Li tijonelil ut lix wankil aj tojol-ix li Kolonel

K’oxla junaq li cohete k’ojk’o sa’ xb’een junaq na’ajej re kutuk cohete li yoo chi kawresiik re kute’k. Anajwan, k’oxla naq naloch. Lix ya’al, lochb’il chi nim, na’ok jo’ li gas jwal tiq li na’el chi kaw, xk’eeb’al xmetz’ew re naq taakute’q sa’ choxa. Sa’ xraqik, k’oxla li k’a’ru naxk’am chaq li cohete aran chaq chi tzuul. Lix loq’al li k’a’ru naxk’am chaq nak’utun chi tz’aqal ka’ajwi’ naq nawulak b’ar tento taawulaq ut nak’anjelak jo’ tento taak’anjelaq. Ink’a’ na’ajman ru naq laa’at junaq aj tzolol cohete re xk’eeb’al reetal naq jun li satelite terto xtz’aq re numsink esil chiru ruchich’och’ maak’a’ xloq’al wi yal wan sa’ jun li k’uuleb’aal. Lix k’anjel li cohete a’an xk’amb’al chaq k’a’ruhaq toj’ sa’ xna’aj.

Sa’ li q’ojyin a’in nawaj raj xjuntaq’eetankil li tijonelil wan qik’in rik’in jun li cohete ut li qosob’tesinkil re tz’aqonk sa’ lix wankilal aj tojol-ix li Kolonel rik’in li k’a’ru naxk’am chaq li cohete.

Xb’aan lix mayej aj tojol-ix, li Jesukrito wan xwankil re xtojb’al rix chixjunil li winqilal. Re naq lix wankil aj tojol-ix wanq choq’ qe chiqajunilo, a’an xkanab’ahom jun raqal lix wankilal reheb’ li winq sa’ xb’een li ruchich’och’. Li wankilal kixkanab’ naxk’ab’a’in li tijonelil. A’an nak’ehok xliceens li ani neke’k’amok re chixtenq’ankil li qaChoxahil Yuwa’ ut li Jesukristo sa’ lix k’anjel—xk’eeb’al chi uxmank li kolb’a-ib’ ut li taqenaqil loq’al reheb’ li ralal xk’ajol li Dios. Naxb’aanu chi jo’kan xb’aan naq naxk’e xhoonaleb’ li ralal xk’ajol re xk’ulb’aleb’ li osob’tesink re lix wankilal aj tojol-ix li Kolonel.

Lix wankilal aj tojol-ix li Jesukristo jwal aajel ru xb’aan naq maajun qe laa’o naru nokoq’aj sa’ li qachoxahil ochoch chi maak’a’ qatenq’ankil. Sa’ li yu’am sa’ ruchich’och’, rajlal nokosach ut naqamux lix chaq’rab’ li Dios. Tz’aj qu nokokana xb’aan li maak ut ink’a’ tookanab’aaq chi q’ajk wan wi’ li Dios. Aajel ru choq’ qe lix wankilal aj tojol-ix li Kolonel re taqak’am wi’chik qib’ sa’ usilal rik’in li qaChoxahil Yuwa’. Li Jesukristo kixt’up lix b’ak’leb’ li kamk sa’ tib’elej, ut chi jo’kan chiqajunilo taaruuq toowakliiq chi yo’yo. Naxk’e xkuyb’al li qamaak, wi na’ux li ab’ink chiruheb’ lix chaq’rab’ ut lix k’ojob’anb’il k’anjel lix evangelio. Rik’in li Jesukristo, nayeechi’iman li taqenaqil loq’al. Naq naru taqak’ul lix wankilal aj tojol-ix li Kolonel, a’an li k’a’ru jwal nim xloq’al li naxk’am chaq li Yo’ob’tesink.

Re naq li rajom li qaChoxahil Yuwa’ taa’uxmanq, lix wankilal aj tojol-ix li Kristo tento naq taawanq choq’ reheb’ li ralaj xk’ajol li Dios.¹ Li tijonelil naxk’am chaq a’in. A’an a’an li cohete. Li tijonelil jwal aajel ru xb’aan naq eb’ li k’ojob’anb’il k’anjel ut li sumwank aajeleb’ ru sa’ li ruchich’och’ neke’k’anjelaak ka’ajwi’ rik’in lix wankilal a’an. Wi ta li tijonelil namaajelo’ sa’ xk’amb’al chaq lix wankilal aj tojol-ix li Kolonel, k’a’ raj ru li rajom wanq? Ka’ajwi’ raj junaq li cohete ch’ina-us re ile’k? li Dios naroyb’eni naq taa’oksimanq li tijonelil re xk’amb’al chaq li k’a’ru naxk’am.

Li kok’ xcha’alil li cohete ink’a’ us naru naq tixk’e chi maajelo’k lix k’anjel. Xletzb’al ink’a’ us ut xtawajik li ch’iich’ naru nak’e chi po’ok li cohete. Re xkolb’al rix li tijonelil chiru xletzb’al ink’a’ us ut xtawajik li ch’iich’, li Dios jwal naxk’e reetal ani aj-e naxk’e jo’ ajwi’ chanru na’oksiman.² Xk’eeb’al li tijonelil jwal k’uulanb’il rub’el lix laawil li tijonelil, li k’ulub’ej re jolomink k’eeb’il re li winq.³ Roksinkil li tijonelil k’uulanb’il ajwi’ xb’aan lix laawil li tijonelil a’ut jo’a ajwi’ xb’aaneb’ li sumwank neke’ok wi’ laj k’amol re li tijonelil. Lix taql li tijonelil k’eeb’il re chixjunjunqal ut ink’a’ nawan xwankil chi maak’a’ a’an;⁴ li tijonelil maawa’ jun wankilal xjunes rib’.

Li Tijonelil re Aaron jo’ ajwi’ re Melkisedek neke’k’ule’ rik’in sumwank.⁵ Li Dios naxk’uub’ li Sumwank ut li winq naxk’ulub’a. Eb’ laj k’amol re li tijonelil neke’ok sa’ aatin naq te’xtenq’a li Dios sa’ lix k’anjel. Sa’ xtiklajik li k’ojlajik a’in, li Jesukristo kixch’olob’ naq li sumwank re li tijonelil a’an “k’ojob’anb’il sa’ eeb’een choq’ eere laa’ex; ut moko ka’aj ta wi’ choq’ eere, choq’ re ajwi’ chixjunil li ruchich’och’ … xb’aan naq ink’a’ neke’chal wik’in.”⁶

A’an naxk’ut naq li rajom li tijonelil a’an xb’oqb’aleb’ li kristiaan chi chalk rik’in li Kristo rik’in xtenq’ankileb’ chixk’ulb’al li evangelio k’ojob’anb’il wi’chik. Wan li tijonelil qik’in re xtenq’ankileb’ li ralaj xk’ajol li qaChoxahil Yuwa’ re naq te’ach’ab’aaq chiru li raalal li maak ut te’wulaq jo’ chanru a’an. Rik’in li tijonelil, lix wankil li choxahilal naxk’utb’esi rib’ sa’ lix yu’ameb’ chixjunil li ani neke’xk’uub’ ut neke’roxloq’i li sumwank re li evangelio ut neke’xk’ul ajwi’ li k’ojob’anb’il k’anjel re a’an.⁷ Chi jo’kan, chiqajunjunqal nokochal rik’in li Kristo, nasaqob’resiik qu, ut naqak’am wi’chik qib’ sa’ usilal rik’in li Dios. Lix wankilal aj tojol-ix li Kristo naru natawman rik’in li tijonelil, li naxk’am chaq qe.

Eb’ li sumwank noko’ok wi’ rik’in li Dios tiikeb’ tz’aqal. Jun li winq tento tixkawresi rib’, taatzoloq chirix, ut taa’ok sa’eb’ li Sumwank a’in rik’in rajb’al chiroxloq’inkileb’. Jun sumwank nawulak jo’ li yeechi’ink-ib’ sa’ jun xaqab’anb’il aatin. Laj Rober Bolt, jun aj tz’iib’anel aj Inglaterra kixye naq jun li winq naxk’uub’ jun li sumwank ka’ajwi’ naq naraj xteneb’ankil rib’ chi tz’aqal sa’ jun li yeechi’ihom. Naxk’e reetal lix yaalil li yeechi’ink rik’in lix saq ruhil na’leb’ xjunes rib’. Naq jun li winq naxk’uub’ jun li sumwank, naxchap rib’ xjunes, jo’ li ha’, sa’ li ruq’. Ut wi naxte li ruq’, maajun wa chik tixtaw rib’. Li ani naxmux li sumwank ink’a’ chik naxtaw rib’ re xteneb’ankil rib’ malaj xyeechi’inkil k’a’ruhaq.⁸

Jun aj k’amol re li tijonelil re Aaron na’ok sa’ aatin naq tixtz’eqtaana li maa’usilal, tixtenq’aheb’ li ras riitz’in chixk’amb’al wi’chik rib’ sa’ usilal rik’in li Dios, ut tixkawresi rib’ re xk’ulb’al li Tijonelil re Melkisedek.⁹ Naxb’aanu li santil teneb’ank a’an naq nak’utuk, nakub’sin ha’, naxkawob’resiheb’ li komon re li Iglees, ut naxb’oqeb’ li jun ch’ol chik chixkulub’ankil li evangelio. A’an a’in lix k’anjel jo’ chanchan li cohete. Re xq’ajkamunkil, li Dios naxyeechi’i yo’onihom, xkuyb’al xmaak, lix k’anjeleb’ li anjel, ut lix laawil li evangelio re li jalb’a-k’a’uxlej ut li kub’iha’.¹⁰

Jun aj k’amol re li Tijonelil re Melkisedek na’ok sa’ aatin naq tixtz’aqob’resi ru lix teneb’ankil li Tijonelil re Aaron ut tixnimob’resi lix b’oqb’al sa’ li Tijonelil re Melkisedek.¹¹ Naxb’aanu a’in naq na’ab’ink chiruheb’ li taqlahom re li sumwank. Eb’ li taqlahom a’in neke’xpatz’ naq “[taa’ab’inq] chi yalb’il [xq’e] chiru li aatin re li junelik yu’am” rik’in xyu’aminkil li junjunq chi aatin li na’el chaq sa’ xtz’uumal re li Dios,¹² xch’olob’ankil xyaalal li Jesukristo ut lix k’anjel sa’ roso’jikeb’ li kutan,¹³ ink’a’ xnimankil rib’,¹⁴ ut wulak jo’ ramiiw li Kolonel, xkanab’ankil rib’ chiru jo’ tixxb’aanu raj junaq amiiw.¹⁵

Re xq’ajkamunkil, li Dios naxyeechi’i re jun laj k’amol re li Tijonelil re Melkisedek naq tixk’uleb’ li laaw re xtawb’al ru lix muqmuukil na’leb’ li Dios. Taawulaq chi tz’aqal re ru re naq taaruuq chi xaqliik chiru li Dios. Taaruuq tixtz’aqob’resi ru lix k’anjel sa’ li k’anjel re li kolb’a-ib’. Li Jesukristo tixkawresi li b’e chiru aj k’amol re li tijonelil ut taawanq rik’in. Li Santil Musiq’ej taawanq sa’ li raam ut eb’ li anjel te’xtaqsi. Lix tib’el taakawresiiq ut taa’ak’ob’resiiq. Taareechani li rosob’tesinkil laj Abraham ut, rochb’een li rixaqil, te’ok choq’ sum’eechaninel rik’in li Jesukristo sa’ li rawa’b’ejihom li qaChoxahil Yuwa’.¹⁶ A’aneb’ a’in li “chaq’al ru ut xninqal ru li yeechi’ihom.”¹⁷ Maajun yeechi’ihom xninqal wi’chik ru chiru a’in naru nak’oxlaman.

Re li junjunq chi winq li nak’uluk re li Tijonelil re Melkisedek, li Dios naxk’ojob’eb’ lix yeechi’ihom re li sumwank rik’in xaqab’anb’il aatin.¹⁸ Li xaqab’anb’il aatin a’an ka’ajwi’ re li Tijonelil re Melkisedek,¹⁹ ut a’an li Dios li naxxaqab’ li aatin, ink’a’ li ani nak’amok re li tijonelil.²⁰ Xb’aan naq li k’anjel a’in naxk’am chaq lix choxahil wankil ut wankilal, li Dios naroksi li xaqab’anb’il aatin ut naroksi li aatin jwal ch’olch’o ru naru re xk’ojob’ankil qach’ool chirix lix yeechi’ihom li ink’a’ naru neke’jalman ru.

Xmuxb’al li sumwank re li tijonelil ut xkanab’ankil chixjunil li wan reheb’ tixk’am chaq li kawil q’ajkamunkil.²¹ Rilb’al jun li b’oqleb’ sa’ li tijonelil chi maak’a’ rajb’al malaj chi maak’a’ rajom a’an chanchan xch’ikb’al li tawaak sa’ xcha’alil lix k’anjeleb’aal jun li cohete. Naxk’e sa’ xiwxiw li sumwank re li tijonelil xb’aan naq naru naxk’e chi maajelo’k li k’anjel. Li q’etok chiru lix taqlahom li Dios naxjor li sumwank. Chiru li ani rajlal najorok re li sumwank ut ink’a’ naxjal xk’a’uxl, neke’isiik li yeechi’inb’il osob’tesink.

Wiib’ oxib’ chihab’ chaq anajwan, kin’ok chixtawb’al ru chi us chanru neke’xk’am rib’ li “cohete re li tijonelil” ut li “osob’tesink re tz’aqonk sa’ lix wankilal aj tojol-ix li Kristo.” Sa’ jun xraqik li xamaan, wan wiib’ lin k’anjel. Jun reheb’, a’an xk’uub’ankil li xb’een oqech sa’ jun li tenamit, ut li jun chik a’an raatinankil jun li saaj winq ut, wi tustu ru chixjunil, xk’eeb’al wi’chik li tijonelil choq’ re ut li rosob’tesihom li santil ochoch. Li winq a’in, wan tana 30 chihab’ re, ki’ok sa’ li Iglees naq toj ch’ajom chaq. Xko’o sa’ li mision, a’b’an naq kiq’aj sa’ li rochoch, ki’el sa’ li b’e ut kixsachb’esi li rajlil jo’ komon sa’ li Iglees. Chirix junjunqeb’ li chihab’ “kiq’aj chaq,”²² ut rik’in xtenq’eb’ laj jolominel sa’ li tijonelil ut li chaab’il komon, kixjal xk’a’uxl ut kik’ulman wi’chik sa’ li Iglees rik’in li kub’iha’.

Moqon, kixpatz’ naq taak’eemanq wi’chik re li tijonelil ut li rosob’tesihom li santil ochoch. K’uub’anb’il chaq naq taqach’utub’ qib’ sabado sa’ lajeeb’ oor re eq’la sa’ li ch’utamil kab’l. Naq kinwulak re raatinankileb’ jalaneb’ chik li komon mas eq’la, a’an ak wan aran. Jwal wan lix ch’ool chixk’ulb’al wi’chik li tijonelil, ut kiraj ru naq lix hoonalil taawulaq.

Chiru li aatinak, kink’ut chiru jun li hu li naxch’olob’ naq li Awa’b’ej Thomas S. Monson kiril lix patz’om ut kixk’ulub’a naq too’aatinaq. Li saaj winq a’an, kiyaab’ak. Jo’kan ut kinye re naq lix kutankil li ch’utam a’in ink’a’ taawanq chi tz’iib’anb’il chi moko jultikanb’il sa’ xyu’am. Sachso xch’ool jo’ kinril. Kinye re naq chirix naq tink’e wi’chik re li rosob’tesihom, li rajlil jo’ komon ka’ajwi’ tixk’ut lix kutankil xb’een xkub’iha’, xk’ojob’ankil, xk’ojob’ankil sa’ li tijonelil, ut xtiqib’ankil sa’ li santil ochoch. Haye’ ki’ok chi yaab’ak wi’chik.

Kinpatz’ re naq taaril ru jun raqal sa’ li Tzol’leb’ ut Sumwank:

“K’ehomaq reetal, ani xjal lix xk’a’uxl chirixeb’ lix maak, a’an ajwi’ kuyb’ileb’ lix maak, ut laa’in, li Qaawa’, ink’a’ chik neke’jultiko’ we.

“Jo’ka’in naru teenaw ma naxjal xk’a’uxl junaq li winq chirixeb’ lix maak—k’ehomaq reetal, tixch’olob’eb’, ut tixkanab’eb’.”²³

Li xsa’ ru kinujak rik’in xya’al ru sa’ rox sut. Chirix a’an kink’e li wuq’ sa’ xb’een lix jolom ut, sa’ xk’ab’a’ li Jesukristo ut rik’in lix wankilal li Tijonelil re Melkisedek, ut chi k’eeb’il inwankil xb’aan li Awa’b’ej re li Iglees, kink’e wi’chik li tijonelil ut li rosob’tesihom li santil ochoch re.

Li sahil ch’oolejil kiqeek’a jwal nim. A’an kixnaw naq wan wi’chik lix k’ulub’ re xk’amb’al ut xk’anjelankil lix tijonelil li Dios. Kixnaw naq li rosob’tesihom li santil ochoch wan wi’chik choq’ re. Kib’eek chi sa wi’chik xch’ool ut kixk’utb’esi li saqen re sahil ch’oolejil. Kiweek’a xsahil inch’ool chirix a’an, ut kiweek’a naq sa ajwi’ xch’ool li qaChoxahil Yuwa’j rik’in a’an.

Chirix a’an kik’uub’aman li oqech. Eb’ li ch’utam nujenaqeb’ rik’ineb’ laj Santil Paab’anel tiikeb’ chi paab’ank ut waklesinb’ileb’ xch’ool, ut kixaqab’aak jun chaab’il awa’b’ejil re li oqech. A’b’anan, choq’ we, lix sahil inch’ool xb’aan xk’uub’ankil ru xb’een li oqech sa’ jun li tenamit kiq’axe’ ru xb’aan xsahil inch’ool kiweek’a naq kink’e wi’chik li rosob’tesihom li saaj winq a’an.

Ink’eehom reetal naq li rajom lix k’uub’ankil junaq li oqech, malaj li roksinkil lix tijonelil li Dios jo’ chanru k’ojob’anb’il, a’an xtenq’ankil li qaChoxahil Yuwa’ ut li Jesukristo sa’ lix k’anjel—re xk’eeb’al reheb’ li ralal xk’ajol li Dios li osob’tesink re xtawb’al li toje’k ix ut li taqenaqil loq’al. Jo’ chanchan li cohete, li naxk’am chaq k’a’ruhaq sa’ jun na’ajej, li tijonelil naxk’am chaq lix evangelio li Jesukristo, li naxk’e xwankil chixajunileb’ chixk’uub’ankileb’ li sumwank ut chixk’ulb’al li k’ojob’anb’il k’anjel wan reheb’. “Lix kik’el li Kristo li natojok rix li maak”²⁴ naru taak’anjelamanq sa’ qayu’am naq naqeek’a lix saqob’resihom li Santil Musiq’ej ut naqak’uleb’ li osob’tesink naxyeechi’i li Dios.

Jo’ nekexinb’oq chi ab’ink chiruheb’ li chaq’rab’ ut li k’ojob’anb’il na’leb’, nekexinb’oq ajwi’ chek’uub’ankileb’ ut chek’uulankileb’ li sumwank re li tijonelil. Chek’ulaq lix xaqab’anb’il aatin li Dios ut lix yeechi’ihom. K’anjelanqex sa’ lix teneb’ahom li tijonelil ut tenq’ahomaq li qaChoxahil Yuwa’ ut li Jesukristo. Cheroksi li tijonelil re xtenq’ankil anihaq chik rik’in xk’eeb’al re li rosob’tesihom lix tojb’al rix li maak xb’aan li Kolonel! Naq teeb’aanu chi jo’kan, laa’ex ut lee junkab’al teexk’ul naab’al li osob’tesink. Ninch’olob’ xyaalal naq laj Tojol-ix yo’yo ut naxb’eresi li k’anjel a’in, sa’ xk’ab’a’ li Jesukristo, amen.