2010–2019
Priesthood me a Klisichel a Tngakireng er a Osobel
October 2017


Priesthood me sel Klisichel a Tngakireng er a Osobel

A uchul eng mo mekedmokl a moktek er a Chedam er a Babeluades, e a klisichel a tngakireng er a Kristo a kirel mekedmokl el mo er a rengelekel a Dios. A priesthood a meskid aikal techall.

Ka momes er tiang lobengkek, a leko a raket a lomesiul er ngii el mora rolel me bol sebechel el suebek. Chelechang, e betebengii el kordang. Le cheluchul el lultebechel el kmard, eng ngobeltang el mocha mekeald el ngau el meringel el toutang, el msa sel klisichel me losebekii el mora melidiul. E tiakid, e mesa sel berraod malechub e ng nguleklool loltak er ngii tial raket. Tial berraod a bo desa sel mui lulsbechellel sel borsel meral lolsechelel meng mo oureor. Kau a diak el dil kirem el mo roket scientist e bochu desa, el kmo a aikal takai el mesil el meliuekl ra beluulechad a kekerei a belkul sel dil medechel er a soko. A ngerchelel a raket a di mo olekerd er loltak er ngii el berraod.

Chelechal kebesengei eng soak el mo omes er tial priesthood el dobang el ua raket me sel techall el de nguu er a tngakireng er a Osobel el ua sel beraod el raket a mo olekerd er ngii.

Le sel tilengetengii el tngakireng er Ngii, e a Jesus Kristo a ngarngii a klisichel ma ngerchelel el mo olsobel ra rokui el chad. Sel rulii meng sebechela klisichel a tngakireng er Ngii loureor el merkid, a Ngii el mla nguu a telkib er sel klisichel ma ngerechelel el mesterir a rechad er a beluulechad. Tial mlodars el klisiich ma ngerachel a okodongall el kmo priesthood. Ng mesterir a rubang a priesthood el mo olengeseu ra Demad ra Babeluades ma Jesus Kristo ra Urerir—elmo olsobel e mesterir a deurreng a rengelekel a Dios. Ng uaisei e leng mesterir a Rengelekel a techall el mo ng mai a ikel klengeltengat el ngar sel klisichel a tngakireng er a Osobel.

Sel klisichel a tngakireng er a Jesus Kristo a klou a ultutelel e leng diak a ta er kid el sebechel el lmuut el mora blid ra babeluades e lak a olengeseu. Chelsel tial klengar, e kid a blechoel el remuul a chelibirukel e tomall a lechul a Dios. Me kede mechesechusem er a klengit e mo diak el sebeched e lmuut el mo kiei lobengkel a Dios. Kede ousbech er sel klisichel a tngakireng er a Osobel me deluut el moungil a delongeled kid ma Demad ra Babeluades. A Jesus Kristo a ngilbetid er a klisichel a kodall, meng mo sebeched el rokui el mekiis er a kodall. Ngii a oldars a klausubes ra klengit, alsekum kede oltirakl a llach ma urellel a ebangkelio er Ngii. Ngokiu Ngii, e a klebkall a modars. A techall el nguu a klisichel a tngakireng er a Osobel a selmkot el ngarbab er a berraod ra rokui el lulbeob.

Ma ikel moktek er a Demad ra Babeluades el kirel mo meketmokl, a mocha, klisichel a tngakireng er a Kristo el kirel modars el mora rengelekel a Dios.1 A priesthood a meskid aikaikid el techall. Ngii e a raket. A priesthood a usbechall e leng chedaol el ureor me a telbiil el ngara beluulechad a meketmokl lokiu a klisichel. Alsekum ma priesthood a mo diak el sebechel el kutmokl a ikel techall el moungil leng ngokiu a klisichel a tngakireng er a Osobel, eng ngera sel moktek er ngii? Tiang kuk di ta ra sibai, chetiteuokel el cherrodech lolechau a mad? A Dios a ngar ngii ra uldesuel ra priesthood el kirel klou a usbechellel el diak el kuk di sel temel a omesuub er a Sandei malechub eng techall el mesiou. Ngara uldesuel a Dios el kirel el lolekerd a beraod.

A mekekerei el telmellel a raket a sebechel tomelii omerael. A meketekek el chemars ma mechut el deel a sebechel mechelii a chelitechetul a raket. Ma sobechekliia a priesthood e ldi ua le metetemall a tingetel e merael mo mechut, e a Dios a mesebechakl er a oidel ma usbechelel.2 A oidel a priesthood a longeluolu er ngii a ikel kisel a priesthood, e likel lemeltel omengederedel el bsang a chad.3 A usbechellel a priesthood a selbechakl lokiu a telbiil el ngikel loba priesthood a kutmokl. A priesthood a diak el terrekakl el rolel a dongederedel; a usbechellel a chederdall lokiu a telbiil. E dirrek, a urellel a priesthood loba chad a modars el morngii el diak el lileakl er ngii;4 le klisichel a priesthood a diak di le bechachau.

Ng diul Aaronic ma Melchizedek Priesthood a mengai e lokiu a telbiil.5 A Dios a rodemii sel dodai e a chad a nguu. Ng bleketakl el tirkel loba kle priesthood a yaksok lolngeseu ra Dios er a Urellel. Sera uchelel tial taem, e a Jesus Kristo a silodii el kmo sel telbilel a priesthood “a moterkokl el ngar kemiu leng oreliu, e diak el dil bol kiriu, engdi ngmo orellel a beluulechad el rokir …e leng diak el bel lokiu ngak.”6

Tia osisecheklid el kmo sel moktek er a priesthood a mo siotai ra rebebil elmo ra Kristo e lolngeseu er tir el nguu a mla moluut el ebangkelio. Kid oba priesthood meng sebeched lolengeseu ra rengelekel a Demad ra Babeluades elmo mimokl er a berredel a klengit e mo uai Ngii. Ngokiu a priesthood, e a teletelel a Dios a chemolt er a klengar ra bek el chad el kutmokl e mengeluolu a telbilel ra ebangkelio e ngmai a ikel chedaol lureor el lobengkel.7 Ngokiu tial rael, ea rechad a mera Kristo, e mekikiid, e lmuut el mora Dios. A klisichel a tngakireng er a Kristo a mo sebeched el nguu lokiu a priesthood, el ngii a oieiit a beraod.

A telbiil lobengkel a Dios chedaol e diak el klekool. A chad a kirel keltmokl el kirel, e mesuub er ngii, e soiiseb er ngii el telbiil e loba blak el reng e kulii. A telbiil a yaksok loltirakl. Me ak melekoi a luluuchs a chad er a Inglis el Robert Bolt, a chad a kutmokl a telbiil leng kuk di soal el blak a rengul el ngoriakl el kirel a telbiil. Ng mekdebechii a mesisiich el deliongel ra delongelel a klemerang er sel telbiil me sel kldung er ngii. Sel sekum a chad a soiiseb er a telbiil, eng ngurekodel er ngii, el ua ralm el klaud ra chelsel a chimal. E alsekum e ng mok a chimal, eng diak el luut er a smechel. Ngkel tomall a telbiil a dikea lultuil ra kmung ngerang malechub e bol doseb er a kmung ngerang.8

A oba Aaronic Priesthood a yaksok el cheroid er a mekngit, olngeseu ra rebebil elmo tang lobengkel a Dios, e mengetmokl el mo nguu sel Melchizedek Priesthood.9 A ikal chedaol el ngerachel a meketmokl sel lolsisechakl, melecholb, e melisiich er a rechad ra Ikelesia, e omerek ra ebangkelio el mora rebebil. A ikang a klekedellel a urellel. E do dengai, el yaksok el malra Dios a urunguled, klausubes, ma anghel lolsisechakl, ma ikel kiis er a ebangkelio ra kleuchel reng ma techolb.10

A oba Melchizedek Priesthood a yaksok el kutmokl a ngerachelel el ua ikel ngara Aaronic Priesthood e mo dochel a urellel er tial Melchizedek Priesthood.11 Meng uaisei sel loltirakl a llach el lultuil ra ikel telbiil. A ikal llach a ngarngii oltirakl “loba blak el reng el kirel a tekingel a diak a ulebengellel klengar” el kie “lokiu a rokui el tekoi el tuobed er a ngerel a Dios,12 lolecholt er a klaumerang ra Jesus Kristo ma urellel er chelechal taem,13 el diak loruul a chisel,14 e mo sechelil a Osobel, loumerang er Ngii lokiu a ungil klausechelei.15

Sel denguu er ngii, a Dios a yaksok el kmo ngkel loba Melchizedek Priesthood a ngmai a kiis elmo medengei a ikel bertelel a Dios. Ng mo cherrungel meng mo sebechel dechor ra medal a Dios. Ng mo sebechel kutmokl a ngerchelel er a ureor lolsobel. A Jesus Kristo a mo dmedesii a rael ruchei er ngkel loba priesthood e mo obengkel. A Chedaol Reng a mo kiei ra chelsel a rengul ngkel loba priesthood ma re anghel a mo tikeuii. A bedengel a mo mesisiich e mukbeches. Ng mo ngmai a ikel klengeltengat ra Abraham e, obengkel a bechil, el dmak ma Jesus Kristo el mora rengedel a Demad ra Babeluades.16 A ikang a “uldingerongel el meklou e kesiokel el telbiil.”17 Ng diak a lmuut el meklou el telbiil el debdasu.

Tirkel bek el chad el nguu a Melchizedek Priesthood, a Dios a oterkeklii a telbilel e yaksok leng mla moterkokl.18Tial telbiil a melutk el kuk di kirel a Melchizedek Priesthood,19 e a Dios el ngii a mla terkeklii tial telbiil, el diak el ngkel loba a priesthood.20 Leng tial tokubets el teletael leng chedaol el klisichel ma ngerchelel, e a Dios a ousbech er a telbiil, lousbech a ikel kot el mesisiich el tekoi el sebechel, lomeklatk er kid er a ikel llechotel e kal mengodech el telbilel.

Ng meringel el tekoi a mo debuch sel de temall a telbiil ra priesthood mesel bode iikr el rokui.21Sel do mekbeot malechub e kede omeksoal a rengud er a ngercheled er a priesthood a di ua dolecholt er a mechut el klalo el mora raket el keldemed. Ng oitechetur a telbilel a priesthood leng ngii el sebechel tomelii a mission. Sel de temall a lechul a Dios eng tomelii a telbiil. Ngkel blechoel, e ka louchul e melmall a telbiil, a ikel telbiil ra klengeltengat a mo remiid.

Ak mlo mui a klemedengei er ngak er a delongelel a “priesthood” raket ma “techall el nguu a klisichel a tngakireng er a Kristo” ra beraod er a kesai rak ra memong. Ng mle tal el sandei, ng mle erul tekoi a kuruul. A tang a mlo mengederodel ra kot el stake ra tal beluu, e sel tang a mlo mengedecheduch ra ngeasek el chad, e alsekum a rokui el tekoi a di ungil, eng moluut a kle priesthood er ngii ma klengeltengat er a templo. Ngkal lokedei a rekil chad a mlo chedal a Ikelesia sera le kekerel chad. Ng milesiou el mle ungil. Engdi sera luut er ngii, eng milcheuid er a rolel, e mlo diak el chedal a Ikelesia. Kesai rak ruriul, “eng mlo melchesuar,”22 e okiu a ulengesuir a roubeltik el reng el mengeteklel a priesthood ma re chubechub el chedal a ikelesia, eng nguleuchel e liluut el metecholb er a Ikelesia.

E a uriul, eng milluches me lolutii a priesthood er ngii ma klengeltengat er a templo. Maki ulterkeklii a sils elmo kaseues er a Sabadong ra teruich el klok er a tutau ra blil a miting. Sera ak bong er tial cheldecheduch, eng mla mong. Ng kmal mle semeriar el lmuut el nguu a priesthood meng diak lorekedii a rengul.

Me kim chadecheduch, e ak kulchotii er ngii a babier louchais el kmo a President Thomas S. Monson a ulemes er a babilngel e kilngei er a cheldecheduch. Ngkal cheklemuk el ngeasek el chad a lilangell. Ma ak silbedii el kmo a sils el ki bom chadecheduch a diak a chedechedelel ra klengar er ngii. Ng kora mlo rrau a rengul. Ma kuluchais er ngii el kmo sel luriul er a le moluut a klengeltengat el morngii, e a rekord el chedal a Ikelesia a di mochotii sera le metecholb, le moterkokl, le nguu a priesthood, ma le mechedaol ra templo. Ng liluut el mo uedikel a rengul.

A kulengit er ngii mel iuii a Doctrine and Covenants:

Ma Rubak a dilu el kmo, ngkel mla ouchul a rengul er a kengtil, ngii a bla kusubes er ngii, e Ngii, el Rubak, a mla ousubes.

Tiakid, e kede medengei alsekum a chad a mlaouchul a rengul ra kengtil—momes, ng kombesar e mo imikr.23

Ng mlo merael iuosech er a medal ra ongedei el taem. Mak mocha mor imak ra bebul a btelul el loba ngklel Kristo, lokiu a ngerachel er a Melchizedek Priesthood, e oba sel kengei ra President er a Ikelesia, e ak kulutii a priesthood er ngi ma klengeltengat er a templo.

Sel deurreng el mle er kemam a mengasireng. Ng mlo medengei el kmo ng sebechel lmuut el lobang e ousbech er a priesthood ra Dios. Ng mlo medengei el kmo a klengeltengat er a templo a mla lmuut el mo oureor. Meng merael el kora kebekakl e mad el dmeu a rengul. Ak meral otengii e melchesuar el chemat er ngii a Demad ra Babeluades. Ngak me ak lilangel er a deurreng.

Nguriul, e a stake a milchederodel. A ikel miting a kmal mle meseked er a re semeriar, el mekedung el Santo, e a re smiich el menguteling er a stake a mloterkokl. Engdi, kuk ngak, e sel reksii er tial longdibel el milngederodel ra kot el stake er tial beluu a diak le ngelakl ra deurreng el kulechesuar er ngii ra kulluut a ikel klengeltengat el mo re ngikal ngeasek el chad.

Ak mla mo medengei el kmo sel moktek er a mengederodel er a stake, malechub eng ngusbechellel a priesthood er a Dios ra ngidil tekoi, a olengeseu ra Demad ra Babeluades ma Jesus Kristo er a Urerir, lodars a techall mel sobel el nguu a deurreng a re bek el ngelekel a Dios. El di ua sel raket el moktek a oleiul er a beraod, a priesthood oleiul er a ebangkelio ra Jesus Kristo, el techall el rokui el chad el kutmokl a telbiil e le ngai a ikel telengtengil a chedaol lureor. “A rsechel a tngakireng er a Kristo”24 a sebechel dousbech er ngii ra klengar er kid sel dolchesuar er sel mengikiid longitikaik er a Chedaol Reng eng ngmai a ikel telbilel a Dios.

Nguldimukl er a moltirakl a lechul ma chedaol lureor er a ebangkelio, e ak mengemedaol er kau el kutmokl e mengeluolu a telbilel a priesthood. Mnguu a yaksok er a Dios ma telbilel. Mchiisois a ngerchelem ra priesthood lolengeseu er a Demad ra Babeluades ma Jesus Kristo. Mousbech er a priesthood e molengeseu loleiul ra techall el mo klungiolel a kmung techang lokiu sel klisichel a tngakireng er a Osobel. Mesel chomuaisei, eng meklou el klengeltengat a me er kau ma telungalk er kau. Ak medengei el kmo a Osobel a ngar e omekrael er tial lureor, loba ngklel a Jesus Kristo, amen.