Te Autahuʼaraʼa ’e te mana tāra’ehara a te Faʼaora

E hiʼo na tātou i te hōʼē pahī pao (fusée) e faʼahaerehia ra i te vāhi haʼamaʼuera’a ’ia nehenehe i te reira ’ia faʼaineinehia nō te haʼamaʼue. ʼA hiʼo na i teienei i te tūʼamaraʼa. E faʼarirohia te ito, ’o te tūtuʼi-maitaʼi-hia, ʼei māhu ahi veʼaveʼa o te pao mai, ma te hōroʼa i te tūraʼiraʼa e tītauhia nō te haʼamaʼue i te pahī pao nā te ara. I te pae hopeʼa, ʼa hiʼo na i te utaʼa ʼaore rā te ferēti e vai ra i mua i te pahī pao. E tupu mau te hoʼona o te utaʼa ’ia tae anaʼe te reira i te vāhi i tītauhia ’e ’ia rave te reira i te ʼohipa i tītauhia. ’Aita e tītauhia ’ia riro ’outou ’ei ʼaivānaʼa nō niʼa i te pahī pao nō te ha’afa’ahiahia i te hōʼē peʼeʼutari moni rahi, nō te faʼataeraʼa manaʼo nā te ao nei, ’ia vaiiho-noa-anaʼe-hia te reira i roto i te hōʼē fare maehaʼa. Te misiōni a te hōʼē pahī pao ’o te tari-noa-raʼa ïa i te hōʼē utaʼa.

Tē hinaʼaro nei au i teie pō e faʼaau i te autahuʼaraʼa tei mauhia e tātou nei i te hōʼē pahī pao {3}ʼe te rāveʼa ’ia fānaʼo i te mana tāraʼehara a te Faʼaora i te utaʼa tā te hōʼē pahī pao e tari atu.

Nā roto i tāna tūsia tāra’ehara, e mana ’e e ti’ara’a tō Iesu Mesia ’ia fa’aora i te mau ta’ata ato’a. ’Ia nehenehe i tōna mana tāra’ehara ’ia fāriʼihia, ’ua hōroʼa ʼoia i te hōʼē tufaʼa o tōna mana ʼe te tiʼaraʼa i te taʼata i niʼa i te fenua nei.Teie mana ʼe teie tiʼaraʼa tei hōroʼahia mai, ’ua piʼihia ïa te autahuʼaraʼa. E faʼatiʼa te reira i te mau taʼata tei mau i te autahuʼaraʼa ’ia tauturu i te Metua i te Ao ra ʼe ia Iesu Mesia i roto i tā rāua nei ʼohipa—’ia faʼatupu i te fa’aorara’a ʼe te faʼateiteiraʼa o te mau tamariʼi a te Atua. E tupu te reira, nō te mea e hōroʼa mai te reira i tāna mau tamariʼi i te rāveʼa nō te fāriʼi i te mau haʼamaitaʼiraʼa nō te mana tāraʼehara a te Faʼaora.

E mea faufaʼa roa te mana tāraʼehara a Iesu Mesia nō te mea ʼaore roa te hōʼē o tātou e nehenehe e hoʼi i tō tātou ʼutuāfare i te raʼi ma te tauturu ʼore. I roto i te oraraʼa tāhuti nei, e rave iho ā tātou i te mau hape ʼe e ʼōfati hoʼi i te mau ture a te Atua. E viʼiviʼihia tātou i te hara ʼe eʼita tātou e faʼatiʼahia ’ia hoʼi atu e ora i mua i te aro o te Atua. Tītauhia te mana tāraʼehara a te Faʼaora ’ia nehenehe ia tātou ’ia faite ’e te Metua i te Ao ra. ʼUa ʼōfati Iesu Mesia i te mau tāpeʼa o te pohe pae tino, e tiʼafaʼahou ai te taʼata atoʼa. Tē pūpū nei ʼoia i te faʼaʼoreraʼa hara, mai te au i te haʼapaʼoraʼa i te mau ture ʼe te mau ʼōroʼa o tāna ʼevanelia. ʼUa pūpūhia mai te faʼateiteiraʼa nā roto mai iāna. Te rāveʼa nō te fānaʼo i te mana tāraʼehara a te Faʼaora ’o te utaʼa faufaʼa rahi roa aʼe ïa o te poietera’ahia te ao nei.

Nō te faʼatupu i te mau ʼōpuaraʼa a te Metua i te Ao ra, e tiʼa ïa ’ia noaʼa te mana tāraʼehara a te Mesia i te mau tamariʼi a te Atua.¹ E hōroʼa te autahuʼaraʼa i teie mau rāveʼa. ’O te pahī pao ïa. E mea faufaʼa rahi te autahuʼaraʼa nō te mea e faʼaterehia te mau ’ōroʼa ʼe te mau fafauraʼa e tītauhia i niʼa i te fenua nei nā roto anaʼe i te mana o te autahuʼaraʼa. Mai te mea eʼita te autahuʼaraʼa e manuia i te hōroʼa i te rāveʼa nō te fānaʼo i te mana tāraʼehara a te Faʼaora, ʼe aha ïa tōna tumu ? E riro noa ïa te reira ʼei hōʼē ahitiri fifi, ’ei faʼatianiraʼa i te manaʼo ? ʼUa ʼōpua te Atua ’ia faʼaʼohipahia te autahuʼaraʼa hau atu i te hōʼē piha haʼapiʼiraʼa noa i te Sābati ʼaore rā ʼei hōʼē rāveʼa nō te tāviniraʼa. ʼUa ʼōpua ʼoia i te reira nō te tari i te utaʼa.

E nehenehe te mau hape naʼinaʼi e faʼatupu i te manuia-ʼore-raʼa o te misiōni. E nehenehe te mau mutu o te mau tāpiri ʼe te ʼariʼari o te mātēria e faʼataupupū i te tereraʼa o te hōʼē pahī pao. Nō te pāruru i te autahuʼaraʼa i teie mau fifi, ʼua pāruru te Atua i te hōroʼaraʼa ʼe te faʼaʼohiparaʼa i te reira.² Nā te mau tāviri o te autahuʼaraʼa, ʼoia hoʼi te mau tiʼaraʼa o te peresideniraʼa tei hōroʼahia i te taʼata nei e pāruru i te hōroʼara’a o te autahuʼaraʼa.³ Nā te mau tāviri o te autahu’ara’a ato’a ’e nā te mau fafauraʼa tā te taʼata tei mau i te autahuʼaraʼa i rave e pāruru i te faʼaʼohiparaʼa i te autahuʼaraʼa. Nō reira, tē fa’aterehia nei te fa’a’ohipara’a o te autahu’ara’a e te mau tāviri nō te autahu’ara’a ’e te mau fafaura’a. ʼUa hōroʼahia te faʼaueraʼa autahuʼaraʼa i te taʼata tātaʼitahi ’e ’aita te reira e ta’a atu iāna,⁴ e ’ere te autahu’ara’a i te hō’ē puna mana ’aita e hōho’a, ’e nāna iho tōna mana.

E fāriʼihia te autahuʼaraʼa a Aarona ʼe a Melehizedeka nā roto i te fafauraʼa.⁵ Nā te Atua e faʼataʼa i te mau tītauraʼa ʼe nā te taʼata e fāriʼi. Te auraʼa mau, e fafau te mau taʼata tei mau i te autahuʼaraʼa ’ia tauturu i te Atua i roto i tāna ʼohipa. I te ʼōmuaraʼa o teie nei tau tuʼuraʼa ʼevanelia, ’ua faʼaʼite mai ʼo Iesu Mesia ē « ʼua haʼamauhia te fafauraʼa autahuʼaraʼa i niʼa ia ʼoutou ʼei maitaʼi nō ʼoutou, e ʼere hoʼi te maitaʼi nō ʼoutou anaʼe, ʼei maitaʼi rā nō te ao pāʼātoʼa nei… nō te mea e ʼore roa rātou e haere mai iāʼu nei ».⁶

Tē haʼapiʼi mai nei te reira ē, te tumu nō te autahuʼaraʼa ’o te aniraʼa ïa ia vetahi ’ē ’ia haere mai i te Mesia ra nā roto i te tautururaʼa ia rātou ’ia fāriʼi i te ʼevanelia tei faʼahoʼihia mai. Tei ia tātou ra te autahuʼaraʼa ’ia nehenehe ia tātou ’ia tauturu i te mau tamariʼi a te Metua i te Ao ra ’ia haʼamāmāhia te hōpoiʼa o te hara ʼe ’ia riro mai iāna ra te huru. E faʼaʼitehia mai nā roto i te autahuʼaraʼa te mana nō te atuaraʼa i roto i te oraraʼa o te mau taʼata atoʼa ’o te rave ʼe ’o te haʼapaʼo i te mau fafauraʼa o te ʼevanelia ʼe ’o te fāriʼi i te mau ʼōroʼa tei ʼāpitihia atu.⁷ Teie te rāve’a e haere ai tātou tāta’itahi i te Mesia, e tāmāhia ai ʼe e faite atu ai ’e te Atua.E noaʼa te mana tāraʼehara a te Mesia nā roto i te autahuʼaraʼa, ’o te tari i te utaʼa.

Mea faufaʼa rahi ʼe e mea hanahana te mau fafauraʼa a te Atua. E tiʼa i te hōʼē taʼata ’ia faʼaineine, ’ia haʼapiʼi mai, ʼe ’ia tomo atu i roto i taua mau fafauraʼa ra ma te hinaʼaro pāpū e faʼatura i te reira. E riro mai te hōʼē fafauraʼa ’ei fafauraʼa nō te taʼata iho.Mai tā te taʼata pāpaʼi teata peretāne Robert Bolt i pāpaʼi, e rave te hōʼē taʼata i te hōʼē fafauraʼa mai te mea anaʼe e hinaʼaro mau ʼoia i te hōroʼa iāna iho i te hōʼē fafauraʼa. E haʼamau ʼoia i te hōʼē auraʼa pūai i rotopū i te parau mau o te fafauraʼa ʼe i tōna iho maitaʼi. ’Ia rave anaʼe te hōʼē taʼata i te hōʼē fafauraʼa, tē mau ra ʼoia iāna iho, mai te pape, i roto i tōna ʼāuʼa rima te huru. ʼE mai te mea e ʼīriti ʼoia i tōna mau rimarima, eʼita ïa ʼoia e nehenehe faʼahou ’ia ʼite iāna iho. ʼAita faʼahou tō te hōʼē taʼata tei ʼōfati i te fafauraʼa e hinaʼaro ’ia haʼapaʼo ʼaore rā ’ia hōroʼa i te hōʼē haʼapāpūraʼa.⁸

E fafau te hōʼē taʼata tei mau i te autahuʼaraʼa a Aarona ’ia ’ape i te ’ino, ’ia tauturu ia vetahi ’ē ’ia faite ’e te Atua, ʼe ’ia faʼaineine i te fāriʼi i te autahuʼaraʼa a Melehizedeka.⁹ E tupu teie mau hōpoiʼa moʼa ’a ha’api’i ai ’oia, ’a bāpetizo ai, ’a haʼapūai ai ’oia i te mau melo o te ʼĒkālesia, ’e ’a ani manihini ’oia ia vetahi ’ē ’ia fāriʼi i te ʼevanelia. ʼO teie ïa tāna ʼohipa « pahī pao ». E fafau mai ïa te Atua i te tiʼaturiraʼa, te faʼaʼoreraʼa hara, te utuuturaʼa a te mau melahi, ʼe te mau tāviri o te ʼevanelia nō te tātarahapa ʼe te bāpetizoraʼa.¹⁰

E fafau te hōʼē taʼata tei mau i te autahuʼaraʼa a Melehizedeka ’ia rave faʼaoti i te mau hōpoiʼa tei tūʼatihia i te autahuʼaraʼa a Aarona ’e ’ia faʼananea i tōna piʼiraʼa i roto i te autahuʼaraʼa a Melehizedeka.¹¹ E nā reira ʼoia nā roto i te haʼapaʼoraʼa i te mau faʼaueraʼa i tūʼatihia atu i te fafauraʼa. Tei roto i teie mau faʼaueraʼa te « faʼaitoitoraʼa i te haʼapaʼoraʼa i te mau parau nō te ora mure ʼore » nā roto i te oraraʼa « i te mau parau atoʼa nā roto mai i te vaha o te Atua »,¹² te fa’a’itera’a i te ’itera’a pāpū nō Iesu Mesia ʼe tāna ʼohipa i te mau mahana hopeʼa nei,¹³ ma te faʼaahaaha ʼore iāna iho,¹⁴ ʼe te riroraʼa ʼei hoa nō te Faʼaora, mā te tiʼaturiraʼa iāna mai tā te hōʼē hoa e nā reira.¹⁵

E fafau mai ïa te Atua ē e fāriʼi te hōʼē taʼata tei mau i te autahuʼaraʼa a Melehizedeka i te mau tāviri nō te ʼite i te mau parau ʼaro a te Atua. E riro mai ïa ʼoia ’ei taʼata maitaʼi ’ia nehenehe iāna ’ia tiʼa atu i mua i te aro o te Atua. E nehenehe atoʼa ïa iāna ’ia rave faʼaoti i tāna ʼohipa i roto i te ʼohipa nō te faʼaoraraʼa. E faʼaineine ïa ʼo Iesu Mesia i te ’ēʼa i mua i te taʼata tei mau i te autahuʼaraʼa ʼe e pārahi mai ʼoia i pīhaʼi iho iāna. E pārahi mai ïa te Vārua Maitaʼi i roto i te ʼāʼau ʼo te taʼata tei mau i te autahuʼaraʼa ʼe e amo ïa te mau melahi iāna. E haʼapūai ʼe e faʼaʼāpīhia ïa tōna tino. E riro mai ïa ʼoia ’ei fatu ʼāiʼa nō te mau haʼamaitaʼiraʼa a Aberahama ’e i pīhaʼi iho i tāna vahine faʼaipoipo, ’ei fatu ʼāiʼa ’e ’o Iesu Mesia i te bāsileia o te Metua i te Ao ra.¹⁶ Teie ïa « te mau maitaʼi rahi roa i parauhia mai ».¹⁷ ʼAita atu e mau fafauraʼa rahi e nehenehe e ferurihia.

Tē haʼapāpū nei te Atua i te taʼata tātaʼitahi e fāriʼi i te autahuʼaraʼa a Melehizedeka i tāna mau parau fafau ma te hōʼē tapuraʼa.¹⁸ Nō te autahuʼaraʼa a Melehizedeka anaʼe teie tapuraʼa,¹⁹ ʼe nā te Atua e hōreo i te tapuraʼa, e ʼere ïa nā te taʼata tei mau i te autahuʼaraʼa.²⁰ Nō teie huru ta’a ’ē hō’ē roa i te fa’a’ohipara’a i tōna mana ’e tāna ha’amanara’a, ’ua faʼaʼohipa te Atua i te tapura’a, ’ei parau pūai roa a’e tāna e nehenehe e fa’a’ohipa, ’ei haʼapāpūra’a ia tātou i te nātura ru’uru’u ʼe te ho’i ’ore i muri o tāna mau fafauraʼa.

E tupu mai te mau hopeʼaraʼa ’ino nā roto i te ʼōfatiraʼa i te mau fafauraʼa nō te autahuʼaraʼa ʼe te fāriu-’ē-raʼa atu i te reira.²¹ Te rave-haʼumani-noa-raʼa ʼaore rā te faʼaea-ʼohipa-ʼore-noa-raʼa i roto i te hōʼē piʼiraʼa nō te autahuʼaraʼa, ’ua riro ïa mai te tuʼuraʼa atu i te paruparu o te mātēria i roto i te faʼanahoraʼa o te hōʼē pahī pao. E haʼafifi ïa te reira i te fafauraʼa autahuʼaraʼa nō te mea e nehenehe te reira e arataʼi atu i te manuia-’ore-ra’a o te misiōni. E ʼōfati te haʼapaʼo-’ore-raʼa i te mau faʼaueraʼa a te Atua i te fafauraʼa. Nō te hōʼē taʼata tāmau i te ʼōfati i te fafauraʼa ʼe te tātarahapa ’ore, e ʼīriti-’ē-hia atu ïa te mau haʼamaitaʼiraʼa i fafauhia.

E rave rahi matahiti i teienei, ’ua noaʼa iāʼu ’ia ʼite māramarama rahi atu ā i te auraʼa i rotopū i te « pahī pao o te autahuʼaraʼa » ʼe te « utaʼa nō te rāveʼa ’ia fānaʼo i te mana tāraʼehara a te Mesia ». ’Ua fāriʼi au i roto i te hōʼē hopeʼa hebedoma e piti faʼataʼaraʼa ʼohipa. Te hōʼē ’o te haʼamauraʼa ïa i te titi mātāmua i roto i te hōʼē fenua, ʼe te tahi ’o te uiuiraʼa ïa i te hōʼē taureʼareʼa ’e, mai te mea ’ua ʼāfaro te mau mea atoʼa, ’ia haʼamau faʼahou i tōna mau haʼamaitaʼiraʼa nō te autahuʼaraʼa ʼe nō te hiero. ʼUa tomo mai teie nei taʼata 30 matahiti te paʼari i roto te ʼĒkālesia i tōna ʼāpīra’a. ʼUa tāvini ʼoia i te hōʼē misiōni mā te hanahana. I tōna rā hoʼiraʼa atu i te fare, ʼua moʼe ʼoia i tōna haereʼa, ʼe ʼua ʼere ʼoia i tōna tiʼaraʼa melo i roto i te ʼĒkālesia. I muri aʼe i te tahi mau matahiti, « iho fa’ahou maira tōna iho huru mau »,²² ʼe ma te tauturu a te mau tiʼa faʼatere here nō te autahuʼaraʼa ʼe te mau melo maitaʼi, ’ua tātarahapa ʼoia ʼe ʼua fāriʼi-faʼahou-hia ʼoia i roto i te ʼĒkālesia nā roto i te bāpetizoraʼa.

I muri mai, ʼua ani ʼoia ē ’ia faʼahoʼihia mai tōna autahuʼaraʼa ʼe tōna mau haʼamaitaʼiraʼa hiero. ʼUa faʼataʼa māua i te hōʼē fārereiraʼa nō te mahana māʼa i te hora 10 i te poʼipoʼi i te fare pureraʼa. I tōʼu taeraʼa atu nō te tahi mau fārereiraʼa nā mua atu, tei reira atoʼa ’oia. ʼUa hinaʼaro rahi mau ʼoia i te fāriʼi faʼahou i te autahuʼaraʼa, ʼe ʼaita i tiʼa iāna i te tīaʼi.

I roto i tā māua uiuiraʼa ʼua faʼaʼite atu vau iāna i te rata o te haʼamāramarama ra ē ’ua hiʼopoʼa te peresideni Thomas S. Monson i tāna aniraʼa ’e ’ua faʼatiʼa ’ia ravehia te uiuiraʼa. ʼUa taʼi teie taure’are’a tamāroa ʼāueue ʼore. I muri iho, ’ua parau atu vau iāna ē ʼaita e auraʼa te taiʼo mahana nō tā māua fārereiraʼa i roto i tōna oraraʼa. ʼUa hiʼo māere mai ʼoia. ʼUa faʼaʼite au iāna ē i muri aʼe i tōʼu faʼahoʼi-faʼahou-raʼa i tōna mau haʼamaitaʼiraʼa, e faʼaʼite noa mai ïa tāna parau meloraʼa i te mau taiʼo mahana o tōna bāpetizoraʼa mātāmua, te haʼamauraʼa, te faʼatōroʼaraʼa i te autahuʼaraʼa e te ʼōroʼa hiero. ’Ua taʼi faʼahou ʼoia.

’Ua ani au iāna ’ia taiʼo mai i roto i te Parau Ha’api’ira’a ’e te mau Parau Fafau :

« Inaha, ’o ’oia ’o tei tātarahapa i tāna ra mau hara, ’ua fa’a’orehia ïa te reira, ’e e ’ore ho’i au, ’o te Fatu e ha’amana’o fa’ahou ā i te reira.

« Nā roto i teie nei mea e ʼite ai ʼoutou ē mai te mea ’ua tātarahapa te taʼata i tāna ra mau hara—inaha, e fā’i mai ʼoia i te reira ʼe e haʼapae ’ē roa atu ho’i ».²³

ʼUa ’ī faʼahou tōna mata i te roimata nō te toru o te taime. I muri iho, ʼua tuʼu atu vau i tōʼu mau rima i ni’a iho i tōna upoʼo ’e i te iʼoa o Iesu Mesia ’e nā roto i te mana o te autahuʼaraʼa a Melehizedeka, ʼe te faʼatiʼaraʼa a te Peresideni o te ʼĒkālesia, ’ua faʼahoʼi au i tōna autahuʼaraʼa ʼe tōna mau haʼamaitaʼiraʼa hiero.

E mea hōhonu te ʼoaʼoa tei tae mai i niʼa iho ia māua. ʼUa ʼite ʼoia ē ’ua faʼatiʼa-faʼahou-hia ʼoia ’ia mau ’e ’ia faʼaʼohipa i te autahuʼaraʼa a te Atua. ʼUa ʼite ʼoia ē ʼua tere faʼahou ā tōna mau haʼamaitaʼiraʼa hiero. ʼUa ʼoaʼoa rahi roa ʼoia. ʼUa faʼahiahia vau iāna ’e ’ua ʼite au i te faʼahiahiaraʼa o te Metua i te Ao ra iāna.

I muri mai, ’ua haʼamauhia te titi. ʼUa tae rahi mai te feiā moʼa ʼanaʼanatae ʼe te itoito i te mau rururaʼa, ʼe ʼua pāturuhia te hōʼē peresideniraʼa titi faʼahiahia. Nōʼu rā, ’ua rahi aʼe tōʼu ʼoaʼoa i te faʼahoʼi-faʼahou-raʼa i te mau haʼamaitaʼiraʼa o teie taure’are’a i te ʼoaʼoa nō te haʼamauraʼa i te titi mātāmua i roto i te hōʼē fenua.

’Ua ʼite au ē te tumu nō te haʼamauraʼa i te hōʼē titi, ʼaore rā i te faʼa’ohiparaʼa i te autahuʼaraʼa a te Atua nā roto i te mau rāveʼa atoʼa, ’o te tautururaʼa ïa i te Metua i te Ao ra ʼe ia Iesu Mesia i roto i tā rāua ʼohipa, te hōroʼaraʼa ïa i te rāveʼa faʼaora ʼe te faʼateiteiraʼa i te mau tamariʼi tātaʼitahi a te Atua. Mai te tumu o te pahī pao i te utaraʼa i te hōʼē utaʼa, tē uta nei te autahuʼaraʼa i te ʼevanelia a Iesu Mesia, ’ia nehenehe i te mau taʼata atoʼa ’ia rave i te mau fafauraʼa ’e ’ia fāriʼi i te mau ʼōroʼa i tūʼatihia atu. E nehenehe te « toto tāraʼehara o te Mesia »²⁴ ’ia faʼaʼohipahia i roto i tō tātou oraraʼa ’ia ʼite anaʼe tātou i te mana haʼamoʼa o te Vārua Maitaʼi ’e ’ia fāriʼi anaʼe tātou i te mau haʼamaitaʼiraʼa tā te Atua i parau.

Taʼa ’ē noa atu i tō ʼoutou iho haʼapaʼoraʼa i te mau ture ʼe te mau ʼōroʼa o te ʼevanelia, tē ani manihinihi atu nei au ia ʼoutou ’ia rave ʼe ’ia tāpeʼa i te mau fafauraʼa o te autahuʼaraʼa. ’A fāriʼi i te tapuraʼa a te Atua ʼe tāna fafauraʼa. ’A faʼarahi i tā ʼoutou mau hōpoi’a i roto i te autahuʼaraʼa nō te tauturu i te Metua i te Ao ra ’e ia Iesu Mesia. ’A faʼaʼohipa i te autahuʼaraʼa nō te tauturu i te hōroʼa atu i te tahi taʼata te rāveʼa nō te fānaʼo i te mana tāraʼehara a te Faʼaora. ’Ia nā reira anaʼe ʼoutou, e tae mai ïa te mau haʼamaitaʼiraʼa rahi i niʼa ia ʼoutou ’e tō ʼoutou ʼutuāfare. Tē faʼaʼite pāpū atu nei au ē tē ora nei ʼe te ʼarataʼi nei te Tāraʼehara i teie ʼohipa, i te iʼoa o Iesu Mesia, ’āmene.