បព្វជិតភាព និងព្រះចេស្តាដ៏ធួនរបស់ព្រះអង្គសង្គ្រោះ
ដើម្បីឲ្យព្រះរាជបំណងរបស់ព្រះបិតាសួគ៌បានសម្រេច ព្រះចេស្តាដ៏ធួនរបស់ព្រះគ្រីស្ទចាំបាច់ត្រូវមានសម្រាប់កូនចៅរបស់ព្រះ ។ អ្នកកាន់បព្វជិតភាពផ្ដល់នូវឱកាសទាំងនេះ ។
សូមនឹកស្រមៃជាមួយនឹងខ្ញុំថា មានកាំជ្រួចរ៉ូកែតមួយត្រូវបានគេរៀបចំដាក់ចូលទៅកន្លែងបញ្ជាបង្ហោះ ដើម្បីត្រៀមបាញ់បង្ហោះឡើង ។ ឥឡូវសូមស្រមៃអំពីការបញ្ឆេះឲ្យហោះឡើង ។ ប្រេងសាំង នៅពេលឆេះដោយមានការគ្រប់គ្រង គឺត្រូវបានបំលែងទៅជាឧស្ម័នក្ដៅដែលជាកម្លាំងជំរុញ ដ៏ចាំបាច់ដើម្បីរុញកាំជ្រួចទៅក្នុងអវកាស ។ ជាចុងក្រោយ ចូរស្រមៃអំពីក្បាលគ្រាប់រ៉ូកែតនោះ ។ ក្បាលគ្រាប់រ៉ូកែតមានគុណតម្លៃពេញលេញ លុះត្រាណាវាទៅដល់កន្លែងដែលវាត្រូវទៅ ហើយមានដំណើរការធម្មតា ។ អ្នកពុំចាំបាច់ជាអ្នកវិទ្យាសាស្ត្រខាងកាំជ្រួចរ៉ូកែត ដើម្បីដឹងថាផ្កាយរណបទំនាក់ទំនងជាសាកលដ៏មានតម្លៃថ្លៃមួយ ត្រូវបានថយចុះគុណតម្លៃពេលទុកវានៅក្នុងឃ្លាំងចោលមួយនោះទេ ។ បេសកកម្មរបស់កាំជ្រួចរ៉ូកែតមួយ គឺគ្រាន់តែដើម្បីបញ្ជូនក្បាលគ្រាប់រ៉ូកែតមួយប៉ុណ្ណោះ ។
ល្ងាចនេះ ខ្ញុំចង់ប្រៀបធៀប បព្វជិតភាពដែលយើងកាន់ ទៅនឹងកាំជ្រួចរ៉ូកែតមួយ និងឱកាសទទួលប្រយោជន៍មកពីព្រះចេស្តាដ៏ធួនរបស់ព្រះអង្គសង្គ្រោះ ទៅនឹងគ្រាប់ក្បាលរ៉ូកែតមួយ ។
ដោយសារពលិកម្មធួនរបស់ទ្រង់ ព្រះយេស៊ូវគ្រីស្ទ មានព្រះចេស្ដា និងសិទ្ធិអំណាចដើម្បីប្រោសលោះមនុស្សលោកទាំងអស់ ។ ដើម្បីធ្វើឲ្យព្រះចេស្តាដ៏ធួនរបស់ទ្រង់អាចចូលដំណើរការបាន ទ្រង់បានផ្ទេរព្រះចេស្ដា និងសិទ្ធិអំណាចរបស់ទ្រង់មួយចំណែកឲ្យបុរសនៅលើផែនដី ។ អំណាច និងសិទ្ធិ អំណាច ដែលបានផ្ទេរឲ្យនេះត្រូវបានហៅថាបព្វជិតភាព។ វាអនុញ្ញាតឲ្យអ្នកកាន់បព្វជិតភាពជួយដល់ព្រះវរបិតាសួគ៌ និងព្រះយេស៊ូវគ្រីស្ទនៅក្នុងកិច្ចការរបស់ទ្រង់—ដើម្បីនាំឲ្យមានសេចក្ដីសង្គ្រោះ និងភាពតម្កើងឡើងដល់កូនចៅរបស់ព្រះ ។ វាដំណើរការដូច្នោះ ដោយសារវាផ្ដល់ឱកាសដល់កូនចៅរបស់ទ្រង់ដើម្បីទទួលពរជ័យទាំងឡាយនៃព្រះចេស្តាដ៏ធួនរបស់ព្រះអង្គសង្គ្រោះ ។
ព្រះចេស្តាដ៏ធួនរបស់ព្រះយេស៊ូវគ្រីស្ទ គឺចាំបាច់ណាស់ ដោយសារតែគ្មានយើងណាម្នាក់អាចត្រឡប់ទៅគេហដ្ឋានសួគ៌របស់យើងវិញដោយគ្មាន ជំនួយបានទេ ។ នៅក្នុងជីវិតរមែងស្លាប់ យើងតែងតែមានកំហុស ហើយល្មើសនឹងក្រឹត្យវិន័យរបស់ព្រះ ។ យើងបានជាប់ប្រឡាក់ដោយអំពើបាប ហើយមិនអាចអនុញ្ញាតឲ្យត្រឡប់ទៅរស់នៅក្នុងវត្តមានរបស់ព្រះវិញបានទេ ។ យើងត្រូវការព្រះចេស្តាដ៏ធួនរបស់ព្រះអង្គសង្គ្រោះ ដើម្បីយើងអាចត្រូវបានផ្សះផ្សារនឹងព្រះវរបិតាសួគ៌ ។ ព្រះយេស៊ូវគ្រីស្ទបានផ្ដាច់ចំណងនៃសេចក្ដីស្លាប់ខាងរូបកាយ ដោយអនុញ្ញាតឲ្យមានការរស់ឡើងវិញដល់មនុស្សគ្រប់រូប ។ ទ្រង់ប្រទានការអភ័យទោសដល់អំពើបាប តាមរយៈការគោរពប្រតិបត្តិចំពោះក្រឹត្យវិន័យ និងពិធីបរិសុទ្ធនៃដំណឹងល្អរបស់ទ្រង់ ។ តាមរយៈទ្រង់ ភាពតម្កើងឡើងត្រូវបានផ្ដល់ឲ្យ ។ ឱកាសទទួលបានប្រយោជន៍មកពីព្រះចេស្តាដ៏ធួនរបស់ព្រះអង្គសង្គ្រោះ គឺជាក្បាលគ្រាប់រ៉ូកែតដ៏សំខាន់បំផុតរបស់ការបង្កបង្កើត ។
ដើម្បីឲ្យព្រះរាជបំណងរបស់ព្រះបិតាសួគ៌បានសម្រេច ព្រះចេស្តាដ៏ធួនរបស់ព្រះគ្រីស្ទ ចាំបាច់ត្រូវមានសម្រាប់កូនចៅរបស់ព្រះ ។១ បព្វជិតភាពផ្ដល់នូវឱកាសទាំងនេះ ។ វាគឺជាកាំជ្រួចរ៉ូកែត ។ បព្វជិតភាពគឺសំខាន់ណាស់ ដោយសារពិធីបរិសុទ្ធ និងសេចក្ដីសញ្ញាដ៏ចាំបាច់នៅលើផែនដីត្រូវបានធ្វើឡើងតែតាមរយៈសិទ្ធិអំណាចនេះប៉ុណ្ណោះ ។ បើបព្វជិតភាពពុំបានផ្ដល់ឱកាសដើម្បីជាប្រយោជន៍មកពីព្រះចេស្តាដ៏ធួនរបស់ព្រះអង្គសង្គ្រោះទេ តើគោលបំណងរបស់វាជាអ្វីទៅ ? តើវាគ្រាន់តែជាអ្វីមួយដែលទាក់ទាញមនុស្ស ជាអ្វីមួយដែលលាន់ឮឲ្យគេចាប់អារម្មណ៍ឬអី ? ព្រះមានព្រះរាជបំណងចង់ឲ្យប្រើបព្វជិតភាពឲ្យបានច្រើនលើសពីការដែលគ្រាន់តែជាថ្នាក់មួយនៅថ្ងៃអាទិត្យ ឬជាឱកាសបម្រើមួយទៅទៀត ។ ទ្រង់មានព្រះរាជបំណងចង់ឲ្យវាបញ្ជូនក្បាលគ្រាប់រ៉ូកែតនោះទៅ ។
ការខ្វះខាតបន្ដិចបន្ដួចនៅក្នុងកាំជ្រួចរ៉ូកែតនានាអាចធ្វើឲ្យបេសកកម្មបរាជ័យ ។ បើកន្លែងផ្សារបាក់បែក ហើយដែកតួកាំជ្រួចពុំរឹងមាំ វាអាចធ្វើឲ្យកាំជ្រួចមួយពុំដំណើរការ ។ ដើម្បីការពារបព្វជិតភាពពីការបែកបាក់កន្លែងផ្សារភ្ជិត និងដែកតួពុំរឹងមាំ នោះព្រះការពារទាំងការប្រគល់ឲ្យ និងការប្រើប្រាស់ ។២ ការប្រគល់បព្វជិតភាព គឺត្រូវបានការពារដោយកូនសោបព្វជិតភាព ដែលជាសិទ្ធិនៃគណៈប្រធានដែលបានផ្ដល់ទៅឲ្យមនុស្ស ។៣ ដូចគ្នានេះដែរការប្រើប្រាស់បព្វជិតភាព គឺត្រូវបានការពារដោយកូនសោបព្វជិតភាព និងសេចក្ដីសញ្ញាដែលអ្នកកាន់បព្វជិតភាពបានធ្វើ ។ ហេតុដូច្នោះហើយការប្រើប្រាស់បព្វជិតភាព គឺត្រូវបានគ្រប់គ្រង ទាំងតាមរយៈកូនសោបព្វជិតភាព និងសេចក្ដីសញ្ញា ។ ការអនុញ្ញាតខាងបព្វជិតភាពរបស់បុរសម្នាក់ គឺត្រូវបានប្រគល់ឲ្យជាបុគ្គល ប៉ុន្តែពុំឯករាជ្យតែឯងនោះទេ ៤បព្វជិតភាពពុំមែនជាប្រភពនៃអំណាចស្វ័យតអរូបីនោះទេ ។
ទាំងបព្វជិតភាពអើរ៉ុន និងមិលគីស្សាដែក គឺត្រូវបានទទួលដោយសេចក្ដីសញ្ញា ។៥ ព្រះកំណត់លក្ខខណ្ឌ ហើយមនុស្សទទួលយក ។ និយាយជាទូទៅ អ្នកកាន់បព្វជិតភាពចុះសេចក្ដីសញ្ញាដើម្បីជួយព្រះនៅក្នុងកិច្ចការរបស់ទ្រង់ ។ នៅដើមដំបូងនៃគ្រាកាន់កាប់ត្រួតត្រានេះ ព្រះយេស៊ូវគ្រីស្ទបានពន្យល់ថាសេចក្ដីសញ្ញាបព្វជិតភាព « បានបញ្ជាក់មកលើអ្នករាល់គ្នាដែលត្រូវបានបញ្ជាក់មកលើអ្នក ជាប្រយោជន៍ដល់អ្នក ហើយពុំមែនជាប្រយោជន៍ដល់អ្នកតែប៉ុណ្ណោះទេ ប៉ុន្តែជាប្រយោជន៍ដល់ពិភពលោកទាំងមូល…ពីព្រោះពួកគេពុំមករកយើងឡើយ » ។៦
ការណ៍នេះបង្រៀនថាគោលបំណងនៃបព្វជិតភាពគឺដើម្បីអញ្ជើញអ្នកដទៃឲ្យមករកព្រះគ្រីស្ទ ដោយការជួយពួកគេទទួលបានដំណឹងល្អដែលបានស្ដារឡើងវិញ ។ យើងមានបព្វជិតភាពដើម្បីយើងអាចជួយកូនចៅរបស់ព្រះវរបិតាសួគ៌ ឲ្យបានស្រាលពីបន្ទុកនៃអំពើបាប ហើយប្រែក្លាយដូចជាទ្រង់ ។ តាមរយៈបព្វជិតភាព អំណាចនៃសេចក្ដីល្អ គឺបង្ហាញឡើងនៅក្នុងជីវិតនៃអស់អ្នកដែលធ្វើ ហើយរក្សាសេចក្ដីសញ្ញានៃដំណឹងល្អ ហើយទទួលពិធីបរិសុទ្ធដែលជាប់ទាក់ទង ។៧ នេះគឺជារបៀបដែលយើងម្នាក់ៗមករកព្រះគ្រីស្ទ គឺត្រូវបានធ្វើឲ្យបរិសុទ្ធ ហើយត្រូវបានផ្សះផ្សារនឹងព្រះ ។ ព្រះចេស្តាដ៏ធួនរបស់ព្រះគ្រីស្ទ គឺមានឡើងតាមរយៈបព្វជិតភាពដែលដឹកនាំក្បាលគ្រាប់រ៉ូកែតនោះ ។
សេចក្ដីសញ្ញាជាមួយព្រះ គឺជារឿងសំខាន់ ហើយឧឡារិកណាស់ ។ បុរសម្នាក់គួររៀបចំខ្លួនរៀន ហើយចូលទៅក្នុងសេចក្ដីសញ្ញាដូច្នេះដោយមានបំណងគោរពតាមសេចក្ដីសញ្ញាទាំងនោះ ។ សេចក្តីសញ្ញាមួយក្លាយជាការសច្ចាផ្ទាល់ខ្លួន ។ ខ្ញុំថាឡើងវិញតាមអ្នកនិពន្ធអង់គ្លេស ឈ្មោះ Robert Bolt ថាបុរសម្នាក់ចុះសេចក្ដីសញ្ញាមួយ តែពេលគាត់ចង់តាំងចិត្តចំពោះការសន្យាមួយជាពិសេសប៉ុណ្ណោះ ។ គាត់ធ្វើការសម្គាល់រវាងសេចក្ដីពិតនៃការសន្យានោះ និងគុណធម៌ផ្ទាល់ខ្លួនរបស់គាត់ ។ នៅពេលបុរសម្នាក់ចុះសេចក្ដីសញ្ញាមួយ គឺគាត់កំពុងទប់ខ្លួនគាត់ ដូចជាក្បង់ទឹកនៅក្នុងដៃអញ្ចឹងដែរ ។ ហើយបើគាត់លាម្រាមដៃ នោះគាត់ពុំសង្ឃឹមថានឹងរកឃើញខ្លួនឯងម្ដងទៀតទេ ។ អ្នករំលងសេចក្ដីសញ្ញាពុំតាំងចិត្តខ្លួនឯង ឬអះអាងថាផ្ដល់ឲ្យទៀតទេ ។៨
អ្នកកាន់បព្វជិតភាពអើរ៉ុនម្នាក់ចុះសេចក្ដីសញ្ញាថាចៀសវាងពីសេចក្ដីអាក្រក់ ជួយដល់អ្នកដទៃឲ្យ ផ្សះផ្សារនឹងព្រះ ហើយរៀបចំខ្លួនដើម្បីទទួលបព្វជិតភាពមិលគីស្សាដែក ។៩ ការទទួលខុសត្រូវដ៏ពិសិដ្ឋនេះ ត្រូវបានបំពេញ នៅពេលគាត់បង្រៀន ជ្រមុជទឹក ពង្រឹងដល់សមាជិកសាសនាចក្រ ហើយអញ្ជើញអ្នកដទៃឲ្យទទួលដំណឹងល្អ ។ ទាំងនេះគឺជាមុខងារទាំងឡាយនៃ « កាំជ្រួច » របស់គាត់ ។ ត្រឡប់មកវិញ ព្រះសន្យានូវសេចក្ដីសង្ឃឹម ការអភ័យទោស ការបម្រើនៃពួកទេវតា និងកូនសោនៃដំណឹងល្អនៃការប្រែចិត្ត និងពិធីបុណ្យជ្រមុជទឹក ។១០
អ្នកកាន់បព្វជិតភាពមិលគីស្សាដែក ចុះសេចក្តីសញ្ញាដើម្បីបំពេញការទទួលខុសត្រូវដែល ជាប់ទាក់ទងនឹងបព្វជិតភាពអើរ៉ុន ហើយតម្កើងការហៅរបស់គាត់នៅក្នុងបព្វជិតភាពមិលគីស្សាដែក ។១១ គាត់ធ្វើដូច្នោះតាមរយៈការរក្សាបទបញ្ញត្តិដែលជាប់ទាក់ទងនឹងសេចក្ដីសញ្ញា ។ បទបញ្ញត្តិទាំងនេះរួមមានការ « ឲ្យប្រយ័ត្នប្រយែងខ្លួន ដើម្បីព្យាយាមស្ដាប់តាមព្រះបន្ទូលទាំងឡាយអំពីជីវិតដ៏នៅអស់កល្ប » ១២ ការថ្លែងទីបន្ទាល់អំពីព្រះយេស៊ូវគ្រីស្ទ និងកិច្ចការថ្ងៃចុងក្រោយរបស់ទ្រង់ ១៣ ពុំមានអំនួត ១៤ ហើយក្លាយជាមិត្តរបស់ព្រះអង្គសង្គ្រោះ ទុកចិត្តទ្រង់ដូចជាមិត្ត ។១៥
ត្រឡប់មកវិញ ព្រះសន្យាថាអ្នកកាន់បព្វជិតភាពមិលគីស្សាដែក នឹងទទួលកូនសោដើម្បីយល់ដឹងអំពីអាថ៌កំបាំងទាំងឡាយរបស់ព្រះ ។ គាត់នឹងប្រែក្លាយទៅជាល្អឥតខ្ចោះដើម្បីគាត់អាចឈរនៅក្នុងវត្តមានរបស់ព្រះ ។ គាត់នឹងអាចបំពេញតាមតួនាទីរបស់គាត់នៅ ក្នុងកិច្ចការនៃសេចក្ដីសង្គ្រោះ ។ ព្រះយេស៊ូវគ្រីស្ទនឹងរៀបចំផ្លូវពីមុខអ្នកកាន់បព្វជិតភាព ហើយនឹងគង់នៅជាមួយគេ ។ ព្រះវិញ្ញាណបរិសុទ្ធនឹងស្ថិតនៅក្នុងដួងចិត្តរបស់អ្នកកាន់បព្វជិតភាព ហើយពួកទេវតានឹងលើកគេឡើង ។ រូបកាយរបស់គាត់នឹងត្រូវបានពង្រឹង ហើយធ្វើឲ្យថ្មីឡើងវិញ ។ គាត់នឹងក្លាយទៅជាអ្នកទទួលគ្រងពរជ័យទាំងឡាយរបស់អ័ប្រាហាំ ព្រមជាមួយនឹងភរិយាគាត់ ជាអ្នកគ្រងមរតកជាមួយព្រះយេស៊ូវគ្រីស្ទទៅកាន់នគររបស់ព្រះបិតាសួគ៌ ។១៦ ទាំងនេះគឺជា « សេចក្តីសន្យាដ៏ធំបំផុត ហើយវិសេសផង » ។១៧ គ្មានការសន្យាណាមហិមាជាងនេះ ដែលអាចនឹកស្រមៃឃើញទេ ។
ចំពោះបុរសម្នាក់ៗ ដែលទទួលបព្វជិតភាពមិលគីស្សាដែក ព្រះបញ្ជាក់ពីការសន្យាក្នុងសេចក្ដីសញ្ញារបស់ទ្រង់ដោយពាក្យសម្បថមួយ ។១៨ ពាក្យសម្បថនេះមានចំពោះតែបព្វជិតភាពមិលគីស្សាដែកប៉ុណ្ណោះ១៩ ហើយគឺជាព្រះដែលស្បថសម្បថនោះ ពុំមែនជាអ្នកកាន់បព្វជិតភាពទេ ។២០ ពីព្រោះតែស្ថានភាពពិសេសនេះ ជាប់ទាក់ទងនឹងអំណាច និងសិទ្ធិអំណាចជាព្រះរបស់ទ្រង់ ព្រះប្រើពាក្យសម្បថមួយ ដោយប្រើភាសាបង្ខំបំផុតតាមដែលទ្រង់អាចធ្វើបាន ដើម្បីប្រាកដថាយើងចងភ្ជាប់ ហើយនៅជាប់នឹងការសន្យារបស់ទ្រង់ ។
នឹងកើតមានផលវិបាកដ៏ធ្ងន់ធ្ងរ ដោយសារការរំលងសេចក្ដីសញ្ញាបព្វជិតភាព ហើយងាកចេញពីវានោះ ។២១ ការមិនយកចិត្តទុកដាក់ ឬមិនចាប់អារម្មណ៍នឹងការហៅបព្វជិតភាព គឺដូចជាការដាក់ដែកតួកាំជ្រួចចូលទៅក្នុងសមាសភាគកាំជ្រួចដូច្នោះដែរ ។ ការប្រថុយប្រថានចំពោះសេចក្ដីសញ្ញាបព្វជិតភាព ដោយសារវាអាចនាំឲ្យបេសកកម្មបរាជ័យ ។ ការមិនគោរពប្រតិបត្តិចំពោះបទបញ្ញត្តិរបស់ព្រះ ផ្ដាច់នូវសេចក្ដីសញ្ញា ។ ពរជ័យដែលបានសន្យានឹងត្រូវដកចេញ ពីអ្នកដែលបំពាក់សេចក្ដីសញ្ញាដោយពុំប្រែចិត្តជានិរន្ដរនោះ ។
ខ្ញុំបានយល់កាន់តែពេញលេញអំពីទំនាក់ទំនងរវាងកាំជ្រួច « បព្វជិតភាព » និងក្បាលគ្រាប់រ៉ូកែត « ឱកាសដើម្បីទទួលបានប្រយោជន៍មកពីព្រះចេស្តាដ៏ធួនរបស់ព្រះគ្រីស្ទ » កាលពីប៉ុន្មានឆ្នាំកន្លងទៅ ។ អំឡុងចុងសប្ដាហ៍មួយ ខ្ញុំមានការចាត់តាំងចំនួនពីរ ។ ទីមួយ គឺបង្កើតស្ដេកទីមួយនៅក្នុងប្រទេសមួយ ហើយការចាត់តាំងមួយទៀត គឺសម្ភាសយុវជនម្នាក់ ហើយបើអ្វីៗដំណើរការតាមលំដាប់លំដោយ ដើម្បីស្ដារបព្វជិតភាព និងពរជ័យព្រះវិហារបរិសុទ្ធរបស់គាត់ឡើងវិញ ។ បុរសវ័យ ៣០ ឆ្នាំរូបនេះ បានចូលរួមក្នុងសាសនាចក្រពេលគាត់ធំពេញវ័យ ។ គាត់បានបម្រើបេសកកម្មប្រកបដោយកិត្តិយស ។ ប៉ុន្តែនៅពេលគាត់ត្រឡប់មកផ្ទះវិញ គាត់បានវង្វេងផ្លូវ ហើយបានបាត់បង់សមាជិកភាពរបស់គាត់នៅក្នុងសាសនាចក្រ ។ បន្ទាប់ពីប៉ុន្មានឆ្នាំក្រោយមក គាត់« បានដឹងខ្លួន » ២២ ហើយដោយមានជំនួយមកពីអ្នកដឹកនាំបព្វជិតភាពជាទីស្រឡាញ់ និងសមាជិកដែលមានសន្ដានចិត្តល្អ នោះគាត់បានប្រែចិត្ត ហើយអនុញ្ញាតឲ្យចូលមកវិញ តាមរយៈពិធីបុណ្យជ្រមុជទឹកចូលក្នុងសាសនាចក្រ ។
ក្រោយមក គាត់បានស្នើសុំដើម្បីឲ្យបព្វជិតភាព និងពរជ័យព្រះវិហារបរិសុទ្ធរបស់គាត់បានស្ដារឡើងវិញ ។ ពួកយើងបានណាត់ជួបគ្នានៅថ្ងៃសៅរ៍ ម៉ោង ១០ ព្រឹក នៅក្នុងសាលាប្រជុំមួយ ។ នៅពេលខ្ញុំបានទៅដល់សម្រាប់ការសម្ភាសពីមុននោះស្រាប់តែគាត់បានទៅដល់ទីនោះមុនទៅហើយ ។ គាត់រំភើបចិត្តយ៉ាងខ្លាំងដើម្បីទទួលបព្វជិតភាពម្ដងទៀត គាត់ពុំអាចរង់ចាំតទៀតទេ ។
អំឡុងពេលសម្ភាស ខ្ញុំបានបង្ហាញគាត់នូវសំបុត្រមួយដែលពន្យល់ថា ប្រធាន ថូម៉ាស អេស ម៉នសុន បានមើលការស្នើសុំរបស់គាត់ដោយផ្ទាល់ ហើយបានផ្ដល់សិទ្ធិឲ្យធ្វើការសម្ភាស ។ យុវជនដែលមានអំណត់នេះបានយំ ។ បន្ទាប់មកខ្ញុំបានប្រាប់គាត់ថា កាលបរិច្ឆេទនៃការសម្ភាសរបស់យើង នឹងពុំមានន័យជាផ្លូវការក្នុងជីវិតគាត់ទេ ។ គាត់បានមើលមុខខ្ញុំទាំងស្រឡាំងកាំង ។ ខ្ញុំបានប្រាប់គាត់ថា បន្ទាប់ពីខ្ញុំបានស្ដារពរជ័យរបស់គាត់ នោះកំណត់ត្រាសមាជិកភាពរបស់គាត់ នឹងបង្ហាញតែកាលបរិច្ឆេទដើមនៃពិធីបុណ្យជ្រមុជទឹក ពិធីបញ្ជាក់ និងការតែងតាំងបព្វជិតភាព និងអំណោយទានពិសិដ្ឋរបស់គាត់តែប៉ុណ្ណោះ ។ គាត់បានយំម្ដងទៀត ។
ខ្ញុំបានសុំគាត់ឲ្យអានគោលលទ្ធិ និង សេចក្តីសញ្ញា ៖
« មើលចុះ អ្នកណាដែលប្រែចិត្តពីអំពើបាបទាំងឡាយរបស់ខ្លួន អ្នកឈ្មោះថាបានអត់ទោសឲ្យហើយ ហើយយើងជាព្រះអម្ចាស់មិនចាំពីអំពើបាបទាំងនោះទៀតទេ ។
« តាមរបៀបនេះ អ្នករាល់គ្នាអាចដឹង បើសិនជាមនុស្សណាម្នាក់ប្រែចិត្តពីអំពើបាបទាំងឡាយរបស់ខ្លួន—មើលចុះ អ្នកនោះនឹងសារភាពអំពីអំពើបាបទាំងឡាយ ហើយលះបង់ចោលអំពើបាបទាំងនោះ » ។២៣
គាត់បានយំជាលើកទីបី ។ បន្ទាប់មក ខ្ញុំបានដាក់ដៃរបស់ខ្ញុំលើក្បាលគាត់ ហើយនៅក្នុងនាមនៃព្រះយេស៊ូវគ្រីស្ទ និងដោយសិទ្ធិអំណាចនៃបព្វជិតភាពមិលគីស្សាដែក និងដោយមានការអនុញ្ញាតរបស់ប្រធានសាសនាចក្រ ខ្ញុំបានស្ដារបព្វជិតភាព និងពរជ័យព្រះវិហារបរិសុទ្ធរបស់គាត់ឡើងវិញ ។
អំណរដែលយើងមានគឺអស្ចារ្យណាស់ ។ គាត់បានដឹងថាគាត់មានសិទ្ធិអំណាចដើម្បីកាន់ និងអនុវត្តបព្វជិតភាពនៃព្រះសារជាថ្មី ។ គាត់បានដឹងថាពរជ័យព្រះវិហារបរិសុទ្ធរបស់គាត់មានប្រតិបត្តិការពេញលេញម្ដងទៀត ។ គាត់បានសប្បាយចិត្តគ្រប់ទង្វើររបស់គាត់ ។ ខ្ញុំមានមោទនភាពចំពោះគាត់ណាស់ ហើយខ្ញុំដឹងថាព្រះវរបិតាសួគ៌ក៏មានមោទនភាពចំពោះគាត់ផងដែរ ។
បន្ទាប់ពីនោះមក ស្ដេកត្រូវបានរៀបចំឡើង ។ ការប្រជុំទាំងឡាយមានពួកបរិសុទ្ធស្មោះត្រង់ចូលរួមយ៉ាងក្លៀវក្លា ហើយគណៈប្រធានស្ដេកដ៏ល្អមួយត្រូវបានគាំទ្រ ។ ទោះជាយ៉ាងណាក៏ដោយសម្រាប់ខ្ញុំ ឱកាសជាប្រវត្តិសាស្ត្រនៃការរៀបចំស្ដេកដំបូងនៅក្នុងប្រទេសមួយនេះ ត្រូវបានគ្របដណ្ដប់ដោយអំណរ ដែលខ្ញុំមានក្នុងការស្ដារពរជ័យទាំងឡាយទៅដល់យុវជនរូបនេះទៅវិញ ។
ខ្ញុំបានដឹងថា គោលបំណងនៃការរៀបចំស្ដេកមួយ ឬការប្រើបព្វជិតភាពរបស់ព្រះក្នុងវិធីផ្សេងៗ គឺដើម្បីជួយព្រះវរបិតាសួគ៌ និងព្រះយេស៊ូវគ្រីស្ទនៅ ក្នុងកិច្ចការរបស់ពួកទ្រង់—ដើម្បីផ្ដល់ឱកាសសម្រាប់ការប្រោសលោះ និងភាពតម្កើងឡើងដល់កូនចៅម្នាក់ៗរបស់ព្រះ ។ ដូចជាគោលបំណងរបស់កាំជ្រួចគឺ ដើម្បីបញ្ជូនក្បាលគ្រាប់រ៉ូកែតមួយដែរ បព្វជិតភាពបញ្ជូនសារដំណឹងល្អរបស់ព្រះយេស៊ូវគ្រីស្ទ ដែលធ្វើឲ្យមនុស្សទាំងអស់អាចធ្វើសេចក្ដីសញ្ញា ហើយទទួលពិធីបរិសុទ្ធដែលមានជាប់ទាក់ទង ។ « ព្រះលោហិតដ៏ធួននៃព្រះគ្រីស្ទ »២៤ អាចអនុវត្តនៅក្នុងជីវិតរបស់យើង នៅពេលយើងទទួលបទពិសោធន៍នៃឥទ្ធិពលញែកចេញជាបរិសុទ្ធរបស់ព្រះវិញ្ញាណបរិសុទ្ធ ហើយទទួលពរជ័យទាំងឡាយដែលព្រះសន្យា ។
បន្ថែមពីលើការគោរពតាមច្បាប់ និងពិធីបរិសុទ្ធនៃដំណឹងល្អរបស់បងប្អូនផ្ទាល់ ខ្ញុំសូមអញ្ជើញបងប្អូនឲ្យធ្វើ ហើយរក្សាសេចក្ដីសញ្ញាបព្វជិតភាព ។ សូមទទួលយកសម្បថរបស់ព្រះ និងការសន្យារបស់ទ្រង់ ។ សូមតម្កើងការទទួលខុសត្រូវរបស់អ្នកនៅក្នុងបព្វជិតភាពដើម្បីជួយព្រះវរបិតាសួគ៌ និងព្រះយេស៊ូវគ្រីស្ទ ។ សូមប្រើបព្វជិតភាពដើម្បីជួយបញ្ជូនឱកាសទទួលផលប្រយោជន៍មកពីព្រះចេស្តាដ៏ធួនរបស់ព្រះអង្គសង្គ្រោះទៅដល់នរណាម្នាក់ទៀត ។ នៅពេលអ្នកធ្វើដូច្នោះ នោះពរជ័យដ៏មហិមាទាំងឡាយនឹងកើតមានចំពោះអ្នក និងគ្រួសារអ្នក ។ ខ្ញុំសូមថ្លែងទីបន្ទាល់ថា ព្រះដ៍ប្រោសលោះមានព្រះជន្មរស់ ហើយដឹកនាំកិច្ចការនេះ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។