Prihsduhd oh Manaman en Tomw en Sounkomouro

Iang ie medewe raket ehu ni eh mwekmwekid wawai kowei pwehn kak onopehng e pahn mwesel. Met, song medewe misihn en kamauradahu. Kahs, ni eh kin lulpeseng, oh karakarla, pwehn kak kapihrada raketo nan wehwe. Oh song pil medewe wen toutou en dipwisou me kin mih nan raketo. Ihte ansou me mehn wisingko pahn doadoahk iei ni ansou me e lela wasa me e kokolahng ie oh doadoahk ie. Kumwail sohte anahne wia semen en katanga raket pwehn kak kesempwalki, dipwisou pweilaud ehu me duwehte misihn en sadalaid en sampah pwon me kin mihmi nan sohko ehu. En raket pwukoa ie wa dipisou en nan wehweh kan.

Ni soutik wet, I men karasapene prihsduhd me kitail kolokol ohng raket ehu oh ansou mwau en ale kapai sang ni manaman en tomwpen Sounkomouro ong ni wisik toutou me raketo kin wa.

Pwehki Sapwellime tomwo, Sises Krais ahniki manaman oh mweimwei en komourala aramas koaros. Pwe kitail koaros en kak alehdi kapai pen Sapwellime tomwo, E ketin ketkiongehr ekis en Sapwellime manaman oh mweimwei rehn ohl akan en sampah wet. Manaman oh mweimwei wet kin kadaniki prihsduhd. E kieng mweimwei ong irail me kolokol prihsduhd en sewese Sapwellimen Sahmo oh Sises Krais pwukoa doadoahk--en komourala oh kasapwilada sapwellimen Koht seri kan. Met e wiawi pwehki e kieng Sapwellime seri kan ansou mwahu en alehdi kapai kan en manaman en tomwpen Sounkomouro.

Manaman en tomwpen Sises Krais inenen kesemwpwal pwehki sohte emen kitail kak pwuralahng samatail nanleng ma sohte sawas wet. Nan mour wet, kitail kin kalapw wiahda sapwung oh kawehla sapwellimen Koht kosoned akan. Kitail kin saminkihla dihp oh sohte kak pwuralahng ni limen Koht. Kitail anahne manaman en tomwpen Sounkomouro pwe kitail en kak wia ehute rehn Samatail Nanleng. Sises Krais powehdi mehla, pwe koaros en kak iang iasada. E ketkihieng kitail mahkepen dipatail kan, ma kitail pahn kapwaiada sapwellime kosoned akan oh inou kan en Sapwellime rongamwahuo. Pwehki Ih, kitail kak ale mour soutik. Alahldien kapai en tomwpen Sounkomouro wia pwukoa ehu me keieu kesemwpwal.

Pwe en Samatail Nanleng pilahn akan en kak pweida, manaman en tomw en Krais anahne wiawia ong Sapwellimen Koht seri kan. ¹ Prihsduhd me pahn kak sewesehkin kitail ansou mwau pwukat. Iei met me wia raketo. Prihsduhd udahn kesempwal pwehki tiahk sarawih kan oh inou kan pohn sampah kin wiawihte sang ni mweimwei me irail ahniki. Ma prihsduhd sohte kapwaiada pwukoah wet en kasalehda ansou mwau pwukat en iang paieki manaman en tomw en Sounkomouro, eri ia pahn kahrepen prisduhd? E pahn wiahte mehn kilkilang ong aramas,oh mehkot kopwuriamwei ehu? Koht kupwuriki prihsduhd en sohte ohngete rahn Sarawi de kitail en adikihte. E ketin kupwuriki en doadoahk ohng mehn wisik toutou o.

Kisin ohla tikitik kan en nan raket kin kak karehda sohte pweidahn doadoahk. Wasa me wereilahr oh merlahr akan kin kaluwetehla paliweren raketo kahrehieng raketo ah sohte kin kak tang mwau. Pwehn kak silehdi prihsduhd sang nan soangen ohla pwukat, Koht ketin silehdier mwomwen kihla oh doadoahngki prihsduhd.² Kasarawih kan me prihsduhd kin kihda e silasildier sang ni prihsduhd me wia pwuhng en presidensi me kin kohieng ohl emen.³ Epwelipen doadoahngki prihsduhd kin sang ni mweimwei kan en prihsduhd ohpil inou kan me prihsduhd men kin wiahda. Eh pwukoah doadoahk kin wiawihte sang ni mweimwei en prihsduhd kan oh inou kan. En ohl arail pwukoahn prihsduhd kin kohieng emenemen irail oh e sohte pahn kin wiawi likin ohlo⁴ pwe manaman en prihsduhd sohte kin pein osada.

Aronik oh Melkesidik prihsduhd koaros alahlda sang ni inou kan.⁵Koht me kin koasonehdi wiepeh kan oh ohl emen ahpw kin alehda. Ni oaralap, irail kan me kolokol prihsduhd inoukihdahr en sewese Koht nan Sapwellime doadoahk. Nan rahn pwukat, Sises Krais kawewehda me inou en prihsduhd “kamanamanla ong kitail ong kamwahupatail, oh ahpw kaidehn ongete peihn atail kamwahu, ahpw ong kamwahupen sampah pwon … pwehki irail sohte kin rapahki ie.”⁶

Met padahngkidahr me kahrepen prihsduhd iei en luke mehteikan en kohdo rehn Krais sang ni sewesehkin irail en alehda rongamwau kopwurupwurdohu. Kitail ahniki prihsduhd pwe kitail en kak sewese sapwellimen Samatail Nanleng serih kan en marahradahsang nan katoutou en dihp oh duwehla Ih. Sang ni prihsduhd, manaman en koht akan kin sansal nan mour en irail akan me kin kapwaiada inou sarawih kan oh alehda tiahk sarawih kan me koasondier.⁷Iei soangen mwohmw wet, me aramas akan kin kohdo rehn Krais, mwakelekelda, oh kopwungpwungla rehn Koht. Manaman en Tomw en Krais e mie sang ni prihsduhd me kin wahdo kapai pwukat.

Inou kan rehn Koht me inenen mehlel oh sarawi. Ohl emen anahne en kaunopada, wewehkihla, oh alehda inou pwukat sang ni ineng mehlel en wauhnikin irail. Inou ehu kin wia kauhla ehu me ohl emen pahn inoukihdi en mehlel ieng. Soun inting, Robert Bolt, kawewehda me, ohl emen kin wiahda ah inou kan ihte ni ansou me e mehlelieng pein ih pwehn kapwaiada inou ehu me e piladahr en mehlelieng. E wiadahr ehupene ehu nan pwungen kamehlel pen inouo oh pein ah wiewia mwahu kan. Ni ansou me ohl emen kin wiahda ah inou, e rasehng eh kihieng pihl nan pehu . Oh ma e pahn kihpeseng sendin peh kan, e pahn sehsehla ihs ih. Inou me kin ohla solahr kak pwurehng wiawi de me mie kasikpen me e kak pwurehng alehda.⁸

Aronik Prihsduhd men kin inoukihda en kalikisang me suwed, sewese mehteikan en pwungila rehn Koht, oh onopehng en alehda Melkesidik Prihsduhd.⁹ Pwukoah sarawi pwukat kin pweida ni ansou me irail kin padahngki, pepdaisiala, kakehlaka tohn Mwomohdiso, oh luke mehteikan en alehda rongamwauo. Iei mepwukat me irail kin idawehn pwehn kak katkatanga raketo. Sang ni mepwukat, Koht inouki koapwoaroapwoar, mahk, kaweid en tohnleng kan, oh kih kan en rongamwau en koluhla oh pepdaisla.¹⁰

Melkesidik Prihsduhd men kin inoukihda en kapwaiada pwukoah kan me sang ni Aronik Prihsduhd oh kalaudehla ah pwukoah me malipilipieng nan Melkesidik Prihsduhd.¹¹E kin wia met sang ni kapwaiada kosonned akan me pidada inou sarawi kan. Kosonned pwukat iei me patehng “ngoangki rongorong mahsen en mour soutik” sang ni momourki mahsen en Koht akan,¹² wia kadehdepen Sises Krais oh Sapwellime doadoahk en imwin-rahn akan, ¹³ sohte pein kepikepinga pein ih,¹⁴ oh wiahla kempoakepahn Sounkomouro, kamehlele Ih nin duwen kempoakepah men.¹⁵

Sang ni mepwukat, Koht inoukihda me Melkesidik Prihsduhd men pahn alehdi kih kan en wewehkihla en Koht doadoahk kopwuriamwei kan. E pahn unsekla pwe en kak uh mwohn sihlangin Koht. E pahn kak en kapwaida ah pwukoah nan doadoahk en komouro. Sises Krais pahn kaunopada ahl ohng prihsduhd men oh pahn ketket reh. Ngehn Sarawi pahn mihmi nan mohngiong en irail me kolokol prihsduhd oh tohnleng kan pahn kapai irailda. Paliwere pahn kehlaila oh weliakapwala. E pahn wiahla soun sohso ong kapai kan en Abrahm oh, iangahki ah pwoud, pahn ehu sohso rehn Sises Krais nan wein Samatail Nanleng.¹⁶Mepwukat wia inou “keieu kaselel oh kesempwal kei”.¹⁷ Sohte inou me laudsang met.

Ong emenemen ohl me alehier Melkesidik Prihsduhd, Koht ketin kamanalahr Sapwellime inou kan ki inow poatoapoat ehu.¹⁸Inow wet ongete Melkesidik Prihsduhd,¹⁹oh Koht me inowkidahr inow wet, kaidehn me kolokol prihsduhdo.²⁰Pwehki mwekid kesempwal wet eh doke Sapwellime manaman oh mweimwei, Koht doadoahngki inow poatoapoat ehu, me audaudkihda wen koasoi loal me E kak diar en doadoahngki, pwehn kak kamehlelehieng kitail duwen Sapwellime inou kan ah poatoapoat oh sohte mehkot kak wekidala.

Kahpwal laud pahn pwarada sang ni kasapwungehla oh sohpeisang inou kan.²¹ Ma pahn mie mwomwen mehn mwadongki de sohte nohn pereniki amwail pwukoahn prihsduhd e pahn duwehte amwail pahn wadohng dipisou luwet ehu ong nan mesihn en raket ehu. E pahn kahrehieng inou en prihsduhdo nan apwal pwehki e pahn kak en kahrehieng eh doadoahk eh sohte pweida. Sapeik ohng sapwellimen Koht kosonned akan pahn kawehla inouo. Kapai en inou kan koaros pahn sohralahsang irail me kin kawehla inou pwukat kokolahte.

I wewehkilahr duwen ehupene kesempwal en “prihsduhd” me rasehng raketo oh “ahnsou mwau me kitail ahniki en iang paieki manaman en tomw en Krais” me rasehng mehn wisik kan pahr kei samwalahro. Ni imwin wihk ehu, mie ai kepwukoa riau kohieng ie. Ehu kepwukoahu ien kawada keieu en stake nan ehu sahpwo, oh mehteio ien kapeidakih emen pwutak pwulopwul men oh, ma koaros sondier, kapwurehieng ah prihsduhd oh kapai en tehnpas sarawi kan. Ohl sounpar 30 menet iangala Mwomwohdiso ni ah pwulopwul. E wiahier ah misin. Ahpw ansou me e pwurodo nihmwe, e salongala, oh e sohla wia tohn Mwomwohdiso. Mwurin pahr kei, e ahpw kasawiada peihn ih,²² oh sang ni sawas en kaun en prihsduhd kan oh kadek en tohn mwomwohdiso kan, e koluhla, pepdaisla, oh pwurehng wiahla tohn Mwomwohdiso wet.

Mwurin mwo, e pwurehng peki en ale ah prihsduhd oh kapai kan en nan tehnpas sarawi. Se koasonehdi ansou en tuhpene ong rahn Kaunop kulok 10:00 ni wasahn mihtingo. Ni ansou me I lela mwo mwadang, e mihier mwo. Udahn e men aledahr ah prihsduhdo, e solahr kak awi.

Ni ansou me se tutuhpene, I kasalehieng kisin likou kis me kawewehda en Presiden Thomas  S. Monson eh pein tehkehr nah doaroapwehn pekpeko oh mweidadahr ira en tuhpene. Pwutak menet me kin sohte ah pepehm ni ansou me mehkot sued kin wiawi ahpw sengisengier. Ngei eri ndahieng me rahn en ata tuhpene wet pahn sohte manaman nan ahmw mour. E kilengdo mesen pwuriamwei. I padahkieng me mwurin ai pahn kapwurehieng ah kapai kan, nah doaropwehkan me kasalehda me e wia tohn mwomwohdiso wet pahn kasalehdahte rahn me E tepin pepdaisla, kasarawiala, tiahk sarawihkan en prihsduhd, oh inow sarawi me e wiadahr kan. E ahpw pwurehng sengiseng.

I peki reh en wadek sang nan Doctrine and Covenants:

“Kilang mehmen me koluhkihla dipeh kan, e pahn ale mahkepe, oh Ngehi, Kauno pahn manokehla.

“Sang ni met kitail ese ma mehmen koluhkihla dipeh kan—e pahn wehkada dipeh kan oh sohla pwurehng wia.”²³

Ih eri pwurehng sengiseng. Eri, ngei pwilikihdi pei pohn monge oh ni mwaren Sises Krais, sang ni mweimwei en Melkesidik Prihsduhd, oh ni mweimwei en Presiden en Mowmwohdiso, I kapwurehieng ih prihsduhd oh kapai en tehnpas sarawi kan.

Wen peren me se ahniki ansouo udahn inenen laud mehlel. E esehier me e pileuier ahniki mweimwei en kolokol oh doadoahngki prihsduhd en Koht. E esehier me ah kapai kan en tehnpas sarawi koaros pwurehngehr doadoahk. Nan ah mwekid koaros kasalehda wen peren me e ahniki oh e sansal me udahn e peren. Udahn I perenkihda ih oh kak kehn wen peren me Samatail Nanleng ahniki ong ih. Ngei pil sengisengki wen peren me I ahniki.

Mwurin mwo stakeo kokoudahr. Tuhpene koaros pweida sang ni ngoang, pwoson en Souleng kan, oh alahldahn stake presidensi kapw. Ohng ie, koasonepen stake nan sahpwo sohla nohn kaperen duwehte wen peren me I ahniki ni ahi kapwurehieng kapai kan rehn pwutak pwulopwulo.

I diaradahr me kahrepen kosonepen stake ehu, de doadoahngki prihsduhd en Koht ni sohte lipilipil, iei en sewese Samatail Nanleng oh Sises Krais nan Sapwellimara doadoahk,--en kieng Sapwellimen Koht seri kan arail ahnsou en dorei iraila oh duwehla Krais. Duwehte raketo me ah pwukoa en wa dipisou toutou, prihsduhd kin wa rongamwau en Sises Krais, en kak mweidohng koaros en wiahda inou kan oh alehdi tiahk sarawi kan. “Intahn Tomw en Kraiso”²⁴kak en sewesei kitail nan atail mour ni atail pahn kehn manaman en Ngehn Sarawi oh ale kapai kan en sapwellimen Koht inou kan.

Pwe en patehng amwail kin kapwaiada kosonned akan oh tiahk sarawih kan en rongamwauo, I lukei kumwail en wiahda oh kapwaiada inou kan en prihsduhd. Alehda Sapwellimen Koht inou poatoapoato. Kalaudehla amwail pwukoah kan en prihsduhd pwehn sewese Samatail Nanleng oh Sises Krais. Doadoahngki prihsduhd en sewese kihwei ahnsou en iang paieki manaman en tomw en Sounkomouro ohng mehteikan! Ni ansou me kumwail wia met, kapai tohto kan pahn kodohng kumwail oh amwail peneinei. I kadehde me Soundoro ieias oh kaweid doadoahk wet ni mwaren Sises Krais, ahmen.