Seiloak Reirei Apwalo Wihwiawihte!

Sounpar epwiki isihsek samwalahro, Brigham Young ahpw kilkilengseli nan Wahu en Salt Lake oh e ahpw koasoia, “I wasahu met!”¹E ese me ih wasahn mwo pwe Kauno me ketin kasalehiong ih.

Nan pahr 1869 Souleng tohto sang 70,000 wiahier soangen seilokaohte. Mehndahte wekpeseng en arail lokaiah kan, tiahk, wasa re kohsangie, irail ehu kipene arail kadehde Sahmo, Iehroso, oh Ngehn Sarawio, rongamwahu en Sises Krais kopwurpwurdohu, oh arail ineng en kauwada wein Saion—wasa meleilei, kaperen, oh kaselel en kaunopadahng Ketdo Keriau en Sounkomouro.

Kilel

Jane Manning James

Nan pwungen Soulengko me tepin lella nan Utah iei Jane Manning James—nein lidu kasaledeklah men, me pepdaisla nan Mwomwohdiso kopwurpwurdoh, e wia tohnpadahk mwahu men me kin sohpai idren kahpwal. Sister James wia Souleng poadidih men lao lel ah mehla nan 1908.

E ntingihdi: “I men nda met de wasaht, me ahi pwoson rongamwahu en Sises Krais, I eseh sang nan Mwomwohdiso en Sises Krais en Souleng en Imwin Rahn-akan, udahn kehlail rahnwet, soh, iet, ni mehlel, e kehlail sangehr rahn me I pepdaislao. I kin pwain ahi meiroang en eisekis ehu oh kaisihsol, kapwaiada kosoned en mahsen en erepit, mwadang en meirla oh pirida mwadang, I kin nantihong mendahte ahi luwet pwe en wia mehn karasaras ong koaros.”²

Sister James, duwehte Souleng tohto, e sohte iangete kauwada Saion ki, nta, pwudau, oh pilen mas ahpw e pil kin rapahki Sapwellimen Kauno kapai kan sang ni momourki padahk kan en rongamwahuo wen ah kak koaros en kolokol ah pwoson Sises Krais—sounkamwahuiala koaros me kin rapahki Ih ni mehlel.

Souleng en mahs oko sohte unsek , ahpw irail wiadahr poahsoan ehu me kitail kaudahr atail peneinei kan powe oh pwwihn ehu me pwoakong oh kolokol tiahk sarawih kan, me pil kileldier nan doaropwehn soai kan nan sampah pwehki atail inou ong Sises Krais oh atail koahiek kan me kitail kin sewesehki mehn mpatail oh me doh kan^.3

Presiden Eyring, I man kapatahieng ahi kaping kalahngan pwehki tohnleng seht oangohng nen kei me wie sausawas nan Texas, Mexico oh wasa teikan pwehki kumwail.

I kamehlele sang nan ahi mohngiong ma kitail sohla pahn kataman dahme irail me tiengehr mwohtail ko, me iei paionihr ko atail pahpa oh nohno en mahs oko, kitail pahn luhs sang mehkot me inenen kesempwal, I koaosaia duwen “Pwoson ni Kahk Koaros” mahs oh pil kohkolahte mwowe pwe I ese me dihen mwuhr kan udahn pahn ahniki soangen pwosonohte me irail Souleng en mahs oko ong Sises Krais oh Sapwellime rongamwahu kopwurpwurdohu.⁴

Ahi pahpa oh nohno en mahs oko iang irail paionihr ko me wawaik kurumah kau, oh dake kuruma kau, oh alu lel Utah. Irail, duwehte Sister Jane Manning James, me ahniki pwoson kehlail ni arail kahk kan koaros ansou me irail wihwia pein arail seiloak.

Neirail pwuhk kan audaudkihda koasoaiepen kahpwal akan, men mwenge, oh soumwahu oh pil kadehde en arail pwoson Koht oh kopwurpwurdohn rongamwahu en Sises Krais.

Arail kepwe me malaulau ahpw irail perepereniki kapai laud me sang riarail ohl oh lih akan me irail diarada nan Mwomwohdiso en Siss Krais. Ansou me irail kak, irail kin sewesehda kahpwal laud akan oh kapaiada me soumwahu kan sang ni papah emen emen sang ni prihsduhd en Koht.

Sister kan nan Cache Valley, Utah padahkiong souleng kan sang ni nghen en Pwihn en Sawas en Lih “en ehupene oh doadoahk pwe irail en kak sewese me anahne sawas,”⁵Ahn pahpa ah pahpao nohno, Margaret McNeil Ballard e papah ni ah sewese ah pwoud Henry, ansou me e wia bishop en Keriau en ward en Logan erein sounpar 40. Margaret me wia preseden en Pwihn en Sawas en Lih sunpar 30. E kin wahla nimwarailo me semwehmweh kan, me soumwahu, oh me sohla arail pwoud oh sohte arail nohno pahpa, oh e pil kin kalikawiada me mehla kan ki arail likou en tehnpas sarawi kan.

Mehlel e konehng oh kesempwal en tamataman poadoapoad en irail paionihr en Mormon kan me wia arail seiloak, nan dih ke19 oh kitail anahne tamataman me “seiloak reirei apwalo wiwiawihte!” ong emen emen kitail met kin kasalehda ma kitail kin “pwoson nan kahk kan koaros.”

Kilel

Toweh kan kin pokonpene nana rail mwomwodisoh kan

Me apwtehn pepdaisla kan solahr kin kohpene pwe ren rapahki wasahn kousoan nan palikapi en United States. Ahpw, irail kin uhd kohpene wasahn sarawi kan en arail wasahn kousoan wasa me tohn mwomwohdisoht kin kaudekong Samatail Nanleng ni mwaren Sises Krais. Wasahn sarawi tohtohsang 30,000, me wiawidahr nan sampah pwon, koaros kin pokonpene nan pein arail Zion. Duwehte dahme pwuhk sarawi kan kosoia, Oh met iei Zion—me mwakelekel nan mohngiongi.⁶

Ni atail kin alu nan ahl en mour, kasongsong kin kohieng kitail pwe kitail en “kilang ma kitail kak kilang oh wia soahng koaros me Kauno masanih kitail en wia”⁷

Me tohto kitail me ieiang seiloak kopwuriamwei wet en diarada—kaukaweid aramas en kaunsekala oh kalaudehla palingenitail. Ekei kitail, mwein, ieiang seiloak ehu me kalwaikitailahngehr nan pwunod, dihp, medek, oh nsensuwed.

Nan soai pwoatet, menlau idek rehmw: Iawasa ke pahn kohla ie imwilahn ahmw seiloak? Iawas lipwen nehmw kan kahkahreiukalaie? Seiloak me ke ieiang pahn kahlwaiuk ong “kapai laud” me Sounkomouro inoukidaho?⁸

Seiloak pwuralahng rehn Samatail Nanleng ih seiloak keieu kesempwal nan atail mour, oh wihwiawi rahn koaros, wihk koaros, oh pahr koaros ni atail kalkalaudehla atail pwoson Ih oh Sapwellime Iehroso, Sises Krais.

Kitail udahn pahn tehk mwahu wasa kitail kin kahkala ie. Kitail udahn pahn kilang mwahu oh idawehn kaweid en Sises ong Sapwellime tohnpadahko ni E sapeng arail peidek kan: “Ndahng kiht, iahd me soahng pwukat pahn wiawi? Oh kasalepen omwi pahn pwurehng ketdo, oh imwin sampah?

“Oh Sises ahpw sapeng oh masanih ong irail, tengetengedi pwe sohte aramas [oh I kapatahieng lih] kak pitihiukedi”⁹

Rahnwet I kapwurehieng sawas kan sang irail soun kaweid en Mwomwohdiso.

• Rieiko, kumwail kolokol padahk en Krais oh dehr lohdiong pahn irail kan me kin wekidala padahko. Rongamwahu en Sahmo oh Sapwellimehu kopwurupwurdohr sang rehn Joseph Smith, soukohp en imwin ansou.

• Kumwail dehr rong irail kan me sohte ale tiahk sarawi oh kasarawihla ong arail pwukoah kan ahpw sohte alehda kaweid en irail kan me ahniki manaman oh mweimwei en Mwomwohdiso.¹⁰

• Kaparkinkumwail pwihn en aramas akan, de aramas akan me mie pein arail pasapeng ong peidek en padahk mehlelo me irail kin ndinda rahn pwukat me wahnparon oh soukohp sohte ahniki de wehwehki.

• Dehr rong irail kan me kin idingehng kumwail en kapwurehieng irail mehkot laud. Neitail member kan keselahr mwohni laud, eri kanaieng.

Ekei wasa, neitail aramas tohto raparapahki seli mehkot me sohte katepeiong arail mour oh raparapahki songen marain rir kei me pweilaud pwe en kamwahuiraila de seweseirail.

Ire kamanamanla ehu sang Mwomwohdiso, kodahr sounpar ehu samwalahro, koasoaia: “Se koangoangoahki tohn Mwomwohdiso en dehr patehng soangen pwihn kan me kin wiahda inou—me pid kaweliali en mwohni—kamwahulahn soumwahu kopwuriamwei kan de nda me mie ah manaman en kamwahuiala soumwahu ni ah sohte ah manaman en prihsduhd.”¹¹

Pwuken kaweid en Mwomwohdiso kaweidkin kitail me: “Towehkan sohte pahn doadoahngki soangen wini de soahng kan me kin doadoahk ong paliwar me pahn mie peidekpe. Sounkaweid en amwail wasah kan pahn sewesehki towehkan me ahniki soumwahu en paliwar en kin kohla tuhong irail toahkte kan me mie neirail laisin nan wehi kan de wasa me re wie doadoahkie.”¹²

Rieiko kumwail anahne marainiki oh periki pwe ekei kemwekid kan kakete mwomwen mwahu ahpw e pahn kawehla laud palinghen oh paliwar.

Ong kadaudokatail kan me wia pionihr, uhtor wia mehkot kesempwal rehrail, ahpw ehu penehn arail wasahn kousoano pil kesempwal. Irail kin doadoahk pene oh sewese mehteikan en kak powehdi kahpwal en paliwar oh pali ngehn. Ong ohl akan, mie pwihn en prihsduhd, oh lih akan Pwihn en Sawas en Lih me kin pwukoahkin irail. Soangen mwekid pwukat sohte wekila nan rahn pwukat.

Pwihn en Sawas en Lih oh pwihn en prihsduhd me kin kaunopada dahme pahn sewese pali ngehn oh palinwar en tohn mwomwohdiso.

Weweidki rongamwahuo sang ni amwail pahn ahniki “pwoson ni kahk koaros” eri kumwail pahn kak pitila oh pwurala oh uh mwohn sihlangin Sahm Nanleng oh Sapwellime Iehros Sises Krais. Kauno iei atail Sounkomour limpoak. Ih me wia Soundoar en sampah. Kitail udahn pahn wauneki Mwahre sarawi oh sohte kamwamwahli ni soangen ahl sohte lipilipil, ansou koaros nantiong kapwaiada Sapwellime kosoned akan. Ma kitail pahn wia met, E pahn kapai kitailda oh kahlwaikitail pwurala rehn Sahm Nanleng.

I luke kumwail koaros me rongorongie ih kasamwoh oh wauneki koaros me wihwia pein arail seiloak rahnwet, sohte lipilipil iawasa re mihmi ie nan arail seloak.

Menlau tamataman me sohte kapai aramas kak ehukipene me mwahu sang padahk en Kopwurpwurdohu, me ansou kumwail alehda oh momourki, inou en peren soutuk oh meleilei—iei mour soutuk. Kitail doadoahngki atail kehlail oh kehl, oh kadehde en kak sewese neitail misneri kan en diarada, padahk, oh pepdaisiala Sapwellimen Koht serih kan pwe irail en kak ahniki manaman en rongamwahuo en kak kaweid arail mour.

Kitail anahne apwalih Sapwellimen Koht serih kan mwahu oh kihsang soahng suwed kan me iangahki, uhpene nan pwungen aramas, kawehla kosoned en mwakelekel, oh uhpenehn wehi kan. En sansal me kitail uhdahn kamehlele me kapaikan en rongamwahu kapwurpwurdohu en Sises Krais langehng seri en Koht koruhsien.

I kadehde me “seiloak wet nanantihlahte mwowe,” oh I lukei kumwail en weweidki rongamwahuo ni amwail nantihla mwowe oh sewesehda Sapwellimen Koht serihkan ni limpoak oh kadek pwe kitail en kak ehupene wiahda atail mohngiong kan en mwakelekel oh pehtail kan en kak mwakelekel en alehda kapai kesempwal me kaunopdahngehr koaros me poakohng Samatail Nanleng oh Sapwellime Ieroso, me I ni karakarahk kapakapki ni mwahr sarawi en Sises Krais, amen.