechad, e ng di ngarngii a bebil er a omeruul el kuk diak ek kired el meruul sel dosiik el mo oltirakl osischeklel a Jesus Kristo me a re Apostol er Ngii, er a irechar me chelechal taem.
I.
Chelsel a cheldecheduch, e a Jesus a mesaod el kirir tirkel “[rognesii] a tekoi” e ng di diak a ngera el “mekedmokl” sel sekum aikel rrenges el tekoi a “metenget” er a “tekingel a beluulechad, me a ngibesereng er a ilteet” (Mateus 13:22). A uriul, e a Jesus a silmecheklii a Petrus el blak a rengul e ra “ikel tekoi el melutk el kirel a Dios, e bai blak a rengul er a tekingel a chad,” e millekoi er ngii el kmo, “Le ngera ng rullii e ra chad, alsekum e ng mo betok a kloklel er a beluulechad, e choridii a klengar ngii?” (Mateus 16:23, 26). A mocha er a orokiolel osischeklel Osobel, e ng dilu er a re Apostol er Ngii el kmo, “A om chedal a beluulechad, e a beluulechad a semeriar kemiu: e ng di kemiu el diak mchedal a beluuelchad, … a uchul e a beluulechad ouketui er kemiu” (Johanes 15:19; dirrek el mesa Johanes 17:14, 16).
Osisiu, e a tekingir tirkel di mla Apostol er a Jesus a blechoel lousbech er a “beluulechad” el uaia lomtok osischeklel ebangkelio. “Lak molngesenges a tekingel a beluulechad” (Rom 12:2), e a Apostol Paulus a ulisechakl el kmo, “Le llemesel a beluulechad a klebelung er medal a Dios” (1 Korinth 3:19). E, millemolem lomeklatk el kmo “Bom kerekikl,” “me lak mechetikaik er a chad … er a uldelid el siukang er a chad, lultuil er a osischeklel a beluulechad, e diak lultuil er a Kristo” (Kolose 2:8). A Apostol Jakobus a ulisechakl el kmo “a deleuill lobengkel a beluulechad a cherreuel a Dios[.] A le uaisei e ngike el sechelil a beluulechad a cherreuel a Dios” (Jakobus 4:4).
A Babier er a Mormon a blechoel lousbech er a “beluulechad” el uaia lultok. A Nephi a ulemlaoch el kirel a klou el tellemall el mo er “tirkel losiik el mo merael chisir er medal a beluulechad, me a dirrek el tirkel losiik … a tekingel a beluulechad” (1 Nephi 22:23; dirrek el mesa 2 Nephi 9:30). A Alma a uleltuub er tirkel “mekididai a rengrir … el kloklel a beluulechad a uchul” (Alma 31:27). A berrusel a Lehi ochotii el kmo tirkel losiik el mo oltirakl, a tekingel a Dios, a mo chemau a ultok er a beluulechad. Tirkel mla er sel “klou e meteteu el blai” el Lehi a milsterir a “uleltuub e oldars” a “chimorir el melenguul” (1 Nephi 8: 26–27, 33). A ues lengiluu el belkul tial berrous, e a Nephi a mlo medengei el kmo a otuub me a ultok a mla er “sel seked er a rechad er a beluulechad, … el lolab a llemesir; … me a mekeldidai el reng er a beluulechad” (1 Nephi 11: 34–36).
Me ngera belkul aika el uleklatk el ngara chedaol llechukl me a llach el diak bo “deteloi er a beluulechad” malechub e sel beches el llach el kired el mo “iikrii a beluulechad” (D&C 53:2). A President Thomas S. Monson a smodii er a ikakid el osisechakl: “Ng kired el mo klekar er tial beluulechad el ngii a kmal mla mo cheroid er sel ngii a chedaol. Ng klou a belkul el dechoit a ngii di el ngerang el diak lultuil er a llach e mo mechei a soad e mo olngesenges er sel kired losiik er ngii el: diak a ulebengelel klengar er a rengedel a Dios.”1
A Dios a milebii tial beluulechad loltirakl er a moktek er Ngii el mo mesterir a Rengelekel er a reng a basio el bol ngarngii e mesuub el ngii a klou a belkul dauch el kirel a klebkall el Ngii a soal a le bo er a Rengelekel. Ng uaisei el ngarngii a kakerous el renged me a klebkall, e ng di sel kmal ngara rengul a Chedam er a Babeluades el kirir a Rengelekel a sel lomekedong er ngii a President Monson el kmo “ng diak a ulebengelel klengar er a rengedel a Dios,” el ngii osebelel a telungalek. Tia lmuut el ngarbab er a di mo suobel. A President Russell M. Nelson a mla omeklatk er kid el kmo, “Chelsel sel diak a ulebengelel luldesuel a Dios, e a di mo suobel a ultuil er a dersta el chad; e ng [di] a diak a ulebengelel klengar a melutk el bedul a telungalek.”2
A mla moluut el ebangkelio er a Jesus Kristo me a tial omekellomes el chisel a telungalek, el bo kusaod er ngii ruriul, a meklou a belkul osisechakl lomekrael er kid er a kedmekled er tial beluulechad el kirel a diak a ulebengelel klengar. Ng uaisei el de kiei el ngara chelsel a llechul a chebechiil me a bebil er a uldelid el teletael er tial mekengte el beluulechad, e tirkel tir a melasm el kirel a diak a ulebengelel klengar a kirir el tibir er a uldesuir er a klengar er a telungalek er tir loltirakl er a Rubak el diak loltirakl er sel ngii a kuk ngodech el teletael er a beluulechad.
Chelsel tial klengar er a beluulechad, e ng diak a klemedengei er kid er sel klengar ruchei er a cheroll, e chelecha kede chelbangel a ultok. Kede mukeroul e mo mesisiich er a chedaol tekoi sel dolilt lolngesenges a llechul a Dios sel dungil melilt. Tia uldimukl er ngii a chedaol ruoll me a telbiil me a ouchul reng er a kengtid sel dengiltii a mekngit. E a kuk bitang, e sel lak a klaumera er kid er a moktek er a Dios e lak dolngesenges a llechul malechub eng diak doruul aikel kirel kedmekill, e kede metom er a ulekeruled er a chedaol tekoi. A Babier er a Mormon olisechakl el kmo, “Tial klengar a taem el chad a mengedmokl er ngii el mo er medal a Dios” (Alma 34:32).
II.
A Uriul-klebesei el Santo el medengelii a uldesuel a Dios el kirel a mo suobel a mui a klemedengei er tir el kirel a beluulechad el ngosuterir el mesang a uchul e ngarngii a llechul a Dios, me a diak el mengodech el teletelel a chedaol ruoll, me a sel tokubets el ngerchelel Osobel, el Jesus Kristo. Sel Tngakireng er a Osobeled a sobecheklid er a kodall, e a douchel a rengud er a kengtid, e ked emo suobel er a kengtid. Tiaikid el klemedengei er kid er a beluulechad, e a Uriul-klebesei el Santo a ngodech a moktek me a ikel loruul el tekoi e ngeltengat er a klisichir el otekangel a ongarm me a ringel er tial klengar.
Ng bleketakl, el tirkel melasm loltirakl er a uldesuel a Dios er a mo suobel a sebechir el muchel a diak e lungil klaodengei malechub a mondai lobengterir a rechedal a telungalek er tir malechub a resechelirir el tir a diak loumerang a osisechakl er a chelsel. Aika el mondai a melemolem el di ngarngii. A bek el telcheroll el mla melasm e loltirakl er a uldesuel a Dios a di mla mo obangel olibesongel. A irechar, e a profet Isaiah a millisiich er a rechad er a Israel, el ngii omekedong er tir el kmo “te medengelii a llemalt, … el llechukl a llechuk er a rengrir,” e ng millekoi er tir el kmo, “Lak ko medakt a otuub er a rechad, e lak bo medakt a tekingir” (Isaiah 51:7; dirrek el 2 Nephi 8:7). E ng di ngii di luchul a mondai lobengterir tirkel diak lodengei malechub e te diak loumera er a uldesuel a Dios, e tirkel loumerang a blechoel kirir el melilt er a teletelel a Rubak e diak e loltirakl er a teletelel a beluulechad.
III.
A moktek er a ebangkelio el kirel a dersta el telungalek loltirakl er ngii el kirel a diak a ulebengelel klengar a llechukl er sel chais el tilobed er a Ikelesia er a 1995 el, “Telungalek: Chais el mo er a Beluulechad.”3 A tekoi er a chelsel, a uaisei, el bleketakl el ngodech er a llach, omeruul, me a teletelel a beluulechad el kid a kiei er a chelsel. Chelechal sils, eng kmal bleketakl a delengchokl er a rechad el diak el bechiil, chebechiil er a sechal me a sechal me a redil me a redil, e omekeroul er a rengalek er a chelsel aikaikid el teletael. Tirkel diak loumerang malechub e lolsingch el kirel a diak a ulebengelel klengar a kmal mui el mechetakl er a teletael er a beluuelchad a omdasou er tial chisel a telungalek el kmo ng kuk di llach el kirel mengodech. E ng di a Uriul-klebesei el Santo a mui el medengei el kmo sel chisel a telungalek a smodii a teletelel a deleuill er a telungalek el sel kot el klou a belkul telengtengil a diak a ulebengelel klengar el kid a debetik er ngii er a chelsel.
Kede mla sioning er a klungel a kengei e ra buai el kirel a klausechelei e diak el kaubuch me a chebechiil er a sechal me a sechal me a redil me a redil. A media oldubech er tial teletael, me a skuul, me a dirrek el tekoi er a skel a ureor me ng tara olibesongel el mo er a Uriul-klebesei el Santo. Ng kired el mo ungil mii a teleteled er a otirekled er a ebangkelio er a klengar kid me a osisechakl e melemolem el betik a rengud er a rokui el chad.4 Sel bo deuaisei, e a le bebil er a taem e ked e mo obangel, e diak el kired el medakt, er sel lolekoi e rngii a Isaiah el kmo “ng otuub er a rechad.”
A re mla obult el Uriul-klebesei el Santo a oumerang el kmo a osisechakl er a chelsel sel chisel a telungalek, el tilobed er a kmeed el lluich me a eim el rak er a memong, a loba Rubak el lmuut lomeklatk el kirel a klemerang er a ebangkelio el ngosukid er a ikel ongarm el soiseb er a telungalek. A eru el okesiu a chebechiil er a sechal me a sechal malechub a redil me a redil me tirkel di dmak el kiei e diak el bechiil. Lluich el rak ruriul er a le muchais tial chisel a telungalek, e a Ngarbab el Kort er a Beluu er a Merikel a kongei a chebechiil er a delongelel a sechal me a sechal me a redil me a redil, el kmal mla meltii tial mla mo tela el telael el rak el tekoi el kmo a chebechiil a di mekedmokl er a delongelel a sechal me a redil. E a mechas a rengud er ngii el basent er a rengalek el mechell er a Beluu er a Merikel el chedil a diak el bechil a chedam a mlei ruriul: eim el basent er sera 1960,5 okedei me a eru el basent er a 1995,6 e chelechang e ngobdois er a okeua el basent.7
IV.
Sel chisel a telungalek a omuchel el melekoi el kmo a “chebechiil er a delongelel a sechal me a redil a mechedaol er a Dios e a telungalek a ngii a moktek er a uldesuel Omeob el kirel a diak a ulebengelel klengar el mo er a Rengelekel.” Ng dirrek el meketeklii el kmo a “klsechal malechub a kleredil a klou lolchotel a dersta el chad er sel klengar ruchei, me a klengar chelechang, me a uriul klengar me a moktek er ngii.” Ng melemolem el melekoi el kmo a “Dios a mla dmu el kmo a chedaol klisiich lomeob er a rengalek a kirel di mekedmokl er a delongelel a sechal me a redil, el tir a kaubuch e ulengakl el obekel.”
Tial chais a meketeklii a ngerchelel a sechal me a redil el mo betok a rengelekir e longedereder er a beluulechad me a dirrek el “ngerchelir el mo kaubeltik el reng e omekerreu er a ta me a tang me a rengelekir”: “A rengalek a kirir el mechell er a chelsel a chebechiil, e mukeroul er a chedam me a chedil el tir oltirakl a kelulul a chebechiil.” Ng omeklatk el kirel diak domekringel er a bechid malechub a rengeleked, e dirrek el melekoi el kmo a “deureng er a telungalek a sebechel mekedmokl alsekum e kede ultuil er a osischeklel a Rubak el Jesus Kristo.” E a ulebongel, e ng sel ngaruchei e ngarbab el odubech el “mengeluolu e melisiich a telungalek el ngii a dodai er a beluu.”
Sera 1995, e a Merredel er a Ikelesia me a teruich me a teua el Apostol er a Rubak a ultobed aikal meklou a belkul osisechakl. E ngak el chimo er tirkel teuid el Apostol el dirk ke kiei, e a kumelchesiu louchais er kemiu el kmo ng mlekera tial chisel a telungalek e mekedmokl me bo lodengei tirkel loltirakl er ngii.
A ulekrael luldasou el kirel a usbechellel tial chais el kirel a telungalek a mlei er a remengeteklel a Ikelesia er a kmeed el lluich me a edei el rak er a memong. Ng mlo mechas a rengrir a rebetok el chad el tir a ulemdasou el kmo a klemerang el osisechakl el kirel a chebechiil me a telungalek el di bla lodengei a diak el kirir lomelekl.8 E ng di, aki ulemelchesiu er a oterkeklel a reng e omechela er a ureram. Ng mlengilt e mesaod a tekoi lokiu a rechedal a Chelechad er a Teruich m ea terung el kmeed el tal rak. A tekoi er a chelsel a mle keldmokl, e mloues, e lmuut omelchesel. Aki mla er a nglunguuch lolengit er a Rubak me lomekrael er kemam er a ki bo mdung el tekoi e mekera ki bo molekoi. Aki rokui el silubii a dersesei, el suobel er a ta el taem, el ua ikel bla el yaksok a Rubak (Mesa D&C 98:12).
Chelsel tial teletael er a chedaol ocholt, e a mla mekedmokl el lecheklel a mlocholt er a First Presidency, el tir a omekrael e mchisii a teletael er a osisechakl me a suobel er a Ikelesia. Uriul er a First Presidency er a lekedmokl a bebil er a ngeldechel, e tial chais el kirel a telungalek a mlechuiu lokiu a Merredel er a Ikelesia, el Gordon B. Hinckley. Sel miting er a redil el mlarngii er a September 23, 1995, e ngulechotii tial chais lolab aikakid el tekoi: “Ng kmal betok el blulak el uldasou er a beluulechad a oleko ng klemerang, me a betok el ongetikaik lomtok a llach me a ungil teletael, me a betok el omengesuseu el teletael el ngarngii er a beluulechad, e a ki omelchesiu lomeklatk e lmuut lomeklatk.”9
A kuchais el kmo sel chais el kirel a telungalek a meral kirel a diak a ulebengelel klemerang, el ngii a moktek er a Dios el kirir a Rengelekel el tir a osiik er a diak a ulebengelel klengar. Ng mla mo dodai er a osisechakl me a omeruul er a chelsel a Ikelesia e ra ika el mereko el lluich me a eru el rak e melemolem el mo er medad. Momes er ngii el uaisei, e molisechakl er ngii, e mkiei loltirakl er ngii, e kemiu a mo ngeltengat sel molemolm el merael bedul a diak a ulebengelel klengar.
Okeua el rak er a memong, e a President Ezra Taft Benson a ulisechakl el kmo “a bek el telcheroll a di ngarngii a skeng me a techall el di tir lolecholt er tir.”10 A kumerang el kmo a blekerdeled el kirel me a usbechelled er tial chisel a telungalek a ta er a ikaikid el skeng er chelechal telcheroll. Nglunguchek me a rokui el Uriul-klebesei el Santo bol dechor el mesisiich er tir er tial skeng.
Ak mengesimer lolab osischeklel a President Gordon B. Hinckley ledilung er a eru el rak ruchei er a le muchais tial chisel a telungalek. Ng millekoi el kmo: “Ak mesang a klebokel el ngara medad el taem er a chelsel a chetituokel el beluulechad. Omko ked emo urrekodel osischekled, omko kede meleketek osischeklir a redemad me a redelad me a rebeldeked, omko kede mo kiei lolngesenges er a Rubak, omko ked emo oltirakl er a ebangkelio e ked emo mukngeltengat er a chelsel a klebokel e meang el teletael. Kede mo mocholt el ngellitel el chad el mla metik er a rael el kirel a deureng.”11
A kuchais el kirel a klemerang me a diak a ulebengelel klou el ultutelel er tial chais el kirel a telungalek, el mlocholt lokiu a Rubak el Jesus Kristo el mo er a re Apostol er Ngii el kirel a diak a ulebengelel klengar el mo er a Rengelekel (mesa Doctrine and Covenants 131:1–4),el ngara ngklel a Jesus Kristo, amen.