Na Dina ni Veika Kecega

Eda lako mai ena bogi nikua ena vakanuinui kei na vakabauta ni da na biubiu ena veivakaukauwataki kei na veivakalougatataki ni Yalo Tabu o koya ka vakatavulica na dina.¹ E baleta na noda vakasaqara yadudua na dina o koya au gadreva meu vosa kina.

Ena noqu a se cauravou kina, e levu na noqu taro me baleta na Lotu. E so na noqu taro e vakaidina. E so tale e sega ka rokataka na nodra vakatitiqa na tani.

Au dau veitalanoataka vakawasoma kei tinaqu na noqu taro. Au kila ni rawa ni siqema o koya ni levu na noqu taro e vakaidina ka lako mai yaloqu. Au nanuma ni a sega so ni taleitaka o koya na vei taro ka sega so ni vakaidina ka vakatubu veileti. Ia, e sega vakadua ni vakuwai au ena noqu vakatataro. E dau vakarogoca o koya ka tovolea me sauma. Ni vakila o koya ni sa sauma kece na ka e rawa ni kaya ia ka’u se lomatarotaro tikoga, sa qai dau tukuna mai vakaoqo: “Tevita, oqori edua na taro vinaka. Ena nomu vakaqara ka vakawilika ka masulaka na kena isau, vakacava mo cakava na veika o kila ni dodonu ka kakua ni cakava na veika o kila ni sega ni dodonu?” Oqo e qai yaco me iwalewale ni noqu vakasaqara na dina. Ena vuli, masumasu, kei na talairawarawa ki na ivakaro, au kunea ni ra tu na isau ni noqu taro bibi kece. Au kunea talega ni gadrevi na vakabauta vagumatua, yalovosota, kei na vakatakila me baleta eso na taro.²

O tinaqu ea biuta vei au na itavi ni vakatoroicaketaki ni vakabauta kei na vakasaqarai ni sau ni taro. E kila o koya ni isau ni taro bibi kece ena lako mai ena noqu vakasaqara na dina ena kena sala sa virikotora na Tamada Vakalomalagi. E kila o koya ni’u gadreva me’u kunea na dina. E kila o koya ni’u gadreva me’u dina ena noqu taro ka yalorawarawa me’u cakacakataka na veika au sa kila rawa tu ni dina. E kila o koya ni’u gadreva me’u vulica ka masulaka ka taracake vakalevu na yalovosota ena noqu vakasaqara na isau ni taro mai vua na Turaga. Na yalorawarawa ki na yalovosota esa tiki ni noda vakasaqara na dina ka tiki ni iwalewale ni nona vakatakila na dina na Turaga.³

Ni oti edua na gauna, au sa qai mai kila ni o tinaqu ea vakatavulica tiko vei au na nona iwalewale ni vakasaqara na dina na Tamada Vakalomalagi. Sa tubu na vakabauta, sa tekivu lako mai na isau ni taro, ka’u ciqoma sara na kaci ni kaulotu.

Ea yaco edua na gauna enai tekivu ni noqu kaulotu, ena noqu kilai yaloqu mai ni dodonu me’u kila se dina na Lotu ka parofita ni Kalou o Josefa Simici. Au a vakila na ka ea tukuna vakamatata o Peresitedi Monson ena koniferedi raraba ga se qai oti: “Kevaka e sega ni dua na nomu ivakadinadina tudei ni veika oqo, cakava na veika e ganita mo rawata kina e dua. E yaga sara vei iko me tiko na nomu ivakadinadina ena veigauna dredre oqo, baleta na nodra ivakadinadina na so tale ena tauri iko ga vakalekaleka.”⁴ Au a kila na ka e ganita. E yaga me’u wilika na iVola i Momani ena yalo vakaidina, ena lomaqu taucoko, ka taroga vua na Kalou kevaka e dina.

Rogoca na nona yalayala uasivi na Tamada Vakalomalagi mai vua na parofita o Moronai: “Ia ni dou sa ciqoma na veika oqo, au gadreva me’u vakamasuti kemudou, mo dou kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko koya ena kaukauwa ni Yalo Tabu ni sa dina.”⁵

Me rawa ni’u rawata na veika e tiko ena iVola i Momani, e yaga me’u wilika. Au tekivu ena itekitekivu ni ivola ka wiliwili ena veisiga. Eso era rawata sara vakatotolo na ivakadinadina. Vei ira tale eso, ena taura e levu na gauna kei na levu na masu ka rawa ni okati kina na kena wiliki vakavica na ivola. Ea gadrevi me’u wilika taucoko na ivola ni bera ni’u rawata na ivakadinadina yalataki. Ia, na Kalou ea vakatakila na kena dina vei au ena kaukauwa ni Yalo Tabu.

Ena noqu ivolatukutuku ni kaulotu, au vakamacalataka na noqu reki ena noqu kila na dina vakatalega kina na noqu yalataka ena lomaqu taucoko me’u na cakacakataka na dina au sa rawata. Au a vola: “Au sa yalataka vei Tamaqu mai Lomalagi kei au ni’u na vakayacora na noqu vinaka taucoko, ka solia kina e 100 na pasede ena vo ni noqu bula, na veika ga e vinakati vei au, au na cakava, ia ena gauna oqo e se vo na noqu kaulotu ka’u na vakacavara vakavinaka sara, edua ka’u na sega ni yalocataka, ka sega ni baleti au, e baleta na Turaga. Au lomana na Turaga, ka’u taleitaka na cakacaka, ka’u sa masulaka ga me kakua ni laivi au na veika au vakila oqori.

Au sa qai mai kila ni veivakani tudei kei na tomani ni sasaga ni veivutuni kei na talairawarawa ki na ivakaro ena gadrevi me kakua kina ni lako laivi na veika e vakilai oqori. O Peresitedi Monson e kaya, “A ivakadinadina e gadrevi me maroroi vinaka ka vakabulabulataki ena talairawarawa vagumatua ki na ivakaro ni Kalou kei na masumasu e veisiga kei na vulici ni ivolanikalou.”⁶

Ena veiyabaki sa oti, au vakatarogi ira na daukaulotu kei ira na itabagone ena veiyasai vuravura se ra tekivuna vakacava na nodra sasaga yadudua me ra vakasaqara na dina ka rawata na ivakadinadina. E levu ga era sauma ni nodra sasaga me ra rawata na nodra ivakadinadina yadudua e tekivu ena nodra lewa vakataki ira me ra wilika na iVola i Momani mai na kena itekitekivu ka taroga vua na Kalou kevaka e dina. Ena nodra cakava oqori, era digitaka me ra “cakacakataka” ka sega ni “cakacakataki”⁷ mai na nodra vakatitiqa na tani.

Me kilai na dina, e gadrevi meda bulataka na kosipeli⁸ ka “vakatovotovotaka”⁹ ena vosa.Eda sa vakasalataki meda kakua ni vorata na Yalo ni Turaga.¹⁰ Na veivutuni, ni sala vata kei na inaki dei ni muria na ivakaro, esa tiki bibi ni noda vakasaqara yadudua na dina.¹¹ E dina, ena gadrevi beka meda “solia tani kece” na noda ivalavala ca me rawa ni da kila na dina.¹²

Eda sa vakaroti meda “segata na kila ka, io ena vuli kei na vakabauta” ka meda “vakasaqara … ena ivola sa uasivi sara na vosa ni yalomatua.”¹³ Ena noda vakasaqara na dina meda raica vakadodonu “na ivola uasivi” kei na ivurevure uasivi.Ka maliwai ira na kena e uasivi duadua oya na ivolanikalou kei na nodra vosa na parofita bula.

O Peresitedi Monson e sa kerei keda yadua meda “cakava [na veika] e ganita” meda rawata ka maroroya na ivakadinadina kaukauwa.¹⁴ Na cava e gadrevi me vakatitobutaki se vaqaqacotaki na nomu ivakadinadina? E noda itavi yadua me da vakayacora na veika e ganita me rawati ka maroroi kina na ivakadinadina kaukauwa.

Na maroroi ena yalovosota ni noda veiyalayalati ni da “cakava [na veika] e ganita” meda taura na isau mai vua na Turaga e sa tiki ni nona iwalewale ni vulici ni dina na Kalou. Vakabibi ena gauna ni dredre, ena vinakati meda “soli [keda] ena yalomarau kei na yalovosota ki na nona inaki na Turaga.”¹⁵ Na yalovosota ena maroroi ni noda veiyalayalati e vakatubura na noda yalomalua, vakatitobutaka na noda gagadre meda kila na dina, ka vakadonuya na Yalo Tabu me “tuberi [keda] ena sala ni yalomatua [me da] kalougata kina, sautu,ka maroroi vinaka tu.”¹⁶

Na watiqu, o Meri, kei au keirau lomana vakalevu edua na yalewa ka sa yavalati vakalevu na nona bula me baleta eso na veitiki ni vakavuvuli ni Lotu. E lomana o koya na kosipeli, e lomana o koya na Lotu ia e se tikoga na nona lomatarotaro. Esa vauci oti o koya ena valetabu, cakacaka vagumatua ena Lotu, dauvakayacora na nona ilesilesi, ka tina ka radinivale taleitaki. Ena veiyabaki, e dau saga o koya me cakava na veika e kila ni dodonu ka levea na veika e kila o koya ni sega ni dodonu. E dau maroroya na nona veiyalayalati ka tomana tikoga na nona vakasaqaqara. Ena so na gauna edau vakavinavinaka o koya ni rawa ni tatakube ena nodra vakabauta na so tale.

Ena dua gauna lekaleka sa oti ea kerea na nona bisopi me raici koya vata kei na watina. E a kerei rau me rau ciqoma edua na ilesilesi ena valetabu me rau veisosomitaki baleti ira era gadreva na cakacaka vakalotu ni valetabu. Na veikacivi oqo ea vakurabuitaki rau, ia erau a ciqoma ka tekivu sara nodrau veiqaravi ena vale ni Turaga. Na luvedrau tagane itabagone esa qai vakadikeva oti ga na nodratou ivola ni kawa ka kunea edua na yaca ni lewe ni matavuvale ka se bera ni vakacavari na cakacaka vakalotu ni valetabu me baleti koya. Ea qai yaco na gauna erau a qarava na veisosomitaki ka vakayacora na cakacaka vakalotu ni valetabu me baleti koya kei na nona matavuvale. Ni rau tekiduru ena itutu ni vakamau ka qaravi na cakacaka vakalotu ni veivauci, na marama taleitaki ka dauyalovosota oqo ka a sa vakasaqaqara vakabalavu sara ea qai vakila vakataki koya na veiyavalati vakayalo ka mai kila kina o koya ni dina na valetabu kei na veicakacaka vakalotu kece e qaravi e loma.Ea qiri vei tinana okoya ka talanoataka vua na veika ea vakila ka tukuna ni dina ga e se tiko eso na nona lomatarotaro, e kila okoya ni dina na valetabu kei na kena veicakacaka vakalotu, ka dina na Lotu. Ea tagi o tinana ena vakavinavinaka vua na Tamada Vakalomalagi dauloloma ka dauyalovosota kei na luvena yalewa ka tomana tiko na nona vakasaqaqara ena yalovosota.

Na maroroi ni veiyalayalati ena yalovosota e kauta mai na veivakalougatataki mai lomalagi kina noda bula.¹⁷

Au sa kunea na veivakacegui levu ena nona yalayala na Turaga ni “ena kaukauwa ni Yalo Tabu dou na kila kina na dina ni veika kecega.”¹⁸ Ena noda lecaika, eda rawa ni kila na dina. Eda sa kila ni dina na iVola i Momani! Sa vakaidina, e vakatavulica ena yakavi oqo o Peresitedi Russell M. Nelson, e rawa ni da “vakila mai na ‘loma’ ni utoqu [raica na Alama 13:27], ni Vola i Momani e sega ni vakatauvatani rawa ni vosa ni Kalou.” Sa rawa talega “me da vakila vakatitobu sara me da kakua ni via bula ena dua madaga na siga ni sega.”¹⁹

Eda rawa ni kila ni iVola i Momani e dina; ni Kalou e Tamada, ka lomani keda; ka Luvena, o Jisu Karisito, e noda iVakabula ka Dauveivueti. Eda rawa ni kila ni noda lewena na Nona Lotu e ka me vakamareqeti kei na noda vakayagataka na sakaramede ena veimacawa ena taqomaki keda kei na noda matavuvale. Eda rawa ni kila ni veimatavuvale e rawa dina ni ra bula vata ka tawamudu ena vuku ni cakacaka vakalotu ni valetabu.Eda rawa ni kila ni Veisorovaki i Jisu Karisito kei na veivakalougatataki ni veivutuni kei na veivosoti e dina. Eda rawa ni kila ni noda parofita lomani, Thomas S. Monson, e nona parofita na Turaga ka o rau na nona daunivakasala kei ira na lewe ni Kuoramu ni LeTinikarua era sa apositolo, parofita, daurairai, ka daunivakatakila.

Na veika kecega oqo au kila ni dina kau sa vakadinadinataka ena yaca i Jisu Karisito, emeni.