Taug Kev Mus Ntxiv!
Txoj kev rov qab mus cuag peb Leej Txiv Saum Ntuj Ceeb Tsheej yog txoj kev tseem ceeb tshaj plaws ntawm peb lub neej.
Ib puas xya caum xyoo tas los, yog thawj zaug uas Brigham Young saib lub Hav Salt Lake thiab nws tshaj tawm tias, “Nov yeej yog qhov chaw yog lawm!”1 Nws paub li ntawd vim tus Tswv tau muab qhov chaw ntawd tshwm sim rau nws.
Txog thaum xyoo 1869, 70,000 tawm Neeg Ntseeg tau taug txoj kev mus zoo ib yam. Txawm yog lawv nyias muaj nyias yam lus, kab lig kev cai, thiab lub teb chaws, lawv txhua tus muaj ib zaj lub tim khawv txog Leej Txiv, Leej Tub, thiab tus Vaj Ntsuj Plig Dawb Huv, txog qhov uas tau muab Yexus Khetos txoj moo zoo txum tim rov qab los, thiab lawv muaj kev xav txhim tsa Xi-oos—ib qho chaw uas kaj siab lug, zoo siab, thiab zoo nkauj kom npaj rau tus Cawm Seej txoj Kev Los Zaum ob.
Ib tug uas nrog Tsoom Haiv Neeg Ntseeg pawg thib ib tuaj txog Utah yog Jane Manning James—tus ntxhais ntawm ib tug qhev uas tau tso dim, ib tug uas hloov siab los ntseeg lub Koom Txoos, thiab ib tug thwj tim zoo kawg uas raug tej teeb meem nyuaj heev. Muam James yog ib tug Neeg Ntseeg hauv Hnub Nyoog Kawg mus txog thaum nws tas sim neej thaum xyoo 1908.
Nws sau hais tias: “Kuv xav hais tam sim no hais tias, kuv txoj kev ntseeg Yexus Khetos txoj moo zoo, raws li qhia nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, hnub no los muaj zog npaum li hnub uas kuv tau ua kev cai raus dej, los yog nyaj muaj zog tshaj. Kuv them ib feem kaum thiab nyiaj pab, ua raws li txoj lus txawj ntse, kuv pw ntxov thiab sawv ntxov, kuv txo hwj chim coj yam ntxwv zoo rau txhua tus.”2
Muam James, nrog rau lwm tus Tsoom Haiv Neeg Ntseeg hauv Hnub Nyoog Kawg, tsis tau los ntshav, tawm hws, thiab los kua muag kom txhim tsa Xi-oos xwb tiam sis nws kuj nrhiav tus Tswv cov koob hmoov uas los ntawm kev ua raws li cov ntsiab cai ntawm txoj moo zoo raws li nws ua tau thaum nws ntseeg Yexus Khetos ruaj nrees—tus uas kho txhua tus uas rau siab nrhiav Nws zoo.
Cov Neeg Ntseeg thaum ntawd tsis zoo tag nrho, tiam sis lawv twb tsa ib lub hauv paus uas peb siv kom muaj tsev neeg thiab ib lub sawm fem uas sib hlub thiab ua raws li peb tej kev khi lus, uas lwm tus sau hauv ntawv xov xwm nyob thoob plaws lub ntiaj teb vim peb cog lus tias peb yuav ua raws li Yexus Khetos thiab peb pab dawb pab txhua tus tsis hais cov nyob ze thiab nyob deb los yog.3
Thawj Tswj Hwm Eyring, kuv xav hais ua tsaug rau cov neeg coob uas hnav tsho daj uas ua hauj lwm hauv Texas, Mev Teb, thiab lwm qhov chaw ntxiv rau cov uas koj tau qhuas.
Kuv xav hais tias yog peb tsis nco txog cov uas ua neej ua ntej peb, tsis hais peb cov poj koob yawm txwv pioneer, ces peb yuav poob ib qho uas muaj nqis heev. Thaum yav tas los kuv twb hais txog “Kev Ntseeg Ib Ruam Dhau Ib Ruam” thiab kuv yuav hais ntxiv thaum yav tom ntej vim kuv paub tias tej tiam neeg uas tab tom loj hlob tuaj yuav tsum muaj kev ntseeg Yexus Khetos thiab Nws txoj moo zoo npaum li Tsoom Haiv Neeg Ntseeg yav thaud.4
Kuv cov poj koob yawm txwv pioneer tau nrog cov pioneer rau siab ntseeg uas rub laub, caij tsheb nees, thiab taug kev mus rau Utah. Zoo li Muam Jane Manning James, lawv muaj kev ntseeg ib ruam dhau ib ruam thaum lawv taug kev mus.
Lawv cov ntawv ceev xwm txheej piav txog tej teeb meem, kev tshaib plab, thiab kev mob kev nkeeg thiab tej zaj lus tim khawv txog lawv txoj kev ntseeg Vajtswv thiab Yexus Khetos txoj moo zoo.
Lawv tsis tau muaj khoom ntiaj teb ntau tiam sis lawv muaj koob hmoov ntau nplua mias los ntawm kev ua kwv tij nus muag uas muaj nyob hauv Yexus Khetos lub Koom Txoos. Thaum lawv ua tau, lawv twb txhawb nqa cov neeg txom nyem thiab foom koob hmoov rau cov neeg mob ib leeg rau ib leeg thiab los ntawm Vajtswv lub pov thawj hwj.
Cov muam nyob hauv Cache Valley, Utah, tau txhawb pab cov Neeg Ntseeg raws li Koom Haum Niam Tsev qhia kom “koom siab ua hauj lwm pab cov uas xav tau kev pab.”5 Kuv tus pog suab Margaret McNeil Ballard tau ua hauj lwm nrog nws tus txiv, Henry, thaum nws yog tus npisov rau Pawg Ntseeg Logan Second tau 40 xyoo. Margaret yog nws pawg ntseeg Koom Haum Niam Tsev tus thawj tswj hwm tau 30 xyoos. Nws tau coj cov neeg pluag, neeg mob, thiab cov poj ntsuam thiab me nyuam ntsuag los nyob hauv nws lub tsev, thiab muab lub tuam tsev cov thav ntxwv huv rau cov uas xiam hnav.
Txawm yog qhov uas peb nco txog txoj kev uas cov pioneer Maumoos taug mus thaum tiam 19 yog ib qho tsim nyog thiab tseem ceeb, peb kuj yuav tsum nco ntsoov tias hauv lub neej no peb tseem “taug kev mus ntxiv!” thaum peb qhia tias peb muaj “kev ntseeg ib ruam dhau ib ruam.”
Niaj hnub no cov neeg hloov siab los ntseeg tsis los koom ua ke hauv tej zos pioneer nyob hauv lub Teb Chaws Amelikas sab hnub poob. Tiam sis, cov neeg hloov siab los ntseeg koom ua ke nyob hauv lawv pawg ntseeg, es nyob ntawd cov Neeg Ntseeg teev tiam peb Leej Txiv Saum Ntuj Ceeb Tsheej los ntawm Yexus Khetos lub npe. Vim muaj 30,000 pawg ntseeg nyob thoob plaws lub ntiaj teb no, txhua tus nyias muaj nyias Xi-oos rau lawv sib sau ua ke. Ib yam li nqe vaj lug kub hais, “Vim nov yog Xi-oos—cov muaj lub siab dawb.”6
Thaum peb taug txoj kev uas yog lub neej no, peb raug sim siab seb peb puas yuav “ua tib zoo ua txhua yam uas [tus Tswv] tau txib.”7
Peb feem coob yeej nrhiav tej yam tshiab txog peb tus kheej—ua rau peb zoo siab thiab txais kev txawj ntse ntawm sab ntsuj plig. Tiam sis, peb ib txhia taug ib txoj kev uas mus rau kev tu siab, kev txhaum, kev ntxhov siab, thiab kev poob siab.
Yog li ntawd, thov nug nej tus kheej: Qhov kawg uas nej mus nyob qhov twg? Nej ib ruam dhau ib ruam mus qhov twg? Thiab nej txoj kev puas mus rau “ntau yam koob hmoov” uas tus Cawm Seej tau cog lus?8
Txoj kev rov qab mus cuag peb Leej Txiv Saum Ntuj Ceeb Tsheej yog txoj kev tseem ceeb tshaj plaws uas peb yuav tsum taug hauv peb lub neej, thiab peb taug txoj kev ntawd txhua hnub, txhua lub lim tiam, txhua hli, thiab txhua xyoo, thaum peb ntxiv dag zog rau peb txoj kev ntseeg Nws thiab Nws Leej Tub, Yexus Khetos.
Peb yuav tsum ceev faj peb mus qhov twg nyob hauv lub neej no. Peb yuav tsum saib xyuas thiab ua raws li Yexus tej lus ntuas rau Nws cov thwj tim thaum Nws teb tej lus no hais tias, “Thov koj qhia rau peb saib thaum twg mam li muaj tej no? thiab yuav muaj yam twg qhia rau peb paub hais tias, twb txog lub sij hawm uas koj yuav los thiab lub ntiaj teb yuav kawg?
“Yexus teb hais tias, Nej yuav tsum ceev faj, tsis txhob pub leej twg dag ntxias tau nej yuam kev.”9
Hnub no kuv rov qab hais tej lus ntuas los ntawm lub Koom Txoos cov thawj coj.
-
Cov kwv tij thiab cov muam, cia li ceev Khetos cov lus qhuab qhia kom dawb huv thiab tsis txhob raug ntxias ib zaug li los ntawm cov uas hloov cov lus qhuab qhia. Yauxej Xamiv, tus yaj saub rau lub caij nyoog tso cai kawg no, yog tus uas muab Leej Txiv thiab Leej Tub txoj moo zoo txum tim rov qab los.
-
Tsis txhob mloog cov neeg uas Vajtswv tsis tau tsa lawv ua lawv txoj hauj lwm hauv lub Koom Txoos thiab cov mej zeej ntawm lub Koom Txoos tsis tau ua kev cai sib pom zoo rau lawv.10
-
Ceev faj txog tej lub koom haum, tej pawg, los yog tib neeg uas hais tias lawv paub teb tej lus nug txog cov lus qhuab qhia uas lawv hais tias cov thwj tim thiab cov yaj saub niaj hnub nim no tsis muaj los yog tsis to taub.
-
Tsis txhob mloog cov uas yuav ntxias nej kom nplua nuj sai sai. Peb cov mej zeej twb poob nyiaj ntau dhau, yog li ntawd cia li ceev faj.
Nyob hauv tej qhov chaw, peb cov neeg coob heev ntsia dhau lub hom phiaj thiab nrhiav tej kev txawj ntse uas kim thiab tsis meej kom kho mob thiab txhawb nqa lawv.
Ib zaj lus raug cai uas lub Koom Txoos tau tshaj tawm ib xyoos tas los, hais tias: “Peb yaum lub Koom Txoos cov mej zeej ceev faj thaum koom tes nrog ib pawg uas cog lus tias—yog muab nyiaj rau lawv—yuav ua txuj ci tseem ceeb kho mob los yog hais tias lawv muaj tej txheej txheem tshwj xeeb kom txais lub hwj chim kho mob uas tsis yog cov uas tuav lub pov thawj hwj raws li txoj cai.”11
Lub Koom Txoos Handbook ntuas hais tias: “Cov mej zeej yuav tsum tsis txhob siv tej kev kho mob uas tsis raug cai. Cov thawj coj hauv zej zos yuav tsum qhia cov mej zeej uas muaj mob kom lawv mus xyuas cov kws kho mob uas muaj ntawv tso cai kho mob nyob hauv tej teb chaws uas lawv ua hauj lwm.”12
Cov kwv tij thiab cov muam, cia li muaj tswv yim thiab paub tias tej txheej txheem uas ntxim nyiam zoo li no ntshe thaum kawg yuav ua rau nej sab ntsuj plig thiab sab cev nqaij daim tawv raug mob.
Hais txog peb cov poj koob yawm txwv pioneer, lawv yuav tsum muaj kev ywj siab thiab vam khom lawv tus kheej, tiam sis lawv txoj kev sib pab yeej tseem ceeb ib yam thiab. Lawv tau ua hauj lwm ua ke thiab ib leeg pab ib leeg kom kov yeej tej teeb meem ntawm lawv lub caij nyoog, tsis hais teeb meem ntawm sab cev nqaij daim tawv los yog ntawm lub siab lub ntsws los yog. Rau cov txiv neej, lawv muaj lawv tej pawg pov thawj hwj, thiab cov poj niam muaj lub Koom Haum Niam Tsev pab lawv. Tej no tsis tau hloov nyob hauv peb lub caij nyoog.
Lub Koom Haum Niam Tsev thiab tej pawg pov thawj hwj pab peb cov mej zeej nyob zoo ntawm sab ntsuj plig thiab sab cev nqaij daim tawv.
Cia li taug txoj kev ntawm txoj moo zoo nrog “kev ntseeg ib ruam dhau ib ruam” nej thiaj yuav rov qab mus cuag Leej Txiv Saum Ntuj Ceeb Tsheej thiab tus Tswv Yexus Khetos. Tus Tswv yog peb tus Cawm Seej uas peb hlub. Nws yog tus Txhiv Dim ntawm neeg ntiaj teb. Peb yuav tsum hwm Nws lub npe thiab tsis txhob siv ua tej yam tsis yog, siv zog ua raws li Nws cov lus txib. Yog peb ua li no, Nws yuav foom koob hmoov rau peb thiab coj peb rov qab mus.
Kuv caw nej txhua tus uas hnov tau kuv lub suab kom tos txais thiab pab leej twg uas tab tom taug kev niaj hnub no, tsis hais nws tau mus deb npaum li cas los yog.
Thov nco ntsoov tias tsis muaj ib txoj koob hmoov zoo tshaj zaj xov ntawm Kev Muab txoj Moo Zoo Txum Tim Rov Qab Los, es thaum peb txais thiab ua raws li tej ntawd, peb yeej yuav tau kev xyiv fab thiab kev kaj siab lug uas kav ib txhis—tsis hais txoj sia nyob mus ib txhis. Cia peb siv peb lub dag zog, thiab zaj lus tim khawv kom pab peb cov tub txib nrhiav, qhia, thiab muab Vajtswv cov me nyuam ua kev cai raus dej lawv thiaj li yuav muaj lub hwj chim ntawm txoj moo zoo cov lus qhuab qhia coj lawv lub neej txhua hnub.
Peb yuav tsum hlub tshua Vajtswv cov me nyuam thiab tso tej kev ntxub ntxaug tseg, tsis hais kev ntxub vim yog ib haiv neeg twg, yog poj niam los txiv neej, thiab peb koom lub teb chaws twg. Thov kom peb ntseeg tiag tiag hais tias cov koob hmoov ntawm Yexus Khetos txoj moo zoo yeej yog rau Vajtswv txhua tus me nyuam.
Kuv ua tim khawv tias peb yuav “taug kev mus ntxiv” thiab kuv caw nej coj raws nraim li txoj moo zoo mus tom ntej thaum nej muaj kev hlub tshua ncav tes pab tag nrho Vajtswv cov me nyuam xwv kom peb yuav koom siab ua rau peb muaj lub siab huv thiab txhais tes huv txais “ntau yam koob hmoov” uas tag nrho cov uas hlub peb Leej Txiv Saum Ntuj Ceeb Tsheej thiab Nws Leej Tub tiag tiag yuav txais, kuv txo hwj chim thov kom muaj li no los ntawm Yexus Khetos lub npe dawb ceev, amees.